Skip to content

Al lo sa dezyenm lalis

Al lo konteni

Temwen Zeova

Kreol Seselwa

Rwayonm Bondye pe dirize!

 SAPIT 2

Sa Rwayonm i vin an egzistans dan lesyel

Sa Rwayonm i vin an egzistans dan lesyel

PWEN ENPORTAN SA SAPIT

Lafason ki Bondye ti prepar son pep pour sa Rwayonm

1, 2. Ki sa levennman pli enportan ki’n arive dan listwar lemonn e akoz i pa drol ki sa pa ti ariv kot tou dimoun i trouve?

ESKI ou’n deza mazinen ki mannyer i pou ete pour viv dan en lepok kot en levennman enportan dan listwar i arive? Pour bokou i leka. Me, zis mazinen: Si ou ti vreman viv pandan enn sa bann lepok, eski personnelman ou ti pou neseserman vwar sa bann levennman enportan ki ti pou lakoz sa bann sanzman? Petet non. Anfet, bokou levennman ki aprezan dan bann liv listwar e ki ti anmenn en lafen avek bann vye gouvernman pa ti souvan deroul an piblik. Bokou sa bann levennman enportan i ariv dan bann pale rwayal, dan bann miting enportan oubyen lofis gouvernman e pourtan zot afekte plizyer milyon dimoun.

2 Me, ki nou pou dir lo sa levennman pli enportan ki’n arive dan listwar lemonn? Sa levennman in annan en lefe lo lavi plizyer milyon dimoun. Pourtan, bann imen pa ti pe vwar sa ki ti pe pase avek zot de lizye. Byensir, nou pe refer avek ler Rwayonm Bondye in vin an egzistans. Sa Rwayonm ki ti’n ganny promet i sa gouvernman dan lesyel kot Kris i dirize e ki byento pou met en lafen avek sa move lemonn an antye. (Lir Danyel 2:34, 35, 44, 45.) Vi ki bann imen pa ti vwar sa levennman enportan, eski nou devret mazinen ki Zeova ti pe kasyet nou sa ki ti pe pase? Ouswa, eski i ti’n prepar son pep fidel depi avan pour sa levennman? Annou vwar.

“Mon mesaze . . . pou prepar en semen devan mwan”

3-5. (a) Lekel sa “mesaze lalyans” ki ganny mansyonnen dan Malaki 3:1? (b) Ki ti pou arive avan ki “mesaze lalyans” ti pou vin kot tanp Bondye?

3 Depi byen lontan, Zeova ti’n plàn pour prepar son pep pour sa moman ler Rwayonm Bondye, dirize par Kris, ti pou vin an egzistans. Par egzanp, get sa profesi dan Malaki 3:1: “La, mon pe anvoy mon mesaze e i pou prepar en semen devan mwan. En sel kou, sa vre Senyer, ki zot pe rode, pou vin kot son tanp e sa mesaze lalyans, ki zot pran plezir ladan, pou vini.”

4 Dan lakonplisman modern sa profesi, kan ki Zeova, “sa vre Senyer,” ti vin enspekte sa bann ki pe servi dan lakour  tanp spirityel lo later? Sa profesi i eksplike ki Zeova ti pou vini avek “mesaze lalyans.” Lekel li? I pa lot ki Mesi sa Lerwa, setadir Zezi Kri! (Lik 1:68-73) Konman sa Lerwa ki ti’n fek ganny apwente, Zezi ti pou fer en lenspeksyon e rafin pep Bondye lo later.​—1 Pyer 4:17.

5 Me, lekel ki ti pou sa lot “mesaze” ki ganny mansyonnen dan Malaki 3:1? Sa mesaze profetik ti pou bezwen la avan ki Mesi ti vin Lerwa. Dan bann lannen avan 1914, lekel ki ti “prepar en semen” pour Lerwa Zezi?

6. Lekel ki ti zwe rol sa “mesaze” ki ti vini avan pour prepar pep Bondye pour bann levennman enportan ki ti pou arive?

6 Dan sa liv, nou pou etidye larepons sa bann kestyon atraver listwar ekstraordiner pep Zeova dan nou lepok. Sa listwar i montre ki ver lafen diznevyenm syek, en pti group dimoun fidel ti rasanble ansanm pour vin sa sel group vre Kretyen parmi sa kantite swadizan Kretyen. Pli tar, sa group ti ganny apele Etidyan Labib. Sirman, Charles Russell ek son bann asosye pli pros ki ti diriz sa group ti sa “mesaze” ki ti’n ganny predir konmkwa zot ti pou donn sa gidans spirityel pep Bondye e prepar zot pour bann levennman ki ti pou al arive. Annou egzamin kat fason ki sa “mesaze” ti fer sa.

Ador Bondye an verite

7, 8. (a) Pandan bann lannen 1800, lekel ki ti ansennyen ki sa krwayans ki nanm i imortel i fo? (b) Ki lezot krwayans Charles Russell ek son bann asosye ti montre i fo?

7 Sa bann Etidyan Labib ti priye e etidye, zot ti tonm dakor lo bann vre lansennyman, zot ti met tousala ansanm e pibliy sa bann krwayans ki ti vre e kler. Pour plizyer syek, bann larelizyon swadizan Kretyen ti dan fernwanr spirityel e bokou zot lansennyman ti sorti dan bann krwayans payen. En legzanp tipik se sa krwayans ki nanm i imortel. Me, dan bann lannen 1800, detrwa Etidyan Labib senser ti analiz sa lansennyman o profon e dekouver ki Parol Bondye pa ansenny sa. Henry Grew, George Stetson ek George Storrs ti ekri e koz avek lardyes dan zot bann diskour pour denons sa fo lansennyman sorti kot Dyab. * Sa ki zot ti fer ti annan en gran lefe lo Charles Russell ek son bann asosye pli pros.

8 Sa pti group Etidyan Labib ti konpran osi ki lezot krwayans ki relye avek sa krwayans ki nanm i imortel ti konfizan e fo. En legzanp se sa lansennyman ki tou bon dimoun i al dan lesyel oubyen ki Bondye i tourmant nanm bann move dimoun pour touzour dan lanfer dife. Avek lardyes, Charles Russell ek son bann asosye pli pros ti denons sa bann mansonz dan plizyer lartik, liv, papye oubyen trak ek bann sermon ki ti ganny pibliye dan bann zournal.

9. Ki mannyer Zion’s Watch Tower ti montre ki krwayans dan Trinite i fo?

9 Lo menm laliny, bann Etidyan Labib ti klerman montre ki sa krwayans byen popiler lo Trinite osi ti fo. An 1887, Zion’s Watch Tower ti dir: “Lekritir i montre klerman ki Zeova ek nou Senyer Zezi i de personnaz vreman diferan e i osi koz lo  kalite relasyon ki zot annan avek kanmarad.” Sa lartik ti menm montre ki i ti vreman enkrwayab ki krwayans dan “en Bondye Trinite, setadir trwa Bondye dan en sel Bondye e an menm tan en sel Bondye an trwa personn, ti’n kapab vin sitan popiler e ganny aksepte par bokou dimoun. Toudmenm, sa i montre ankor pli klerman ki kalite sonmey legliz ti’n tonm ladan pandan ki son lennmi ti anmar li dan fernwanr spirityel.”

10. Ki mannyer Watch Tower ti montre ki 1914 ti en dat enportan?

10 Parey son tit antye ti montre, sa zournal Zion’s Watch Tower and Herald of Christ’s Presence ti vreman met lanfaz lo bann profesi ki annan pour fer avek prezans Kris konman Lerwa. Bann Kretyen swazir fidel ki ti ekri bann lartik dan sa zournal ti konpran ki profesi Danyel konsernan sa “set letan” ti relye avek realizasyon plan Bondye ek son Rwayonm dirize par Kris. Menm depi bann lannen 1870, zot ti’n fini kalkile ki 1914 ti pou sa lannen ki sa set letan ti pou terminen. (Dan. 4:25; Lik 21:24) Menm si nou bann frer dan sa letan pa ti ankor konpran antyerman sinifikasyon sa lannen  enportan, zot ti anons sa ki zot ti konnen partou kote e sa ti annan en gran lefe.

11, 12. (a) Lekel ki Frer Russell ti remersye pour sa ki i ti ansennyen? (b) Ki lenportans sa travay ki Frer Russell ek son bann asosye ti fer pandan bann deseni avan 1914?

11 Ni Charles Russell, ni son bann asosye fidel pa ti pretann ki se zot ki ti’n dekouver oubyen konpran sa bann laverite spirityel enportan. Frer Russell ti rekonnet travay ki lezot avan li ti’n fer. Me, pli enportan ankor, i ti rekonnet ki se Zeova ki ti responsab pour ansenny Son pep sa ki zot ti bezwen konnen dan sa moman apropriye. Vreman, Zeova ti beni zefor Frer Russell ek son bann asosye pour separ laverite avek mansonz. Anmezir letan ti pase, zot ti deplizanpli separe avek bann fo larelizyon Kretyen e zot ti konpletman diferan.

Frer Russell ek son bann asosye ti defann laverite ki dan Labib

12 I vreman enkrwayab ler nou realiz sa kantite travay ki sa bann zonm fidel ti fer dan bann lannen avan 1914. Avek sa antet, The Watch Tower and Herald of Christ’s Presence le 1 Novanm 1917 ti dir: “Plizyer milyon dimoun ozordi i lib e nepli per akoz sa bann krwayans ki’n ganny enpoze lo zot atraver bann lansennyman parey lanfer dife ek lezot fo krwayans . . . Parey en gro laroul, laverite ki ti konmans karant an pase, i kontinyen ogmante ziska ki i pou ranpli later antye e son bann lennmi pa pou kapab anpes laverite fannen lo later antye zis parey en dimoun pa ti pou zanmen kapab anpes bann gro laroul kraz lo lans avek en senp balye.”

13, 14. (a) Ki mannyer sa “mesaze” ti ede prepar semen pour Mesi sa Lerwa? (b) Ki nou aprann avek nou bann frer dan lepase?

13 Mazin sa: Eski dimoun ti pou’n ganny prepare pour konmansman prezans Kris si zot pa ti’n kapab fer diferans ant Zezi ek son Papa, Zeova? Pa ditou. Zot pa ti pou’n ni menm prepare si zot ti krwar ki tou dimoun i imortel olye konnen ki zis en pti group parmi bann disip Zezi ki ti pou resevwar sa kado presye, pa i vre? Sa ti pou’n osi leka si zot ti krwar ki Bondye i tourmant dimoun dan lanfer san okenn lespwar pour sorti dan sa kondisyon. Alor, vreman, sa “mesaze” ti prepar en semen pour sa Lerwa dan Rwayonm Bondye!

14 Me ki nou pou dir lo nou la konmela? Ki nou kapab aprann avek nou bann frer ki ti viv plis ki 100 an pase? Parey zot, nou bezwen lir e etidye Labib o profon e avek devouman. (Zan 17:2, 3) Menm si sa lemonn pe vin deplizanpli meg lo plan spirityel, annou fer sir ki nou lapeti pour nouritir spirityel i vin touzour pli gran!​—Lir 1 Timote 4:15NW.

‘Sorti dan Gran Babilonn, mon pep’

15. Ki bann Etidyan Labib ti ptitapti konpran? (Vwar osi not.)

15 Bann Etidyan Labib ti ansennyen ki i ti neseser pour separ zot konpletman avek bann legliz. An 1879, Watch Tower ti servi sa lekspresyon “legliz Babilonn.” Eski i ti pe koz lo bann lepap? Oubyen eski i ti pe koz lo Legliz Katolik  Romen? Pour plizyer syek, sanmenm ki bann larelizyon Protestan ti’n dir konsernan Babilonn. Me, avek letan, bann Etidyan Labib ti ptitapti konmans konpran ki tou bann larelizyon Kretyen ti form par sa “Babilonn” modern. Akoz? Parski zot tou zot ti ansenny bann mansonz parey sa bann ki nou’n vwar pli boner. * Pli tar, nou bann piblikasyon ti osi montre ankor pli klerman sa ki bann dimoun senser ki ti form parti Babilonn ti devret fer.

16, 17. (a) Ki mannyer Volim 3 Millennial Dawn ek Watch Tower ti ankouraz bann dimoun pour sorti dan fo larelizyon? (b) Kwa ki ti fer sa bann lavertisman pa paret sitan enportan? (Vwar osi not.)

16 Par egzanp, an 1891, Volim 3 Millennial Dawn ti dir ki Bondye ti’n rezet tou sa bann lorganizasyon relizye an dizan: “Sa sistenm antye, setadir, en sistenm ki anglob tou bann legliz swadizan Kretyen in ganny rezete.” I ti osi dir ki tou bann ki “pa dakor avek son bann fo krwayans ek pratik i ganny ankouraze pour separ zot avek li.”

17 An Zanvye 1900, Watch Tower ti konsey bann ki ti ankor annan zot non lo lalis bann legliz Kretyen e ki ti panse dan zot menm, “Mwan, mon kontan laverite e byen rar mon asiste lezot servis relizye.” Sa lartik ti demande: “Eski i byen pour annan en lipye anndan e en lipye an deor Babilonn? Eski sanmenm sa lobeisans ki nou merit annan . . . ki Bondye i aksepte e ki fer li plezir? Pa ditou. I [manm sa legliz] ti fer en lalyans an piblik avek sa larelizyon ler i ti konmans asosye avek li e i devret fidelman swiv bann prensip sa lalyans ziska ki i . . . renons oubyen sorti ofisyelman e piblikman dan sa larelizyon.” Avek letan, sa mesaz ti vin deplizanpli kler. * Bann serviter Zeova i devret konpletman separ zot avek fo larelizyon.

18. Akoz i ti neseser pour bann dimoun sorti dan Gran Babilonn?

18 Fer konmsi personn pa ti’n koz lo lenportans pour sorti dan Gran Babilonn regilyerman, eski Kris, sa nouvo Lerwa, ti pou’n kapab trouv en group Kretyen swazir ki ti’n prepare lo later? Pa ditou, parski zis bann Kretyen ki nepli anba lenfliyans Babilonn ki kapab ador Zeova ‘an espri e an verite.’ (Zan 4:24) Eski nou osi ozordi nou determinen pour reste separe avek fo larelizyon? Annou kontinyen obei sa lord: “Sorti dan [Gran Babilonn], mon pep”!​—Lir Revelasyon 18:4.

Nou zwenn ansanm pour ador Bondye

19, 20. Ki mannyer Watch Tower ti ankouraz pep Bondye pour rasanble pour ador li?

19 Bann Etidyan Labib ti ansennyen ki i ti neseser pour zot zwenn ansanm pour ador Bondye kan i ti posib. Pour bann vre Kretyen, i pa sifi zis pour sorti dan fo larelizyon. I osi neseser pour zot partisip dan vre ladorasyon. Menm depi son bann premye nimero, Watch Tower ti ankouraz son bann lekter pour zwenn ansanm pour ladorasyon. Par egzanp, an Zilyet 1880, Frer Russell ti fer en rapor lo bann vizit ki i ti’n  fer dan diferan landrwa pour fer bann diskour e i ti dir ki sa bann diferan renyon ti vreman ankourazan. Alor, apre sa, i ti ankouraz bann lekter pour ekri lo bann progre ki i ti annan dan bann renyon e serten sa bann rapor ti pou ganny pibliye dan Watch Tower. Akoz? I ti dir: “Annou fer tou dimoun konnen . . . ki mannyer Senyer i fer zot prospere, anmezir ki zot fidel dan bann renyon avek bann ki annan menm lafwa presye ki zot.”

Charles Russell avek en group Etidyan Labib Copenhagen, Dennmark, an 1909

20 An 1882, lartik “Assembling Together” (Zwenn ansanm) dan Watch Tower ti ankouraz bann Kretyen pour organiz bann renyon ki ti pou “batir, ankouraz e fortifye kanmarad.” Sa lartik ti osi dir: “I pa enportan si i annan parmi zot ki byen edike oubyen talante. Zot tou, vin avek zot Labib, papye ek kreyon e okenn lezot piblikasyon parey Konkordans, . . . si i posib. Swazir en topik, demann led Lespri sen pour konpran. Apre lir, reflesir e konpar bann verse avek kanmarad e zot kapab asire ki zot pou ganny gide ver laverite.”

21. Ki legzanp kongregasyon Allegheny, Pennsylvania ti kite an rapor avek renyon ek vizit bann frer ek ser?

 21 Bann Etidyan Labib ti annan zot biro prensipal dan lavil Allegheny, Pennsylvania, Leta-z-ini. Laba, zot ti obei sa konsey dan Ebre 10:24, 25 (lir) e donn en bon legzanp par zwenn ansanm. Bokou lannen pli tar, Charles Capen, en frer aze ti rakonte ki i ti asiste sa bann renyon ler i ti ankor en pti garson. I ti ekrir: “Mon ankor rapel enn bann verse Labib ki ti ganny penn lo miray lasal lasanble Lasosyete. ‘Zot tou zot frer e zot annan zis en sel Met, Kris.’ Sa parol in toultan reste dan mon lespri konmkwa napa en diferans ant bann responsab ek lezot dan pep Zeova.” (Mat. 23:8) Frer Capen ti osi mansyonnen ki bann renyon ti vreman ankourazan e fortifyan e osi ki Frer Russell ti fer bokou zefor pour ankouraz sak manm kongregasyon personnelman.

22. Ki mannyer bann dimoun fidel ti reakte anver sa lankourazman pour asiste renyon Kretyen e ki leson nou aprann avek zot?

22 Bann dimoun senser ti swiv byen sa legzanp ek sa bann lenstriksyon. Bann kongregasyon ti ganny formen dan diferan leta, Leta-z-ini, parey dan Ohio ek Michigan, e pli tar partou dan Nor Lanmerik e dan lezot pei. Zis mazinen: Eski bann Kretyen fidel ti pou’n ganny prepare pour prezans Kris si zot pa ti’n ganny formen pour zot rasanble ansanm pour ador Bondye? Be ditou! Me, ki nou pou dir ozordi? Zis parey sa bann Kretyen, nou osi nou bezwen determinen pour asiste bann renyon Kretyen regilyerman e rod tou loportinite pour rasanble ansanm pour ladorasyon e pour batir kanmarad spirityelman.

 Zot ti pres avek devouman

23. Ki mannyer Watch Tower ti fer kler ki tou bann Kretyen swazir i devret pres laverite?

23 Bann Etidyan Labib ti ansennyen ki i ti neseser pour tou Kretyen swazir al pres laverite. An 1885, Watch Tower ti dir: “Nou pa devret oubliye ki sak manm Kretyen swazir i ganny swazir pour li prese (Iza. 61:1) e i’n ganny anvoye pour akonpli en minister.” An 1888, en nimero sa menm magazin ti dir: “Nou misyon i kler . . . Si nou inyor li oubyen rod leskiz, nou vreman bann serviter pares ki pa diny pour resevwar sa pozisyon enportan ki nou’n ganny promet.”

24, 25. (a) Ki mannyer Frer Russell ek son bann asosye ti fer plis ki zis ankouraz bann dimoun pour prese? (b) Ki mannyer en colporteur ti dekrir son travay dan bann letan kot i ti napa loto?

24 Frer Russell ek son bann asosye pa ti zis ankouraz lezot pour prese. Zot ti pibliy Bible Students’ Tracts ki pli tar ti ganny apele Old Theology Quarterly. Bann ki ti lir Watch Tower ti ganny sa bann trak pour distribye avek piblik san fer peye.

I byen demann nou lekor, ‘Eski predikasyon i sa keksoz pli enportan dan mon lavi?’

25 Bann ki ti devoue pour pres a plen tan ti ganny apele bann colporteurs. Charles Capen ki’n ganny mansyonnen pli boner ti enn parmi. Pli tar, i ti rakonte: “Mon ti servi bann map ki United States Government Geological Survey ti fer pour ed mwan kouver bann teritwar dan leta Pennsylvania. Lo sa bann map, i ti annan tou bann semen e sa ti fer li fasil pour al dan tou pti kwen sak provens apye. Par ler, apre ki mon ti’n fer en tournen trwa zour dan sa leta e pran komann pour bann liv dan sa seri Studies in the Scriptures, mon ti lwe en seval ek en saret pour delivre tou sa bann piblikasyon ki ti’n ganny rekomande. Souvandfwa, mon ti reste e pas lannwit kot bann fermye. I ti napa loto sa letan.”

En colporteur. Get “Chart of the Ages” dan kote lo sa saret

26. (a) Akoz pep Bondye ti bezwen partisip dan predikasyon pour ki zot prepar zot pour renny Kris? (b) Ki kestyon i byen nou demann nou lekor?

26 I ti demann kouraz ek devouman pour prese dan sa bann lepok. Eski bann vre Kretyen ti pou’n prepare pour Rwayonm Kris si zot pa ti’n ganny ansennyen lenportans predikasyon? Ditou! Anfet, predikasyon ti pou vin en laspe remarkab prezans Kris. (Mat. 24:14) Pep Bondye ti bezwen ganny prepare pour ki predikasyon ki sov lavi ti pou vin sa keksoz pli enportan dan zot lavi. Ozordi, i pou byen si nou demann nou lekor: ‘Eski predikasyon i sa keksoz pli enportan dan mon lavi? Eski mon pe fer bann sakrifis pour mwan partisip plennman dan predikasyon?’

Rwayonm Bondye i vin an egzistans!

27, 28. Ki zapot Zan ti vwar dan en vizyon e ki mannyer Satan ek son bann demon ti reazir ler Rwayonm Bondye ti vin an egzistans?

27 Alafendefen, sa lannen vreman enportan, 1914, ti arive. Parey nou ti mansyonnen o konmansman sa sapit, i ti napa personn lo later ki ti kapab vwar sa ki ti pe arive dan lesyel. Par kont, zapot Zan ti vwar en vizyon ki ti dekrir sa ki ti pe arive dan en fason senbolik. Zis esey mazin sa: Zan i vwar “en gran siny” dan lesyel. ‘Madanm’ Bondye, setadir bann lanz dan lesyel, i ansent e i ganny en pti baba. Sa profesi i dir ki sa garson senbolik pou byento “diriz tou nasyon  avek en baget feray.” Me selman, dek ki i ne, sa garson i “ganny anmennen kot Bondye kot son tronn.” En lavwa for dan lesyel i dir: “Aprezan, delivrans, pisans, rwayonm nou Bondye, ek lotorite son Kris in ganny etabli.”​—Rev. 12:1, 5, 10.

28 Sirman, Zan ti pe vwar dan en vizyon sa moman kan Rwayonm Bondye ti pou vin an egzistans. Sa ti en moman glorye me pa tou dimoun ki ti kontan. Satan ek son bann demon ti lager avek bann lanz fidel ki anba lotorite Mikael (Misel) oubyen Kris. Ki ti arive? Nou lir: “Sa gro dragon, ti ganny zet ater. Limenm li sa serpan lantikite, ki apel dyab ou satan, e ki tronp lemonn antye. I ti ganny zete lo later, e son bann lanz ansanm avek li.”​—Rev. 12:7, 9.

An 1914, bann Etidyan Labib ti konmans rekonnet siny envizib prezans Kris

29, 30. Apre ki Rwayonm Bondye ti vin an egzistans, ki mannyer kondisyon ti sanze (a) lo later? (b) dan lesyel?

29 Plizyer lannen avan 1914, bann Etidyan Labib ti’n anonse ki sa lannen ti pou konmansman en lepok boulvers. Me, zot menm zot pa ti kapab imazinen ki sa prediksyon ti pou ganny akonplir dan en fason sitan egzakt. Parey vizyon Zan i montre, apre sa, Satan ti pou annan en pli move lenfliyans ankor lo bann imen. Labib i dir: “Maler, later ek lanmer, parski dyab in desann kot zot avek en gran lakoler, akoz i konnen ki i reste li ankor zis en pti pe letan.” (Rev. 12:12) An 1914, i ti annan premye lager mondyal e siny prezans Kris konman Lerwa ti konmans ganny akonplir dan lemonn antye. Bann “dernyen zour” sa move lemonn ti’n konmanse.​—2 Tim. 3:1.

30 Toudmenm, i ti annan lazwa dan lesyel. Satan ek son bann demon ti’n ganny pouse dan lesyel pour touzour. Sa resi i dir: “Pour sa rezon, alor, rezoui lesyel” ek bann ki reste laba! (Rev. 12:12) Vi ki lesyel ti’n ganny netwaye e Zezi ti’n vin Lerwa, alor Rwayonm Bondye ti pare pour konmans azir an faver pep Bondye lo later. Ki i ti pou fer? Parey nou ti vwar o konmansman sa sapit, Kris konman “mesaze lalyans” ti pou premyerman rafin bann serviter Bondye lo later. Ki sa ti enplike?

En letan tes

31. Ki Malaki ti predir konsernan sa peryod pirifikasyon e ki mannyer sa profesi ti konmans vin vre? (Vwar osi not.)

31 Malaki ti predir ki sa peryod letan kot pep Bondye ti pou ganny rafinen pa ti pou fasil. I ti ekrir: “Lekel ki pou andir sa zour ki i pou vini, e lekel ki pou tenir kan i aparet? Parski i pou parey dife en lorfev e parey savon bann blansisez.” (Mal. 3:2) Sa parol ti vreman reflekte larealite! Konmansman lannen 1914, pep Bondye lo later ti fer fas avek bann tes ek difikilte enn deryer lot. Pandan Premye Lager Mondyal, plizyer Etidyan Labib ti ganny anprizonnen e persekite dan en fason vyolan. *

32. Ki problenm dan lorganizasyon ki ti afekte pep Bondye dan bann lannen 1916?

 32 I ti annan bann sityasyon difisil menm dan nou lorganizasyon. An 1916, Frer Russell ti mor a laz selman 64 an e sa ti en sok pour bokou serviter Bondye. I ti vin evidan apre son lanmor ki pour serten, sa zonm vreman egzanpler ti’n vin tro enportan pour zot. Menm si Frer Russell pa ti rod sa latansyon, serten ti’n met li lo en serten oter. Bokou ti panse ki revelasyon bann nouvo laverite ti pou arete apre son lanmor e serten ti fer tou pour anpes zefor ki ti pe ganny fer pour kontiny sa ki i ti’n konmanse. Akoz sa latitid, en group aposta ti diviz lorganizasyon.

33. Ki mannyer serten ekspektasyon ti teste pep Bondye?

33 Serten ti annan bann ekspektasyon ki pa ti ganny realize e sa ti en lot tes. Menm si Watch Tower ti’n byen dir ki Letan bann Nasyon ti pou fini an 1914, bann frer pa ti ankor konnen sa ki ti pou arive sa lannen. (Lik 21:24) Zot ti krwar ki Kris ti pou anmenn bann Kretyen swazir, setadir, son madanm senbolik, dan lesyel pour diriz avek li an 1914. Sa pa ti arive. Ver lafen 1917, The Watch Tower ti anonse ki en peryod rekolt 40 an ti pou fini prentan 1918. Me predikasyon pa ti fini sa lannen, o kontrer, i ti kontinyen avek plis lentansite ankor apre sa. Sa magazin ti dir ki rekolt ti’n fini, me ki aprezan en letan pour anmas bann restan ti’n konmanse. Toudmenm, bokou ti aret servi Zeova akoz zot ti dezapwente.

34. Ki gro tes i ti annan an 1918 e akoz bann larelizyon Kretyen ti panse ki pep Bondye ti’n “mor”?

34 An 1918, i ti annan en lot gro tes. Frer Joseph Rutherford ki ti kontiny travay Frer Russell pour organiz pep Bondye ti ganny arete ansanm avek set lezot frer responsab. Akoz en lenzistis, zot ti ganny bann gro santans prizon dan en prizon federal dan lavil Atlanta, Georgia, Leta-z-ini. I ti paret ki travay pep Bondye ti’n sezi lanmenm pour en serten letan. Bokou bann sef relizye swadizan Kretyen ti byen kontan. Vi ki bann “lider” sa bann Etidyan Labib ti dan prizon, biro prensipal Brooklyn ti’n ganny fermen e predikasyon ti anba restriksyon Lanmerik ek Lerop, bann sef relizye ti konmans krwar ki zot ti pou ganny debarase avek sa fleo e ki dan en sans, sa bann Etidyan Labib ti’n mor. (Rev. 11:3, 7-10) Pa zot ti vreman mal!

En letan pour rekonmans zot aktivite

35. Akoz Zezi ti les son bann disip fer fas avek leprev e ki i ti fer pour ed zot?

35 Bann lennmi laverite pa ti realize ki Zezi ti les son pep ganny teste zis akoz senbolikman sa letan Zeova ti pe dan en sans ‘rafin e netway larzan.’ (Mal. 3:3) Zeova ek son Garson ti konnen ki bann tes ki ti parey dife ti pou pirifye e rafin bann dimoun fidel ki ti pou finalman pli kalifye pour servi sa Lerwa. Sa ki son bann lennmi ti krwar i ti pou enposib, sanmenm ki lespri sen Zeova ti fer avek son pep depi konmansman 1919. Bann fidel ti rekonmans zot aktivite! (Rev. 11:11) Se sa moman menm ki Kris ti realiz en laspe enportan  sa siny bann dernyen zour. I ti apwent ‘sa lesklav fidel e pridan,’ andotmo, en pti group bann zonm swazir ki ti pou pran swen avek son pep par donn zot nouritir spirityel kan i ler.​—Mat. 24:45-47.

36. Kwa ki montre ki pep Bondye ti pe repran son bann aktivite spirityel?

36 Frer Rutherford ek son bann asosye ti ganny large dan prizon le 26 Mars 1919. Desito, en lasanble ti ganny organize pour son Septanm. Zot ti pe fer plan pour lans en nouvo magazin ki ti pou apel The Golden Age. Sa magazin ti pou al avek The Watch Tower e i ti pou ganny servi dan predikasyon. * Sa menm lannen, premye nimero Bulletin, ki konmela i kaye pour renyon Nou minister ek lavi Kretyen ti ganny lanse. Depi son bann premye nimero, i’n vreman promot predikasyon. San okenn dout, depi 1919 ziska prezan, bokou lanfaz in ganny mete pour ki sak dimoun i partisip dan predikasyon portanport.

37. Dan bann lannen apre 1919, ki mannyer serten ti montre ki zot pa ti fidel?

37 Predikasyon ti pe kontinyen rafin bann serviter Kris akoz bann ki orgeye e arogan ti napa sa leker pour fer en travay ki demann bokou limilite. Bann ki pa ti oule partisip dan  predikasyon ti kit bann Kretyen fidel. Dan bann lannen apre 1919, serten ki ti’n kit nou ti vin ankoler e zot ti konmans fer kalonmni e menm pran kote avek sa bann ki ti persekit bann serviter fidel Zeova.

38. Ki sikse ek laviktwar bann disip Kris i ansenny nou?

38 Malgre sa bann latak, bann disip Kris lo later ti kontinyen ogmante e prospere spirityelman. Sak sikse, sak laviktwar depi sa letan i prouve ki Rwayonm Bondye pe dirize! Se selman gras a led, sipor ek benediksyon Bondye atraver son Garson ek son Rwayonm ki en group imen enparfe in kapab ranport laviktwar enn deryer lot lo Satan ek son move lemonn!​—Lir Izai 54:17.

Frer Rutherford pe donn en diskour inoubliyab dan en lasanble zis detrwa mwan apre ki i ti ganny large dan prizon

39, 40. (a) Ki serten laspe sa piblikasyon? (b) Ki lefe i pou annan lo ou si ou etidye sa liv?

39 Dan bann sapit ki swiv, nou pou egzamin sa ki Rwayonm Bondye in akonpli lo later depi ki i’n vin an egzistans dan lesyel. Dan sak seksyon sa liv, nou pou egzamin en laspe diferan lo sa travay ki relye avek sa Rwayonm isi lo later. Dan sak sapit, i annan en bwat revizyon pour ed nou analize e vwar personnelman ki degre reel sa Rwayonm i ete pour nou. Dan bann dernyen sapit, nou pou vwar ki nou kapab ekspekte ler sa Rwayonm i vini tre byento pour detri bann move dimoun e fer later vin en paradi. Ler ou etidye sa liv, ki lefe sa pou annan lo ou?

40 Satan i anvi ki ou perdi lafwa dan Rwayonm Bondye. Me Zeova i oule fortifye ou lafwa pour ki ou lafwa i vin en proteksyon pour ou e ki ou reste for spirityelman. (Efe. 6:16) Pour sa rezon, nou demann ou pour vreman etidye sa liv e apre priye konsernan sa ki ou’n aprann. Tou dilon sa liv, demann ou lekor, ‘Eski Rwayonm Bondye i reel pour mwan?’ Pli i pou reel pour ou, pli i pou annan en sans ki ou pou la pe fidelman siport sa Rwayonm avek devouman zour ki tou dimoun pou vwar ki Rwayonm Bondye i reel e ki i pe dirize!

^ par. 7 Pour konn plis lo Henry Grew, George Stetson ek George Storrs, vwar liv Jehovah’s Witnesses​—Proclaimers of God’s Kingdom paz 45-46.

^ par. 15 Menm si bann Etidyan Labib ti vwar li neseser pour separ zot avek bann lorganizasyon relizye ki ti pe mel dan bann zafer sa lemonn, pour bokou lannen zot ti kontinyen konsider bann endividi ki pa ti Etidyan Labib, me ki ti krwar dan ranson e dir ki zot in dedye zot lavi avek Bondye konman zot frer Kretyen.

^ par. 17 En laspe ki ti fer sa bann lavertisman pa paret sitan enportan, se lefet ki nou ti krwar ki zot ti aplik sirtou avek sa pti troupo Kris oubyen sa 144,000. Parey nou pou vwar dan Sapit 5, avan 1935, nou ti krwar ki sa “gran lafoul” ki ganny mansyonnen dan Revelasyon 7:9, 10 (“great multitude” an Angle dapre King James Version) ti pou enkli en kantite manm diferan legliz Kretyen e ki zot ti pou form parti en dezyenm group ki ti pou al dan lesyel akoz zot ti pou’n pran kote Zezi ler lafen i vini.

^ par. 31 An Septanm 1920, The Golden Age (aprezan Awake!) ti pibliy en nimero spesyal ki ti donn bokou detay lo bann persekisyon ki parfwa ti vreman vyolan ki nou ti pas atraver Kanada, Lalmanny, Langleter ek Leta-z-ini pandan lager. Sa ti tou lekontrer avek bann lannen avan premye lager mondyal, kot nou pa ti ganny persekite preski ditou.

^ par. 36 Pour bokou lannen, The Watch Tower ti prensipalman ganny pibliye pour bann Kretyen swazir pour batir zot spirityelman.