Skip to content

Al lo sa dezyenm lalis

Al lo konteni

Temwen Zeova

Kreol Seselwa

Rwayonm Bondye pe dirize!

 SAPIT 9

Rezilta predikasyon​—“Bann lagrenn in mir e in pare pour larekolt”

Rezilta predikasyon​—“Bann lagrenn in mir e in pare pour larekolt”

PWEN ENPORTAN SA SAPIT

Zeova in fer pouse lagrenn laverite lo Rwayonm

1, 2. (a) Akoz bann disip ti konfize? (b) Ki kalite rekolt Zezi ti pe koz lo la?

BANN disip i konfize. Zezi fek dir zot: “Lev lizye e get byen bann plantasyon, bann lagrenn in mir e in pare pour larekolt.” Zot get dan sa direksyon ki Zezi pe montre zot, me zot pa vwar en plantasyon mir, plito, zot vwar en plantasyon ver akoz sa moman lorz fek pet later. Petet zot ti mazinen: ‘Ki rekolt i a pe dir li? I reste ankor detrwa mwan avan rekolt.’​—Zan 4:35.

2 Me, Zezi pa ti pe koz lo en rekolt literal. Plito, i ti pe profit sa moman pour ansenny son bann disip de leson enportan konsernan en rekolt senbolik ki ti relye avek rekolte dimoun. Ki sa de leson? Pour konnen, annou egzamin sa resi pli an detay.

En lapel ek en zoli promes

3. (a) Kwa ki ti’n kapab pous Zezi pour dir: “Lagrenn in mir e in pare pour larekolt”? (Vwar not.) (b) Ki mannyer Zezi ti klarifye son parol?

3 Zezi ti fer sa konversasyon avek son bann disip a lafen lannen 30 N.L., pros o bor Sikar, en lavil Samariten. Letan ki son bann disip ti’n al dan sa lavil, Zezi ti reste deryer kot en pwi kot i ti ansenny laverite spirityel avek en madanm ki ti deswit konpran lenportans son lansennyman. Ler bann disip ti retourn kot Zezi, sa madanm ti al Sikar an tayan pour rakont son bann vwazen bann keksoz merveye ki i ti’n aprann. Sa ki i ti dir ti enteres bokou dimoun e en kantite son bann vwazen ti taye pour al kot sa pwi pour rankontre Zezi. I tre probab ki se pandan sa moman, setadir, anmezir ki Zezi ti pe get dan lwen ki i ti vwar en lafoul Samariten pe aprose par deryer sa plantasyon, ki i ti dir: “Get byen bann plantasyon, bann lagrenn in mir e in pare pour larekolt.” * Apre sa, pour montre ki i pa ti pe koz lo en rekolt literal, me plito lo enn spirityel, Zezi ti azoute: “Sa ki fer rekolt i . . . ranmas bann lagrenn pour lavi eternel.”​—Zan 4:5-30, 36.

4. (a) Ki sa de leson konsernan rekolt Zezi ti ansennyen? (b) Ki kestyon nou pou egzaminen?

4 Ki sa de leson enportan nou aprann avek sa rekolt spirityel ki Zezi ti koz lo la? Premyerman, sa travay i irzan.  Lefet ki i ti dir ‘bann lagrenn in mir,’ i ti pe montre ki son bann disip ti annan en gran travay pour fer. Pour montre son disip ki sa travay i irzan, Zezi ti azoute: “Sa ki fer rekolt [pe deza] resevwar son lapey.” Wi, rekolt ti’n deza fini konmanse, i pa ti en letan pour tarde! Dezyenmman, sa bann ki fer rekolt i dan en gran lakontantman. Zezi ti dir ki bann senmer ek bann ki rekolte i “ganny kontantman ansanm.” (Zan 4:35b, 36) Zis parey Zezi li menm ti’n bezwen kontan kan i ti vwar ‘bokou Samariten sa lavil krwar dan li,’ son bann disip osi ti pou annan en gran lazwa anmezir zot ti partisip dan rekolt avek tou zot leker. (Zan 4:39-42) Sa resi dan premye syek i annan en gran sinifikasyon pour nou ozordi akoz i montre nou sa ki pe arive la pandan sa pli gran rekolt spirityel. Kan ki sa rekolt modern ti konmanse? Lekel ki partisip ladan? Ki rezilta in anmennen?

Nou Lerwa i diriz sa pli gran rekolt ki’n egziste

5. Lekel ki partisip dan sa rekolt ki pe ganny fer dan lemonn antye e ki mannyer vizyon Zan i montre ki sa travay i irzan?

5 Dan en vizyon ki zapot Zan ti gannyen, Zeova ti montre ki i ti’n donn Zezi sa responsabilite pour diriz en rekolt senbolik mondyal. (Lir Revelasyon 14:14-16.) Dan sa vizyon, Zezi i annan en kouronn ek en fosiy. Sa “kouronn an-or” lo latet Zezi i konfirm son pozisyon konman sa Lerwa ki pe dirize. Sa “fosiy byen koupe” i konfirm son rol konman sa Enn ki fer rekolt. Ler Zeova ti dir atraver en lanz ki “rekolt later in mir,” i ti pe montre ki sa travay ti irzan. Anfet, “ler [ti’n] arive pour rekolte.” (Nou ki’n met an italik.) Pour obei lord Bondye, Zezi ti anvoy son fosiy e senbolikman konmans rekolte bann dimoun lo later. Sa vizyon eksitan i fer nou rapel ankor enn fwa ki “bann lagrenn in mir e in pare pour larekolt.” Eski sa vizyon i ed nou konnen kan ki rekolt mondyal ti konmanse? Wi.

6. (a) Kan ki sezon “rekolt” ti konmanse? (b) Kan ki “rekolt later” li menm ti konmanse? Eksplike.

6 Vi ki vizyon Zan dan Revelasyon sapit 14 i montre ki Zezi, sa Enn ki fer rekolt i annan en kouronn lo son latet (verse 14), savedir i ti’n fini ganny kouronnen konman Lerwa e sa se an 1914. (Dan. 7:13, 14) En pe letan apre sa, Zezi ti ganny lord pour konmans rekolte (verse 15). Sa parabol Zezi konsernan rekolte dible i dan menm lord, i ti dir: ‘Larekolt se konklizyon sa move lemonn.’ Alor, sezon rekolt ek konklizyon sa move lemonn ti konmans an menm tan, setadir, an 1914. Pli tar, pandan sezon rekolt, rekolt li menm ti konmanse. (Mat. 13:30, 39) Aprezan, nou kapab vwar ki rekolt ti konmanse en pe letan apre ki Zezi ti vin Lerwa. Premyerman, depi 1914 ziska bann premye mwan 1919, Zezi ti fer en travay pirifikasyon parmi bann Kretyen swazir. (Mal. 3:1-3; 1 Pyer 4:17) Apre sa, an 1919, “rekolt later” ti  konmanse. San tarde, Zezi ti servi sa lesklav fidel ki ti’n fek ganny apwente pour ed nou bann frer vwar ki degre irzan predikasyon i ete. Annou vwar sa ki ti arive.

7. (a) Ki analiz ki ti ed nou bann frer vwar ki predikasyon i irzan? (b) Ki nou bann frer ek ser ti ganny ankouraze pour fer?

7 The Watch Tower Zilyet 1920 ti dir: “I paret evidan atraver en analiz lo Lekritir ki legliz i annan en gran privilez pour anons en mesaz konsernan rwayonm.” Par egzanp, parol profetik Izai ti ed bann frer konpran ki sa bon nouvel Rwayonm ti devret ganny anonse lo later antye. (Iza. 49:6; 52:7; 61:1-3) Zot pa ti vreman konnen ki mannyer en travay parey ti pou ganny fer, me zot ti annan konfyans ki Zeova ti pou fer li posib pour zot. (Lir Izai 59:1.) Lefet ki zot ti konpran pli klerman ki sa travay i irzan, nou bann frer ti ganny ankouraze pour fer plis dan predikasyon. Ki mannyer lezot frer ek ser ti reazir?

8. An 1921, ki sa de laverite fondamantal konsernan predikasyon nou bann frer ti arive konpran?

8 The Watch Tower Desanm 1921 ti fer sa lanons: “Sa lannen i enn pli meyer ki tou lezot lannen e plis dimoun ankor in tann sa mesaz laverite pandan 1921 konpare avek lezot lannen avan.” Sa magazin ti azoute: “I annan ankor bokou plis pour fer. . . .  Annou fer li avek en leker zwaye.” Nou bann frer sa letan osi ti konpran sa de laverite fondamantal ki relye avek sa travay predikasyon ki Zezi ti’n donn son bann zapot pour fer. Zot ti konpran ki sa travay i irzan e bann ki fer li i dan lazwa.

9. (a) An 1954, ki The Watchtower ti dir konsernan travay rekolt e akoz? (b) Ki logmantasyon mondyal dan lakantite proklanmater ki’n arive pandan sa dernyen 50 an? (Vwar latab “ Logmantasyon mondyal.”)

9 Diran bann lannen 1930, apre ki bann frer ti’n konpran ki en gran lafoul lezot mouton ti pou aksepte mesaz Rwayonm, bokou plis ti ganny fer dan predikasyon. (Iza. 55:5; Zan 10:16; Rev. 7:9) Avek ki rezilta? Lakantite proklanmater ki ti pe anons sa mesaz Rwayonm ti ogmante sorti 41,000 an 1934 pour vin 500,000 an 1953! The Watchtower le 1 Desanm 1954 ti fer sa konklizyon: “Se gras a lespri sen  Zeova ek pouvwar son Parol ki sa gran travay rekolt dan lemonn antye in ganny akonplir.” *​—Zeka. 4:6.

 

LOGMANTASYON MONDYAL

Pei

1962

1987

2013

Lostrali

15,927

46,170

66,023

Brezil

26,390

216,216

756,455

Lafrans

18,452

96,954

124,029

Itali

6,929

149,870

247,251

Zapon

2,491

120,722

217,154

Meksiko

27,054

222,168

772,628

Nizerya

33,956

133,899

344,342

Filipin

36,829

101,735

181,236

Leta-z-ini

289,135

780,676

1,203,642

Zanmbya

30,129

67,144

162,370

 

SIF LETID LABIB KI KONTINYEN OGMANTE

1950

2 MILYON

1960

3 MILYON

1970

4 MILYON

1980

5 MILYON

1990

6 MILYON

2000

7 MILYON

2010

8 MILYON

Rezilta larekolt ti ganny predir atraver bann parabol

10, 11. Dan sa parabol lo lagrenn moutard, ki laspe ki ganny fer resorti?

10 Dan son bann parabol lo Rwayonm, Zezi ti predir dan en fason senp e kler rezilta sa travay rekolt. Annou egzamin sa parabol konsernan lagrenn moutard ek sa enn lo lelven. Nou pou konsantre lo konman ki zot in ganny akonplir dan sa letan lafen.

11 Parabol lagrenn moutard. En zonm i plant en lagrenn moutard. Sa lagrenn i pouse e vin en pye dibwa kot bann zwazo i pran refiz. (Lir Matye 13:31, 32.) Lefet ki sa lagrenn i pouse, ki sa i montre? (1) Lafason i pouse i enpresyonan. Sa lagrenn i “pli pti ki tou lagrenn,” me kan i pouse i vin en pye dibwa avek “bann gran brans.” (Mark 4:31, 32) (2) Lasirans ki i pou pouse. “Kan en dimoun i plant [sa lagrenn] dan later i grandi.” Zezi pa ti dir, “I kapab grandi.” Plito i ti dir: “I grandi.” Personn pa kapab anpes li pouse. (3) Sa pye ki pe grandi i atir latansyon bann viziter e i en landrwa reste. “Bann zwazo dan lesyel” i vini e “fer zot nik anba son lonbraz.” Ki mannyer sa trwa laspe i aplikab dan sa rekolt spirityel modern?

12. Ki mannyer sa parabol lo lagrenn moutard i aplik avek rekolt dan nou letan? (Vwar osi latab “ Sif letid Labib ki kontinyen ogmante.”)

12 (1) Lafason i pouse: Sa parabol i met lanfaz lo sa mesaz ki propaze ensi ki progre kongregasyon. Depi 1919, sa bann travayer devoue in ganny rasanble dan kongregasyon Kretyen ki ti’n ganny restore. Sa letan, lakantite travayer ti ptigin, me vitman i ti vin bokou. Anfet, son progre depi dan bann lannen 1900 ziska ozordii vreman enkrwayab! (Iza. 60:22) (2) Lasirans: Personn pa’n kapab anpes bann Kretyen vin bokou. Menm si lennmi Bondye i met tou sort lobstak parey ros dan son semen, sa pti lagrenn in kontinyen pouse, i tir tou sa bann lobstak. (Iza. 54:17) (3) Landrwa reste: Sa “bann zwazo dan lesyel” ki trouv en landrwa reste dan sa pye i reprezant sa plizyer milyon endividi ki annan sa bon kondisyon leker sorti dan plis ki 240 pei e ki’n aksepte mesaz Rwayonm e form parti kongregasyon Kretyen. (Ezek. 17:23) Laba zot resevwar nouritir spirityel, repo ek proteksyon.​—Iza. 32:1, 2; 54:13.

Parabol lagrenn moutard i montre ki bann dimoun dan kongregasyon i annan en landrwa reste e zot ganny proteze (Vwar paragraf 11, 12)

13. Ki laspe predikasyon sa parabol lo lelven i fer resorti?

13 Parabol lelven. Apre ki en madanm i azout en pe lelven avek en ponnyen lafarin, sa lelven i fer monte sa lapat antye. (Lir Matye 13:33.) Lefet ki lelven i fer monte lapat antye, ki sa i endike? Annou vwar. (1) I annan en transformasyon. Sa lelven i propaze ziska ki ‘lapat antye i monte.’ (2) I propaz partou. Sa lelven i fer monte sa lapat antye. Ki mannyer sa de pwen i aplik avek rekolt spirityel dan nou letan?

14. Ki mannyer sa parabol lo lelven i aplik avek rekolt dan nou letan?

 14 (1) Transformasyon: Lelven i reprezant mesaz Rwayonm e sa lafarin i reprezant limanite. Parey lelven i fer en transformasyon dan sa lafarin apre ki zot in ganny melanze ansanm, mesaz Rwayonm i transform leker en dimoun apre ki i’n aksepte sa mesaz. (Rom. 12:2) (2) Propaz partou: Lefet ki lelven i propaz partou, sa i montre ki mesaz Rwayonm osi i propaz partou. Sa lelven i finalman propaz dan tou sa lapat. Pareyman, mesaz Rwayonm in propaze “ziska tou bann landrwa pli elwannyen lo later.” (Akt 1:8) Sa laspe dan sa parabol i osi endike ki menm dan bann landrwa kot predikasyon i anba restriksyon, sa mesaz Rwayonm pou propaze, menm si bokou pa remark nou aktivite dan sa bann rezyon.

15. Ki mannyer sa parol dan Izai 60:5, 22 in ganny akonplir? (Vwar osi bwat “ Zeova in fer li posib” e “ Lafason ki ‘sa enn ptipti’ in vin ‘en nasyon pwisan.’”)

15 Apepre 800 an avan ki Zezi ti rakont sa parabol, atraver Izai, Zeova ti predir lanpler ki sa rekolt spirityel ti pou arive e lazwa ki sa rekolt ti pou anmennen. * Zeova ti endike  ki en kantite dimoun “sorti byen lwen” ti pou vin ver son lorganizasyon. I ti dir avek en “madanm” spirityel ki ganny reprezante par bann Kretyen swazir lo later la konmela: “Ou pou vwar e ou pou dan lazwa, ou leker pou bate e deborde avek lazwa, akoz ou pou ganny larises lanmer e ou pou ganny bann resours bann nasyon.” (Iza. 60:1, 4, 5, 9) Pa sa parol i definitivman vre! Ozordi, bann ki servi Zeova pour plizyer lannen i sirman dan en gran lazwa anmezir zot vwar lakantite proklanmater dan zot pei pe ogmante sorti zis en ptigin pour vin plizyer milye.

Akoz tou serviter Zeova i annan rezon pour dan lazwa

16, 17. Dan ki sans “sa ki senmen e sa ki rekolte zot ganny kontantman ansanm”? (Vwar osi bwat “ De trak ti tous de leker dan rezyon Amazonn.”)

16 Petet ou rapel ki Zezi ti dir son bann zapot: “Sa ki fer rekolt i . . . ranmas bann lagrenn pour lavi eternel, e dan sa fason, sa ki senmen e sa ki rekolte zot ganny kontantman ansanm.” (Zan 4:36) Ki mannyer nou ganny ‘kontantman ansanm’ dan sa rekolt mondyal? Dan diferan fason. Annou vwar trwa.

17 Premyerman, nou kontan pour vwar rol Zeova dan sa travay. Kan nou pres sa mesaz Rwayonm, nou pe senm lagrenn. (Mat. 13:18, 19) Kan nou ed en dimoun pour vin en disip Kris, nou pe rekolte fri. Nou tou nou zwaye anmezir nou get avek ladmirasyon lafason ki Zeova i fer lagrenn laverite “zermen e grandi.” (Mark 4:27, 28) Serten lagrenn ki nou senmen i pouse pli tar e lezot ki rekolte zot. Petet ou’n ganny en leksperyans preski parey pour Joan, en ser Langleter ki ti batize 60 an pase. I ti dir: “Mon’n zwenn bann dimoun ki’n dir mwan ki mon ti plant en lagrenn dan zot leker kan mon ti pres avek zot en bann letan pase. San ki mon konnen, pli tar lezot Temwen ti etidye Labib avek zot e ed zot vin en serviter Zeova. Mon kontan ki sa lagrenn ki mon ti plante in pouse e i’n ganny rekolte.”​—Lir 1 Korentyen 3:6, 7.

18. Dapre 1 Korentyen 3:8, ki rezon nou annan pour zwaye?

18 Dezyenmman, nou reste bann travayer zwaye kan nou gard antet sa ki Pol ti dir: “Sakenn pou ganny son saler dapre son travay.” (1 Kor. 3:8, nou ki’n met an italik.) Sakenn pou ganny rekonpanse dapre sa travay, pa dapre rezilta sa travay. Pa sa i rekonfortan pour sa bann ki pres dan bann teritwar kot napa bokou dimoun ki aksepte laverite! Dan lizye Bondye, sak Temwen ki partisip dan sa travay avek tou zot leker, pe “raport bokou fri” e alor, zot annan tou rezon pour rezouir.​—Zan 15:8; Mat. 13:23.

19. (a) Ki mannyer sa profesi dan Matye 24:14 i relye avek nou lazwa? (b) Ki nou devret gard antet menm si personnelman nou pa pe reisi fer en disip?

19 Trwazyenmman, nou kontan ki sa travay nou pe fer pe akonplir profesi Labib. Get larepons ki Zezi ti donn son bann zapot ler zot ti demann li: ‘Dir nou kan tousala pou  arive, e ki siny ki pou endik ou prezans ek konklizyon sa move lemonn?’ I ti dir zot ki predikasyon dan lemonn antye ti pou en laspe sa siny. Eski i ti pe koz lo sa travay pour fer disip? Non. I ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen.” (Mat. 24:3, 14, nou ki’n met an italik.) Alor, pres lo Rwayonm, setadir, senm lagrenn i en laspe sa siny. Me, anmezir nou pres sa bon nouvel, nou devret gard antet ki menm si nou pa reisi fer en disip, nou deza pe reisi akoz nou pe fer ‘dimoun konn’ sa mesaz. * Wi, ki swa dimoun i aksepte oubyen non, nou pe ede akonplir profesi Zezi e nou annan sa loner pour “travay ansanm” avek Bondye. (1 Kor. 3:9) Pa sa i en bon rezon pour rezouir!

“Depi soley leve ziska soley kouse”

20, 21. (a) Ki mannyer sa parol dan Malaki 1:11 ti ganny akonplir? (b) An rapor avek travay rekolt, ki ou determinen pour fer e akoz?

20 Dan premye syek, Zezi ti ed son bann zapot pour konpran ki sa travay rekolt i irzan. Depi 1919 an montan, Zezi in ed son bann disip dan nou letan pour konpran sa menm laverite. An rezilta sa, pep Bondye in entansifye zot travay. Anfet, personn pa’n reisi aret sa travay rekolt. Parey profet Malaki ti predir, predikasyon pe ganny fer “depi soley leve ziska soley kouse.” (Mal. 1:11) Sertennman, depi soley leve ziska soley kouse, depi les ziska was, nenport kote zot ete lo later, bann senmer ek travayer rekolt senbolik pe travay e rezouir ansanm. Depi soley leve ziska soley kouse, depi bomaten ziska aswar, ouswa lazournen antye, nou fer sa travay ki nou konnen i irzan.

21 Ler nou reflesir lo sa apepre 100 an pase e vwar ki mannyer en pti group serviter Bondye in pouse ouswa grandi pour vin “en nasyon pwisan,” nou leker i sirman “bate e deborde” avek lazwa. (Iza. 60:5, 22) Annou fer sir ki nou lazwa ek lanmour pour Zeova, “Propriyeter rekolt” i pous nou pour kontinyen partisipe e fini sa pli gran rekolt dan listwar!​—Lik 10:2.

^ par. 3 Remark Zezi konsernan ‘lagrenn ki’n mir,’ ki literalman an Grek i vedir ‘lagrenn i blan’ ti kapab pe refer avek bann rob blan bann Samariten ki Zezi ti vwar pe vini.

^ par. 9 Pour konn plis lo sa bann lannen ek deseni ki ti swiv, nou ankouraz ou pour lir paz 425-520 dan liv Jehovah’s Witnesses​—Proclaimers of God’s Kingdom, ki koz lo sa ki ti ganny akonplir dan travay rekolt depi 1919 ziska 1992.

^ par. 15 Pour plis detay lo sa profesi enteresan, vwar liv Isaiah’s Prophecy​—Light for All Mankind II lo paz 303-320.

^ par. 19 Bann Etidyan Labib ti’n deza fini konpran sa laverite fondamantal. Zion’s Watch Tower le 15 Novanm 1895 ti dir: “Si zis en ptigin dible i kapab ganny rasanble, en kantite temwannyaz lo laverite i kapab ganny donnen. . . . Tou dimoun i kapab pres levanzil.”