Skip to content

Al lo sa dezyenm lalis

Al lo konteni

Temwen Zeova

Kreol Seselwa

Rwayonm Bondye pe dirize!

 SAPIT 6

Bann dimoun ki prese​—Bann predikater ki ofer zot lekor volonterman

Bann dimoun ki prese​—Bann predikater ki ofer zot lekor volonterman

PWEN ENPORTAN SA SAPIT

Lerwa i organiz en larme predikater

1, 2. Ki sa gran travay Zezi ti predir e ki kestyon enportan ki ganny souleve?

BANN dirizan politik i souvan fer bann promes ki pa ganny realize. Menm sa bann ki annan bon lentansyon i kapab pa reisi akonpli zot promes. De lot kote, Kris Zezi, lerwa Rwayonm Bondye in toultan prouve ki i gard son parol.

2 Apre ki i ti vin Lerwa an 1914, Zezi ti pare pour akonpli en profesi ki i ti’n anonse 1,900 an pli boner. En pti pe letan avan son lanmor, Zezi ti predir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Mat. 24:14) Lakonplisman sa parol ti pou form parti siny son prezans konman Lerwa. Par kont, en kestyon enportan ti ganny souleve: Ki mannyer sa Lerwa ti pou kapab organiz en larme predikater volonter pandan bann dernyen zour, en letan kot i ti pou annan en leta lespri egois, san lanmour e dimoun pa ti pou relizye. (Mat. 24:12; 2 Tim. 3:1-5) Nou bezwen konn larepons, parski larepons sa kestyon i enplik tou Kretyen.

3. Ki konfyans Zezi ti annan e kote i ti ganny sa kalite konfyans?

3 Get ankor en kou profesi Zezi. Eski sa parol ‘sa bon nouvel pou ganny anonse’ i montre ki Zezi ti asire ki sa ti pou arive? Sirman wi! Zezi ti asire ki i ti pou annan bann volonter pour siport li pandan bann dernyen zour. Ki mannyer i’n ganny en tel konfyans? I ti aprann avek son Papa. (Zan 12:45; 14:9) Avan vin lo later, Zezi ti vwar pour li menm ki Zeova i annan konfyans dan latitid volonter son bann adorater. Annou vwar ki mannyer Zeova ti eksprim son konfyans.

“Ou pep pou ofer zot lekor volonterman”

4. Ki travay Zeova ti envit bann Izraelit pour siporte e ki mannyer zot ti reazir?

4 Rapel sa ki ti arive ler Zeova ti donn lord Moiz pour konstri en tabernak ouswa latant kot vre ladorasyon ti pou ganny fer pour nasyon Izrael. Atraver Moiz, Zeova ti envit tou lepep pour siport sa travay. Moiz ti dir zot: “Ki tou sa ki annan en leker ki volonter i anmenn en kontribisyon  pour Zeova.” Avek ki rezilta? Bann dimoun ti “kontinyen anmenn . . . bann lofrann volonter zour apre zour.” Zot ti anmenn sitan en kantite ki zot ti bezwen ganny “anpese pour anmenn lezot keksoz ankor”! (Egz. 35:5; 36:3, 6) Bann Izraelit ti prouve ki Zeova ti annan tou rezon pour annan konfyans dan zot.

5, 6. Dapre Psonm 110:1-3, ki leta lespri Zeova ek Zezi i ekspekte trouve parmi son bann adorater pandan letan lafen?

5 Eski Zeova i ekspekte trouv sa leta lespri volonter parmi son bann adorater pandan sa bann dernyen zour? Wi! Plis ki 1,000 an avan ki Zezi ti ne lo later, Zeova ti enspir David pour ekri konsernan sa letan ler Mesi ti pou konmans rennyen. (Lir Psonm 110:1-3.) Zezi, sa nouvo Lerwa ti pou annan bann lennmi ki ti pou opoz li. Pourtan, i ti pou osi annan en larme siporter. Zot pa ti pou bezwen ganny forse pour servi li. Menm bann zenn parmi zot ti pou ofer zot lekor volonterman, zot ti pou vin telman en kantite ki zot ti kapab ganny konpare avek laroze ki kouver later dan larder soley granmaten. *

Bann ki volonterman siport Rwayonm i annabondans parey laroze (Vwar paragraf 5)

6 Zezi ti konnen ki sa profesi dan Psonm 110 ti aplik avek li. (Mat. 22:42-45) Alor, i ti annan tou rezon pour li annan konfyans ki i ti pou annan bann dimoun ki ti pou siport li fidelman e ofer zot lekor volonterman pour pres sa bon nouvel lo later antye. Ki listwar i montre? Anfet, eski sa Lerwa in reisi organiz en larme ki volonterman prese pandan sa bann dernyen zour?

“Anons sa mesaz i mon privilez ek devwar”

7. Apre ki i ti vin Lerwa, ki Zezi ti fer pour prepar sa bann ki ti pou siport li dan sa travay ki zot ti pou gannyen?

7 En pti pe letan apre ki i ti’n vin Lerwa, Zezi ti pran aksyon pour prepar son bann disip pour sa gran travay ganny fer. Parey nou ti vwar dan Sapit 2, i ti fer en travay  lenspeksyon ek pirifikasyon depi 1914 ziska dan bann premye mwan 1919. (Mal. 3:1-4) Apre, an 1919, i ti apwent sa lesklav fidel pour diriz son bann disip. (Mat. 24:45) Sirtou depi sa letan, sa lesklav in donn nouritir spirityel atraver bann piblikasyon ek diskour dan lasanble ki toultan pe met lanfaz ki tou Kretyen i personnelman annan sa responsabilite pour partisip dan predikasyon.

8-10. Ki rol bann lasanble ti zwe an sa ki konsern predikasyon? Donn en legzanp. (Vwar osi bwat “ Bann lasanble ki ti promot predikasyon.”)

8 Diskour bann lasanble distrik. Telman zot ti eksite pour ganny gidans, bann Etidyan Labib ti rasanble Cedar Point, Ohio, Leta-z-ini, le 1 ziska le 8 Septanm 1919 pour zot premye lasanble distrik apre Premye Lager Mondyal. Lo dezyenm zour, Frer Rutherford ti fer en diskour kot i ti dir bann delege: “Misyon en Kretyen lo later . . . se pour anons sa mesaz lo rwayonm Senyer.”

9 Laspe enportan sa lasanble ti ganny fer resorti trwa zour pli tar ler Frer Rutherford ti fer en diskour ki ti annan pour tit “Address to Co-laborers” (En lapel pour bann labourer spirityel) ki ti ganny pibliye dan The Watch Tower anba tit “Announcing the Kingdom” (Anons Rwayonm). I ti dir: “Dan en refleksyon serye, en Kretyen i kapab demann son lekor, Akoz mon lo later? I devret mazinen, Mon lo later akoz Senyer in fer mwan vin son lanbasader pour proklanm en mesaz Bondye pour rekonsilye bann imen dan lemonn e anons sa mesaz i mon privilez ek devwar.”

10 Dan sa diskour istorik, Frer Rutherford ti anonse ki en nouvo magazin The Golden Age (ki aprezan apel Awake!), ti pou ganny pibliye pour atir latansyon bann dimoun lo sa Rwayonm konman sel lespwar pour limanite. Apre sa, i ti demande ki kantite dimoun dan lodyans ki ti anvi partisipe pour distribye sa magazin. En rapor lo sa lasanble ti eksplike: “Reaksyon lodyans ti ekstraordiner. Sis mil dimoun ti leve konman en sel group.” * I kler ki sa Lerwa ti annan bann siporter volonter ki ti vreman anvi proklanm sa Rwayonm!

11, 12. Ki The Watch Tower 1920 ti dir konsernan kan sa travay ki Zezi ti predir ti pou ganny fer?

11 Bann piblikasyon. Dan bann paz magazin The Watch Tower, sinifikasyon sa travay ki Zezi ti predir, setadir pres sa bon nouvel Rwayonm ti vin pli kler deplizanpli. Egzamin serten legzanp depi o konmansman 1920.

12 Ki mesaz ki ti pou ganny proklanmen pour akonpli Matye 24:14? Kan ki sa travay ti pou ganny fer? The Watch Tower le 1 Zilyet 1920, dan en lartik avek tit “Gospel of the Kingdom” (Levanzil Rwayonm) ti eksplik sa mesaz an dizan: “Sa bon nouvel i konsernan lafen sa vye sistenm ek Rwayonm Bondye ki ganny etablir.” Sa lartik ti montre klerman kan ki sa mesaz ti pou ganny prese an dizan: “Sa mesaz i  devret ganny anonse depi letan sa gran lager [Premye Lager Mondyal] ziska ‘gran ladetres.’” Se pour sa rezon ki sa lartik ti dir: “La i lemoman . . . pour anons sa bon nouvel lo later antye avek bann manm larelizyon Kretyen.”

13. Ki mannyer The Watch Tower 1921 ti motiv bann Kretyen swazir pour annan en leta lespri volonter?

13 Eski pep Bondye ti pou ganny forse pour fer sa travay ki Zezi ti predir? Non. Sa lartik “Be of Good Courage,” (Fodre annan bokou kouraz) dan The Watch Tower le 15 Mars 1921 ti ankouraz bann Kretyen swazir pour annan en leta lespri volonter. Nou tou nou ganny ankouraze pour demann nou lekor: “Eski pa i en gran privilez ek devwar pour mwan partisip dan sa travay?” Sa lartik ti kontinyen an dizan: “Nou asire ki si ou vreman vwar li [konman en privilez pour partisip dan sa travay], ou pou parey Zeremi, ki dan son leker, parol Senyer ti ‘parey en dife pe brile dan [son] lezo’ e sa ti motiv li pour pa aret koze.” (Zer. 20:9) Sa lankourazman ti en laprev ki Zeova ek Zezi i annan konfyans dan sa bann ki siport Rwayonm.

14, 15. Dan ki fason The Watch Tower 1922, ti ankouraz bann Kretyen swazir pour tous bann dimoun?

14 Ki mannyer bann vre Kretyen i devret tous lezot avek sa mesaz Rwayonm? En pti lartik byen tousan ki ti annan pour tit “Service Essential” (Servis Esansyel) dan The Watch Tower le 15 Out 1922 ti ankouraz bann Kretyen swazir pour partisipe e “aktivman anmenn sa mesaz ki’n ganny enprimen dan bann liv ek magazin kot bann dimoun e koz avek zot devan zot laport, rann temwannyaz avek zot ki Rwayonm lesyel i pros pour vini.”

15 I kler ki depi 1919 an montan, Kris in servi son lesklav fidel e pridan pour kontinyelman repete ki privilez ek devwar en Kretyen se pour proklanm sa mesaz Rwayonm lo later. Me, ki mannyer o konmansman bann Etidyan Labib ti reakte anver sa lankourazman pour partisip dan predikasyon lo Rwayonm?

“Bann fidel pou bann volonter”

16. Ki mannyer serten ansyen elekte ti reakte ler zot ti’n ganny ankouraze pour partisip dan predikasyon?

16 Dan bann lannen 1920 ek 1930, serten pa ti dakor avek sa lide ki tou Kretyen swazir i devret partisip dan predikasyon. The Watch Tower le 1 Novanm 1927 ti eksplik sa ki ti pe arive: “I annan serten ozordi dan legliz [kongregasyon] ki annan responsabilite konman ansyen . . . ki refize ankouraz zot bann frer pour partisip dan servis e ki refize partisip dan servis zot osi. . . . Zot pa dakor avek sa nide pour al portanport pour anons sa mesaz lo Bondye, son Lerwa ek son rwayonm avek bann dimoun.” Sa lartik ti met lanfaz lo sa pwen an dizan: “Sa letan in arive pour bann ki fidel mark sa bann dimoun, evite frekant zot e dir zot ki nou pou nepli konfye zot sa responsabilite konman ansyen.” *

17, 18. Ki mannyer laplipar dan kongregasyon ti reazir anver gidans sorti kot biro prensipal e ki mannyer plizyer milyon in reakte diran sa 100 dernyen lannen?

 17 Erezman, laplipar kongregasyon ti kontan sa gidans ki biro prensipal ti donnen. Zot ti vwar li konman en privilez pour propaz sa mesaz Rwayonm. The Watch Tower le 15 Mars 1926 ti met li koumsa: “Sa bann fidel pou bann volonter, . . . pour anons sa mesaz avek bann dimoun.” Sa bann fidel ti akonplir sa parol profetik dan Psonm 110:3 e zot ti prouve ki zot ti pe volonterman siport sa Lerwa.

18 Pour sa plis ki 100 an, plizyer milyon in ofer zot lekor volonterman pour fer sa travay pour proklanm Rwayonm Bondye. Dan sa detrwa prosen sapit, nou pou vwar ki mannyer zot ti prese, bann metod ek zouti zot ti servi e ki rezilta sa ti anmennen. Me, premyerman annou vwar akoz plizyer milyon dimoun in partisip dan predikasyon volonterman, malgre ki zot viv dan en lemonn kot dimoun i met zot lekor premye. Anmezir nou egzaminen akoz, i byen pour demann nou lekor, ‘Akoz mon anons sa bon nouvel avek lezot?’

Kontinyen “rod plito Rwayonm Bondye”

19. Akoz nou swiv konsey Zezi pour kontinyen “rod plito Rwayonm Bondye”?

19 Zezi ti konsey son bann disip pour kontinyen “rod plito Rwayonm Bondye.” (Mat. 6:33) Akoz nou swiv sa konsey? Premyerman, akoz nou rekonnet lenportans sa Rwayonm, andotmo, i en priyorite dan plan Bondye. Parey nou ti vwar dan sapit avan, lespri sen in ptitapti revel bann laverite enteresan konsernan Rwayonm Bondye. Kan bann laverite lo Rwayonm i tous nou leker, nou santi nou motive pour rod plito Rwayonm Bondye.

Parey en zonm ki kontan ler i dekouver en trezor, bann Kretyen i kontan ki zot in trouv laverite lo Rwayonm (Vwar paragraf 20)

20. Ki mannyer parabol Zezi lo trezor kasyet i montre lafason ki son bann disip ti reakte anver konsey pour rod plito Rwayonm Bondye?

20 Zezi ti konnen ki son bann disip ti pou swiv sa konsey pour kontinyen rod plito Rwayonm Bondye. Get sa legzanp konsernan sa trezor kasyet. (Lir Matye 13:44.) Pandan ki i pe travay, en labourer i bat avek en trezor kasyet e deswit i rekonnet son valer. Ki i fer? “I sitan kontan ki i al vann tou sa ki i ti posede e retournen e aste sa plantasyon.” Ki nou aprann? Kan nou trouv laverite lo Rwayonm e nou rekonnet son valer, nou pou kontan pour fer bann sakrifis neseser pour ki Rwayonm Bondye i reste premye plas dan nou lavi, sa plas ki i merite. *

21, 22. Ki mannyer bann ki fidelman siport Rwayonm i montre ki zot pe rod plito Rwayonm Bondye? Donn en legzanp.

21 Bann Kretyen fidel ki siport sa Rwayonm i demontre par zot aksyon e pa zis par parol, ki zot pe rod plito Rwayonm Bondye. Zot dedye zot lavi, zot abilite ek resours pour pres sa mesaz Rwayonm. En kantite dimoun in fer sakrifis pour ki zot kapab antreprann servis a plen tan. Tou sa bann predikater in vwar pour zot menm ki Zeova i beni sa bann ki volonterman met Rwayonm premye. Get legzanp serten o konmansman menm.

 22 Avery ek Lovenia Bristow ti konmans fer pionye ansanm dan sid Leta-z-ini tar dan bann lannen 1920. Plizyer lannen pli tar, Lovenia i rakonte: “Depi sa letan, nou de Avery nou’n annan en lavi vreman gou ansanm pe fer pionye. I’n annan plizyer fwa kot nou pa ti konnen kote nou ti pou ganny larzan pour aste bennzin ouswa konmisyon. Me, lannen apre lannen, Zeova ti touzour donn nou sa ki nou ti bezwen. Nou ti zis kontinyen. Nou ti touzour annan zis sa ki nou ti bezwen.” Lovenia i rapel en fwa kan i ti pe fer pionye Pensacola, Laflorid e zot ti napa bokou larzan ek konmisyon de baz. Zot ti retourn se zot kot zot karavann e vwar de gran sak konmisyon ansanm avek en not ki ti dir, “Avek bokou lanmour sorti kot kongregasyon Pensacola.” * Ler i ti pe reflesir lo sa plizyer dizenn lannen ki i’n pase dan servis a plen tan, Lovenia i dir: “Zeova pa zanmen abandonn nou. I pa zanmen trai nou konfyans dan li.”

23. Ki mannyer ou santi anver laverite ki ou’n dekouver e ki ou determinen pour fer?

23 Pa nou tou ki kapab pres sa kantite. Nou sirkonstans i diferan. Par kont, nou tou nou kapab vwar li konman en privilez pour anons sa bon nouvel avek tou nou leker. (Kol. 3:23) Vi ki nou konn valer sa laverite lo Rwayonm ki nou’n trouve, nou pare e kontan pour fer nenport sakrifis ki nou kapab pour partisip pli plennman posib dan sa travay. Eski sanmenm ki ou determinen pour fer?

24. Lekel enn parmi bann pli gran lakonplisman sa Rwayonm pandan sa bann dernyen zour?

24 Diran sa dernyen san-t-an, sa Lerwa in vreman akonplir sa parol profetik dan Matye 24:14. I pa’n fors personn pour fer li. Apre ki zot sorti dan sa lemonn egois, son bann disip i ofer zot lekor volonterman pour prese. Lefet ki zot pe pres sa bon nouvel lo later antye, zot pe akonpli profesi Zezi konsernan siny son prezans konman Lerwa e se sanmenm ki pli gran lakonplisman sa Rwayonm pandan sa bann dernyen zour.

^ par. 5 Dan Labib, laroze i ganny asosye avek labondans.​—Zen. 27:28; Mik. 5:7.

^ par. 10 Sa trak To Whom the Work Is Entrusted ti eksplike: “The Golden Age i ganny servi dan en kanpanny pour al kaz an kaz avek sa mesaz rwayonm. . . . Apre ki sa mesaz i ganny prezante, . . . en kopi Golden Age i devret ganny kite kot sak lakour, ki swa dimoun i pran en labonnman ouswa non.” Apre sa, pour plizyer lannen bann frer ti ganny ankouraze pour ofer en labonnman pour The Golden Age ensi ki pour The Watch Tower. Konmansman le 1 Fevriye 1940, pep Zeova ti ganny ankouraze pour distribye sak kopi sa bann magazin e mark lakantite ki zot kite.

^ par. 16 Sa letan, bann ansyen ti ganny elekte dan en fason demokratik par kongregasyon. Alor, en kongregasyon ti kapab refize vot pour bann zonm ki pa ti aksepte pour prese. Sanzman konsernan apwent bann ansyen pou ganny diskite dan Sapit 12.

^ par. 20 Zezi ti fer resorti en pwen preski parey dan son legzanp konsernan en marsan ki al rod en perl ki annan gran valer. Kan i vwar li, sa marsan i vann tou sa ki i annan e aste li. (Mat. 13:45, 46) Sa de parabol i osi ansenny nou ki nou kapab aprann laverite Rwayonm dan diferan fason. Serten i tonm lo la par azar, dan en sans e lezot i rod li. Me, nenport fason ki nou’n trouv laverite, nou pare pour fer sakrifis pour ki nou met Rwayonm premye dan nou lavi.

^ par. 22 Kongregasyon sa lepok ti ganny apele companies.