Skip to content

Al lo sa dezyenm lalis

Al lo konteni

Temwen Zeova

Kreol Seselwa

Rwayonm Bondye pe dirize!

 SAPIT 7

Metod pour prese​—Servi diferan metod pour zwenn plis dimoun posib

Metod pour prese​—Servi diferan metod pour zwenn plis dimoun posib

PWEN ENPORTAN SA SAPIT

Pep Bondye i servi diferan metod predikasyon pour zwenn plis dimoun posib

1, 2. (a) Ki teknik Zezi ti servi pour kapab koz avek en gran lafoul? (b) Ki mannyer bann disip fidel Kris in swiv son legzanp e akoz?

EN GRAN lafoul i rasanble otour Zezi o bor lak, me i anbark dan en bato e al en pti zistans lo lak. Akoz? I konnen ki sirfas delo pou fer son lavwa rezonnen e ki en pli gran kantite dimoun pou kapab tann sa mesaz pli klerman.​—Lir Mark 4:1, 2.

2 Diran bann deseni avan e apre ki Rwayonm Bondye ti vin an egzistans, bann disip fidel Kris ti swiv son legzanp, an servan bann nouvo teknik pour propaz sa bon nouvel Rwayonm avek plis dimoun posib. Anba direksyon zot Lerwa, pep Bondye pe kontinyen servi bann nouvo metod e zot adapte anmezir ki sirkonstans i sanze e nouvo teknolozi i vin disponib. Nou anvi zwenn plis dimoun posib avan lafen i arive. (Mat. 24:14) Annou vwar serten metod ki nou’n servi pour zwenn dimoun, nenport kote zot reste. Mazin osi lo bann fason ki ou kapab imit lafwa sa bann ki ti propaz sa bon nouvel o konmansman.

Bann gran lodyans

3. Kwa ki ti fer bann lennmi laverite ankoler ler nou ti servi bann zournal pour propaz laverite?

3 Zournal. Frer Russell ek son bann asosye ti’n pibliy Watch Tower depi 1879 e sa ti’n ede propaz mesaz Rwayonm avek bokou dimoun. Me apepre di-z-an avan 1914, i paret ki Kris ti’n fer en fason pour ki sa bon nouvel i ganny anonse avek plis dimoun ankor. Sa bann levennman ti konmans an 1903. Sa lannen, Dr. Ephraim Eaton, portparol en group minis Protestan Pennsylvania ti met Charles Russell o defi atraver diferan deba lo bann lansennyman Labib. Dan en let pour Charles Russell, Ephraim Eaton ti ekrir: “Mon mazinen ki en deba piblik lo serten sa bann kestyon ki mwan ek ou nou pa tonm dakor lo la ti pou vreman enteres manm piblik.” Charles Russell ek son bann asosye ti osi mazinen ki manm piblik ti pou vreman enterese, alor, zot ti aranze pour fer sa bann deba ganny pibliye dan The Pittsburgh  Gazette, en zournal popiler sa letan. Bann lartik dan zournal ti sitan popiler e leksplikasyon kler lo Labib ki Charles Russell ti donnen ti sitan atiran ki bann responsab sa zournal ti ofer pour pibliy bann diskour Charles Russell tou le semenn. Sirman, sa devlopman ti fer lennmi laverite ankoler!

Ver 1914, plis ki 2,000 zournal ti pe pibliy sermon Frer Russell

4, 5. Ki kalite Frer Russell ti demontre e ki mannyer sa bann ki annan responsabilite i kapab imit son legzanp?

4 I pa ti pran bokou letan pour lezot zournal anvi pibliy diskour Charles Russell. Ver 1908, Watch Tower ti kapab raporte ki bann diskour ti pe ganny pibliye dan “onz zournal regilyerman.” Deplis, bann frer ki ti familye avek pibliy zournal ti konsey Frer Russell ki si i ti deplas bann lofis Lasosyete Pittsburgh pour al dan lavil ki pli renonmen, i ti pou annan bann lartik lo Labib dan plis zournal. Apre ki i ti’n egzamin byen sa konsey ek lezot fakter, Frer Russell ti bouze pour etablir bann lofis Brooklyn, New York, an 1909. Avek ki rezilta? Detrwa mwan apre sa deplasman, apepre 400 zournal ti pe pibliy bann sermon ek lezot zournal osi ti anvi fer sa. Letan ki Rwayonm Bondye ti ganny etablir an 1914, plis ki 2,000 zournal dan kat langaz ti pe pibliy bann lartik ek diskour Frer Russell.

5 Ki leson enportan nou aprann avek sa devlopman? I byen pour sa bann ki annan en serten lotorite dan lorganizasyon Bondye ozordi imit limilite Frer Russell. Dan ki fason? Kan i annan bann desizyon enportan pour fer, pran an konsiderasyon konsey lezot.​—Lir Proverb 15:22.

6. Ki lefe bann lartik lo laverite dan zournal ti annan lo en dimoun?

6 Laverite lo Rwayonm ki ti ganny pibliye dan sa bann lartik zournal ti sanz lavi bokou dimoun. (Ebr. 4:12) Par egzanp, Ora Hetzel ki ti batize an 1917 ti enn parmi bokou ki ti tann koz lo laverite pour premye fwa atraver sa bann lartik. Ora ti dir: “Apre ki mon ti’n marye, mon ti al vizit mon manman Rochester, Minnesota. Kan mon ti ariv laba, mon ti vwar li pe dekoup bann lartik dan en zournal. I ti bann sermon Frer Russell. Manmi ti eksplik mwan bann keksoz ki i ti’n aprann ladan.” Ora ti aksepte sa laverite ki i ti pe aprann e pour apepre swasant an i’n en proklanmater Rwayonm fidel.

7. Akoz bann frer responsab ti reegzamin sa lide pour servi zournal?

7 An 1916, de levennman enportan ti fer sa bann ki ti responsab reegzamin itilizasyon zournal pour propaz sa bon nouvel. Premyerman, Premye Lager Mondyal ki ti pe arive sa letan ti fer li difisil pour ganny bann materyo ki ti neseser pour lenprimri. An 1916, en rapor sorti kot nou departman zournal Langleter ti eksplik pli gran defi an dizan: “I annan zis plis ki 30 zournal ki pe pibliy bann Sermon pour lemoman. I tre probab ki sa sif pou diminyen en kantite vi ki pri papye pe monte.” Dezyenm levennman se lanmor  Frer Russell le 31 Oktob 1916. Akoz sa, The Watch Tower le 15 Desanm 1916 ti anonse: “La ki Frer Russell in mor, bann sermon [dan zournal] pou konpletman aret ganny pibliye.” Menm si sa metod predikasyon ti arete, lezot metod tel ki sa “Photo-Drama of Creation” ti kontinyen anmenn bon rezilta.

8. Ki i ti enplike pour prodwir “Photo-Drama of Creation”?

8 Film ek slayd. Frer Russell ek son bann asosye ti travay dir pandan trwa-z-an pour prodwir “Photo-Drama of Creation,” ki ti ganny lanse an 1914. (Prov. 21:5) Sa Dram, parey bokou ti apel li, ti nouvo pour sa lepok. I ti en koleksyon bann pti film, lanrezistreman odyo ek bann slayd kouler. Plizyer santenn dimoun ti partisipe pour zwe bann rol dan sa bann senn Labib ki ti’n ganny filmen e menm bann zannimo ti ganny servi. En rapor 1913 i dir ki laplipar zannimo dan  en gran zou ti ganny servi pour prodwir sa film lo Noe ki ti form parti sa dram. Tandis ki bann artis sorti Lonn, New York, Pari ek Filadelfi ti penn bann pti bout vit enn par enn pour prepar sa plizyer santenn slayd ki ti annan dan sa prezantasyon.

9. Akoz en kantite zefor ek letan ti ganny mete pour prodwir “Photo-Drama”?

9 Akoz sitan kantite letan ek depans ti ganny mete pour fer sa “Photo-Drama”? En rezolisyon ki ti ganny pran dan bann lasanble distrik 1913 ti eksplike ki ‘i ti remarkab ki bann zournal Ameriken ki ti servi bann kartoun ek portre ti annan bokou sikse pour tous piblik e osi ki bann film ti vin deplizanpli popiler akoz zot ti prezant bann lenformasyon dan en fason varye e nouvo. Pour sa rezon, nou krwar ki nou osi nou bezwen kontinyen amelyor nou bann metod lansennyman e ki i toutafe zistifye e itil ki nou osi nou fer nou mye pour servi bann prezantasyon slayd ek film pour desarz pli byen nou rol konman bann ki ansenny e pres lo Labib dan en fason atiran e efikas.’

Anler: En lasanm kot teknisyen ti zwe “Photo-Drama”; anba: Slayd an vit “Photo-Drama”

10. Ki kantite landrwa “Photo-Drama” ti ganny zwe?

10 Diran lannen 1914, “Photo-Drama” ti ganny montre dan 80 lavil sak zour. Pros wit milyon dimoun Leta-z-ini ek Kanada ti vwar sa prezantasyon. Sa menm lannen, “Photo-Drama” ti ganny montre Dennmark, Finlenn, Lalmanny, Langleter, Lanorvez, Laswed, Laswis, Lostrali ek Nouvel Zelann. En pli pti versyon sa dram, enn kot i ti napa film ti ganny prepare pour ganny servi dan bann pli pti lavil. I ti ganny apele “Eureka Drama” e i ti pli bon marse pour prodwir e fasil pour transporte. Ver 1916, “Photo-Drama” ek “Eureka Drama” ti’n ganny tradwir an Alman, Armenian, Dano-Norwegian, Espanyol, Franse, Grek, Italyen, Polish ek Swedish.

Diran lannen 1914, “Photo-Drama” ti ganny zwe dan bann lasal plen

11, 12. Ki lefe “Photo-Drama” ti annan lo en zenn onm e ki legzanp i’n kite?

11 Tradiksyon Franse sa “Photo-Drama” ti annan en gran lefe lo en garson 18 an ki ti apel Charles Rohner. Charles i dir: “I ti ganny prezante Colmar, Alsace, Lafrans, lavil kot mon reste. Depi lo son konmansman mon ti enpresyonnen avek sa fason kler ki laverite dan Labib ti pe ganny prezante.”

12 Konman rezilta, Charles ti batize e an 1922 i ti antreprann servis a plen tan. Premye privilez ki i ti gannyen, se pour ede prezant “Photo-Drama” avek bann lodyans Lafrans. Pour dekrir sa travay, Charles ti dir: “Mon ti annan diferan louvraz: zwe vyolon, serviter kont ek serviter piblikasyon. Mon ti osi ganny demande pour fer lodyans reste trankil avan progranm i konmanse. Pandan poz, nou ti ofer bann piblikasyon avek lodyans. Sak frer oubyen ser ti okip en seksyon lasal. Sakenn ti annan piblikasyon dan lanmen e zot ti apros sak dimoun dan zot seksyon. An plis ki sa, kot larantre lasal, nou ti met bann latab ranpli avek piblikasyon.” An  1925, Charles ti ganny envite pour servi dan Betel Brooklyn, New York. Laba, i ti ganny sa responsabilite pour diriz en lorkes pour nouvo stasyon radyo WBBR. Apre ki nou’n vwar legzanp Frer Rohner, nou kapab demann nou lekor, ‘Eski mon pare pour aksepte nenport privilez mon gannyen pour ede propaz sa mesaz Rwayonm?’​—Lir Izai 6:8.

13, 14. Ki mannyer radyo ti ganny servi pour propaz sa bon nouvel? (Vwar osi bwat “ Progranm lo WBBR” ek “ En lasanble vreman enportan.”)

13 Radyo. Dan bann lannen 1920, travay avek “Photo-Drama” ti konmans diminyen, me radyo ti aprezan en bon mwayen pour propaz sa bon nouvel Rwayonm. Le 16 Avril 1922, Frer Rutherford ti fer son premye transmisyon lo radyo dan Metropolitan Opera House dan lavil Filadelfi, Pennsylvania. Dapre estimasyon, apepre 50,000 dimoun ti tann sa diskour “Millions Now Living Will Never Die” (Plizyer milyon ki pe viv konmela pa pou zanmen mor). Apre, an 1923, i ti annan premye transmisyon en lasanble distrik. Apard servi bann stasyon radyo komersyal, bann responsab lorganizasyon ti mazinen ki i ti pou pli bon etabli zot prop stasyon radyo ki ti ganny konstri Staten Island, New York e i ti ganny anrezistre konman WBBR. Premye transmisyon ti ganny fer le 24 Fevriye 1924.

An 1922, apepre 50,000 dimoun ti tann sa diskour “Millions Now Living Will Never Die” lo radyo

14 Pour eksplik bi radyo WBBR, The Watch Tower le 1 Desanm 1924 ti dir: “Nou santi ki radyo i sa mwayen pli ekonomik e efikas ki nou’n servi pour propaz sa mesaz laverite.” I ti osi azoute: “Si Senyer i santi i bon konstri lezot stasyon radyo pour propaz sa bon nouvel, i pou donn nou sa larzan dan en fason ou en lot.” (Ps. 127:1) Ver 1926, pep Zeova ti propriyeter sis stasyon radyo. De ti Leta-z-ini, WBBR ti New York e WORD ti pros avek Chicago. Lezot kat ti Kanada, dan lavil Alberta, British Columbia, Ontario ek Saskatchewan.

15, 16. (a) Ki mannyer bann sef relizye Kanada ti reakte anver nou bann transmisyon lo radyo? (b) Ki mannyer bann diskour lo radyo ek predikasyon kaz an kaz ti mars byen ansanm?

15 Bann sef relizye ti okouran ki sa bann transmisyon laverite lo Labib ti pe ganny fer lo radyo. Albert Hoffman, ki ti familye avek travay ki ti pe ganny fer kot stasyon radyo Saskatchewan, Kanada ti dir: “Plis dimoun ankor ti konmans konn bann Etidyan Labib [konmela Temwen Zeova]. En gran temwannyaz ti ganny rann ziska 1928 ler bann sef relizye ti met presyon lo bann zofisye gouvernman e tou bann stasyon ki bann Etidyan Labib ti annan Kanada ti perdi zot laysenns.”

16 Menm si nou bann stasyon radyo ti’n fermen, bann sermon lo Labib ti kontinyen ganny transmet lo bann radyo komersyal. (Mat. 10:23) Pour ogmant lefikasite sa bann progranm, dan The Watch Tower ek The Golden Age (konmela Awake!) i ti annan en lalis bann stasyon komersyal ki ti  transmet laverite lo Labib pour ki bann proklanmater ki ti pe al portanport ti kapab ankouraz bann dimoun pour ekout sa bann diskour lo zot stasyon radyo lokal. Ki lefe sa ti annan? Bulletin Zanvye 1931 ti dir: “Sa bann progranm radyo in vreman ed bann frer ek ser ki pres portanport en kantite. I annan plizyer rapor ki’n antre kot lofis ki’n met nou okouran ki en kantite dimoun pe ekoute e lefet ki zot ti’n tann bann diskour Frer Rutherford, zot ti pare pour aksepte bann liv ki zot ti ganny ofer.” Bulletin ti dekrir sa bann progranm lo radyo ek predikasyon kaz an kaz konman sa “de pli gran metod ki lorganizasyon Senyer pe servi pour propaz sa bon nouvel.”

17, 18. Menm si sirkonstans ti sanze, ki mannyer radyo ti kontinyen zwe en rol pour propaz sa bon nouvel?

17 Dan bann lannen 1930, i ti annan en kantite lopozisyon pour nou servi bann stasyon radyo komersyal. Alor, tar dan bann lannen 1937, pep Zeova ti adapte avek bann sirkonstans ki ti pe sanze. Zot ti aret fer transmisyon lo radyo komersyal e konsantre plis lo predikasyon kaz an kaz. * Kantmenm sa, radyo ti kontinyen zwe en rol enportan pour propaz sa bon nouvel dan bann landrwa lwen e izole. Par egzanp, depi 1951 ziska 1991, en stasyon Was Berlin, Lalmanny ti regilyerman transmet bann diskour baze lo Labib pour ki sa bann ki reste dan sa rezyon, ki sa letan ti dan Les Lalmanny, ti kapab tann sa mesaz Rwayonm. Konmansman 1961 e pour plis ki trant an apre sa, en stasyon radyo nasyonal Suriname, Sid Lanmerik ti transmet en progranm 15 minit tou le semenn pour propaz laverite. Depi 1969 ziska 1977, lorganizasyon ti prodwir plis ki 350 progranm radyo rikorde dan sa seri “All Scripture Is Beneficial” (Tou Lekritir i itil). Dan 48 leta (Leta-z-ini), 291 stasyon radyo ti zwe sa progranm. An 1996, en stasyon radyo Apia, ki ti kapital ek lavil Samoa dan Sid Pasifik, ti transmet en progranm tou le semenn apele “Answers to Your Bible Questions” (Larepons bann kestyon lo Labib).

18 Ver lafen ventyenm syek, radyo ti nepli zwe en rol enportan pour propaz sa bon nouvel. Par kont, en lot teknolozi ti pe konmans ganny servi dan en fason ki ti pou fer li posib pour pres avek en pli gran lodyans ankor.

19, 20. Akoz pep Zeova in entrodwir jw.org e ki lefe sa in annan? (Vwar osi bwat “ JW.ORG.”)

19 Enternet. Depi 2013, plis ki 2.7 bilyon dimoun, preski 40 poursan popilasyon lemonn ti konnekte avek Enternet. Dapre serten estimasyon, apepre de bilyon i annan akse avek li lo zot telefonn ouswa tablet. Sa sif i kontinyelman ogmante dan lemonn, me pli gran ogmantasyon pour servi Enternet lo telefonn pe aktyelman arive Lafrik kot i annan plis ki 90 milyon dimoun ki annan Enternet lo zot telefonn.  Sa bann devlopman in sanz bokou lafason ki dimoun i ganny lenformasyon.

20 Konmansman 1997, pep Zeova ti adopte sa metod ek mwayen kominikasyon ki bokou dimoun pe servi. An 2013, sit jw.org ti disponib dan apepre 300 langaz e bann lenformasyon baze lo Labib ti disponib dan plis ki 520 langaz. Sak zour, apepre 750,000 diferan dimoun ti al lo sa sit e lir bann lenformasyon ouswa get bann video. Sak mwan, apard get video, dimoun i download plis ki 3 milyon liv, 4 milyon magazin ek 22 milyon progranm odyo.

21. Ki nou aprann avek leksperyans Sina?

21 Sa sit in vin en metod efikas pour propaz sa bon nouvel lo Rwayonm Bondye, menm dan bann pei kot predikasyon i anba restriksyon. Par egzanp, o konmansman 2013, en zonm ki apel Sina ti trouv sa sit jw.org e i ti telefonn biro prensipal Leta-z-ini pour demann plis lenformasyon lo Labib. Akoz sa koudtelefonn ti en pe drol? Sina i sorti dan en fanmir Mizilman e i reste dan en vilaz izole dan en pei kot predikasyon Temwen Zeova i enterdi. Apre sa koudtelefonn, laranzman ti ganny fer pour ki Sina i kapab etidye Labib de fwa par semenn avek en Temwen Leta-z-ini. Sa letid ti ganny fer atraver sistenm video lo Enternet.

Ansenny endividyelman

22, 23. (a) Eski metod pour zwenn plis dimoun alafwa in ranplas predikasyon portanport? (b) Ki mannyer sa Lerwa in beni nou zefor?

22 Napa enn parmi sa bann metod ki nou’n servi pour zwenn plis dimoun, tel ki “Photo-Drama,” bann progranm radyo ek sit Enternet ki’n ranplas nou predikasyon portanport.  Akoz? Parski pep Zeova i swiv menm metod ki Zezi. I ti fer plis ki pres avek bann gran lafoul, i ti ed lezot endividyelman. (Lik 19:1-5) Zezi ti osi form son bann disip pour koz avek bann dimoun endividyelman e i ti donn zot en mesaz pour anonse. (Lir Lik 10:1, 8-11.) Parey nou ti vwar dan Sapit 6, sa bann ki responsab in toultan ankouraz sak serviter Zeova pour koz avek bann dimoun endividyelman.​—Akt 5:42; 20:20.

23 San-t-an apre ki Rwayonm Bondye in vin an egzistans, plis ki 7.9 milyon proklanmater i aktivman partisipe pour ansenny lezot plan Bondye. San okenn dout, sa Lerwa in beni bann metod ki nou’n servi pour anons sa Rwayonm. Parey sapit ki swiv pou montre, i’n donn nou bann zouti ki nou bezwen pour propaz sa bon nouvel avek sak nasyon, tribi ek langaz.​—Rev. 14:6.

^ par. 17 An 1957, bann responsab ti deside ferm nou dernyen stasyon radyo WBBR New York.