Skip to content

Al lo sa dezyenm lalis

Al lo konteni

Temwen Zeova

Kreol Seselwa

Rwayonm Bondye pe dirize!

 SAPIT 5

Sa Lerwa i donn plis leklersisman lo sa Rwayonm

Sa Lerwa i donn plis leklersisman lo sa Rwayonm

PWEN ENPORTAN SA SAPIT

Pep Bondye ti arive konpran serten laverite enportan konsernan sa Rwayonm, son bann dirizan ek son bann sitwayen e osi lenportans fidelite

1, 2. Dan ki sans Zezi ti en gid saz?

FER krwar ou parmi en group touris ki en gid pe anmennen pour vizit en zoli lavil. Ou ek lezot dimoun pa konn sa lavil, alor ou ekout byen atantivman tou sa ki sa gid pe dir. Par ler, ou ek lezot touris i kapab pe mazin lezot laspe sa lavil ki zot pa ankor trouve. Me kan ou demann sa gid sa lenformasyon, i pa dir ou nanryen ziska ki zot pros pour ariv kot sa landrwa spesifik. Avek letan, ou pli konpran ki sa gid in fer sa akoz i ti anvi dir ou sa ki ou bezwen konnen sa moman menm ki ou devret konn sa keksoz.

2 Bann vre Kretyen i dan preski menm sityasyon ki sa bann touris. Nou kontan pour aprann konsernan sa pli zoli lavil, “sa lavil avek fondasyon solid,” andotmo, Rwayonm Bondye. (Ebr. 11:10) Kan Zezi ti lo later, i ti personnelman gid son bann disip par donn zot en pli gran konnesans lo sa Rwayonm. Eski i ti reponn tou zot kestyon e dir zot tou keksoz lo sa Rwayonm en sel kou? Non. I ti dir: “Mon annan ankor en kantite keksoz pou dir zot, me zot pa kapab siport tousala pour le moman.” (Zan 16:12) Konman sa gid pli saz, Zezi pa ti dir son bann disip bann keksoz ki zot pa ti pou kapab arive konpran.

3, 4. (a) Dan ki fason Zezi in kontinyen ansenny bann dimoun fidel konsernan Rwayonm Bondye? (b) Ki nou pou egzaminen dan sa sapit?

3 Zezi ti dir sa parol ki dan Zan 16:12 sa dernyen zour swar avan son lanmor. Apre son lanmor, ki mannyer i ti pou kapab kontinyen ansenny bann dimoun fidel konsernan Rwayonm Bondye? I ti asir son bann zapot: “Kan Lespri laverite i vini, i pou gid zot dan laverite an antye.” * (Zan 16:13) Petet nou mazin lespri sen konman en gid byen pasyan. Se lespri sen ki Zezi i servi pour ansenny son bann disip sa ki zot bezwen konnen lo Rwayonm Bondye, zis sa moman ki zot bezwen konn li.

4 Annou vwar ki mannyer lespri sen Zeova in gid bann Kretyen senser pour ganny en pli gran konnesans lo sa Rwayonm. Premyerman, nou pou egzamin nou konprenezon lo kan ki Rwayonm Bondye ti konmans dirize. Apre  sa, nou pou vwar lekel sa bann ki pou dirizan dan sa Rwayonm e ki lespwar zot ek bann sitwayen sa Rwayonm i annan. Finalman, nou pou vwar ki mannyer bann disip Kris ti konpran pli byen ki i enplike pour reste fidel avek sa Rwayonm.

Konprenezon lo sa lannen enportan

5, 6. (a) Ki fo pwennvi bann Etidyan Labib ti annan konsernan dat ki Rwayonm Bondye ti ganny etablir ek sezon rekolt? (b) Akoz sa fo pwennvi pa ti senm dout si vreman Zezi ti pe gid son disip?

5 Parey nou ti vwar dan Sapit 2 sa liv, bann Etidyan Labib ti ansennyen pour plizyer dizenn lannen ki lannen 1914 ti pou en lannen vreman enportan pour akonplir profesi Labib. Me, sa letan zot ti krwar ki prezans Kris ti’n konmanse depi 1874, i ti’n konmans dirize dan lesyel an 1878 e sa Rwayonm pa ti pou’n antyerman etablir avan Oktob 1914. Zot ti krwar ki rekolt ti pou konmans an 1874 e fini an 1914 ler bann Kretyen swazir ti pou finalman ganny rasanble dan lesyel. Eski bann lide koumsa i fer nou annan dout si Zezi ti pe vreman gid sa bann zonm fidel atraver lespri sen?

6 Pa ditou! Rapel sa legzanp nou’n servi o konmansman. Eski pwennvi ouswa kestyon sa bann touris ti pou senm okenn dout dan lespri lezot ki sa gid pa kalifye? Definitivman non! Pareyman, menm si par ler pep Bondye i esey konpran serten detay dan plan Zeova avan ki sa ler i arive pour lespri sen gid zot pour konpran sa bann laverite, i evidan ki Zezi pe gid zot. Alor, bann ki fidel i pare pour les zot ganny korize e avek limilite zot aziste zot pwennvi.​—Zak 4:6.

7. Ki leklersisman spirityel pep Bondye ti gannyen?

7 Dan bann lannen apre 1919, pep Bondye ti ganny plis leklersisman spirityel. (Lir Psonm 97:11.) An 1925, i ti annan en lartik enportan avek tit “Birth of the Nation” (En nasyon i vin an egzistans) dan The Watch Tower. I ti fer resorti bann levidans sorti dan Labib ki sa Rwayonm kot Kris i dirize konman Lerwa ti vin an egzistans an 1914 e sa ti pe akonpli sa profesi kot madanm Bondye dan lesyel ti pe donn nesans en zanfan, zis parey i ganny rikorde dan Revelasyon sapit 12. * Sa lartik ti montre osi ki bann persekisyon ek leprev ki pep Bondye ti eksperyanse pandan bann lannen lager ti en levidans kler ki Satan in ganny zete lo later e akoz sa, i annan “en gran lakoler, akoz i konnen ki i reste li ankor zis en pti pe letan.”​—Rev. 12:12.

8, 9. (a) Dan ki fason lenportans Rwayonm Bondye ti ganny met lanfaz lo la? (b) Ki kestyon nou pou egzaminen?

8 Ki degre enportan sa Rwayonm i ete? An 1928, The Watch Tower ti konmans met lanfaz ki sa Rwayonm ti pli enportan ki delivrans en endividi par mwayen sa ranson. Vreman, se atraver son Rwayonm ki Zeova pou arive sanktifye son non, zistifye son souvrennte e akonplir son plan an rapor avek bann imen.

 9 Lekel ki ti pou diriz avek Kris dan sa Rwayonm? Lekel ki ti pou bann sitwayen sa Rwayonm lo later? Ki travay bann disip Kris ti devret pe fer?

Rekolt bann Kretyen swazir

10. Ki pep Bondye in konpran depi lontan konsernan sa 144,000?

10 Plizyer dizenn lannen avan 1914, bann vre Kretyen ti deza konpran ki 144,000 disip swazir Kris ti pou dirize avek li dan lesyel. * Sa bann Etidyan Labib ti vwar ki sa sif ti literal e ki sa bann disip swazir ti’n konmans ganny rasanble depi premye syek N.L.

11. Ki mannyer bann ki ti pou form sa nouvel marye ti konpran ptitapti zot rol lo later?

11 Me, ki sa bann manm ki ti pou form nouvel marye Kris ti pou fer pandan ki zot lo later? Zot ti konpran ki Zezi ti’n met lanfaz lo predikasyon e alor, zot ti mazinen ki predikasyon ti relye avek letan rekolt. (Mat. 9:37; Zan 4:35) Parey nou ti vwar dan Sapit 2, pour en serten letan zot ti mazinen ki rekolt ti pou al pour 40 an e i ti pou terminen apre ki tou Kretyen swazir ti ganny rasanble dan lesyel. Me, lefet ki sa travay ti ankor pe kontinyen apre sa peryod 40 an, i ti neseser pour annan plis klarifikasyon. La aprezan, nou konnen ki sezon rekolt pour separ dible ek move zerb, setadir separ bann Kretyen swazir avek bann swadizan Kretyen, ti konmans an 1914. I ti’n ariv ler pour konsantre lo rasanbleman leres Kretyen swazir ki pou al dan lesyel.

Lannen 1914 ti mark konmansman sezon rekolt (Vwar paragraf 11)

12, 13. Ki mannyer sa de parabol Zezi konsernan sa dis vyerz ek larzan in ganny akonplir pandan bann dernyen zour?

12 Depi 1919 an montan, Kris in kontinyen gid sa lesklav fidel e pridan pour met lanfaz lo lenportans predikasyon. Zezi ti’n donn son disip sa responsabilite pour prese dan premye syek. (Mat. 28:19, 20) I ti osi montre ki bann kalite bann Kretyen swazir ti pou bezwen annan pour zot akonpli sa misyon pour prese. Ki mannyer? Dan son parabol lo sa dis vyerz, i ti montre ki bann Kretyen swazir ti pou bezwen kontinyen veye e reste vizilan spirityelman si zot ti anvi atenn zot bi pour partisip dan festen maryaz dan lesyel zour Kris ti pou reini avek sa 144,000 Kretyen swazir, son “nouvel-marye.” (Rev. 21:2) Apre sa, dan son parabol konsernan larzan, Zezi  ti ansennyen ki son bann serviter swazir ti pou bezwen devoue pour fer byen sa travay predikasyon ki i ti’n donn zot.​—Mat. 25:1-30.

13 Sa bann Kretyen swazir ti montre ki zot ti vizilan e devoue pandan sa syek ki’n pase. Pour sa rezon, nou asire ki zot pou ganny rekonpanse akoz zot in reste vizilan. Par kont, eski sa travay rekolt ti zis pour rasanble sa 144,000 ki pou diriz avek Zezi?

Sa Rwayonm i rasanble bann sitwayen ki pou viv lo later

14, 15. Ki sa kat diferan group ki liv The Finished Mystery ti koz lo la?

14 I fer en bann lannen depi ki bann zonm ek fanm fidel in kirye pour konn lidantite sa “gran lafoul” (oubyen “Great multitude,” dapre King James Version) ki ganny mansyonnen dan Revelasyon 7:9-14. I pa drol ki avan ki i ti’n ariv ler pour Kris revel lidantite sa gran lafoul, sa kantite ki ti’n ganny dir lo sa size ti diferan avek sa laverite kler e senp ki nou konnen e kontan ozordi.

15 An 1917, sa liv The Finished Mystery ti dir ki i annan de kalite lespwar pour bann ki al dan lesyel e de kalite lespwar pour bann ki pou viv lo later. Lekel ki ti form parti sa kat group dimoun ki ti pou annan sa kat diferan lespwar pour ganny sove? Premyerman, i ti annan sa 144,000 ki ti pou dirize avek Kris. Dezyenmman, i ti annan sa gran lafoul ki sa letan nou ti krwar i manm bann diferan larelizyon swadizan Kretyen. Zot ti annan en serten kantite lafwa, me i pa ti ase pour zot demontre en lentegrite ferm. Alor, zot ti pou ganny en pozisyon enferyer dan lesyel. Tandis ki lo later, i ti pou annan en trwazyenm group, andotmo, bann “ancient worthies,” setadir, bann dimoun fidel parey Abraam, Moiz ek lezot ki ti pou annan lotorite lo sa katriyenm group ki ti reprezant limanite an zeneral.

16. Ki leklersisman spirityel i ti annan an 1923 ek 1932?

16 Ki mannyer lespri sen ti ed bann disip Kris pour annan sa konprenezon ki nou annan ozordi? I ti ariv ptitapti, atraver plizyer leklersisman spirityel. Depi bann lannen 1923, The Watch Tower ti atir latansyon lo en group ki ti napa lespwar pour viv dan lesyel me ki ti pou viv lo later anba dominasyon Kris. An 1932, The Watchtower ti koz lo Yonadab (Yeonadab), ki ti reste atase avek Yeou, sa lerwa Izraelit pour siport li dan son lalit kont fo ladorasyon. (2 Rwa. 10:15-17) Sa lartik ti dir ki i annan en group dimoun dan letan modern ki parey Yonadab e i ti dir ki Zeova ti pou fer sa group “travers Armagedon” pour viv isi lo later.

17. (a) Ki leklersisman spirityel i ti annan an 1935? (b) Ki lefe sa nouvo konprenezon lo sa gran lafoul ti annan lo bann Kretyen fidel? (Vwar bwat “ Bokou ti soulaze.”)

17 An 1935, i ti annan en gran leklersisman spirityel. Pandan lasanble distrik dan lavil Washington, sa gran lafoul ti ganny idantifye konman sa group ki ti pou viv lo later e zot  menm zot sa bann mouton ki Zezi ti koz lo la dan son parabol lo mouton ek kabri. (Mat. 25:33-40) Sa gran lafoul ti pou form parmi ‘lezot mouton’ ki Zezi ti koz lo la ler i ti dir: “Mon bezwen anmenn zot osi.” (Zan 10:16) Kan orater, Joseph Rutherford ti demande: “Eski tou sa bann ki annan lespwar pour viv pour touzour lo later i kapab debout silvouple?,” plis ki lanmwatye lodyans ti debout! I ti dir: “Gete!, la sa gran lafoul!” Alafendefen, en kantite ti kontan pour konpran zot lespwar pour lavenir.

18. Lo kwa bann disip Kris ti konsantre dan predikasyon e avek ki rezilta?

18 Depi sa, Kris in gid son pep pour fer plis zefor pour rasanble bann manm sa gran lafoul ki pou pas sa gran ladetres sen e sof. O konmansman, sa rasanbleman pa ti paret enpresyonan. Frer Rutherford ti fer sa komanter en fwa: “I paret konmsi sa ‘gran lafoul’ pa pou sitan gran apre tou.” Byensir, aprezan nou konnen ki Zeova in vreman beni rekolt depi sa letan! Anba gidans Zezi ek lespri sen, bann Kretyen swazir ensi ki zot konpanyon ‘lezot mouton’ in vin sa ki Zezi li menm ti predir. Zot “en sel troupo” ki pe servi ansanm anba gidans “en sel berze.”

Frer Rutherford pa ti kapab vwar davans logmantasyon gran lafoul (A gos ziska a drwat: Nathan Knorr, Joseph Rutherford, ek Hayden Covington)

19. Ki nou kapab fer pour ede pour ki gran lafoul i ogmante?

19 Lamazorite bann imen fidel pou reste pour touzour lo later ki pou’n vin en paradi e zot pou ganny dirize par Kris ek sa 144,000 ki pou diriz ansanm avek li. Eski pa i en plezir pour mazin lafason ki Kris in gid pep Bondye pour annan sa lespwar kler baze lo Labib? Pa i vreman en gran privilez pour partaz sa lespwar avek bann dimoun ki nou zwenn dan predikasyon! Annou kontinyen reste devoue tan ki nou sirkonstans i permet nou pour ki sa gran lafoul i kontinyen ogmante e vin bokou plis ankor pour loue non Zeova!​—Lir Lik 10:2.

Gran lafoul pe kontinyelman ogmante

Ki i enplike pour fidel avek Rwayonm Bondye

20. Ki eleman ki form parti lorganizasyon Satan e dan ki fason fidelite bann Kretyen i enplike?

20 Anmezir pep Bondye ti kontinyen aprann konsernan son Rwayonm, zot ti osi bezwen konpran klerman ki i enplike pour reste fidel avek sa gouvernman dan lesyel. Anliny avek sa, an 1922, The Watch Tower ti fer resorti ki i annan de lorganizasyon, sa ki pour Zeova e sa ki pour Satan. Lorganizasyon Satan i enplik bann eleman komersyal, relizye e politik. Sa bann ki fidel avek Rwayonm Bondye anba direksyon Kris pa devret fer konpromi an rapor avek zot fidelite par enterfer dan okenn laspe lorganizasyon Satan. (2 Kor. 6:17) Ki sa i vedir?

21. (a) Ki mannyer lesklav fidel in averti pep Bondye konsernan bann gran biznes? (b) An 1963, ki The Watchtower ti dir lo “Gran Babilonn”?

21 Nouritir spirityel sorti kot lesklav fidel in toultan denons koripsyon dan bann gran biznes e i’n averti pep Bondye pour pa tonm dan materyalizm. (Mat. 6:24) Pareyman, nou bann piblikasyon in kontinyelman koz bokou lo bann fo lansennyman lorganizasyon Satan. An 1963, The Watchtower ti montre klerman ki “Gran Babilonn” pa ti pe zis reprezant  bann larelizyon Kretyen, me tou bann fo larelizyon dan lemonn. Alor, parey nou pou vwar pli an detay dan Sapit 10 sa liv, pep Bondye dan tou pei ek kiltir in ganny ede pour “sorti dan sa lavil” e pirifye zot lekor avek tou fo pratik relizye.​—Rev. 18:2, 4.

22. Diran Premye Lager Mondyal, ki mannyer bokou dan pep Bondye ti konpran sa parol dan Romen 13:1?

22 Me, ki pour dir konsernan laspe politik lorganizasyon Satan? Eski bann vre Kretyen i kapab pran par dan lager ek konfli ant bann nasyon? Pandan Premye Lager Mondyal, bann Etidyan Labib ti konpran ki bann disip Kris pa ti devret donn lanmen touy lezot. (Mat. 26:52) Par kont, pour plizyer lezot, zot ti panse ki sa parol dan Romen 13:1 ki dir soumet “avek bann lotorite” ti vedir ki zot devret antre dan larme, met liniform solda e menm annan zarm, me ler zot ti ganny demande pour touy zot lennmi, zot ti fiziye dan lezer.

23, 24. Ki nou ti konpran dapre Romen 13:1 pandan Dezyenm Lager Mondyal e ki mannyer bann disip Kris ti ganny gide pour annan en pli bon konprenezon?

23 Anmezir ki Dezyenm Lager Mondyal ti pe konmanse an 1939, The Watchtower ti koz o profon lo pa pran kote dan lager. Sa lartik ti montre klerman ki bann Kretyen pa ti devret pran par dan okenn lager ek konfli ant bann nasyon dan lemonn Satan. Pa sa ti en gidans zis aler! Bann disip Kris ti alor ganny proteze avek versman disan ki ti ravaz bann nasyon pandan sa lager. Me, o konmansman 1929, nou bann piblikasyon ti’n osi montre ki sa bann lotorite ki dan Romen 13:1 pa ti bann dirizan imen, me Zeova ek Zezi. En konprenezon pli kler ti neseser.

 24 Lespri sen ti gid bann disip Kris pour konpran sa an 1962 ler bann lartik enportan baze lo Romen 13:1-7 ti ganny pibliye dan The Watchtower le 15 Novanm ek le 1 Desanm. Finalman, pep Bondye ti konpran sa prensip lo soumisyon ki Zezi ti’n koz lo la kan i ti dir: “Rann Sezar sa ki pour Sezar, e Bondye sa ki pour Bondye!” (Lik 20:25) Bann vre Kretyen i aprezan konpran ki sa bann lotorite siperyer se bann lotorite gouvernmantal dan sa lemonn e ki bann Kretyen i devret soumet avek zot. Par kont, i annan en kondisyon. Kan sa bann lotorite gouvernmantal i demann nou pour dezobei Zeova, nou larepons pou parey bann zapot ki ti dir: “Nou devre obei Bondye plito ki zonm.” (Akt 5:29) Dan Sapit 13 ek 14 dan sa liv, nou pou aprann plis konsernan ki mannyer pep Bondye in met an pratik sa prensip par pa pran par dan bann zafer politik oubyen lager.

Pa i en gran privilez pour partaz lespwar ki dan Labib konsernan lavi eternel!

25. Akoz ou apresye gidans lespri sen pour arive konpran Rwayonm Bondye?

25 Mazin tou sa ki bann disip Kris in ganny ansennyen konsernan Rwayonm Bondye pandan sa dernyen syek. Nou’n aprann kan ki Rwayonm Bondye ti ganny etablir dan lesyel e ki degre enportan i ete. Nou konpran klerman sa de lespwar ki bann serviter fidel Bondye i annan, setadir lespwar pour viv dan lesyel ek lo later. Nou osi konnen konman pour demontre nou fidelite anver Rwayonm Bondye an menm tan ki nou soumet avek bann lotorite dan sa lemonn. Demann ou lekor, ‘Eski mon ti pou konn sa bann laverite presye si Zezi Kri pa ti’n gid son lesklav fidel lo later pour konpran zot epi ansenny zot?’ Pa i vreman en benediksyon ki nou annan Kris ek lespri sen pour gid nou!

^ par. 3 Dapre en liv referans, sa mo Grek ki’n ganny tradwir “gid” dan sa verse i vedir “montre semen.”

^ par. 7 Avan sa letan, nou ti mazinen ki sa vizyon ti pe montre ki i ti pou annan en lager ant bann larelizyon dan Lanpir payen Ronm ek Legliz Katolik Romen.

^ par. 10 Zen 1880, Zion’s Watch Tower ti dir ki sa 144,000 ti pou bann Zwif ki ti pou ganny konverti ziska 1914. Me, pli tar lannen 1880, en konprenezon en pti pe pli pros e ki preski koresponn avek sa ki nou konpran ozordi ti ganny pibliye.