Skip to content

Al lo sa dezyenm lalis

Al lo konteni

Temwen Zeova

Kreol Seselwa

Bon nouvel sorti kot Bondye!

 LESON 4

Ki sennla Zezi Kri?

Ki sennla Zezi Kri?

1. Ki mannyer lavi Zezi ti konmanse?

Ki bann kalite ki ti fer bann dimoun anvi apros Zezi?MATYE 11:29; MARK 10:13-16.

Zezi ti diferan avek lezot imen akoz i ti viv konman en lanz dan lesyel avan ki i ti ne lo later. (Zan 8:23) Zezi ti premye kreasyon Bondye e i ti donn Zeova lanmen kre tou lezot keksoz. Zis li ki ti ganny kree direkteman par Zeova, sanmenm rezon i ganny apele “sel Garson” Bondye. (Zan 1:14) Zezi ti Portparol Bondye, se pour sa rezon ki i ganny apele “Laparol.”Lir Proverb 8:22, 23, 30; Kolosyen 1:15, 16.

2. Akoz Zezi ti vin lo later?

Bondye ti anvoy son Garson lo later ler i ti transfer lavi Zezi dan vant Mari, en vyerz Zwif. Anfet, papa Zezi pa ti en zonm. (Lik 1:30-35) Zezi ti vin lo later pour (1) ansenny laverite lo Bondye, (2) pour kit en legzanp lo konman pour fer lavolonte Bondye menm ler nou pas dan difikilte e (3) donn son lavi parfe konman “en pri” oubyen ranson.Lir Matye 20:28.

3. Akoz nou bezwen en ranson?

En ranson i en pri ki ganny peye pour larg en dimoun ki son lavi i an danze. (Egzod 21:29, 30) I pa ti dan plan Bondye pour bann imen vin vye e mor. Ki mannyer nou konn sa? Parski Bondye ti dir Adan sa premye zonm, ki si i ti fer sa ki Labib i apel “pese,” i ti pou mor. Si Adan pa ti’n fer pese, i pa ti pou’n zanmen mor. (Zenez 2:16, 17; 5:5) Dapre Labib, lanmor in “antre” dan lemonn akoz Adan. Alor,  tou desandans Adan in erit pese ek son konsekans setadir lanmor. Nou bezwen sa ranson pour nou ganny libere avek sa santans lanmor ki nou’n erite avek Adan.Lir Romen 5:12; 6:23.

Lekel ki ti kapab pey sa ranson pour liber nou avek lanmor? Ler nou mor, nou zis pey pour konsekans nou prop pese. Me napa en imen enparfe ki kapab pey pour pese lezot.Lir Psonm 49:7-9.

4. Akoz Zezi ti mor?

Zezi ti diferan avek nou akoz i ti parfe. Pour sa rezon, i pa ti bezwen mor pour son pese akoz i pa ti zanmen komet okenn pese. Plito, i ti mor pour pese lezot dimoun. Bondye in demontre son lanmour ekstraordiner pour limanite, par anvoy son Garson pour mor pour nou. Zezi ti osi demontre lanmour pour nou akoz i ti obeir son Papa e donn son lavi pour nou bann pese.Lir Zan 3:16; Romen 5:18, 19.

5. Ki Zezi pe fer la konmela?

Ler i ti lo later, Zezi ti geri bann malad, resisit dimoun mor e ed bann ki ti an danze. Dan sa fason, i ti pe montre sa ki i ti pou fer a lavenir pour bann imen obeisan. (Matye 15:30, 31; Zan 5:28) Zezi ti mor, me apre sa Bondye ti redonn li lavi konman en lespri dan lesyel. (1 Pyer 3:18) Apre sa, Zezi ti espere dan kote drwat Bondye ziska ki Zeova ti donn li pouvwar pour diriz later konman Lerwa. (Ebre 10:12, 13) La konmela, Zezi i en Lerwa dan lesyel e son bann disip pe anons sa bon nouvel partou lo later.Lir Danyel 7:13, 14; Matye 24:14.

Byento, Lerwa Zezi pou servi son lotorite pour anmenn en lafen avek tou soufrans ek bann ki fer lezot soufer. Tou bann ki demontre lafwa dan Zezi par obeir li pou viv dan Paradi lo later.Lir Psonm 37:9-11.