Skip to content

Al lo sa dezyenm lalis

Al lo konteni

Temwen Zeova

Kreol Seselwa

Bon nouvel sorti kot Bondye!

 LESON 8

Akoz Bondye i permet lemal ek soufrans?

Akoz Bondye i permet lemal ek soufrans?

1. Ki mannyer lemal ti konmanse?

Bondye in donn zonm ase letan pour prouve si zot kapab rezourd zot bann problenm zot menm

Lemal lo later ti konmanse kan Satan ti koz sa premye mansonz. O konmansman, Satan ti en lanz parfe, me i pa ti reste ferm dan laverite. (Zan 8:44) I ti anvi ganny sa ladorasyon ki zis Bondye ki merit gannyen. Satan ti koz manti avek sa premye madanm Ev e i ti persyad li pour obeir li plito ki Bondye. Adan osi ti fer parey Ev, i ti dezobeir Bondye. Desizyon Adan in anmenn soufrans ek lanmor.Lir Zenez 3:1-6, 19.

Kan Satan ti esey anbet Ev pour dezobeir Bondye, anfet i ti pe konmans rebel kont souvrennte Bondye, andotmo i ti pe rezet pozisyon Bondye konman sa Enn Tre O dan liniver. Laplipar dimoun in swazir kote Satan e zot in rezet Bondye konman zot Sef. Alor, Satan in vin “sa enn ki gouvern lemonn.”Lir Zan 14:30; 1 Zan 5:19.

2. Eski i ti annan defo dan kreasyon Bondye?

Tou sa ki Bondye i fer i parfe. Bann imen ek lanz ki Bondye ti kree ti kapab obeir Bondye parfetman. (Deterononm 32:4, 5) Bondye ti kre nou avek sa liberte pour swazir ant sa ki byen ek sa ki mal. Sa liberte ki nou’n gannyen i donn nou sa loportinite pour eksprim nou lanmour pour Bondye.Lir Zak 1:13-15; 1 Zan 5:3.

3. Akoz Bondye in permet soufrans ziska aprezan?

Pour en serten letan, Bondye in permet sa rebelyon anver son souvrennte. Akoz? Pour montre ki personn pa kapab byen dirize san son led. (Eklezyast 7:29; 8:9) Depi sa 6,000 an ki imen pe dirize, levidans  i montre ki bann dirizan imen pa’n kapab elimin lager, krim, lenzistis ouswa maladi.Lir Zeremi 10:23; Romen 9:17.

Dominasyon Bondye i diferan avek dominasyon zonm akoz dominasyon Bondye i anmenn byenfe pour bann ki aksepte li. (Izai 48:17, 18) Byento Zeova pou detrir tou bann gouvernman imen. Zis bann dimoun ki’n aksepte dominasyon Bondye ki pou reste lo later.Izai 11:9.Lir Danyel 2:44.

4. Ki pasyans Bondye i permet nou fer?

Satan in dir ki tou dimoun pou servi Bondye akoz bann rezon egois. Eski ou ti a kontan prouve ki sa i en mansonz? Ou kapab fer li. Pasyans Bondye i donn nou loportinite pour swazir lekel ant zonm ek Bondye ki pou diriz nou. Par lafason ki nou viv, nou montre lekel ki nou’n swazir.Lir Zob 1:8-12; Proverb 27:11.

5. Ki mannyer nou kapab swazir Bondye konman nou Sef?

Nou bann swa i montre si nou oule ki Bondye i vin nou Sef

Nou kapab swazir Bondye konman nou Sef ler nou rode konman pour ador li parey Parol Bondye Labib i demande. (Zan 4:23) Parey Zezi, nou kapab rezet Satan konman nou sef ler nou pa partisip dan politik ek lager.Lir Zan 17:14.

Satan i servi son pouvwar pour promouvwar bann keksoz imoral ek bann pratik danzere. Ler nou rezet sa bann move keksoz, serten nou bann zanmi ouswa fanmir i kapab monk nou ouswa opoz nou. (1 Pyer 4:3, 4) Alor, nou pou bezwen fer en swa. Eski nou pou asosye avek sa pep ki kontan Bondye? Eski nou pou obeir son bann lalwa ki reflekte son lanmour ek lasazes? Si nou fer sa, nou pou prouve ki Satan ti koz manti ler i ti dir ki personn pa pou fer sa ki Bondye i demande si i rankontre difikilte.Lir 1 Korentyen 6:9, 10; 15:33.

Lefet ki Bondye i kontan nou, sa i en garanti ki lemal ek soufrans pou fini en zour. Bann ki vreman krwar sa pou kapab viv pour touzour lo later.Lir Zan 3:16.