Skip to content

Al lo sa dezyenm lalis

Al lo konteni

Temwen Zeova

Kreol Seselwa

Apros avek Zeova

 SAPIT 21

Zezi i revel lasazes Bondye

Zezi i revel lasazes Bondye

1-3. Ki mannyer bann dimoun dan lavil kot Zezi ti grandi ti azir anver son lansennyman, e ki zot pa ti arive konnen lo li?

SA LODYANS ti etonnen. Zezi, en zennonm, ti pe debout devan zot dan sinagog e ti pe ansennyen. Zot tou zot ti konn li, parski i ti’n grandi dan menm lavil avek zot e pour plizyer lannen i ti’n travay parmi zot konman en sarpantye. I posib serten parmi zot ti reste dan bann lakaz ki Zezi ti’n fer. Petet zot ti kiltiv zot plantasyon avek bann pyos ek zoug ki Zezi li menm ti’n fer. * Me ki mannyer zot ti pou azir anver lansennyman sa ansyen sarpantye?

2 Lamazorite dimoun ki ti pe ekout li ti etonnen. Zot ti demande: “Kote i ganny sa lasazes?” Me zot ti osi fer sa remark: “Sa pa limenm garson sa sarpantye? Eski Mari pa son manman?” (Matye 13:54-58; Mark 6:1-3) Malerezman, bann dimoun dan lavil kot Zezi ti’n grandi ti fer sa rezonnman, ‘Sa sarpantye i en zonm ordiner parey nou.’ Menm si i ti koz avek sazes, zot ti rezet li. Zot pa ti konnen ki Zezi pa ti pe partaz son prop lasazes.

3 Alor, kote Zezi ti ganny sa lasazes? Zezi ti dir: “Lansennyman ki mon donnen i pa mon prop lansennyman, me i sorti kot Bondye ki’n anvoy mwan.” (Zan 7:16) Zapot Pol ti eksplike ki Zezi in vin pour nou, lasazes sorti kot Bondye. (1 Korentyen 1:30) Lasazes Zeova i ganny revele atraver son Garson, Zezi. Se pour sa rezon Zezi ti dir: “Mwan ek mon  Papa nou en sel.” (Zan 10:30) Annou egzamin trwa laspe kot Zezi ti demontre lasazes sorti kot Bondye.

Sa ki i ti ansennyen

4. (a) Ki tenm sa mesaz ki Zezi ti ansennyen, e akoz i ti vreman enportan? (b) Akoz konsey Zezi ti toultan pratik e dan pli bon lentere sa bann ki ekout li?

4 Premyerman, egzamin sa ki Zezi ti ansennyen. Tenm son mesaz ti “Bonn Nouvel konsernan Rwayonm Bondye.” (Lik 4:43) Sa ti vreman enportan parski sa Rwayonm i annan en gran rol pour zwe. I pou zistifye sa drwa ki Zeova i annan pour dirize, e anmenn benediksyon eternel pour imen. Dan son lansennyman, Zezi ti osi donn bann konsey ki benefisye nou dan lavi toulezour. Zezi ti prouve ki i sa “Konseye Merveye” ki ti ganny predir. (Izai 9:6) Annefe, son konsey ti vreman merveye. I ti annan en profon konnesans lo Parol Bondye e lo son lavolonte. I ti osi annan en bon konprenezon lo konportman imen, e i ti kontan limanite en kantite. Alors, son konsey ti toultan pratik e dan pli bon lentere sa bann ki ti ekout li. Zezi ti dir bann “parol lavi eternel.” Wi, kan nou met an pratik son konsey sa i kapab sov nou lavi.Zan 6:68.

5. Ki serten size Zezi ti koz lo la dan son Sermon lo montanny?

5 Sa Sermon lo montanny i en legzanp remarkab kot ou kapab vwar sa lasazes remarkab dan lansennyman Zezi. Petet i ti pran li zis 20 minit pour fer sa sermon ki ganny rikorde dan Matye 5:3–7:27. Me son konsey i toultan bon, i ankor aplikab dan nou letan zis parey i ti ete ler i ti ganny donnen pour premye fwa. Zezi ti koz lo en kantite size, parey konman pour amelyor relasyon avek lezot (5:23-26, 38-42; 7:1-512), ki mannyer pour reste prop moralman (5:27-32), e konman pour annan en bi dan lavi (6:19-24; 7:24-27). Zezi pa ti zis dir sa bann ki ti ekout li ki savedir lasazes; me i ti osi  montre zot. I ti fer sa par eksplike, rezonn avek zot, e donn laprev.

6-8. (a) Ki bann rezon Zezi in donn nou pour evite pran traka? (b) Kwa ki montre ki konsey Zezi i reflekte lasazes sorti anler?

6 Pran par egzanp sa bon konsey ki Zezi ti donnen konsernan trakas pour bann keksoz materyel, ki trouve dan Matye sapit 6. Zezi ti donn sa konsey: “Pa bezwen trakase, ki zot pou manze e ki zot pou bwar pour viv, oubyen ki zot pou mete.” (Verse 25) Manze ek lenz i bann nesesite debaz dan lavi. Alor, i normal ki nou mazinen konman pour ganny sa bann keksoz. Me akoz Zezi i dir nou “pa bezwen trakase” konsernan sa bann keksoz? *

7 Port latansyon anmezir Zezi i eksplike. Vi ki Zeova in donn nou lavi ek en lekor, pa i kapab donn nou manze pour kontinyen viv ek lenz pour met lo nou? (Verse 25) Si Bondye i donn bann zwazo manze e i abiy bann fler avek labote, konbyen plis ankor i pou pran swen avek son bann serviter isi lo later! (Verse 26, 28-30) Wi, i pa neseser pran bokou traka. Traka pa kapab fer nou viv pli lontan, ni menm en zour anplis. * (Verse 27) Ki mannyer nou kapab evite pran traka? Zezi i konsey nou: Kontinyen met Bondye premye dan nou lavi. Tou bann ki fer sa i kapab asire ki zot Papa dan lesyel pou “donn zot” tou zot nesesite toulezour. (Verse 33) Finalman, Zezi i donn en sizesyon ki vreman pratik. Pran en zour alafwa. Akfer azout traka pour demen ansanm avek sa ki pour ozordi? (Verse 34) Deplis, akfer nou bezwen pran en kantite traka lo bann keksoz ki kapab pa zanmen arive? Kan nou aplik sa bann konsey saz,  i kapab sov nou en kantite latet fer mal dan sa lemonn difisil.

8 Wi, ozordi bann konsey Zezi i ankor pratik zis parey i ti ete ler zot ti ganny donnen preski 2,000 an pase. Pa i evidan ki son lasazes i sorti dan lesyel? Menm bann pli bon konsey ki imen i donnen i tant pour perdi son valer avek letan e i bezwen ganny revize oubyen ranplase. Kantmenm en kantite letan in pase, lansennyman Zezi i ankor annan valer e itil ozordi. Me sa pa devret sirprann nou, parski sa Konseye Merveye ti dir zot “sa ki Bondye in dir li.”Zan 3:34NW.

Son Fason ansennyen

9. Ki serten solda ti dir lo fason ansennyen Zezi, e akoz zot pa ti pe egzazere?

9 En dezyenm laspe kot Zezi ti reflekte lasazes Bondye ti son fason ansennyen. En zour, kan serten solda ti ganny anvoye pour aret li, zot ti retourn zot de lanmen anpandan. Zot ti dir: “Personn pa’n zanmen deza koz parey sa zonm.” (Zan 7:45, 46) Zot pa ti pe egzazere. Zezi ki ti “sorti lao,” ti annan pli gran konnesans ek leksperyans ki tou lezot imen ki’n deza viv lo later. (Zan 8:23) Okenn lezot imen pa ti kapab ansenny parey li. Annou egzamin zis de fason ki mannyer sa Ansennyan saz ti ansenny lezot.

“Lafoul ti etonnen par mannyer ki i ti ansennyen”

10, 11. (a) Akoz nou kapab admir fason ki Zezi ti servi bann legzanp? (b) Kisisa parabol, e ki legzanp ki montre akoz son bann parabol ti efikas pour ansennyen?

10 Servi legzanp dan en fason efikas. Labib i dir ki ‘Zezi ti servi bann legzanp pour koz avek lafoul, i pa ti dir zot nanryen san servi legzanp.’ (Matye 13:34) Nou vreman admir son abilite remarkab pour ansenny bann laverite profon par servi bann keksoz dan lavi toulezour. Par egzanp, i ti servi legzanp bann fermye pe senm lagrenn, bann madanm kot pe prepar dipen, zanfan pe zwe dan bazar, peser pe redi lasenn, bann berze pe rod en mouton perdi. Tou dimoun ki ti ekout  li ti tre familye avek sa bann keksoz. Kan bann laverite enportan i ganny asosye avek bann keksoz dan lavi toulezour, sa bann laverite i antre vitman e oprofon dan leker ek lespri.Matye 11:16-19; 13:3-8, 33, 47-50; 18:12-14.

11 Souvannfwa, Zezi ti servi bann parabol oubyen zistwar kourt pour ansenny serten leson lo moralite ek spirityalite. Vi ki sa bann zistwar i pli fasil pour konpran e pli fasil pour gard antet ki bann lide zeneral, alor sa bann parabol ti ede prezerv lansennyman Zezi. Dan bokou parabol, Zezi ti dekrir son Papa par servi bann legzanp ki pa fasil pour oubliye. Par egzanp, lekel ki pa pou konpran sa pwen dan parabol garson perdi e retrouve? Sa parabol i fer nou vwar ki ler en dimoun ki’n elwannyen i montre repantans senser, Zeova pou pran pitye pour li e avek lanmour i pou akey li.Lik 15:11-32.

12. (a) Dan ki fason Zezi ti servi kestyon dan son lansennyman? (b) Ki mannyer Zezi ti fer sa bann ki ti kestyonn son lotorite reste labous fermen?

12 Byen servi kestyon. Zezi ti servi kestyon pour ed bann ki ti ekout li tir zot prop konklizyon, egzamin zot lentansyon e pour fer desizyon. (Matye 12:24-30; 17:24-27; 22:41-46) Kan bann sef relizye ti demann Zezi si sa lotorite ki i annan i sorti kot Bondye, Zezi ti reponn zot: “Kote lotorite pour Zan batize i sorti, dan lesyel oubyen kot zonm?” Zot ti etonnen par sa kestyon. Alor, zot ti konmans dir antre zot: “Si nou dir, ‘I sorti dan lesyel,’ i pou dir nou, ‘Akoz, nou pa ti krwar Zan?’ Me si nou dir, ‘I sorti kot zonm,’ nou per sa ki lafoul a fer, parski zot tou zot ti konsider Zan konman en profet.” Finalman zot ti reponn, “Nou pa konnen.” (Mark 11:27-33; Matye 21:23-27) Avek en senp kestyon, Zezi ti fer zot reste labous fermen e revel sa traizon ki ti annan dan zot leker.

13-15. Ki mannyer sa parabol konsernan sa bon Samariten i reflekte lasazes Zezi?

13 Parfwa Zezi ti servi plizyer metod ansanm par met bann  kestyon ki fer reflesir dan son bann legzanp. En fwa, en avoka Zwif ti demann Zezi ki i bezwen fer pour ganny lavi eternel. Pour reponn li, Zezi ti sit Lalwa Moiz kot i dir, ou bezwen kontan Bondye ek ou prosen. Pour sey montre ki i en zonm drwat, sa zonm ti demande: “Me lekel mon prosen?” Pour reponn li, Zezi ti rakont en zistwar. En zonm Zwif ti pe marse li tousel. Dan semen bann bandi ti bat li, e kit li demi mor. Plitar de Zwif ti pas obor li, premye ti en pret, e lot ti en Levit. Me zot ti les li lanmenm ater. Me apre en Samariten ti pas dan sa landrwa. Ler i ti vwar sa zonm i ti pran pitye pour li. I ti bann son blesir e apre anmenn li dan en pti lotel kot i ti kapab rekipere. Pour konklir, Zezi ti demann sa zonm: “Dapre ou, lekel parmi sa trwa, ki’n azir konman prosen sa zonm ki ti ganny atake par bann bandi?” Sa zonm ti oblize reponn. I ti dir: “Sa enn ki’n egzers konpasyon pour li.”Lik 10:25-37.

14 Ki mannyer sa parabol i reflekte sa lasazes ki Zezi i annan? Dan letan Zezi, bann Zwif ti konsider en dimoun zot “prosen” si sa dimoun ti annan menm tradisyon avek zot. Byensir bann Samariten pa ti ganny konsidere zot prosen. (Zan 4:9) Meton dan sa zistwar Zezi ti dir ki en Samariten ki ti ganny blese e en Zwif ki ti vin sekour li, eski sa ti pou’n ed sa Zwif sanz son pwennvi? Zezi ti byen aranz sa zistwar, afen ki en Samariten ki ti pran swen avek en Zwif. Remark osi sa kestyon ki Zezi ti demande alafen sa zistwar. I ti met lanfaz lo sa mo “prosen.” Annefe, sa avoka ti’n demande: ‘Lekel mon prosen ki mon devret demontre mon lanmour pour li?’ Me Zezi ti demann li: “Lekel parmi sa trwa ki’n azir konman prosen?” Zezi pa ti met lanfaz lo sa enn ki ti resevwar labonte, me lo sa Samariten ki ti montre labonte. En vre prosen i enn ki pran linisyativ pour montre lanmour anver lezot san pran kont ki nasyonalite zot ete. Napa lot fason pli efikas ki Zezi ti kapab fer resorti sa pwen.

15 Nou pa sirprann ki bann dimoun ti etonnen par  “mannyer ki i ti ansennyen” e ti ganny atire avek li. (Matye 7:28, 29) En fwa “en gran lafoul” ti reste avek Zezi pour trwa zour san manze!Mark 8:1, 2.

Son Fason viv

16. Dan ki fason Zezi ti donn laprev ki i ti ganny dirize par lasazes Bondye?

16 En trwazyenm laspe kot Zezi ti reflekte lasazes Zeova, se lafason ki i ti viv. Ler lasazes i ganny met an pratik, i anmenn bann bon rezilta. Disip Zak ti demande: “Eski parmi zot i annan ki posed lasazes?” Apre li menm i ti reponn: “I devre prouv li . . . par son bann bon laksyon.” (Zak 3:13) Lafason ki Zezi ti konport li ti ‘prouve’ ki i ti ganny gide par lasazes Bondye. Annou egzaminen konman i ti demontre bon zizman dan son fason viv e osi dan lafason ki i ti tret lezot.

17. Kwa ki montre ki Zezi ti annan en lavi balanse?

17 Eski ou’n remarke ki bann dimoun ki napa en bon zizman souvannfwa zot fer keksoz an tro? Wi, nou bezwen annan lasazes pour kapab byen balanse. Zezi ti reflekte lasazes Bondye par byen balanse dan son lavi. Avan tou lezot keksoz, Zezi ti met bann keksoz spirityel premye dan son lavi. I ti telman okipe avek sa travay pour pres sa bon nouvel. I ti dir: “Se pour sa rezon ki mon’n vini.” (Mark 1:38) Byensir, bann keksoz materyel pa ti annan en gran lenportans pour li. I paret ki Zezi pa ti annan bokou keksoz materyel. (Matye 8:20) Me i pa ti tro priv son lekor. Parey son Papa ki en ‘Bondye ere,’ Zezi ti en dimoun zwaye e i ti fer lezot osi kontan. (1 Timote 1:11; 6:15) Kan i ti al en maryaz—en levennman kot normalman i annan lanmizik, sante e kot dimoun i dan lazwa—Zezi pa ti al asiste pour gat latmosfer sa maryaz. Kan tou diven ti fini, i ti fer delo vin diven, en labwason ki “fer leker zonm kontan.” (Psonm 104:15; Zan 2:1-11) Plizyer fwa Zezi ti aksepte lenvitasyon pour manz avek  lezot. Souvannfwa i ti sezi sa bann lokazyon pour ansenny lezot.Lik 10:38-42; 14:1-6.

18. Ki mannyer Zezi ti demontre ki i balanse dan lafason ki i ti tret son bann disip?

18 Zezi ti demontre en tre bon zizman dan lafason ki i ti tret lezot. Son konprenezon lo konportman imen ti fer li annan en bon pwennvi lo son bann disip. I ti konn tre byen ki zot ti enparfe. Me kantmenm sa, i ti kapab vwar zot bann bon kalite. I ti vwar sa potansyel dan sa bann zonm ki Zeova ti’n atire. (Zan 6:44) Zezi ti pare pour met konfyans dan zot, menm si zot ti annan defo. Zezi ti demontre ki i annan konfyans dan son bann disip par donn zot en gro responsabilite. I ti ordonn zot pour pres sa bon nouvel e i ti asire ki zot ti pou kapab akonpli sa latas. (Matye 28:19, 20) Liv Akt i montre ki bann disip Zezi ti fidelman akonpli sa travay ki i ti’n donn zot pour fer. (Akt 2:41, 42; 4:33; 5:27-32) Alors, i kler ki Zezi ti saz pour met konfyans dan zot.

19. Ki mannyer Zezi ti demontre ki i ti ‘dou e annan limilite dan son leker’?

19 Parey nou’n vwar dan Sapit 20, dan Labib limilite ek ladouser i relye avek lasazes. Byensir, Zeova i donn pli bon legzanp dan sa domenn. Me ki nou pou dir lo Zezi?  I vreman tousan pour vwar sa limilite ki Zezi ti demontre anver son bann disip. Konman en imen parfe, i ti pli siperyer ki zot. Kantmenm sa, i pa ti mepriz zot. Zanmen i ti esey fer zot santi enferyer oubyen ki zot enkonpetan. Okontrer, i ti pran an konsiderasyon zot limit e annan pasyans avek zot malgre zot defo. (Mark 14:34-38; Zan 16:12) Menm bann zanfan ti santi zot alez avek li. Sirman zot ti atire avek li akoz zot ti santi ki i ti en dimoun ‘dou e annan limilite dan son leker.’Matye 11:29; Mark 10:13-16.

20. Ki mannyer Zezi ti montre li rezonnab dan son fason azir avek sa madanm ki pa ti en Zwif?

20 Zezi ti reflekte limilite ki Bondye i annan dan en lot fason enportan. I ti rezonnab oubyen pare pour fer serten sanzman, kan i ti santi neseser pour pran pitye pour lezot. Par egzanp, en zour en madanm ki pa ti en Zwif, ti sipliy li pour geri son fiy ki ti pe ganny tourmante par demon. Okonmansman, Zezi ti montre par trwa fason ki i pa ti son lentansyon pour ed sa madanm. Premyerman, par refize reponn li. Dezyenmman, Zezi ti dir ki i’n ganny anvoye pour bann Zwif selman. Trwazyenmman, i ti donn en legzanp ki ti zantiman fer resorti sa menm lide dan dezyenm rezon. Me sa madanm ti persiste, i ti demontre en tre gran lafwa. Ki mannyer Zezi ti azir dan sa sitiasyon? I ti fer tou lekontrer avek sa ki i ti’n dir. Zezi ti geri fiy sa madanm. (Matye 15:21-28) Eski sa pa i en limilite vreman remarkab? Pa oubliye, limilite i rasin vre lasazes.

21. Akoz nou devret esey imit personnalite Zezi, son fason ansennyen, ek son fason viv?

21 Pa nou vreman rekonesan ki bann levanzil i revel bann parol ek keksoz ki sa zonm pli saz ki’n deza viv lo later ti fer! Annou pa oubliye ki Zezi ti reflekte son Papa parfetman. Si nou esey imit son personnalite, son fason ansennyen, e son fason viv, nou pou devlop sa lasazes ki sorti anler. Dan nou lot sapit nou pou vwar konman nou kapab aplik lasazes Bondye dan nou lavi.

^ par. 1 Dan letan ki Labib ti ganny ekrir, bann sarpantye ti ganny anploye pour fer lakaz, meb, e fer bann zouti laferm. Dan dezyenm syek nou lepok, Justin Martyr ti ekrir sa lo Zezi: “I ti travay konman en sarpantye kan i ti lo later. I ti fer bann pyos ek zoug.”

^ par. 6 Sa verb Grek ki’n ganny tradwir “trakase” i vedir “ler en dimoun son lespri i fatige.” Parey i’n ganny servi dan Matye 6:25, sa mo i refer avek lafreyer oubyen lenkyetid ki en dimoun i annan ki preokip son lespri, ki fer li perdi son lazwa dan lavi.

^ par. 7 Annefe, resers ki syantis in fer i montre ki pran tro bokou traka ek presyon, i kapab fer nou ganny malad leker e lezot maladi ki kapab fer nou mor avan ler.