Skip to content

Al lo sa dezyenm lalis

Al lo konteni

Temwen Zeova

Kreol Seselwa

Labib lo Enternet | NEW WORLD TRANSLATION OF THE HOLY SCRIPTURES

Tit 3:1-15

KONTENI

  • Soumisyon (1-3)

  • Pare pour fer bann bon keksoz (4-8)

  • Rezet bann largiman bet ek bann sekt (9-11)

  • Bann lenstriksyon personnel ek salitasyon (12-15)

3  Kontinyen rapel zot pour zot soumet e obei bann gouvernman ek lotorite e pour pare pour fer tou sa ki bon,  pour pa koz an mal lo personn, pour pa fer kankan, me pour rezonnab e toultan demontre ladouser anver tou dimoun.  Parski i ti annan en letan kot nou osi nou ti bet, dezobeisan, nou ti ganny anbete par lezot, nou ti lesklav tou sort dezir ek plezir, nou ti kontinyelman fer lemal, nou ti groker, nou ti detestab e ay kanmarad.  Par kont, ler Bondye nou Sover ti demontre son labonte ek lanmour anver limanite  (pa akoz sa ki nou ti’n fer ti byen, me akoz son prop konpasyon),* i’n sov nou gras a sa delo* ki’n fer nou ganny lavi e i’n sov nou par fer nou vin en nouvo dimoun gras a lespri sen.  I’n donn nou son lespri sen annabondans gras a Zezi Kri nou Sover,  pour ki apre ki nou’n ganny aprouve konman drwat gras a son labonte ekstraordiner, nou kapab annan lespwar pour ganny lavi eternel konman nou leritaz.  Sa parol i vre e mon oule ki ou kontinyen met lanfaz lo sa bann keksoz, pour ki sa bann ki’n krwar Bondye i kapab gard zot lespri konsantre lo fer bann bon keksoz kontinyelman. Sa bann keksoz i bon e i benefisye dimoun.  Me ou, ou pa devret annan nanryen pour fer avek sa bann largiman bet, bann resers lo zanset, bann deba ek dispit lo Lalwa parski zot initil e zot pa fer sans. 10  Si en zonm i promot en sekt, apre ki i’n ganny averti en premye fwa e en dezyenm fwa, rezet li, 11  parski en tel zonm in abandonn sa vre semen, i pe fer pese e i’n kondann son prop lekor. 12  Ler mon anvoy Artemas oubyen Tisik kot ou, fer tou ou posib pour vin kot mwan Nikopolis, parski mon’n deside pas liver laba. 13  Fer sir ki ou donn Zenas ki konn byen Lalwa ek Apolos tou sa ki zot bezwen pour ki zot pa mank nanryen pour zot vwayaz. 14  Me bann frer i devret aprann pour fer bann bon aksyon pour ki zot kapab ede kan i annan bann bezwen irzan, pour ki zot kapab toultan raport fri. 15  Tou sa bann ki avek mwan i fer ou salanm. Fer salanm bann ki kontan* nou dan lafwa. Ki labonte ekstraordiner Bondye i avek zot tou.

Bann not

Oubyen “mizerikord.”
Oubyen “ben.”
Oubyen “annan lafeksyon pour.”