Skip to content

Al lo sa dezyenm lalis

Al lo konteni

Temwen Zeova

Kreol Seselwa

Labib lo Enternet | NEW WORLD TRANSLATION OF THE HOLY SCRIPTURES

Galat 3:1-29

KONTENI

  • Swiv Lalwa, annan lafwa (1-14)

    • Sa ki drwat pou viv akoz lafwa (11)

  • Promes Abraam pa baze lo Lalwa (15-18)

    • Kris i desandans Abraam (16)

  • Lorizin ek bi Lalwa (19-25)

  • Bann garson Bondye gras a lafwa (26-29)

    • Desandans Abraam, bann ki pour Kris (29)

3  Bann Galat, zot pa konpran menm! Lekel ki’n anbet zot koumsa? Pa zot ti’n ganny ansennyen dan en fason kler ki Zezi Kri ti’n ganny kloute lo poto?  I annan en keksoz ki mon anvi demann zot: Eski zot ti ganny lespri sen akoz zot ti swiv lalwa ouswa akoz zot ti annan lafwa dan sa ki zot ti tande?  Eski zot vreman pa konpran? O konmansman, zot ti pe depan lo lespri sen,* eski aprezan zot pe swiv bann rezonnman imen?*  Eski zot in pas atraver sa kantite soufrans pour nanryen? Mon krwar pa!  Alor, eski sa enn ki donn zot lespri sen e fer bann mirak parmi zot i fer li akoz zot swiv lalwa oubyen akoz zot annan lafwa dan sa ki zot in tande?  I zis parey Abraam ki ti “annan lafwa dan Zeova* e pour sa rezon Bondye ti konsider li konman en dimoun drwat.”  Sirman zot konnen ki sa bann ki annan lafwa se zot ki bann garson Abraam.  Lekritir ti vwar davans ki dimoun lezot nasyon ti pou ganny aprouve konman drwat akoz zot lafwa e lekritir ti anons sa bon nouvel davans avek Abraam: “Tou bann nasyon pou ganny beni atraver ou.”  Alor, Abraam ti ganny beni akoz son lafwa e sa bann ki annan lafwa osi pe ganny beni. 10  Tou bann ki annan konfyans ki zot kapab swiv lalwa i anba en malediksyon, parski i’n ganny ekrir: “Modi sa enn ki pa kontinyen fer tou sa ki’n ganny ekrir dan liv Lalwa.” 11  Deplis, i evidan ki napa personn ki ganny aprouve konman drwat akoz i swiv lalwa parski “sa enn ki drwat pou viv akoz son lafwa.” 12  Ou pa bezwen lafwa pour swiv Lalwa me lekritir i dir “sa ki swiv lalwa pou ganny lavi gras a lalwa.” 13  Kris in aste nou, i’n delivre nou avek malediksyon Lalwa e i’n ganny modi dan nou plas, parski i’n ganny ekrir: “Modi sa ki ganny met anpandan lo poto.” 14  Sa ti arive pour ki atraver Zezi Kri, bann dimoun lezot nasyon i ganny benediksyon ki ti’n ganny promet avek Abraam e pour ki par nou lafwa, nou kapab ganny lespri sen ki Bondye ti promet pour donn nou. 15  Mon bann frer, annou servi en legzanp dan lavi tou le zour: Enn fwa ki en lalyans in ganny etablir, menm si i zis en dimoun ki’n fer li, napa personn ki kapab kas li ouswa azout nanryen avek. 16  Aprezan, bann promes ti ganny fer avek Abraam e avek son desandans. I pa dir, “avek ou bann desandans” konmsi i pe refer avek plizyer dimoun. Plito i dir, “avek ou desandans,” ki pe refer avek zis en dimoun e sa i Kris. 17  Deplis, la sa ki mon dir: Bondye ti fer sa lalyans premye, Lalwa ti vin an egzistans 430 an pli tar, me Lalwa pa ti aboli sa lalyans ek sa promes. 18  Parski si leritaz ki Bondye i donnen i baze lo lalwa, i nepli baze lo en promes, me Bondye in volonterman donn Abraam sa leritaz akoz sa promes. 19  Alor, akfer Lalwa? I ti ganny donnen pour montre bann move keksoz ki dimoun ti pe fer ziska ki sa desandans i arive. Sa promes ti’n ganny fer avek sa desandans e sa lalwa ti ganny donnen par bann lanz atraver en medyater.* 20  Napa medyater ler i annan zis en dimoun ki enplike, me Bondye ti tousel ler i ti fer sa promes. 21  Alor, eski Lalwa i kont bann promes Bondye? Sirman non! Parski si i ti annan en lalwa ki donn lavi, savedir i ti pou’n posib pour demontre ladrwatir par swiv lalwa. 22  Me Lekritir in met tou dimoun anba pouvwar pese, pour ki bann ki demontre lafwa dan Zezi Kri i kapab ganny promes Bondye. 23  Me avan ki lafwa* ti arive, nou ti anba lalwa, nou ti’n ganny mete anba pouvwar lalwa e nou ti pe esper lafwa ki ti pros pour ganny revele. 24  Alor, Lalwa ti vin nou gid* ziska Kris, pour ki nou kapab ganny aprouve konman drwat akoz lafwa. 25  Me la ki lafwa in arive, nou nepli anba en gid.* 26  Anfet, zot tou zot zanfan Bondye akoz zot annan lafwa dan Kris Zezi. 27  Parski zot tou ki’n ganny batize dan Kris zot in vin parey Kris.* 28  I pa enportan si ou Zwif oubyen Grek, lesklav oubyen dimoun lib, msye oubyen madanm, parski zot tou zot en sel, ini avek Kris Zezi. 29  Deplis, si zot pour Kris, zot vreman desandans Abraam e zot pou kapab ganny sa leritaz ki ti ganny promet avek Abraam.

Bann not

Literalman, “zot in konmans avek lespri.”
Literalman, “zot pe fini avek laser?”
Vwar Leksplikasyon bann mo.
Vwar Leksplikasyon bann mo.
Sa pe refer avek lafwa Kretyen.
Oubyen “gardyen.”
Oubyen “gardyen.”
Oubyen “in abiy zot avek Kris.”