Skip to content

Al lo konteni

Akt 18:1-28

KONTENI

  • Minister Pol Korent (1-17)

  • Pol i retourn Antyos, Siri (18-22)

  • Pol i al Galasi ek Frizi (23)

  • Apolos i ganny led (24-28)

18  Apre sa, i ti kit Atenn e al Korent.  I ti zwenn en Zwif ki ti apel Akila, ki ti’n ne Pon e ki ti’n fek arive sorti Itali avek son madanm Prisil, parski Klod ti’n donn lord tou bann Zwif pour kit Ronm. Alor i ti al kot zot  e lefet ki i ti fer menm metye, Pol ti reste kot zot e travay avek zot parski zot osi zot ti fer latant.  I ti fer diskour* dan sinagog tou le saba e i ti persyad Zwif konman Grek.  Ler Silas ek Timote ti arive sorti Masedwann, Pol ti konmans pas tou son letan pe anons parol Bondye e rann temwannyaz avek bann Zwif pour prouve ki Zezi i Kris.  Me apre ki zot ti’n kontinyelman opoz li e ensilte li, i ti sekwe son lenz e dir: “Zot pou responsab pour zot prop lanmor.* Mwan mon pa responsab.* Konmansman ozordi mon pou al kot dimoun lezot nasyon.”  I ti sorti laba* e al dan lakour en zonm ki apel Titis Zistis, en adorater Bondye ki son lakaz ti o bor sinagog.  Me Krispis, zofisye sinagog ek tou dimoun dan son lakour ti krwar dan Senyer. Bokou Korentyen ki ti osi tann sa bon nouvel ti konmans krwar e ganny batize.  Deplis, dan en vizyon pandan lannwit, Senyer ti dir Pol: “Pa bezwen per, me kontinyen koze e pa reste trankil 10  parski mon avek ou e personn pa pou fer ou dimal. Mon annan bokou dimoun dan sa lavil.” 11  Alor i ti reste laba pour enn an edmi pe ansenny parol Bondye avek zot. 12  Pandan ki Galyon ti gouverner provens* Akai, bann Zwif ti fer en konplo pour atak Pol e zot ti anmenn li kot tribinal pour li ganny zize. 13  Zot ti dir: “Sa zonm pe persyad dimoun pour ador Bondye dan en fason ki kont lalwa.” 14  Me ler Pol ti pe al koze, Galyon ti dir bann Zwif: “Si vreman i ti’n fer en keksoz mal ouswa en krim serye, i ti pou fer sans pour mwan pran letan pour ekout zot. 15  Me si se akoz en deba lo bann mo, dimoun ouswa zot prop lalwa, zot menm gete ki zot pou fer. Mon pa anvi ziz sa bann zafer.” 16  Apre sa, i ti fer zot sorti devan tribinal. 17  Alor zot tou zot ti tyonbo Sostenn, zofisye sinagog e konmans bat li devan tribinal. Me Galyon pa ti enterfer ditou dan sa bann zafer. 18  Me apre ki i ti’n reste pour ankor en bon pe letan, Pol ti dir orevwar bann frer e pran bato pour al Siri avek Prisil ek Akila. Letan i ti Sankre, i ti koup son seve kourt parski i ti’n fer en ve. 19  Ler zot ti ariv Efez, Pol ti kit zot anvil me li i ti al dan sinagog pour rezonn avek bann Zwif. 20  Menm si zot ti sipliy li pour reste avek zot pli lontan, i pa ti aksepte 21  me i ti dir zot orevwar. I ti dir zot: “Mon pou retourn kot zot si Zeova* i permet.” I ti pran bato e kit Efez 22  e i ti desann Sezare. I ti mont Zerizalenm e al vizit kongregasyon e apre sa i ti desann Antyos. 23  Apre ki i ti’n pas en pe letan laba, i ti ale. I ti al dan en landrwa apre lot partou dan pei Galasi ek Frizi pour fortifye tou bann disip. 24  En Zwif ki ti apel Apolos e ki ti ne Aleksandri ti ariv Efez. Sa zonm ti koz byen e i ti konn byen Lekritir. 25  I ti’n ganny ansennyen* lo semen Zeova,* i ti vreman devoue e ranpli avek lespri sen. I ti pe koze e ansenny bann keksoz egzakt lo Zezi, me i ti konn zis batenm Zan. 26  I ti konmans koz avek lardyes dan sinagog. Ler Prisil ek Akila ti tann li, zot ti anmenn li avek zot e eksplik li semen Bondye dan en fason pli egzakt. 27  Deplis, vi ki i ti anvi al Akai, bann frer ti ekri bann disip laba pour ankouraz zot pour byen resevwar li. Alor ler i ti ariv Akai, i ti ed en kantite bann ki ti’n vin disip gras a labonte ekstraordiner Bondye. 28  Parski avek bokou devouman, i ti klerman prouve an piblik ki bann Zwif ti mal e i ti montre zot dapre Lekritir ki Zezi i Kris.

Bann not

Oubyen “I ti rezonn avek zot.”
Literalman, “Zot disan i lo zot prop latet.”
Literalman, “mon prop.”
Setadir, dan sa sinagog.
Literalman, “prokonsil.” Vwar Leksplikasyon bann mo.
Vwar Leksplikasyon bann mo.
Oubyen “ekout lansennyman.”
Vwar Leksplikasyon bann mo.