Skip to content

Al lo konteni

2 Pyer 1:1-21

KONTENI

  • Salitasyon (1)

  • Fer sir ki zot gard zot privilez konman sa bann ki’n ganny apele (2-15)

    • Bann kalite ki’n ganny azoute avek lafwa (5-9)

  • Nou pli asire ki bann profesi pou ganny akonplir (16-21)

1  Mwan Simon Pyer, en lesklav ek zapot Zezi Kri, mon pe ekri zot ki’n ganny sa lafwa presye parey nou* gras a ladrwatir nou Bondye e ladrwatir Zezi Kri nou Sover:  Ki Bondye i demontre ankor plis labonte ekstraordiner* ek lape anver zot, gras a en konnesans egzakt lo li ek Zezi nou Senyer.  Parski gras a pwisans Bondye, nou’n ganny tou sa ki nou bezwen pour viv e pour annan en devosyon pour li gras a sa konnesans egzakt lo sa Enn ki’n swazir nou akoz son prop laglwar ek ladrwatir.*  Vi ki nou’n rezet tou bann keksoz ki mal ki ganny fer dan sa lemonn akoz move dezir,* Bondye in donn* nou sa bann promes presye e merveye gras a son laglwar ek ladrwatir, pour ki gras a sa bann kalite zot osi zot a kapab vin bann lespri parey Bondye.  Pour sa rezon alor, fer bokou zefor pour azout avek zot lafwa, ladrwatir,* avek zot ladrwatir, konnesans,  avek zot konnesans, kontrol lo zot lekor, avek kontrol lo zot lekor, landirans, avek zot landirans, devosyon pour Bondye,  avek zot devosyon pour Bondye, lafeksyon pour kanmarad parey bann frer ek ser, avek zot lafeksyon pour kanmarad, lanmour.  Parski si zot annan sa bann kalite e zot kontinyen devlop sa bann kalite plis ankor, sa pou anpes zot vin inaktif oubyen pa prodiktif* konsernan sa ki zot in aprann* lo nou Senyer Zezi Kri.  Parski en dimoun ki napa sa bann kalite i aveg akoz i pa oule vwar lalimyer* e i’n oubliye ki i’n ganny pirifye avek bann pese ki i ti’n fer dan lepase. 10  Alor mon bann frer, fer touzour plis zefor pour fer sir ki zot gard zot privilez konman sa bann ki’n ganny apele e swazir, parski si zot kontinyen fer sa bann keksoz, zot pa pou zanmen abandonn lafwa. 11  Anfet, si zot fer sa, se avek laglwar ki zot pou antre dan Rwayonm eternel nou Senyer ek Sover Zezi Kri. 12  Se pour sa rezon ki mon pou toultan fer zot rapel sa bann keksoz, menm si zot deza konnen e zot in byen etabli dan sa laverite ki zot in aprann. 13  Me mon krwar ki i byen ki tan ki mon dan sa lekor,* mon kontinyen donn zot bann rapel pour ankouraz zot, 14  akoz mon konnen ki byento mon pou kit sa lekor,* zis parey nou Senyer Zezi Kri in dir mwan klerman. 15  Mon pou toultan fer tou mon posib pour ki apre mon depar, zot pou kapab rapel* sa bann keksoz lo zot menm. 16  Kan nou ti koz avek zot konsernan ler Senyer Zezi Kri pou la* e lo son pwisans, i pa ti dapre bann fo zistwar ki’n ganny byen aranze par zonm, me plito akoz nou ti vwar pour nou menm son laglwar merveye. 17  Parski i ti ganny loner ek laglwar avek Bondye, son Papa. Sa ti arive kan Bondye dan son laglwar merveye ti dir li sa parol:* “Sa i mon Garson ki mon kontan ki mwan menm mon’n aprouve.” 18  Wi, nou ti tann sa parol sorti dan lesyel ler nou ti avek li lo sa montanny sen. 19  Sanmenm sa nou pli asire ki bann profesi pou ganny akonplir. Zot annan rezon pour port latansyon lo sa bann profesi ki parey en lalanp ki pe briye dan en landrwa fernwanr, setadir dan zot leker, ziska ki granmaten i fer e zetwal granmaten i leve. 20  Parski avan tou, zot konnen ki napa okenn profesi dan Lekritir* ki baze lo bann lide personnel. 21  Parski napa okenn profesi ki’n ganny anonse par lavolonte zonm, me bann zonm ti dir sa ki Bondye ti pous* zot pour dir gras a lespri sen.

Bann not

Oubyen “lafwa.” Setadir, sa menm privilez ki nou.
Vwar Leksplikasyon bann mo.
Oubyen “laverti.”
Oubyen “pasyon.”
Oubyen “donn nou volonterman.”
Oubyen “laverti, bon kondwit.”
Oubyen “pa raport fri.”
Oubyen “aprann dan en fason egzakt.”
Oubyen posibleman, “akoz i aveg, i pa vwar lwen.”
Oubyen “latant, tabernak.”
Oubyen “latant, tabernak.”
Oubyen “mansyonn.”
Literalman, “prezans Senyer Zezi Kri.” Vwar Leksplikasyon bann mo.
Literalman, “lavwa.”
Setadir, Labib.
Oubyen “gid, diriz.”