Skip to content

Al lo konteni

1 Korentyen 9:1-27

KONTENI

  • Legzanp Pol konman en zapot (1-27)

    • “Ou pa devret anmar labous en toro” (9)

    • ‘Maler pour mwan si mon pa prese!’ (16)

    • Vin tou pour tou sort kalite dimoun (19-23)

    • Kontrol lo nou lekor dan sa lakours pour lavi (24-27)

9  Pa mon lib? Pa mon en zapot? Pa mon’n vwar Zezi nou Senyer? Pa zot menm rezilta mon travay dan Senyer?  Menm si mon pa en zapot pour lezot, mon definitivman en zapot pour zot! Parski zot sa laprev ki montre ki mon en zapot Senyer.  La mon defans pour sa bann ki pe ziz mwan:  Pa nou annan drwa* manze e bwar?  Pa nou annan drwa anmenn avek nou nou madanm Kretyen parey bann frer Senyer, lezot zapot ek Sefas* i fer?  Oubyen eski zis Barnabas ek mwan ki napa drwa pa travay pour nou ganny nou lavi?  Lekel sa solda ki pe servi dan en larme ki bezwen pey son prop depans? Lekel sa dimoun ki’n plant bann pye rezen e ki pa kapab manz son fri? Ouswa lekel ki okip en troupo e ki pa kapab ganny en pe dile avek sa troupo?  Eski mon pe dir sa bann keksoz dapre sa ki dimoun i panse? Pa Lalwa osi i dir sa bann keksoz?  Parski i’n ganny ekrir dan Lalwa Moiz: “Ou pa devret anmar labous en toro ler i pe bat lagrenn.” Eski se toro ki Bondye i enterese avek 10  ouswa i pour nou prop dibyen ki i ti dir sa? I ti sirman ganny ekrir pour nou prop dibyen, parski en zonm ki labour later e en zonm ki bat lagrenn, zot fer li avek lasirans ki zot pou ganny en par dan rekolt. 11  Si nou’n senm bann keksoz spirityel parmi zot, eski i pou mal si zot donn nou keksoz pour siport nou bezwen materyel? 12  Si lezot dimoun i annan drwa ganny led materyel avek zot, pa i annan plis rezon pour nou ganny zot sipor? Kantmenm sa, nou pa’n servi sa drwa, me nou pe andir tou keksoz pour ki nou pa vin en lobstak pour sa bon nouvel konsernan Kris dan okenn fason. 13  Pa zot konnen ki bann zonm ki fer servis sakre dan tanp i manz bann keksoz ki dan tanp e bann ki regilyerman servi kot lotel i resevwar en par bann sakrifis ki ganny ofer lo lotel? 14  Dan sa menm fason osi, Senyer ti donn lord pour sa bann ki anons sa bon nouvel ganny dekwa pour viv gras a sa bon nouvel. 15  Me mon pa’n profit lo okenn sa bann laranzman. Anfet, mon pa’n ekri sa bann keksoz pour ki sa i ganny fer pour mwan, parski mon fyer ki mon’n anons bon nouvel pour nanryen e plito mon mor ki dimoun i anpes mwan fyer akoz sa! 16  Me mon napa rezon pour mwan fyer akoz mon pe anons sa bon nouvel, parski sa i en lobligasyon pour mwan. An tou ka, maler pour mwan si mon pa anons sa bon nouvel! 17  Si mon fer sa volonterman, mon annan en rekonpans, me menm si mon pa fer li volonterman, toudmenm Senyer in konfye mwan sa responsabilite. 18  Alor, ki mon rekonpans? Se ki ler mon anons sa bon nouvel, mon fer li pour nanryen pour evite ki mon mal servi mon lotorite* an sa ki konsern sa bon nouvel. 19  Parski menm si mon pa lesklav personn, mon’n fer mwan vin lesklav tou dimoun, pour ki mon ganny plis dimoun posib. 20  Parmi bann Zwif, mon ti vin parey en Zwif pour mwan kapab ganny bann Zwif. Parmi sa bann ki anba lalwa, mon ti vin anba lalwa, menm si mwan menm mon pa anba lalwa pour ki mon ganny sa bann ki anba lalwa. 21  Parmi sa bann ki pa anba lalwa, mon ti konmsi mon pa anba lalwa, menm si mon swiv lalwa Bondye e mon anba lalwa Kris, pour ki mon ganny sa bann ki pa anba lalwa. 22  Parmi bann dimoun ki feb, mon ti vin feb, pour mwan ganny bann dimoun ki feb. Mon’n vin tou, pour tou sort kalite dimoun pour ki mon kapab sov serten parmi zot par tou mwayen posib. 23  Me mon fer tou keksoz akoz sa bon nouvel pour ki mon kapab anons li avek lezot. 24  Eski zot pa konnen ki tou atlet dan en lakours i taye, me zis enn ki ranport sa pri? Tay dan en fason ki ou pou ranport sa pri. 25  Tou dimoun ki partisip dan en konpetisyon i demontre kontrol lo zot lekor dan tou keksoz. Byensir, zot fer li pour ganny en kouronn fey ki kapab fannen, me nou, nou pou ganny enn ki pa pou fannen. 26  Alor, mon pa pe tay an bonnavini, mon pa pe donn koudpwen dan ler, 27  me mon tret mon lekor dir* e mon kontrol li parey en lesklav pour ki apre ki mon’n anons sa bon nouvel avek lezot, mwan menm mon pa perdi laprouvasyon Bondye* dan okenn fason.

Bann not

Literalman, “lotorite.”
En lot non pour Pyer.
Oubyen “drwa.”
Oubyen “pini, disiplin severman mon lekor.” Literalman, “mon bat mon lekor.”
Oubyen “ganny diskalifye.”