Skip to content

Al lo sa dezyenm lalis

Al lo konteni

Temwen Zeova

Kreol Seselwa

Labib lo Enternet | NEW WORLD TRANSLATION OF THE HOLY SCRIPTURES

1 Korentyen 6:1-20

KONTENI

  • Bann Kretyen i anmenn kanmarad ankour (1-8)

  • Bann ki pa pou antre dan Rwayonm (9-11)

  • Servi zot lekor pour glorifye Bondye (12-20)

    • “Sov lwen avek imoralite seksyel!” (18)

6  Ler zot annan problenm avek en lot dimoun, ki mannyer zot kapab oze al ankour devan dimoun ki pa ador Bondye plito ki devan bann sen?  Zot pa konnen ki bann sen pou ziz lemonn? Alor, si zot pou ziz lemonn, eski zot pa kapab ziz bann zafer ki pa sitan enportan?  Eski zot pa konnen ki nou pou ziz bann lanz, alor akoz nou pa kapab osi ziz bann zafer lo sa later?  Si zot annan bann zafer lo sa later pour zize, eski zot swazir bann dimoun ki pa dan kongregasyon pour ziz sa bann zafer?  Mon dir sa pour fer zot onte. Eski napa en zonm saz parmi zot ki kapab pas zizman ant bann frer?  Me frer i anmenn frer ankour e ladan menm se bann ki pa ador Bondye ki ziz zot!  Vreman, pa i en laont ler zot anmenn kanmarad ankour. Akoz ou pa pare pour aksepte en lenzistis? Akoz ou pa plito les li vol ou?  Plito, zot fer ditor e vol zot prop frer ladan menm!  Zot pa konnen ki bann move dimoun pa pou antre* dan Rwayonm Bondye? Pa les zot ganny anbete. Bann ki pratik imoralite seksyel,* ador zidol, komet adilter, zonm ki les lezot zonm fer bann aksyon omoseksyel avek zot e bann ki pratik omoseksyalite,* 10  bann voler, dimoun voras, bann soular, bann ki ensilte lezot ek bann ki trik lezot pour ganny larzan, zot tou zot pa pou antre* dan Rwayonm Bondye. 11  Pourtan, sanmenm ki serten parmi zot ti ete. Me zot in ganny lave e zot prop, zot in ganny sanktifye e zot in ganny aprouve konman drwat o non Senyer Zezi Kri e gras a lespri sen nou Bondye. 12  Mon ganny drwa fer tou keksoz,* me pa tou keksoz ki pou benefisye mwan. Mon ganny drwa fer tou keksoz, me mon pa pou les nanryen pran kontrol lo mwan. 13  Manze i pour vant e vant i pour manze, me Bondye pou met en lafen avek zot tou le de. Lekor pa’n ganny fer pour pratik imoralite seksyel* me i pour Senyer e Senyer i pour lekor. 14  Me Bondye ti resisit Senyer e i pou osi resisit nou gras a son pwisans. 15  Eski zot pa konnen ki zot lekor i form parti lekor Kris? Alor, eski mon devret pran bann parti lekor Kris e fer zot form parti lekor en prostitye? Definitivman non! 16  Eski zot pa konnen ki en dimoun ki al avek en prostitye i vin en sel lekor avek li? Parski i’n dir, “de pou vin en sel.” 17  Me sa ki ini avek Senyer i annan menm fason panse ki li.* 18  Sov lwen avek imoralite seksyel!* Tou lezot pese ki en dimoun i fer i pa fer ditor son prop lekor, me sa ki pratik imoralite seksyel i fer pese kont son prop lekor. 19  Eski zot pa konnen ki zot lekor i tanp lespri sen ki zot in gannyen avek Bondye? Deplis, zot pa pour zot menm, 20  parski Bondye in pey en pri pour aste zot. Alor, servi zot lekor pour glorifye Bondye.

Bann not

Literalman, “erit.”
Grek, por·neiʹa. Vwar Leksplikasyon bann mo.
Oubyen “zonm ki fer sèks avek zonm.” Literalman, “zonm ki dormi avek zonm.”
Literalman, “erit.”
Oubyen “Tou i permet pour mwan.”
Grek, por·neiʹa. Vwar Leksplikasyon bann mo.
Oubyen “vin en sel avek li annespri.”
Grek, por·neiʹa. Vwar Leksplikasyon bann mo.