Skip to content

Al lo sa dezyenm lalis

Al lo konteni

Temwen Zeova

Kreol Seselwa

Labib lo Enternet | NEW WORLD TRANSLATION OF THE HOLY SCRIPTURES

1 Korentyen 5:1-13

KONTENI

  • Limoralite seksyel (1-5)

  • En pti pe lelven i fer monte tou sa lapat (6-8)

  • En move dimoun i bezwen ganny retire (9-13)

5  Anfet, dimoun i dir ki i annan ki pe pratik imoralite seksyel* ki menm bann dimoun lezot nasyon pa pe pratike. Mon’n tande ki en zonm pe viv avek madanm son papa.  Eski zot fyer akoz sa? Zot pa krwar ki plito zot devret tris e tir sa zonm ki’n fer sa parmi zot?  Menm si mon pa la avek zot, mon mazin zot sityasyon* e mon’n fini ziz sa zonm ki’n fer sa, konmsi mon ti la avek zot.  Ler zot rasanble ansanm o non Senyer Zezi e ki zot konnen ki mwan ki annan pwisans nou Senyer Zezi, mon pe mazin zot,* alor  zot devret livre en zonm koumsa avek Satan pour ki move lenfliyans sa zonm i ganny detrir* e ki leta lespri* kongregasyon i kapab ganny prezerve zour Senyer.  Zot napa rezon pour fer vantar. Eski zot pa konnen ki en ptigin lelven i fer monte tou sa lapat?  Retir sa vye lelven pour ki zot vin en nouvo lapat ki napa lelven ladan, parski Kris, nou pti mouton Lapak, in ganny sakrifye.  Alor, annou selebre sa lafet, pa avek vye lelven, ni avek lelven lemal ek pese, me avek dipen san lelven setadir dipen senserite ek laverite.  Dan mon let, mon ti ekri zot pour aret frekant* bann dimoun ki pratik imoralite seksyel.* 10  Mon pa ti pe esey dir ki zot devret konpletman aret frekant bann ki pratik imoralite seksyel* dan sa lemonn ouswa bann dimoun voras, voler* ouswa ki ador zidol. Si non zot ti pou bezwen sorti dan sa lemonn. 11  Me la mon pe ekri zot pour dir zot ki zot devret aret frekant* nenport dimoun ki en frer ki pe pratik imoralite seksyel* ouswa ki voras, ki ador zidol, ki ensilte lezot, ki en soular, voler* e ki zot pa devret ni menm manz avek en dimoun koumsa. 12  Eski mwan ki devret ziz bann ki an deor kongregasyon? Anfet, zot ki devret ziz sa bann ki dan kongregasyon 13  tandis ki Bondye li i ziz sa bann ki an deor. “Retir sa move dimoun parmi zot.”

Bann not

Grek, por·neiʹa. Vwar Leksplikasyon bann mo.
Oubyen “mon la annespri avek zot.”
Oubyen “mon la avek zot annespri.”
Literalman, “pour destriksyon laser.”
Grek, pneu’ma. Vwar Leksplikasyon bann mo.
Oubyen “asosye avek.”
Grek, por·neiʹa. Vwar Leksplikasyon bann mo.
Grek, por·neiʹa. Vwar Leksplikasyon bann mo.
Oubyen “bann ki trik lezot pour ganny larzan.”
Oubyen “asosye avek.”
Grek, por·neiʹa. Vwar Leksplikasyon bann mo.
Oubyen “bann ki trik lezot pour ganny larzan.”