Akoz i annan sitan soufrans?

Nou bezwen konn vre lakoz soufrans pour arive konpran akoz i annan sitan soufrans e akoz malgre zefor ki imen pe fer pour elimin li, zot pa pe reisi. Menm si i annan diferan lakoz e i kapab paret difisil pour konpran, nou devret vreman rekonesan ki Labib i ed nou idantifye sa bann rezon. Dan sa lartik, nou pou vwar senk rezon prensipal akoz i annan sitan soufrans. Nou envit ou pour egzamin byen sa ki Labib i dir e vwar ki mannyer Parol Bondye i ed nou konpran klerman vre lakoz soufrans.​—2 Timote 3:16.

▪ LEFE EN MOVE GOUVERNMAN

Labib i dir: “Ler en dimoun mesan i dominen, lepep i soupire.”​—Proverb 29:2.

Dapre listwar, i annan en kantite dirizan diktater ki ti sever e ki ti fer soufer zot pep. I vre, pa tou dirizan ki koumsa. Serten i kapab anvi sa ki pli bon pour zot prosen. Me, enn fwa ki zot o pouvwar, souvan zot vwar ki tou i al mal kan zot bann manm i lager antre zot e serten i lager pouvwar. Ouswa serten i abiz zot lotorite pour benefisye zot prop lekor e par fer sa, zot fer ditor lepep. Henry Kissinger, ansyen Sekreter Leta, Leta-z-ini ti dir: “Listwar i ranpli avek zefor ki’n tonm dan delo, kot bann rev pa’n zanmen vin vre.”

Labib i osi fer resorti: “I pa pour en imen ki pe marse pour diriz son lepa.” (Zeremi 10:23) Bann imen enparfe napa ase lasazes neseser ek bon konnesans pour reisi dan sa ki zot fer. Si dimoun pa kapab diriz zot prop lepa, ki mannyer zot kapab diriz en pei antye? Eski ou kapab vwar akoz bann dirizan imen napa sa abilite pour elimin soufrans? Anfet, pli souvan, lakoz soufrans se akoz move gouvernman ouswa move dominasyon.

▪ LENFLIYANS FO LARELIZYON

Zezi ti dir: “Dimoun pou war ki zot mon bann disip si zot kontan kanmarad.”​—Zan 13:35.

En kantite sef relizye i fer bann sermon lo lanmour ek linite. Me, larealite se ki zot menm zot pa’n reisi ed zot fidel devlop en lanmour profon ki pou anpes zot mepriz lezot. Olye ed dimoun devlop lanmour, larelizyon i souvan lakoz divizyon, diskriminasyon relizye ek konfli ant bann pep. A lafen son liv Christianity and the World Religions, Hans Küng, en profeser larelizyon ti ekrir: “Bann lalit politik pli fanatik e kriyel i sa bann ki ganny enfliyanse, enspire e aprouve par larelizyon.”

 An plis ki sa, en kantite sef relizye i piblikman soutir sèks avan maryaz, adilter ek omoseksyalite. Akoz sa, lemonn i ranpli avek en kantite maladi, avortman, lansentman ki zot pa ti anvi, maryaz ek fanmir ki kase e sa i lakoz en kantite soufrans ek langwas.

▪ LENPERFEKSYON IMEN EK DEZIR EGOIS

“Tou dimoun i ganny tante ler i les li ganny antrennen e atire par son prop move dezir. Alor, move dezir enn fwa ki i’n ganny formen i donn nesans pese.”​—Zak 1:14, 15.

Nou tou, akoz nou lenperfeksyon, nou fer fot e bezwen lalit avek sa tandans pour “swiv bann dezir nou lekor.” (Efezyen 2:3) Me, si nou annan en move dezir e nou annan sa loportinite pour satisfer li, i kapab difisil pour pa fer sa ki mal. Si nou les move dezir fer nou fer pese, son konsekans i kapab fatal.

Ekriven Phiroz Mehta ti ekrir: “En kantite soufrans i akoz nou prop move dezir ek lanvi pour fer nou lekor kontan, vorasite ek lanbisyon.” Bann lanvi ek adiksyon avek tou sort parey lalkol, drog, zwe bann zwe larzan, sèks ek leres ankor, in fer plizyer “sitwayen respektab” faid e fer soufer zot fanmir, zanmi ek lezot ankor. Akoz nou lenperfeksyon, nou bezwen dakor avek sa ki Labib i dir: “Tou dimoun i kapab vwar avek son de lizye ki dan sa letan ki nou pe viv, tou sa ki’n ganny kree pe soupire e pe rente ansanm.”​—Romen 8:22, The New Testament in Modern English, par John Phillips.

▪ LENFLIYANS BANN DEMON

Labib i montre ki Satan i “bondye . . . sa syek” ansanm avek bann demon pwisan.​—2 Korentyen 4:4; Revelasyon 12:9.

Parey Satan, bann demon pe fer tou pour kontrol e anbet bann dimoun. Zapot Pol ti rekonnet sa kan i ti dir: “Parski nou pa pe lit kont dimoun, me kont bann pouvwar move lespri dan ler, bann lotorite, ek pouvwar dan lemonn teneb [setadir bann demon] dan sa letan ki nou pe viv ladan.”​—Efezyen 6:12.

Bann demon pa zis anvi fer dimoun per. Zot anvi ki bann dimoun i elwannyen avek Zeova, sa Bondye Tre O. (Psonm 83:18) Bann pratik parey astrolozi, mazik, bonnonm dibwa ek predir lavenir i serten taktik ki bann demon i servi pour anbet e kontrol bann dimoun. Sanmenm sa Zeova i averti nou konsernan sa bann danze e protez tou sa bann ki anvi reziste Satan ek son bann demon.​—Zak 4:7.

▪ NOU PE VIV DAN “BANN DERNYEN ZOUR”

Apepre de mil an pase, Labib ti predir: “Rapel sa byen: dan bann dernyen zour pou annan letan difisil.”

Pour montre kwa ki pou fer sa letan difisil, Labib i kontinyen an dizan: “Parski zonm pou vin egois, kontan larzan, vantar, arogan . . . zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye.” Sirman, en rezon prensipal akoz i annan sitan soufrans i akoz nou pe viv “dan bann dernyen zour.”​—2 Timote 3:1-4.

Anliny avek sa ki nou fek vwar, eski pa i kler ki imen pa pou kapab elimin soufrans malgre zot bon lentansyon? Alor, kote nou kapab rod led? Nou bezwen rod led nou Kreater, ki’n promet pour “detri bann travay dyab.” (1 Zan 3:8) Sa lartik ki swiv pou montre sa ki Bondye pou fer pour elimin tou lakoz soufrans.

[Portre lo paz 4]