Skip to content

Al lo konteni

BIOGRAFI

Mon premye lanmour in ed mwan pour andire

Mon premye lanmour in ed mwan pour andire

LETE ti’n fek konmanse an 1970. Mwan, mon ti lo mon lili dan Lopital Valley Forge, ki ti sitye Phoenixville, Pennsylvania, Leta-z-ini. En msye ners ti pe tyek mon tansyon tou le demi erdtan. Mon ti en solda a laz 20 an e mon ti’n ganny en lenfeksyon grav. Sa ners, ki ti detrwa lannen pli vye ki mwan ti paret enkyet. Mon tansyon ti kontinyen desann e mon ti dir li, “Ou pa’n deza vwar en dimoun kot i mor, non?” Son figir ti vin pal e i ti reponn, “Non, mon pa’n deza.”

Sa letan, i ti paret ki mon pa ti pou sirviv. Me ki mannyer mon ti’n ariv lopital? Les mwan rakont zot mon lavi.

KOUMSA KI MON TI GANNY ENTRODWIR AVEK LAGER

Pandan Lager Vyetnanm, mon ti pe travay konman en dimoun ki ti prepar lasal loperasyon e ki ede pandan loperasyon. I koumsa ki mon ti tonm malad. Mon ti kontan pour ed bann dimoun malad e bann ki ti’n ganny dimal. Mon ti anvi vin en sirizyen. Mon ti ariv Vyetnanm an Zilyet 1969. Parey tou dimoun ler zot fek arive, mon ti ganny en semenn pour adapte avek sa diferans letan e osi sa gro lasaler.

Mon ti raport travay kot en lopital ki fer loperasyon o bor larivyer Mekong, Dong Tam. Pa bokou letan apre, plizyer elikopter avek bann dimoun ki ti’n ganny blese ti arive. Mon ti vreman kontan mon pei e mon ti kontan travay, alor mon ti anvi konmans ede deswit. Bann ki ti’n ganny blese ti ganny prepare pour loperasyon e apre ganny anmennen kot bann pti konntener ki ti’n ganny fer avek metal. I ti annan erkonn ladan e zot ti ganny servi konman bann lasal loperasyon. En sirizyen, en ners ki fer lanestezi e de lezot ners ti kwense dan sa pti konntener pour esey zot mye pour sov lavi bann dimoun. Mon ti remarke ki i ti annan serten gro sak nwanr ki pa ti ganny tire dan elikopter. Mon ti ganny dir ki dan sa bann sak i ti annan bout lekor bann solda ki ti’n ganny touye pandan lager. Se koumsa ki mon ti ganny entrodwir avek lager.

MON ROD BONDYE

Depi byen zenn mon ti’n ganny en pe kontak avek laverite

Depi ki mon ti en zenn garson mon ti’n ganny en pe kontak avek laverite ki bann Temwen Zeova i ansennyen. Mon manman, ki mon kontan en kantite, ti etidye avek bann Temwen, me i pa ti fer progre e batize. Mon ti kontan asiste son letid. Apepre dan menm letan, mon ti pas o bor en Lasal Rwayonm avek mon boper. Mon ti demann li, “Kisisa sa?” I ti reponn, “Pa zanmen al o bor sa bann dimoun!” Mon ti kontan mon boper, alor mon ti ekout son konsey. Sa ti fer ki mon ti perdi kontak avek bann Temwen Zeova.

Ler mon ti retourn kot mwan sorti Vyetnanm, mon ti santi ki mon ti bezwen Bondye dan mon lavi. Bann move souvenir Vyetnanm ti’n fer mon leker dir. I paret ki personn pa ti vreman konpran ki ti pe arive Vyetnanm. Mon rapel ki i ti annan bann protestasyon kot bann dimoun ti dekrir bann solda dan larme Leta-z-ini konman bann dimoun ki touy bann pti baba akoz i ti annan bann rapor konmkwa zot ti pe touy bann zanfan inosan pandan lager.

Pour mwan kapab konble mon bezwen spirityel, mon ti asiste lanmes dan diferan legliz. Mon ti’n toultan kontan Bondye me mon pa ti kontan sa ki mon ti vwar dan bann legliz. Finalman, mon ti al kot en Lasal Rwayonm Temwen Zeova sitye Delray Beach, Florida. I ti en Dimans an Fevriye 1971.

Ler mon ti arive, diskour piblik ti pros pour fini, alor mon ti reste pour letid Latour Veyer. Mon pa rapel kwa ki ti pe ganny diskite, me mon ankor rapel bann pti manrmay pe rod bann verse dan zot Labib. Sa ti vreman enpresyonn mwan! Mon ti zis ekoute e obzerve. Ler mon ti pe kit Lasal Rwayonm, en frer ki ti annan apepre 80 an ti apros mwan. I ti apel Jim Gardner. I ti ofer mwan en liv ki ti annan pour tit, The Truth That Leads to Eternal Life e dir, “Silvouple, ou kapab aksepte sa liv?” Nou ti fer en laranzman pour zwenn Zedi bomaten pour nou premye letid Labib.

Sa Dimans swar mon ti bezwen travay. Mon ti’n ganny anploye kot en lopital prive Boca Raton, Florida, kot mon ti travay dan lasal emergency. Mon ti bezwen travay depi 11 er diswar ziska 7 er bomaten. Vi ki i ti napa bokou pour fer sa zour swar, mon ti kapab lir sa liv Truth. En ners sinyor ti aras sa liv dan mon lanmen. Apre ki i ti’n get kouvertir i ti dir, “Ou pa pe vin enn zot ou non?” Mon ti repran mon liv Truth avek li e dir li, “Mon’n lir zis lanmwatye sa liv, me mon krwar sanmenm sa ki pou arive!” I ti les mwan trankil e sa zour swar mon ti lir sa liv an antye.

Mon ti etidye avek Jim Gardner, en Kretyen swazir ki ti konn Charles Russell

Premye keksoz ki mon ti demann Frer Gardner ler nou ti konmans nou letid ti: “Alor, ki nou pe al etidye?” I ti reponn: “Sa liv ki mon’n donn ou.” Mon ti dir li: “Be mon’n fini lir.” Frer Gardner ti zantiman reponn, “Oke, annou zis diskit sa premye sapit.” Mon ti enpresyonnen ki mon ti’n mank en kantite. I ti fer mwan rod bann verse Labib dan versyon King James. Finalman mon ti pe aprann lo sa vre Bondye, Zeova. Frer Gardner, ki mon ti apel Jim, ti etidye trwa sapit sa liv Truth avek mwan sa zour bomaten. Apre sa, tou le Zedi bomaten nou ti etidye trwa sapit. Mon ti vreman kontan nou letid. I ti en gran privilez pour mwan ganny ansennyen avek en frer swazir ki ti’n konn Charles Russell personnelman.

Apre detrwa semenn, mon ti ganny aksepte pour vin en proklanmater sa bon nouvel. I ti annan bokou keksoz ki ti trakas mwan, enkli pres portanport, me Jim ti ed mwan. (Akt 20:20) Anmezir ki Jim ti travay avek mwan dan predikasyon, mon ti konmans kontan sa travay. Mon ankor vwar predikasyon konman sa pli gran privilez ki mon’n gannyen. Pa i gou pour travay ansanm avek Bondye!2 Kor. 6:1.

MON PREMYE LANMOUR POUR ZEOVA

Aprezan, les mwan rakont zot lo mon premye lanmour pour Zeova. (Rev. 2:4) Sa lanmour pour Zeova in ed mwan fer fas avek bann move souvenir ki mon ti gannyen pandan lager ek lezot leprev.Iza. 65:17.

Mon lanmour pour Zeova in ed mwan fer fas avek bann move souvenir ki mon ti gannyen pandan lager ek lezot leprev

Mon ti batize an Zilyet 1971 pandan Lasanble Distrik “Divine Name” kot Stad Yankee

Mon rapel en zour ki ti spesyal dan mon lavi, sa ti an prentan 1971. Mon ti pe reste dan apartman mon paran me aprezan zot ti’n met mwan deor. Mon boper pa ti oule okenn Temwen Zeova lo son propriyete. Mon ti napa bokou larzan sa letan. Sa lopital kot mon ti pe travay ti pey mwan tou le de semenn e mon ti’n fek depans laplipar mon lapey pour aste lenz pour ki mon kapab prese e byen reprezant Zeova. Mon ti annan en pti larzan de kote me i ti dan labank an Michigan kot mon ti’n grandi. Alor mon ti bezwen reste dan mon loto pour detrwa zour. Mon ti bennyen e raze dan bann twalet kot bann stasyon petrol.

En zour, kan mon ti ankor pe reste dan mon loto, mon ti ariv kot Lasal Rwayonm detrwa erdtan avan ki group i zwenn pour predikasyon. Mon ti’n fek fini travay sa zour. Ler mon ti pe asize deryer Lasal Rwayonm kot personn pa ti kapab vwar mwan, bann move souvenir Vyetnanm ti konmans anvair mon lespri, mon ti santi loder lekor brile, mon ti vwar disan ek bann blesir ki’n ouver. Dan mon lespri mon ti kapab tann e vwar bann zenn garson pe sipliy mwan, “Eski mon pou sirviv? Eski mon pou sirviv?” Mon ti konnen zot pou mor, me mon ti esey mon mye pour rekonfort zot e pa fer zot remarke ki zot ti pe al mor. A sa moman, la kot mon ti ete, mon lemosyon ti anvair mwan.

Mon’n fer tou sa ki mon kapab, espesyalman kan mon pe pas atraver bann leprev ek difikilte pour pa zanmen perdi mon premye lanmour pour Zeova.

Anmezir ki mon ti pe priye, zis mon de larm ti koule. (Ps. 56:8) Mon ti konmans reflesir lo sa promes rezireksyon. Apre, en sel kou mon ti realize ki atraver rezireksyon, Zeova pou repar tou bann dega ki mon ti’n vwar pandan lager e retir tou soufrans emosyonnel ki mwan ek lezot nou’n eksperyanse. Bondye pou resisit sa bann zenn garson e zot pou annan sa loportinite pour aprann konn li. (Akt 24:15) A sa moman, mon leker ti deborde avek lanmour pour Zeova ki ti tous mwan o fon mon leker. Sa zour pou toultan en zour spesyal pour mwan. Depi sa letan, mon’n fer tou sa ki mon kapab, espesyalman kan mon pe pas atraver bann leprev ek difikilte pour pa zanmen perdi mon premye lanmour pour Zeova.

ZEOVA IN BON ANVER MWAN

Dan lager, dimoun i fer bann keksoz terib. Mwan osi parey. Me sa ki ed mwan se ler mon medit lo de parmi mon bann verse prefere. Premye verse i dan Revelasyon 12:10, 11, ki dir nou ki Dyab i perdi batay pa zis akoz sa mesaz ki nou anonse me osi akoz disan Lanyo. Dezyenm i sorti dan Galat 2:20. Sa verse i montre mwan ki Zezi Kri ti mor “pour mwan.Zeova i get mwan atraver disan Zezi e I’n pardon mwan pour sa ki mon’n fer. Sa in permet mwan annan en bon konsyans e ankouraz mwan pour fer tou sa ki mon kapab pour ed lezot pour konn laverite konsernan nou Bondye Zeova ki annan mizerikord.Ebr. 9:14.

Ler mon reflesir lo mon lavi, mon vreman apresye ki Zeova in toultan pran swen avek mwan. Par egzanp, sa menm zour ki Jim ti dekouver ki mon ti pe reste dan mon loto, i ti fer mwan ganny kontak avek en ser ki ti lwe lakaz. Mon vreman krwar ki Zeova ti servi Jim ek sa ser pour donn mwan en bon landrwa reste. Zeova i vreman bon! I pran swen avek son bann serviter fidel.

APRANN POUR ANNAN DEVOUMAN EK TAK

An Me 1971, mon ti bezwen al Michigan pour fer serten tranzaksyon. Avan ki mon ti kit Kongregasyon Delray Beach, Florida, mon ti ranpli keson mon loto avek piblikasyon apre mon ti pran semen pour al dan direksyon nor. Keson ti’n fini vid avan mon kit leta Georgia. Mon ti pres sa bon nouvel Rwayonm avek devouman dan diferan landrwa. Mon ti aret kot bann prizon e menm ler mon ti al dan bann landrwa kot dimoun i repoze mon ti donn trak bann msye dan twalet. Ziska ozordi, mon demande si okenn sa bann lagrenn ki mon’n senmen in pouse.1 Kor. 3:6, 7.

Me, mon bezwen admet ki ler mon ti fek aprann laverite mon pa ti servi tak ditou, espesyalman ler mon ti koz avek mon fanmir. Vi ki mon premye lanmour pour Zeova ti pe brile anndan mwan, sa ti fer mwan pres avek devouman me san tak. Mon vreman kontan mon de frer John ek Ron e mon ti tant pour enpoz laverite lo zot. Pli tar mon ti bezwen demann leskiz lefet ki mon ti’n azir dan sa fason. Par kont, mon pa’n zanmen aret priye ki zot aksepte laverite. Depi sa letan, Zeova in ansenny mwan e la aprezan mon servi tak ler mon prese e ansennyen.Kol. 4:6.

LEZOT DIMOUN KI MON KONTAN

Apard ki Zeova, i annan lezot dimoun ki mon kontan. Sa lot dimoun ki mon kontan i mon madanm Susan. Mon ti konnen ki mon ti oule en konpanyon ki ti pou ed mwan dan mon servis. Susan i en madanm kouraze e matir spirityelman. Mon ankor rapel byen kan mon ti al vizit li en zour ler nou ti pe frekante. Susan ti pe asize anba lavarang kot son paran ti reste Cranston, Rhode Island. I ti pe lir Latour Veyer e i ti annan son Labib avek li. Sa ki ti enpresyonn mwan se ki i ti pe lir enn parmi bann lezot lartik dan sa Latour Veyer e i ti pe get son bann verse Labib. Mon ti dir dan mwan menm, ‘Sa i en madanm spirityel!’ Nou ti marye an Desanm 1971 e mon rekonesan ki depi sa letan i’n la dan mon kote pour siport mwan. Sa ki mon vreman apresye avek li se ki menm si i kontan mwan, i pli kontan Zeova.

Mwan ek mon madanm Susan e nou de garson Paul ek Jesse

Nou de Susan nou ti ganny de garson, Jesse ek Paul. Anmezir ki zot ti grandi Zeova ti avek zot. (1 Sam. 3:19) Vi ki zot in pran laverite aker, sa in fer nou de Susan fyer. Zot pe kontinyen servi Zeova akoz zot premye lanmour pour li. Zot tou le de zot dan servis a plen tan pour plis ki 20 an. Mon osi fyer pour annan mon de bel fiy Stephanie ek Racquel, ki mon konsider komann mon de fiy. Mon de garson in marye avek bann madanm spirityel ki kontan Zeova avek tou zot leker.Efe. 6:6.

Konman en fanmir nou ti kontan pres dan bann landrwa kot pa ti souvan ganny prese

Apre mon batenm, mon ti servi pour apepre 16 an Rhode Island kot mon ti fer bann bon zanmi. Mon annan bann zoli souvenir bann bon ansyen ki mon ti travay avek. An plis, mon rekonesan anver tou bann sirveyan rezyonal ki ti annan bann bon lenfliyans lo mwan. Pa i en gran privilez pour travay ansanm avek sa bann zonm ki gard zot premye lanmour pour Zeova! An 1987, nou ti al reste dan Nor Carolina pour al servi kot ti annan en pli gran bezwen e laba osi nou ti ganny bann bon zanmi. *

Pe fer en renyon predikasyon ler mon ti sirveyan rezyonal

An Out 2002, nou de Susan nou ti aksepte sa lenvitasyon pour form parti lafanmir Betel Patterson, Leta-z-ini. Mon ti travay dan Departman Servis e Susan dan laundry. I ti kontan travay laba. Apre sa, an Out 2005, mon ti ganny sa privilez pour servi konman en manm Konsey Direkter. Sa travay in fer mwan devlop limilite. Ler mon madanm ti mazin sa responsabilite, travay ek vwayaz ki nou ti pou bezwen fer, sa ti stres li. Susan pa’n zanmen kontan pran avyon, me nou vwayaz par avyon en kantite! Susan i dir ki madanm bann lezot manm lo Konsey Direkter in ankouraz li pour toultan siport mwan otan ki posib. Sanmenm sa ki i’n fer e sanmenm sa ki fer mwan kontan li.

Dan mon lofis mon antoure avek bann portre ki annan en gran valer pour mwan. Zot fer mon rapel sa bon lavi ki mon’n viv. Mon’n fini resevwar en kantite rekonpans lefet ki mon’n fer mon mye pour rapel mon premye lanmour pour Zeova.

I en lazwa pour mwan pas letan avek mon fanmir

^ par. 31 Pour trouv bann detay konsernan servis a plen tan Frer Morris get dan Latour Veyer le 1 Avril 2006 paz 18.