Kestyon lekter

Eski bann Izraelit ti egzekit bann kriminel anpandan lo poto?

▪ Bokou nasyon dan letan pase ti egzekit bann kriminel par klout zot lo poto. Bann Romen ti anmare oubyen klout en kriminel lo poto, kot i ti pou kapab reste vivan pour plizyer zour ziska ki i mor avek douler, laswaf, lafen, lasaler ek lafreser. Pour bann Romen, i ti en laont pour sa kriminel ganny egzekite dan sa fason.

Ki nou kapab dir konsernan nasyon Izrael dan letan lontan? Eski bann Izraelit ti met a mor bann kriminel lo poto? Lalwa Moiz ti dir kwa ki ti devret ganny fer: “An ka i arive ki en zonm i fer en pese ki merit lanmor, e i’n ganny met a mor, e ou’n bezwen met li anpandan lo en poto, son lekor pa devret reste lo sa poto tou lannwit, me ou devret fer tou pour anter li sa menm zour.” (Det. 21:22, 23) Alor, letan ki Lekritir Ebre ti pe ganny ekrir, i evidan ki en dimoun ti ganny touye avan ganny met anpandan lo en poto oubyen pye dibwa.

Pour sa rezon, Levitik 20:2 i dir: “Nenport zonm parmi bann garson Izrael, e nenport rezidan etranze ki en etranze an Izrael, ki donn enn parmi son bann zanfan avek Molek, i devret sirman ganny met a mor. Bann dimoun sa pei i devret saboul li avek ros.” Bann ki ti annan lespri devinen osi ti bezwen ganny met a mor. Konman? ‘Par saboul zot avek ros.’​—Lev. 20:27.

Deterononm 22:23, 24 i dir: “An ka i arive ki en fiy vyerz ki’n fiyanse pour marye avek en zonm, e en zonm i trouv li dan lavil e i dormi avek li, zot bezwen anmenn tou le de an deor baro sa lavil e saboul zot avek ros e zot bezwen mor, sa fiy pour rezon ki i pa ti kriy o sekour dan sa lavil, e sa zonm pour rezon ki i’n imilye madanm son konpanyon. Alor zot bezwen retir tou lemal parmi zot.” Alor, pour bann Izraelit sa lepok, saboul avek ros ti sa metod prensipal pour met a mor en dimoun ki ti’n komet en krim ki merit lanmor. *

Deterononm 21:23 i dir ki “en keksoz ki’n ganny modi par Bondye i sa enn ki’n ganny pann.” Les lekor en kriminel, andotmo, enn ki’n ganny “modi par Bondye” anpandan kot tou dimoun i vwar ti pou’n bezwen annan en lefe lo bann Izraelit. Anfet, met anpandan lekor en kriminel lo en poto oubyen lo en pye dibwa, ti servi konman en lavertisman pour lezot.

[Not anba lo paz]

[Ekstre lo paz 13]

Letan ki Lekritir Ebre ti pe ganny ekrir, i evidan ki en dimoun ti ganny touye avan ganny met anpandan lo en poto oubyen pye dibwa