Skip to content

Al lo konteni

 LESON 5

Ed ou zanfan aksepte gidans bann adilt

Ed ou zanfan aksepte gidans bann adilt

KWA KI ENPLIKE DAN DONN GIDANS?

Zanfan i bezwen direktiv ek konsey en adilt. Konman en paran, i ou responsabilite pour donn ou zanfan direksyon ek konsey. Par kont, lezot adilt osi i kapab ed ou zanfan e konsey li.

AKOZ GIDANS EN ADILT I ENPORTAN?

Dan plizyer pei bann zenn pa pas preski ditou letan avek bann adilt. Par egzanp:

  • Zanfan i pas laplipar zot letan kot lekol, kot i annan bokou plis zanfan ki bann ansenyan.

  • Apre lekol, serten zenn i retourn kot lakour e zot vwar zot tousel parski zot paran pe travay.

  • Dapre en letid Leta-z-ini, bann zanfan 8 a 12 an i pas an mwayenn apepre sis er-d-tan dan bann divertisman tel parey get televizyon, ekout lanmizik ek bann zwe video sak zour. *

Sa liv Hold On to Your Kids i dir: “Pli ale bann zenn pe rod konsey avek lezot zenn olye bann adilt.”

KI MANNYER POUR DONN GIDANS?

Pas letan avek ou zanfan.

PRENSIP LABIB: “Donn en zanfan bann bon labitid depi son zenn az; I ava ankor pe met zot an pratik dan son vye zour.”​—Proverb 22:6.

Normalman bann zanfan i rod gidans avek zot paran. Anfet, bann eksper i dir ki menm bann adolesan i tant pour rod konsey avek zot paran plito ki avek lezot zenn. Dan sa liv You and Your Adolescent, Profeser Laurence Steinberg i ekri, “Bann paran i zwe en rol enportan dan latitid ek konportman zot zanfan ler zot pe kit laz adolesan pour vin adilt.” I osi dir: “Bann adolesan i anvi konn ou panse e zot ekout byen sa ki ou dir menm si pa toultan ki zot admet ouswa dakor avek tou sa ki ou dir.”

Vi ki ou zanfan i anvi ou gidans, fer tou sa ki ou kapab pour donn li. Pas letan avek ou zanfan e dir zot ki mannyer ou santi e panse lo diferan keksoz, sa ki enportan pour ou e sa ki ou’n aprann dan lavi.

 Rod en dimoun pour ed li.

PRENSIP LABIB: “Si ou frekant en saz, ou menm ou ava vin saz.”​—Proverb 13:20.

Eski i annan en dimoun ki kapab ede e donn konsey ou zanfan adolesan? Eski ou kapab fer laranzman pour ki sa dimoun i pas letan avek li? Byensir, sa pa vedir ki en lot dimoun pou responsab pour ou zanfan. En adilt ki ou annan konfyans ladan e ki pa pou fer ditor ou zanfan i kapab donn ou en koudmen pour ed ou zanfan. Dan Labib, menm si Timote ti en adilt, i ti pas bokou letan avek zapot Pol kot i ti aprann bokou keksoz e Pol osi ti apresye sa lanmitye ki zot ti annan.​—Filipyen 2:20, 22.

Pandan sa dernyen di-z-an, en kantite fanmir nepli viv ansanm dan menm lakaz ouswa vwazinaz e souvandfwa bann granparan, tonton, tantin ek lezot manm fanmir i kapab reste dan lezot pei. Si sa i leka dan landrwa kot ou reste, esey donn ou adolesan sa loportinite pour aprann avek en adilt ki annan bann kalite ki ou ti ava kontan vwar dan ou zanfan.

^ par. 9 Sa letid i fer resorti ki an mwayenn bann adolesan i pas preski nef er-d-tan dan sa bann divertisman. Sa bann statistik lo bann zanfan ek adolesan pa enkli letan ki zot pase lo Enternet kot lekol ouswa pe fer homework.