Skip to content

Al lo konteni

Bann bon valer i parey en bon konpa ki kapab ed ou zanfan pour deside kote i pou ale

 POUR BANN PARAN

7: Valer moral

7: Valer moral

KI I VEDIR

Bann valer i bann standar personnel ki ou met an pratik dan ou lavi. Par egzanp, eski ou esey onnet dan tou keksoz? I tre probab, ki ou pou anvi ou zanfan osi i swiv sa menm valer moral.

Bann valer i osi enkli lapolites. Par egzanp, en dimoun ki annan lapolites i osi kapab en dimoun ki travay dir, pa fer lapreferans e ki mazin lezot. Sa i bann kalite ki en dimoun i kapab devlope ler i ankor zenn.

PRENSIP LABIB: “Donn en zanfan bann bon labitid depi son zenn az; I ava ankor pe met zot an pratik dan son vye zour.”​—Proverb 22:6.

AKOZ I ENPORTAN

Dan en lemonn ranpli avek teknolozi, i vreman enportan pour annan bann valer moral. En manman ki apel Karyn i dir: “I fasil pour ganny move lenfliyans lo mobayl oubyen tablet nenport ler. Nou zanfan i kapab pe asiz lanmenm o bor nou e an menm tan pe get bann keksoz ki pa apropriye.”

PRENSIP LABIB: “Bann dimoun matir ki’n aprann servi zot abilite pour zize pour zot kapab fer diferans ant sa ki byen ek sa ki mal.”​—Ebre 5:14.

I osi enportan pour annan lapolites. Sa i enkli bann senp keksoz (parey dir “silvouple” ek “mersi”) e demontre lentere dan lezot. I vreman enportan pour annan lapolites, vi ki dimoun i pli enterese avek zot mobayl ek tablet ki avek lezot dimoun.

PRENSIP LABIB: “Zis parey zot anvi dimoun i fer pour zot, zot osi fer parey pour zot.”​—Lik 6:31.

SA KI OU KAPAB FER

Fer ou zanfan konn ou bann valer moral. Par egzanp, resers i montre ki bann adolesan i pli pare pour pa fer sèks avan maryaz si zot paran in eksplik zot akoz i mal.

SIZESYON: Servi en levennman ki’n fek pase pour ou kapab koz lo bann valer avek ou zanfan. Par egzanp, si dan nouvel i’n koz lo en krim vyolan ki’n arive, ou kapab dir: “I vreman terib ki mannyer dimoun i montre zot lakoler konmela. Akoz ou krwar zot fer sa?”

“I bokou pli difisil pour en zanfan swazir ant sa ki byen ek sa ki mal si i pa konnen kwa ki byen e kwa ki mal.”​—Brandon.

Ansenny ou zanfan pour annan lapolites. Menm bann zenn manrmay i kapab aprann pour dir “silvouple” ek “mersi” e demontre lentere dan lezot. Sa liv ki apel Parenting Without Borders i dir: “Pli zanfan i vwar ki zot form parti en fanmir, lekol ek lakominote, pli zot pou anvi fer bann keksoz ki pou benefisye lezot, pa zis zot lekor.”

SIZESYON: Donn ou zanfan louvraz pour fer kot lakour pour zot aprann ed lezot.

“Si nou zanfan i abitye fer louvraz depi la konmela, i pa pou en problenm ler zot viv zot tousel pli tar. Zot pou deza annan sa labitid pour pran zot responsabilite.”​—Tara.