POUR BANN ZENN
11: Travay dir
KI I VEDIR
Bann dimoun ki travay dir pa sov travay. O kontrer, zot kontan travay pour ganny sa ki zot bezwen e pour ed lezot menm si bokou dimoun pa kontan sa travay ki zot pe fer.
AKOZ I ENPORTAN
Kontan pa kontan, nou bezwen admet ki nou annan bokou responsabilite dan lavi. Menm si bokou dimoun konmela pa kontan travay, en dimoun ki travay dir i ganny bann bon rezilta.—Eklezyast 3:13.
“Mon’n aprann ki ler ou travay dir, ou fyer pour sa ki ou’n fer e ou vreman kontan. Sa bann santiman koumsa in ed mwan pour kontan travay dir e sa in fer mwan ganny en bon repitasyon.”—Reyon.
PRENSIP LABIB: “Tou travay dir i anmenn byenfe.”—Proverb 14:23, NWT.
SA KI OU KAPAB FER
Pour devlop en bon pwennvi lo travay, swiv sa bann sizesyon swivan.
Fer ou mye pour aprann fer keksoz byen. Ki swa ou pe fer louvraz kot lakour, fer ou leson oubyen ou dan travay, konsantre dan sa ki ou pe fer. Enn fwa ki ou’n kapab fer en keksoz byen, rod fason pour amelyore, petet par fer sa travay pli vit oubyen pli byen ankor. Pli ou efikas, pli ou pou kontan sa travay ki ou pe fer.
PRENSIP LABIB: “Si en zonm i fer byen son travay, [i] ava kapab servi bann lerwa; i pa pou travay pour bann dimoun ordiner.”—Proverb 22:29.
Vwar ki lezot dimoun i enplike. I tre probab ki ler ou pran byen ou responsabilite, sa i benefisye lezot. Par egzanp, ler ou travay dir kot lakour sa pou ed lezot manm fanmir.
PRENSIP LABIB: “I annan plis lazwa pour donnen ki pour resevwar.”—Akt 20:35.
Fer plis. Dan plas fer zis sa ki neseser, esey fer plis ki sa ki ou’n ganny demande pour fer. Dan sa fason, ou ki pe kontrol ou lavi. Ou fer plis pa akoz ou’n ganny forse me akoz ou’n swazir pour fer li.—Matye 5:41.
PRENSIP LABIB: “Ou kapab fer sa bon aksyon akoz ou menm ou anvi fer li me pa akoz ou ganny forse pour fer li.”—Filemon 14.
Reste ekilibre. Bann dimoun ki travay dir pa pares e zot pa travay tro bokou osi. Zot byen ekilibre. Zot kontan travay dir me zot osi kontan pour annan bann moman detant.
PRENSIP LABIB: “En pti ponnyen repo i pli bon ki de ponnyen travay ki zis i en lakours deryer divan.”—Eklezyast 4:6.
