Skip to content

Al lo konteni

En gerizon i devret tret sours sa problenm dan plas zis son sentonm

 AKOZ I DIFISIL?

Nou bezwen konnen akoz nou dan sa problenm

Nou bezwen konnen akoz nou dan sa problenm

Eski ou krwar imen i kapab rezourd sa kantite problenm ki anpes nou viv dan lape ek sekirite e ki met nou lavenir an danze? Pour vreman kapab rezourd nou bann problenm, nou bezwen konn lakoz nou problenm.

Pour donn en legzanp, en pasyan ki apel Tom ti malad e pli tar i ti mor. Akoz i ti mor? Sa dokter ki travay dan sa lopital kot Tom ti ete zis avan i mor, ti ekri: “Ler i ti konmans ganny bann sentonm, personn pa ti mazin pour rode kwa ki ti pe fer li malad.” I paret ki bann dokter ki ti’n okip li avan sa ti’n zis donn li latizann pour soulaz li.

Eski imen pe esey rezourd bann problenm sa lemonn dan menm fason? Par egzanp, pour lager kont krim, bann gouvernman i met bann lalwa, kamera sirveyans e ranforsi zot lafors lapolis. Me menm si sa bann keksoz i ede, zot pa pe adres lakoz nou problenm. Apre tou, dimoun i fer sa ki zot anvi.

Daniel ki reste dan en pei Sid Lanmerik ki pe vin deplizanpli pov, i dir: “Oparavan nou ti annan en lavi normal. Nou pa ti per ki nou pou ganny atake avek bann voler ki annan zarm. Me konmela i nepli annan en lavil ouswa vilaz ki anpe. Avek sa sityasyon difisil dan nou pei, aprezan nou kapab vwar byen ki en kantite dimoun i voras e zot napa respe pour lavi ek keksoz lezot.”

En zonm ki nou pou apel Elias, ti sove e kit Mwayen Oriyan akoz lager e pli tar i ti etidye Labib. I dir: “En kantite zenn onm sorti dan menm lavil avek mwan ti ganny ankouraze par zot fanmir, politisyen ek bann larelizyon pour partisip dan lager pour zot vin bann ero. Bann dimoun ki zot ti pe al lager avek ti’n ganny dir menm zafer! Tousala ti fer mwan vwar ki ler nou met konfyans dan bann dirizan imen, nou pou dezapwente.”

En liv ranpli avek lasazes i dir:

  • “I vre ki depi son lazenes, leker zonm i move.”​—Zenez 8:21.

  • “Leker i pli tret ki okenn keksoz e i tre move. Lekel ki kapab konn li?”​—Zeremi 17:9, NWT.

  • “Dan leker ki sorti bann move rezonnman, mert, . . . imoralite seksyel, vol, fo temwannyaz.”​—Matye 15:19.

Imen pa’n reisi trouv en solisyon pour bann move tandans ki fer dimoun fer ditor kanmarad. Anfet, ler nou mazin lo sa bann problenm ki nou’n mansyonnen dan sa lartik avan, i paret ki sa bann tandans pe vin pli pir. (2 Timote 3:1-5) Sa i leka, malgre dimoun ozordi i annan bokou plis lenformasyon ek plis fasilite pour kominik avek kanmarad! Alor, akoz nou pa kapab anmenn lape ek sekirite dan sa lemonn? Eski imen i kapab fer sa lo zot menm? Eski i posib pour annan en lemonn kot i annan lape ek sekirite?

ESKI I POSIB POUR ANNAN LAPE EK SEKIRITE?

Menm si i ti annan en fason pour tir bann move tandans dan dimoun, nou pa ti pou kapab fer lemonn vin en landrwa ki an sekirite pour tou dimoun. Akoz? Parski konman imen nou annan serten limit.

 I evidan ki: “Napa en dimoun ki kapab kontrol son lavi.” (Zeremi 10:23) Sa i vedir ki nou pa’n ganny kree pour diriz nou prop lekor. Anfet, nou pa’n ganny kree pour diriz lezot imen zis parey nou pa’n ganny kree pour viv anba delo ouswa dan lespas!

Nou pa’n ganny kree pour diriz lezot imen zis parey nou pa’n ganny kree pour viv anba delo

Par egzanp, eski dimoun an zeneral i kontan ler lezot i dir zot ki mannyer pour viv zot lavi oubyen ki bann valer moral zot devret annan? Eski dimoun i kontan ler lezot i dir zot ki pwennvi zot devret annan lo bann keksoz tel parey lavortman, santans lanmor ouswa lafason ki zot devret disiplin zot zanfan? Sa i zis serten keksoz ki fer divizyon ant bann dimoun. Alor, sa ki Labib i dir i fer sans, menm si i kapab difisil pour aksepte. Nou zis napa sa abilite ouswa sa drwa pour diriz lezot dimoun. Kote alor nou kapab ganny led?

Sa pli bon keksoz ki nou kapab fer se tourn ver nou Kreater. Apre tou, li ki’n kree nou! Kontrerman avek sa ki serten i kapab mazinen, i pa’n oubliy nou. Anfet, i montre ki i enterese avek nou parski i’n donn nou Labib ki ranpli avek lasazes. Ler nou konpran sa liv inik, nou osi konpran nou pli byen. Nou kapab konpran akoz listwar imen i telman ranpli avek soufrans. Parey en filozof Alman ti ekri, nou kapab vwar ki “bann dimoun ek gouvernman pa’n zanmen aprann okenn leson avek listwar, alor zot pa’n sanz zot konportman.”

LASAZES KI DAN LABIB I PROTEZ NOU!

En fwa en zonm saz ti dir ki “lasazes en dimoun i ganny rekonnet par son aksyon.” (Lik 7:35) En legzanp lasazes i trouve dan Izai 2:22 (NWT) ki dir: “Pour ou prop dibyen, aret met konfyans dan bann senp imen.” Sa bon konsey i kapab ed nou pour pa met lespwar dan en keksoz ki pa pou zanmen arive. Kenneth, ki reste dan en lavil dan Nor Lanmerik ki ranpli avek vyolans, i dir: “Sak politisyen ki vin o pouvwar i promet pour aranz keksoz pour le meyer, me zot pa kapab. Zot toultan kas zot promes e sa i prouve ki sa ki Labib i dir i vre e saz.”

Daniel ki’n ganny mansyonnen pli boner, i ekri: “Sak zour ki pase mon vin pli konvenki ki imen pa kapab diriz byen. . . . I pa akoz ou annan larzan dan ou kont labank ouswa ou’n fer serten lenvestisman ki sa i vedir ki tou keksoz pour oke a lavenir. Mon’n vwar dimoun vreman fristre akoz sa.”

Labib pa zis anpes nou krwar dan bann keksoz ki pa pou zanmen vin vre. I osi donn nou lespwar parey nou pou vwar apre.