1, 2. (a) Ki diferan lopinyon dimoun i annan konsernan liberte pour swazir? (b) Ki Labib i dir konsernan nou liberte pour swazir e ki kestyon nou pou reponn?

LER en madanm ti pe fer en desizyon personnel, i ti dir son zanmi: “Mon pa anvi reflesir, zis dir mwan ki pour fer. I pli fasil koumsa.” Sa madanm ti anvi ganny dir ki pour fer dan plas servi son liberte pour swazir, en kado presye sorti kot son Kreater. Me ou, eski ou kontan fer ou prop desizyon oubyen ou anvi lezot i fer desizyon pour ou? Ki lopinyon ou annan lo sa size?

² Dimoun i annan diferan lopinyon konsernan liberte pour swazir. Serten i dir ki nou napa sa liberte pour swazir akoz Bondye in fini deside davans tou sa ki nou pou fer. Lezot i dir ki liberte pour swazir i posib zis ler nou totalman lib. Par kont, Labib i dir ki nou ti ganny kree avek sa abilite ek liberte pour fer bann bon desizyon. (Lir Zozye 24:15.) Dan Labib nou osi trouv larepons sa bann kestyon swivan: Eski nou liberte pour swazir i annan  limit? Ki mannyer nou devret servi nou laliberte pour fer bann desizyon? Ki mannyer nou bann desizyon i montre ki nou kontan Zeova en kantite? Ki mannyer nou montre ki nou respe desizyon lezot?

3. Ki mannyer Zeova i servi son laliberte total?

³ Zeova i annan laliberte total e nou kapab aprann avek lafason ki i servi son laliberte. Par egzanp, Zeova ti swazir nasyon Izrael pour vin son pep, “son propriyete spesyal.” (Deterononm 7:6-8, NWT) I ti annan en rezon pour swazir zot. Zeova ti anvi gard sa promes ki i ti’n fer avek son zanmi Abraam. (Zenez 22:15-18) An plis, Zeova i toultan demontre lanmour e i rezonnab ler i servi son laliberte. Nou kapab vwar sa dan lafason ki i ti disiplin bann Izraelit ler zot ti dezobei li. Ler zot ti vreman regret sa ki zot ti’n fer, Zeova ti demontre lanmour ek pitye anver zot. I ti dir: “Mon pou geri zot enfidelite. Mon pou servi mon liberte pour swazir pour kontan zot.” (Osea 14:4, NWT) Zeova in servi son laliberte pour ed lezot, pa sa i en bon legzanp pour nou!

4, 5. (a) Lekel ki ti premye pour ganny sa liberte pour swazir e ki mannyer i ti servi li? (b) Ki kestyon sak dimoun i devret demande?

⁴ Zeova ti swazir pour kree bann lanz ek imen avek liberte pour swazir. Zeova ti kree Zezi premye. I ti ganny kree dan resanblans Bondye e i ti annan liberte pour swazir. (Kolosyen 1:15) Ki mannyer Zezi ti servi son liberte? Avan Zezi ti vin lo later, i ti swazir pour reste fidel avek Bondye e i ti swazir pour pa pran par dan rebelyon ki Satan ti fer. Ler Zezi ti vin lo later, i ti swazir pour reziste bann tantasyon Satan. (Matye 4:10) Sa zour swar avan son lanmor, Zezi ti asir son Papa ki i oule fer Son lavolonte. I ti dir: “Papa, si ou oule, pa les mwan bwar sa lakoup. Selman, pa dapre mon lavolonte, me dapre ou lavolonte.” (Lik 22:42) Eski i vreman posib pour nou imit Zezi e servi nou liberte pour swazir pour onor Zeova e fer son lavolonte?

⁵ Wi, nou kapab imit Zezi akoz nou osi nou’n ganny fer dan resanblans Bondye. (Zenez 1:26) Par kont, nou napa sa laliberte total ki Zeova i annan. Parol Bondye i eksplike ki Zeova in met bann limit lo nou liberte e i ekspekte ki nou aksepte sa bann limit. Par egzanp, dan fanmir, bann madanm i devret soumet avek zot msye e bann zanfan i devret soumet avek zot paran. (Efezyen 5:22; 6:1) Ki lefe sa bann limit i annan lo nou liberte pour swazir? Nou lavenir i depan lo larepons sa kestyon.

6. Donn en legzanp ki montre akoz i enportan pour nou laliberte annan bann limit.

⁶ Parey nou’n vwar, nou laliberte i annan limit, me eski sa i vedir ki nou pa kapab vreman lib? Non, nou kapab. Akoz? Parski bann limit i kapab protez nou. Par egzanp, meton nou ti pe dray pour al dan en lavil ki vreman lwen. Aprezan, mazinen ki i ti napa okenn lalwa trafik, dimoun ti kapab deside dray vites ki zot anvi e dray lo ki kote semen zot anvi. Eski ou ti pou santi ou an sekirite lo sa semen? Ditou. Si i ti napa bann limit, nou pa ti pou kapab apresye bann byenfe ki nou gannyen ler nou vreman lib. Annou vwar serten legzanp dan Labib ki montre ki mannyer bann limit ki Zeova in mete i kapab ed nou.

7. (a) Ki diferans ti annan ant Adan ek bann zannimo? (b) Dekrir en fason ki Adan ti servi son liberte pour swazir.

⁷ Ler Zeova ti kree Adan, sa premye zonm, i ti donn li sa menm kado ki i ti’n donn bann lanz, sa i liberte pour swazir. Me Bondye pa ti donn bann zannimo liberte pour swazir. Ki mannyer Adan ti servi son liberte pour swazir dan sa bon fason? Adan ti annan sa lazwa pour donn non bann zannimo. Bondye “ti anmenn zot kot sa zonm pour vwar ki mannyer i ti pou apel sak zannimo.” Apre ki Adan ti’n obzerv sak zannimo, i ti donn li en non ki ti al byen avek li. Zeova pa ti sanz okenn swa Adan. O kontrer, “nenport non ki sa zonm ti donn sak zannimo, sa ti vin son non.”—Zenez 2:19, NWT.

8. Ki mannyer Adan ti mal servi son liberte pour swazir e ki konsekans sa in anmennen?

⁸ Zeova ti donn Adan sa responsabilite pour fer later vin en paradi e dir li: “Zot ava fer zanfan, zot ava ogmante e ranpli later; zot ava soumet anba zot dominasyon, tou pwason dan lanmer, tou zwazo dan lesyel ek tou zannimo ki bouze lo later!” (Zenez 1:28) Me Adan ti swazir pour manz sa fri ki i ti napa drwa manze e ler i ti fer sa, i ti rezet bann limit ki Zeova ti’n mete. Vi ki Adan ti mal servi son liberte pour swazir, imen in soufer pour plizyer milye lannen. (Romen 5:12) Annou vwar ki konsekans desizyon Adan in anmennen. Sa pou motiv nou pour servi nou laliberte dan en bon fason e aksepte bann limit ki Zeova in donn nou.

9. Ki swa Zeova ti donn pep Izrael e ki zot ti promet pour fer?

⁹ Tou imen in erit lenperfeksyon ek lanmor avek Adan ek Ev. Par kont, nou ankor annan sa drwa pour servi nou liberte pour swazir. Nou kapab vwar sa par lafason ki Bondye ti tret nasyon Izrael. Zeova ti donn zot sa swa pour vin son propriyete spesyal oubyen non. (Egzod 19:3-6) Sa nasyon ti swazir pour vin pep Bondye e zot ti aksepte bann limit ki Bondye ti mete. Zot ti dir: “Nou pou fer  tou sa ki [Zeova] in dir.” (Egzod 19:8) Malerezman, pli tar sa pep ti swazir pour kas zot promes avek Zeova. Nou kapab tir en leson enportan avek sa legzanp. Annou touzour apresye nou liberte pour swazir e kontinyen reste pros avek Zeova e obei son lalwa.—1 Korentyen 10:11.

10. Ki mannyer Ebre sapit 11 i montre ki bann imen enparfe i kapab servi zot liberte pour swazir pour onor Bondye? (Vwar portre o konmansman sa lartik.)

¹⁰ Dan Ebre sapit 11 nou vwar non 16 zonm ek madanm fidel ki ti swazir pour respekte bann limit ki Zeova ti’n mete. Sa ti fer ki zot ti ganny bokou benediksyon e en lavenir merveye. Par egzanp, Noe ti annan en lafwa for e i ti deside pour obei bann lenstriksyon ki i ti gannyen pour konstri lars pour sov son fanmir ek sa zenerasyon ki ti pou vini a lavenir. (Ebre 11:7) Abraam ek Sara ti pare pour obei Bondye e zot ti al dan sa pei ki Bondye ti’n promet pour donn zot. Menm si zot ti annan “loportinite pour retourn” dan lavil Our, zot ti prefere pour konsantre lo promes Zeova pour lavenir. Labib i dir ki zot ti “annan sa dezir pour ganny en landrwa pli meyer.” (Ebre 11:8, 13, 15, 16) Moiz ti rezet bann trezor Lezip e i ti swazir “pour ganny maltrete avek pep Bondye plito ki pran plezir dan pese pour zis en serten letan.” (Ebre 11:24-26) Annou imit lafwa sa bann zonm ek madanm e apresye nou liberte pour swazir e servi li pour fer lavolonte Bondye.

11. (a) Ki pli gran benediksyon nou gannyen ler nou servi nou liberte pour swazir? (b) Kwa ki motiv ou pour servi ou liberte pour swazir dan en bon fason?

¹¹ I kapab fasil pour les en dimoun fer desizyon pour nou, me si nou fer sa, nou kapab pa zanmen ganny enn parmi sa bann pli gran benediksyon setadir nou liberte pour swazir. Ki benediksyon? Labib i eksplike dan Deterononm 30:19, 20. (Lir.) Dan verse 19, nou lir ki Bondye ti donn bann Izraelit en swa. Dan verse 20, nou aprann ki Zeova ti donn zot sa sans pour montre ki kantite zot kontan li. Nou osi nou kapab swazir pour ador Zeova. An plis, nou annan sa loportinite pour servi nou liberte pour swazir pour onor Zeova e demontre ki kantite nou kontan li.

12. Ki nou pa devret zanmen fer avek nou liberte pour swazir?

¹² Meton ou donn en zanmi en kado ki annan en gran valer. Ki mannyer ou pou santi si i zet ou kado dan bin oubyen pli move ankor, i servi ou kado pour fer ditor en dimoun? Definitivman ou pa pou kontan. Zeova in donn nou liberte pour swazir. Alor, son leker i bezwen fermal ler i vwar dimoun mal servi zot laliberte e fer bann move swa ki fer ditor lezot. Labib i dir ki dan “bann dernyen zour,” zonm “pa pou rekonesan.” (2 Timote 3:1, 2) Alor, ki mannyer nou kapab montre ki nou rekonesan pour sa kado presye, setadir sa liberte pour swazir, ki sorti kot Zeova? Ki mannyer nou kapab evite mal servi li?

13. Konman Kretyen, ki mannyer nou kapab evite mal servi nou laliberte?

¹³ Nou tou nou lib pour swazir nou zanmi, nou lenz, nou laparans ek divertisman. Par kont, nou kapab mal servi  nou laliberte pour fer bann swa ki Bondye pa kontan oubyen swiv sa ki dimoun lemonn i fer. (Lir 1 Pyer 2:16.) Dan plas servi nou laliberte pour fer sa ki mal, nou devret servi li pour “fer tou pour laglwar Bondye.”—1 Korentyen 10:31; Galat 5:13.

14. Akoz nou bezwen annan konfyans dan Zeova ler nou servi nou liberte pour swazir?

¹⁴ Zeova i dir: “Mwan [Zeova], ou Bondye. Mon ansenny ou pour ou prop dibyen; mon kondwir ou lo semen ki ou devre swiv.” (Izai 48:17) Pour nou kapab fer bann bon swa, nou bezwen annan konfyans dan Zeova e aksepte bann limit ki i’n mete. Si nou annan limilite nou pou aksepte ki “zonm pa kapab deside ki semen i pou swiv. Menm en zonm ki pe marse pa konnen kote i pou met son lipye.” (Zeremi 10:23, NWT) Olye depan lo limit ki Zeova ti’n mete, Adan e bann Izraelit ki ti enfidel ti swazir pour depan lo zot menm. Annou aprann avek zot move legzanp. Dan plas depan lo nou menm, nou devret annan “konfyans dan [Zeova]” avek tou nou leker.—Proverb 3:5.

15. Ki nou aprann avek sa prensip dan Galat 6:5?

¹⁵ Nou osi bezwen respe laliberte ki lezot i annan pour fer zot prop desizyon. Akoz? Menm si nou tou nou annan liberte pour swazir, sa pa vedir ki tou Kretyen pou fer egzakteman menm desizyon. Sa i enkli desizyon konsernan nou kondwit ek nou ladorasyon.  Mazin sa prensip ki dan Galat 6:5. (Lir.) Ler nou rekonnet ki sak Kretyen i responsab pour son prop desizyon, nou pou respekte liberte pour swazir ki lezot i annan.

16, 17. (a) Ki mannyer liberte pour swazir ti vin en problenm Korent? (b) Ki mannyer Pol ti ed sa bann Kretyen e ki leson nou kapab aprann avek sa?

¹⁶ Annou vwar en legzanp dan Labib ki montre akoz nou bezwen respekte liberte pour swazir ki nou bann frer ek ser i annan. Bann Kretyen dan kongregasyon Korent ti pe argimante konsernan manz bann lavyann ki ti’n ganny ofer avek zidol e ki pli tar ti ganny vann dan bazar. Konsyans serten Kretyen ti permet zot manz sa lavyann akoz zot ti konnen ki zidol pa kapab fer nanryen. Par kont, lezot ki ti abitye ador sa bann zidol ti santi ki si zot manz sa lavyann, sa ti konmsi zot ti pe ador zidol. (1 Korentyen 8:4, 7) Sa ti en problenm serye ki ti’n kapab kree divizyon dan kongregasyon. Ki mannyer Pol ti ed bann Kretyen rezourd sa problenm?

¹⁷ Premyerman, Pol ti fer tou le de group rapel ki manze pa ti pou fortifye zot lanmitye avek Bondye. (1 Korentyen 8:8) Apre sa, Pol ti averti zot pour pa les zot “drwa pour swazir” vin en lobstak pour bann ki feb. (1 Korentyen 8:9) Pli tar, i ti dir bann ki zot konsyans pa ti permet zot manz lavyann pour pa ziz konsyans lezot. (1 Korentyen 10:25, 29, 30) Alor dan bann sityasyon enportan ki ti annan pour fer avek zot ladorasyon, sak Kretyen ti devret fer son prop desizyon. Pa nou osi nou devret respekte laliberte nou bann frer ek ser ler zot fer bann desizyon personnel, menm dan bann pti keksoz!—1 Korentyen 10:32, 33.

18. Ki mannyer ou pou demontre ki ou apresye ou liberte pour swazir?

¹⁸ Zeova in donn nou sa liberte pour swazir, se sa ki fer nou vreman lib. (2 Korentyen 3:17) Nou apresye sa kado parski i permet nou fer desizyon ki montre ki kantite nou kontan Zeova. Alor, annou kontinyen fer bann swa ki onor li e annou respekte drwa ki lezot i annan pour swazir ki mannyer zot servi sa kado presye.