Skip to content

Al lo konteni

Travay ansanm avek Bondye​—En rezon pour nou zwaye

Travay ansanm avek Bondye​—En rezon pour nou zwaye

“Alor ki nou pe travay ansanm avek Bondye, nou sipliy zot pour pa les perdi sa lagras ki zot in resevwar.”​—2 KORENTYEN 6:1.

KANTIK: 75, 74

1. Menm si Zeova i sa Enn ki pli o, ki i’n envit lezot pour fer?

ZEOVA i sa Enn ki pli o. I ti kree tou keksoz e son pwisans ek lasazes napa okenn limit. Apre ki Zeova ti’n ed Zob konpran sa, Zob ti dir li: “La mon konnen ki ou kapab fer tou keksoz, ou kapab fer tou sa ki ou mazin pour fer.” (Zob 42:2) Zeova i kapab fer nenport kwa ki i deside san led personn. Me i demontre lanmour ler i envit lezot pour travay ansanm avek li pour akonpli son bi.

2. Ki travay enportan Zeova ti envit Zezi pour fer?

2 Avan ki Zeova ti kree bann lanz, imen ek tou lezot keksoz, i ti kree son Garson Zezi. Zeova ti permet son Garson ed li kree tou sa bann keksoz. (Zan 1:1-3, 18) Zapot Pol ti ekri sa konsernan Zezi: “Par li, Bondye in kre tou sa ki egziste dan lesyel ek lo later, sa ki vizib ek sa  ki envizib, tou bann pisans spirityel, bann pouvwar, bann gouvernman ek bann lotorite. Tousala Bondye in kree par li e pour li.” (Kolosyen 1:15-16) Alor Zeova pa ti zis donn son Garson en travay enportan me i ti osi fer lezot konnen. Pa sa i en gran loner!

3. Ki Zeova ti envit Adan pour fer e akoz?

3 Zeova ti osi envit bann imen pour travay ansanm avek li. Par egzanp, i ti permet Adan donn non bann zannimo. (Zenez 2:19, 20) Zis mazin sa lazwa ki Adan ti gannyen ler i ti pe fer sa travay! I ti egzamin byen laparans bann zannimo ek zot fason azir e apre i ti donn zot en non. Zeova ti’n kree tou bann zannimo, alor i ti’n kapab donn zot en non li menm. Me pour montre Adan ki kantite i kontan li, i ti permet li donn non bann zannimo. Bondye ti osi donn Adan sa responsabilite pour fer later antye vin en paradi. (Zenez 1:27, 28) Me pli tar Adan ti deside pour aret travay avek Bondye e sa ti anmenn gran soufrans pour li ek son desandans.​—Zenez 3:17-19, 23.

4. Ki mannyer lezot ti travay avek Bondye pour akonpli son lavolonte?

4 Pli tar, Bondye ti envit lezot dimoun pour travay avek li. Noe ti konstri en lars ki ti sov son lavi ek son fanmir pandan Deliz. Moiz ti liber pep Izrael Lezip. Zozye ti anmenn bann Izraelit dan Later Promiz. Salomon ti konstri tanp Zerizalenm. Mari ti vin manman Zezi. Tou sa bann serviter fidel ek bokou lezot ti travay avek Zeova pour akonpli son lavolonte.

5. Dan ki travay nou kapab partisipe e eski Zeova ti oblize envit nou pour fer sa travay? (Vwar portre lo paz 27.)

5 Ozordi, Zeova i envit nou pour fer tou sa ki nou kapab pour siport son Rwayonm. I annan plizyer fason ki nou kapab servi Bondye. Menm si pa nou tou ki kapab servi li dan menm fason, nou tou nou kapab pres sa bon nouvel Rwayonm. Zeova ti’n kapab fer sa travay li menm. I ti’n kapab koz avek bann dimoun lo later apartir lesyel. Zezi ti dir ki Zeova ti menm kapab fer ros koze pour dir lezot konsernan Lerwa Son Rwayonm. (Lik 19:37-40) Me Zeova i permet nou “travay ansanm” avek li. (1 Korentyen 3:9) Zapot Pol ti ekri: “Alor ki nou pe travay ansanm avek Bondye, nou sipliy zot pour pa les perdi sa lagras ki zot in resevwar.” (2 Korentyen 6:1, nou ki’n met an gro lekritir nwanr.) I en gran loner pour ganny envite pour travay avek Bondye. Annou vwar serten rezon akoz sa i donn nou en gran lazwa.

TRAVAY AVEK BONDYE I FER NOU ERE

6. Ki mannyer premye ne Garson Bondye ti dekrir lafason ki i ti santi pour travay akote son Papa?

6 Travay avek Bondye in toultan fer bann serviter Zeova ere. Avan Garson Bondye premye ne tou kreasyon ti vin lo later, i ti dir: “Zeova ti fer mwan premye dan tou sa ki i’n fer. . . .  Mon ti o bor li konman en zouvriye abil. Mon ti sa enn ki i ti pli kontan zour apre zour. Mon ti touzour kontan pour dan son kote.” (Proverb 8:22, 30)  Ler Zezi ti travay avek son Papa, i ti ere akoz i ti fer bokou keksoz e i ti konnen ki Zeova ti kontan li. Me nou?

Kwa ki pli satisfezan ki pour ansenny en dimoun laverite? (Vwar paragraf 7)

7. Akoz travay predikasyon i donn nou lazwa?

7 Zezi ti dir ki nou ere ler nou donnen e ler nou resevwar. (Akt 20:35) Nou ti dan lazwa letan nou ti konn laverite, me akoz i osi en lazwa pour partaz laverite avek lezot? Parski nou vwar zot vin vreman ere ler zot konpran sa ki Labib i ansennyen e zot konmans devlop en relasyon avek Bondye. Nou kontan pour vwar zot sanz zot fason panse ek zot fason viv. Predikasyon i sa travay pli enportan e pli satisfezan ki nou kapab pe fer. I fer li posib pour bann ki vin zanmi Bondye ganny lavi eternel.​—2 Korentyen 5:20.

8. Ki serten in dir konsernan lazwa pour travay avek Zeova?

8 Ler nou ed lezot aprann konn Bondye, nou konnen ki nou pe fer plezir Zeova e ki i apresye nou zefor pour servi li. Sa osi i donn nou lazwa. (Lir 1 Korentyen 15:58.) Marco, ki reste Itali, i dir: “Mon annan sa pli gran lazwa akoz mon konnen mon pe donn mon meyer avek Zeova, non pa avek en dimoun ki pou deswit oubliy sa ki mon’n fer.” Pareyman, Franco ki osi pe servi Itali, i dir: “Zeova i servi son parol ek bann provizyon spirityel pour fer nou rapel tou le zour ki i kontan nou e ki tou sa ki nou fer pour li i enportan, menm si nou zefor i paret pa vo nanryen pour nou. Sanmenm sa, travay ansanm avek Bondye i donn mwan lazwa e donn mon lavi en bi.”

TRAVAY AVEK BONDYE I FER NOU VIN PLI PROS AVEK LI E AVEK LEZOT

9. Ki relasyon ti egziste ant Zeova ek Zezi e akoz?

9 Ler nou travay ansanm avek bann ki nou kontan, nou vin pli pros  avek zot. Nou aprann plis konsernan zot personnalite ek zot kalite. Nou aprann ki lobzektif zot annan e ki mannyer zot esey atenn li. Zezi ti travay avek Zeova pour petet plizyer bilyon lannen. Zot lanmour ek lafeksyon pour kanmarad ti vin sitan for ki nanryen pa ti kapab detri zot relasyon. Zezi ti eksplike ki kantite zot ti pros avek kanmarad ler i ti dir: “Mwan ek mon Papa nou en sel.” (Zan 10:30) Zot ti vreman ini e korpere ler zot ti travay ansanm.

Predikasyon i ranforsi nou lafwa parski i fer nou rapel bann promes Bondye ek son bann standar ki montre ki i kontan nou

10. Akoz predikasyon i fer nou vin pli pros avek Bondye e avek lezot?

10 Zezi ti demann Zeova pour protez son bann disip. Akoz? I ti priye: “Pour ki zot a vin en sel.” (Zan 17:11) Ler nou viv annakor avek bann standar Bondye e partisip dan sa travay predikasyon, nou pli byen konpran son bann zoli kalite. Nou aprann akoz i saz pour met konfyans dan li e swiv son direksyon. Ler nou apros avek Bondye, i apros avek nou. (Lir Zak 4:8.) Nou osi apros avek nou bann frer ek ser akoz parey zot nou pas atraver problenm, nou ganny lazwa e nou annan menm lobzektif. Nou travay ansanm, nou dan lazwa ansanm e nou andir ansanm. Octavia, ki reste Grannbretanny, i dir: “Travay avek Zeova i fer mwan vin pli pros avek lezot.” I eksplike ki aprezan i vin zanmi avek bann ki annan “menm lobzektif e menm direksyon.” Sirman, nou osi nou santi parey. Ler nou vwar zefor ki nou bann frer ek ser i fer pour fer plezir Zeova, sa i fer nou vin pli pros avek zot.

11. Akoz nou pou vin pli pros avek Zeova e avek nou bann frer ek ser dan nouvo lemonn?

11 Nou lanmour pour Bondye ek nou bann frer ek ser i for, me i pou pli for ankor dan nouvo lemonn. Mazin tou sa bann travay eksitan ki nou pou fer a lavenir! Nou pou akeyir bann ki pou resisite e ansenny zot lo Zeova. Nou pou osi travay pour fer later vin en paradi. I pou en gran lazwa pour travay ansanm anba renny Kris e vin parfe ptitapti. Tou imen pou vin pli pros avek kanmarad e osi avek Zeova ki pou sirman “satisfer dezir tou sa ki vivan.”​—Psonm 145:16.

TRAVAY AVEK BONDYE I EN PROTEKSYON

12. Ki mannyer predikasyon i protez nou?

12 Nou bezwen protez nou relasyon avek Zeova. Nou viv dan lemonn Satan e nou enparfe, alor i fasil pour nou konmans mazin e fer parey sa lemonn. I konmsi nou pe naze dan en larivyer ki annan en kouran ki pe pous nou dan en direksyon ki nou pa anvi ale. Alor nou bezwen servi tou nou lafors pour naz dan lot  direksyon. Pareyman, nou bezwen travay dir pour evite ganny enfliyanse par lemonn Satan. Alor ki mannyer predikasyon i protez nou? Ler nou koz konsernan Zeova ek Labib, nou konsantre lo bann keksoz ki enportan e bon, pa lo bann keksoz ki pou afebli nou lafwa. (Filipyen 4:8) Predikasyon i ranforsi nou lafwa parski i fer nou rapel bann promes Bondye ek son bann standar ki montre ki i kontan nou. I osi ed nou gard bann kalite ki nou bezwen pour protez nou lekor kont Satan ek son lemonn.​—Lir Efezyen 6:14-17.

Ler nou reste okipe dan travay Zeova nou napa letan pour trakas tro bokou lo nou bann problenm personnel

13. Ki mannyer en Temwen Lostrali i santi konsernan predikasyon?

13 Ler nou reste okipe pe prese, etidye e fer keksoz pour lezot dan kongregasyon, nou ganny proteze parski nou napa letan pour trakas tro bokou lo nou bann problenm personnel. Joel, ki reste Lostrali, i dir: “Travay predikasyon i ed mwan pour pa oubliy sa ki pe vreman pase dan sa lemonn. I fer mwan rapel bann difikilte ki bann dimoun pe fer fas avek e ki byenfe mon’n gannyen ler mon’n aplik bann prensip Labib dan mon lavi. Sa travay predikasyon i ed mwan pour annan limilite e i donn mwan sa loportinite pour depan lo Zeova ek mon bann frer ek ser.”

14. Ler nou persevere dan predikasyon, ki mannyer sa i montre ki lespri sen Bondye i avek nou?

14 Predikasyon i osi donn nou plis konfyans ki lespri sen Bondye i avek nou. Annou eksplik sa atraver en legzanp: Fer konmsi ki i ou travay pour donn dimoun dipen dan ou kanton. Ou pa ganny peye pour fer sa e ou bezwen fer tou depans lo ou menm. Deplis, laplipar dimoun pa anvi sa dipen e serten i menm ay ou pour anmenn sa dipen kot zot. Ki kantite letan ou ti pou kontinyen fer sa travay? To ou tar, ou ti pou dekouraze e i tre probab ou ti pou arete. Pourtan, bokou nou i kontinyen prese lannen apre lannen, menm si sa i kout nou larzan ek letan e menm si dimoun i sikann nou oubyen ankoler avek nou. Sa i montre ki lespri sen Bondye pe ed nou.

TRAVAY AVEK BONDYE I MONTRE KI NOU KONTAN LI EK LEZOT

15. Ki lyen i annan ant pres sa bon nouvel ek plan Bondye pour limanite?

15 Ki lyen i annan ant predikasyon ek plan Bondye pour limanite? Bondye ti anvi ki imen i viv pour touzour e son plan pa ti sanze ler Adan ti fer pese. (Izai 55:11) Bondye ti fer en plan pour ki nou ganny libere avek pese ek lanmor. Ki mannyer i ti fer sa? Zezi ti vin  lo later e sakrifye son lavi. Me pour benefisye avek son sakrifis, bann imen ti bezwen obei Bondye. Alor Zezi ti ansenny bann dimoun sa ki Bondye i ekspekte avek zot e i ti donn son bann disip lord pour fer parey. Ozordi ler nou prese e ed lezot pour vin zanmi Bondye, nou pe travay direkteman avek Bondye ek son plan pour sov limanite dan pese ek lanmor.

16. Ki mannyer predikasyon i relye avek pli gran komannman Bondye?

16 Ler nou ed lezot pour ganny lavi eternel, nou montre ki nou kontan zot e ki nou kontan Zeova. I “oule ki tou [“sort kalite,” NW] dimoun i ganny sove e ganny konnesans laverite.” (1 Timote 2:4) Ler en Farizyen ti demann Zezi lekel pli gran komannman Bondye, Zezi ti dir: “‘Kontan Senyer ou Bondye avek tou ou leker, avek tou ou lam, e avek tou ou lespri. Sa se premye e pli gran konmannman. E dezyenm konmannman i parey li: “Kontan ou prosen parey ou kontan ou prop lekor.”’” (Matye 22:37-39) Ler nou pres sa bon nouvel, nou obei sa bann komannman.​—Lir Akt 10:42.

17. Ki mannyer ou santi konsernan sa loner pour pres sa bon nouvel?

17 Pa sa i en gran benediksyon! Zeova in donn nou en travay ki donn nou lazwa, ki fer nou vin pli pros avek li ek nou bann frer ek ser e ki protez nou relasyon avek li. I osi donn nou sa loportinite pour montre nou lanmour pour Bondye e pour lezot. Zeova i annan plizyer milyon serviter partou dan lemonn e zot tou zot annan diferan sirkonstans. Me ki swa nou zenn oubyen vye, ris oubyen pov, for oubyen feb, nou fer tou sa ki nou kapab pour partaz nou lafwa avek lezot. Nou annan menm santiman ki Chantel sorti Lafrans, ki dir: “Sa Personnaz pli pwisan dan liniver, Kreater tou keksoz, sa Bondye ere, i dir avek mwan: ‘Ale! Koze! Koz pour mwan, dir sa ki dan ou leker. Mon donn ou mon lafors, mon Parol Labib, led sorti dan lesyel, dimoun pour travay avek lo later, bann formasyon ptitapti e bann lenstriksyon presi dan son letan apropriye.’ Pa i en gran privilez pour fer sa ki Zeova i demann nou e pour travay ansanm avek nou Bondye!”