Skip to content

Al lo konteni

 LO KOUVERTIR | BANN LANZ​—ESKI ZOT EGZISTE? AKOZ I BON KONNEN?

Sa ki Labib i dir lo bann lanz

Sa ki Labib i dir lo bann lanz

Eski ou ti a kontan konnen lekel bann lanz, kote zot sorti e ki zot fer? Labib i sa pli bon landrwa kot nou kapab trouv larepons pour sa bann kestyon. (2 Timote 3:16) Ki Labib i dir?

  • Zis parey Bondye i en Lespri, bann lanz osi i bann lespri envizib ki napa “laser ek lezo.” Bann lanz fidel i reste dan lesyel e zot annan kontakt direk avek Bondye.​—Lik 24:39; Matye 18:10; Zan 4:24.

  • Parfwa, bann lanz in pran laform imen pour fer bann travay ki Bondye in donn zot pour fer lo later. Apre ki zot travay ti’n fini, sa bann lanz ti revin bann lespri e retourn dan lesyel.​—Ziz 6:11-23; 13:15-20.

  • Menm si Labib in toultan montre bann lanz konman bann zonm e sak fwa ki zot in vin lo later zot in pran laform en zonm, sa bann lanz pa ni zonm ni madanm. Zot pa ni marye ni fer zanfan. Deplis, bann lanz pa ti egziste avan konman bann imen, pti baba, zanfan oubyen adilt. Zeova ki ti kree bann lanz e Labib i dir ki zot “bann garson Bondye.”​—Zob 1:6; Psonm 148:2, 5.

  • Labib i dir ki i annan “langaz lanz.” Sa i montre ki bann lanz i annan zot prop langaz. Menm si Bondye in servi bann lanz pour koz avek bann imen, i pa oule ki nou ador oubyen priy avek zot.​—1 Korentyen 13:1; Revelasyon 22:8, 9.

  • I annan plizyer dizenn milye lanz, petet menm plis ki bilyon.​—Danyel 7:10; Revelasyon 5:11.

  • Bann lanz i “pwisan.” Zot bokou pli pwisan e pli entelizan ki bann imen. Zot menm kapab vwayaz avek en vites ekstraordiner, pli vit ki okenn keksoz ki nou kapab vwar lo later.​—Psonm 103:20; Danyel 9:20-23.

  • Malgre zot pli entelizan e annan bann abilite ekstraordiner, bann lanz i annan limit e i annan serten keksoz ki zot pa konnen.​—Matye 24:36; 1 Pyer 1:12.

  • Bann lanz ti ganny kree avek diferan personnalite, bann kalite ki Bondye i annan e avek sa liberte pour swazir. Alor, parey bann imen, zot kapab swazir pou fer sa ki byen oubyen sa ki mal. Malerezman, serten lanz ti swazir pour rebel kont Bondye.​—Zid 6.