Skip to content

Al lo konteni

Bondye i kapab ed ou

Bondye i kapab ed ou

Bondye in kree lekor imen avek sa abilite pour geri. Dapre John Hopkins Medicine Health Library, ler en dimoun i ganny koupe, krose oubyen pike, “son lekor i konmans geri sa blesir dan en fason merveye ki swa sa blesir i gro oubyen pti.” Lekor sa dimoun i reakte deswit pour fer sa blesir aret sennyen, son lavenn i ouver en pti gin, sa blesir i konmans geri e sa lapo kot sa blesir i ete i vin pli for.

REFLESIR: Si nou Kreater in kree nou lekor pour geri bann blesir, pa nou devret annan konfyans ki i kapab ed nou ler nou dekouraze e annan leker blese? En psalmis ti ekri: “I geri bann ki leker in perdi lespwar. I pans zot bann blesir.” (Psonm 147:3) Me si ou pe soufer emosyonnelman akoz bann problenm ki ou’n pas ladan oubyen ki ou pe pas ladan, kwa ki fer ou asire ki Zeova pou pans ou blesir la konmela e dan lavenir?

KI LABIB I DIR?

Bondye i dir: “Pa bezwen per, akoz mon avek ou. Pa bezwen enkyet, akoz mwan menm ou Bondye. Mon pou rann ou for, mon pou ed ou.” (Izai 41:10) En dimoun ki konnen Zeova i kontan li, pou annan lape lespri e i pou annan sa lafors pour fer fas avek diferan problenm. Zapot Pol i dir ki sa lape lespri i “lape Bondye ki depas tou sa ki nou kapab konpran.” I ti osi dir: “Parski dan tou sirkonstans, mon annan lafors gras a sa enn ki donn mwan son pwisans.”​—Filipyen 4:4-7, 9, 13.

Labib i ed nou pour devlop lafwa dan promes Zeova konsernan lavenir. Par egzanp, Revelasyon 21:4, 5 i dir nou kwa ki Bondye pou fer e akoz nou kapab annan konfyans ki i pou fer li:

  • “I pou eswiy tou larm” dan lizye bann imen. Zeova pou tir tou sa ki fer nou soufer e enkyet, menm si sa ki pe fer nou soufer e enkyet i paret pa enportan pour lezot.

  • Zeova, sa Lerwa Tou Pwisan ki ‘asiz lo son tronn’ dan lesyel e ki annan lotorite lo tou kreasyon, i annan sa pouvwar ek lotorite pour tir soufrans e donn nou led ki nou bezwen.

  • Zeova i garanti ki son bann promes i “fidel e vre.” Nou konnen ki Bondye i touzour gard son promes.

“‘I pou eswiy tou larm dan zot lizye, i pou nepli annan ni lanmor, ni dey, ni leokri, ni douler ankor. Sa bann keksoz avan in fini disparet.’ Sa Enn ki ti pe asiz lo tronn ti dir: ‘Gete! Mon pe fer tou keksoz nef.’ I ti osi dir: ‘Ekri, parski sa bann parol i fidel e vre.’”​—Revelasyon 21:4, 5.

Nou kapab konn bann kalite nou Papa ki dan lesyel atraver kreasyon e sa ki Labib i dir. Ler nou obzerv kreasyon, sa i konmsi Bondye pe dir nou vin son zanmi. Anfet Labib i envit nou pour: “Vin pros avek Bondye e i pou vin pros avek zot.” (Zak 4:8) Akt 17:27 i dir ki “i pa lwen avek sakenn ant nou.”

Anmezir ki ou pran letan pour konn Bondye, ou pou pli asire ki ‘i enterese avek ou.’ (1 Pyer 5:7) Me ki byenfe nou gannyen ler nou annan konfyans dan Bondye?

Annou vwar legzanp Toru, ki sorti Zapon. Toru ti grandi dan en fanmir Kretyen me apre i ti zwenn en group mafya vyolan ki apel yakuza. I dir, “Mon ti krwar Bondye i ay mwan e mon ti krwar ki ler bann dimoun ki mon kontan ti mor, Bondye ti pe pini mwan.” Toru i dir ki i ti antoure par bann move keksoz e dimoun ki ti annan bann move latitid, sa ti fer li vin en dimoun ki ti napa konpasyon ek lanmour pour personn. I ti osi dir ki i ti anvi mor byen zenn apre ki i’n touy en dimoun popiler koumsa li osi i ti a vin popiler.

Par kont, apre ki i ti’n etidye Labib ansanm avek son madanm, Hannah, Toru ti fer bann gran sanzman e son fason panse osi ti sanze. Hannah i dir: “I ti evidan ki mon msye ti pe sanze.” Aprezan Toru i dir avek konfyans: “I annan en Bondye ki  kontan nou tou. I pa anvi personn i mor e i pare pour pardonn bann ki senserman repantir. I ekoute ler nou dir li bann keksoz ki nou pa kapab dir avek personn e ki personn pa pou konpran. Byento, Zeova pou tir tou problenm, soufrans ek douler. Menm la konmela, i ed nou dan bann fason ki nou pa ekspekte. I kontan nou e i ed nou ler nou dekouraze.”​—Psonm 136:23.

Parey leksperyans Toru i montre, ler nou konnen ki Bondye pou byento tir tou soufrans e eswiy tou larm dan nou lizye, sa i donn nou en lespwar pour lavenir e i osi ed nou annan en bon lavi la konmela. Menm si i annan bokou soufrans ozordi, Bondye i kapab ed nou.