Skip to content

Al lo konteni

 LO KOUVERTIR | KAN EN DIMOUN KI NOU KONTAN I MOR

Bann mor pou viv ankor!

Bann mor pou viv ankor!

Ou rapel sa ki Gail in dir pli boner dan sa lartik, ki i pa krwar si i pou zanmen arive oubliy son msye, Rob. Parkont, i enpasyan pour vwar li ankor dan sa nouvo lemonn ki Bondye in promet e i dir ki son verse Labib prefere i Revelasyon 21: 3, 4. Sa verse i dir: “[Bondye] pou reste avek zot. . . . I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”

Gail i dir: “Sa promes i dir tou. Mon leker i fermal ler mon mazin bann dimoun ki’n perdi enn zot pros ki zot kontan e ki pa konn sa lespwar ki zot kapab vwar li ankor.” Gail i azir an armoni avek son krwayans par volonterman donn son letan konman en predikater a plen tan, pour partaz sa promes Bondye avek son bann vwazen, ki dan lavenir “lanmor pou nepli egziste.”

Zob ti asire ki i ti pou viv ankor

Bokou dimoun pa krwar sa. Me annou egzamin legzanp Zob. I ti vreman malad. (Zob 2:7) Kantmenm Zob ti anvi mor, i ti annan konfyans dan pouvwar Bondye pour resisit li lo later. Avek konfyans i ti dir: “Ar! si ou kasyet mwan dan Latonm . . . Ou pou apel mwan e mon pou reponn ou. Ou pou vreman anvi vwar sa enn ki ou’n fer.” (Zob 14:13, 15) Zob ti annan konfyans ki son Bondye ti pou mank li e ki I ti pou anvi redonn li lavi.

Byento, Bondye pou fer sanmenm pour Zob e pour bokou lezot ankor, letan ki sa later i ganny transformen dan en paradi. (Lik 23:42, 43) Labib i dir dan Akt 24:15, “Dimoun . . . pou resisite.” Zezi ti asir nou: “Pa bezwen etonnen ler mon dir sa, akoz sa ler pe arive kan tou bann mor ki dan tonbo pou tann son lavwa, e zot pou sorti dan zot tonbo.” (Zan 5:28, 29) Zob pou vwar realizasyon sa promes. I pou annan sa posibilite pour reganny “lafors son zenes” e son laser pou reste “pli fre ki dan son zenes.”(Zob 33:24, 25) Sanmenm ki pou arive avek tou bann ki apresye sa lespwar rezireksyon lo later, en provizyon ki demontre mizerikord Bondye.

Si ou’n deza soufer akoz lanmor en dimoun ki ou ti pros avek, sa bann lenformasyon ki nou’n diskite i kapab pa retir konpletman ou sagrinasyon. Me ler ou medit lo promes Bondye ki trouve dan Labib, ou pou kapab trouv sa vre lespwar ek kouraz pour kontinyen al annavan.​—1 Tesalonisyen 4:13.

Eski ou ti a kontan konn plis lo ki mannyer pour fer fas avek sagrinasyon? Oubyen eski ou annan lezot kestyon tel parey, “Akoz Bondye i permet mesanste ek soufrans?” Silvouple, al lo nou sit, jw.org, pour vwar ki mannyer Labib i donn bann larepons ki rekonfortan e pratik.