Skip to content

Al lo konteni

 LO KOUVERTIR | ESKI OU POU AKSEPTE PLI GRO KADO BONDYE?

Ki ou kapab fer pour benefisye avek sa kado ki Bondye in donnen?

Ki ou kapab fer pour benefisye avek sa kado ki Bondye in donnen?

Lanmour ki Kris i annan pour nou i obliz nou. . . . I’n mor pour tou dimoun pour ki sa bann ki viv pa viv pour zot prop lekor, me pour sa enn ki’n mor . . . pour zot.”2 Korentyen 5:14, 15.

EN ZOLI kado i devret motiv nou pour demontre rekonesans. Zezi ti montre akoz i enportan demontre rekonesans letan i ti geri dis zonm ki ti annan lalep, en maladi ki ti napa gerizon sa letan. Enn parmi sa bann zonm ti “retournen e i ti glorifye Bondye avek en lavwa for.” Zezi ti dir: “Pa tou le dis zonm in ganny geri? Me alor, oli sa nef lezot?” (Lik 17:12-17) Ki nou aprann avek sa ki Zezi ti dir? I vreman fasil pour nou oubliy dibyen ki lezot i fer pour nou.

Sa ranson pa parey okenn lezot kado. I sa pli gro kado ki’n deza ganny donnen. Alor, ki ou kapab fer pour benefisye avek sa kado ki Bondye in donn ou?

  • Aprann konn sa Enn ki’n donn sa kado. Pa tou dimoun ki pou ganny lavi eternel akoz sa ranson. Par kont, Zezi ti dir dan en lapriyer ki i ti fer avek Bondye: “Pour ganny lavi eternel, zot bezwen aprann konn ou, sa sel vre Bondye e sa enn ki ou’n anvoye Zezi Kri.” (Zan 17:3) Si en dimoun ti dir  ou ki en zonm ti’n sov ou lavi letan ou ti ankor zanfan, pa ou ti pou anvi konn plis lo sa zonm e akoz i ti sov ou? Zeova, sa enn ki’n donn sa ranson, i anvi ki ou konn li e osi annan en relasyon pros avek li. Labib i ankouraz nou: “Vin pros avek Bondye e i pou vin pros avek zot.”Zak 4:8.

  • Demontre lafwa dan sa ranson. “Sa enn ki demontre lafwa dan Garson i ganny lavi eternel.” (Zan 3:36) Ki savedir demontre lafwa? I vedir fer aksyon. Alor, nou bezwen fer bann aksyon pour demontre lafwa dan sa ranson. (Zak 2:17) Ki kalite aksyon? En kado i vin pour ou selman si ou anvoy lanmen e aksepte li. Alor ou bezwen fer zefor e aksepte sa ranson. Ki mannyer ou kapab fer sa? Aprann ki mannyer Bondye i anvi ou viv e aplik sa ki ou aprann dan ou lavi. * Priy Bondye pour ou ganny pardonnen ou pese e annan en konsyans kler. Apros avek Bondye e annan konfyans ki gras a sa ranson i pou annan sekirite, prosperite ek lape eternel dan lavenir pour tou bann ki demontre lafwa dan sa ranson.Ebre 11:1.

  • Asiste Memoryal lanmor Zezi. Zezi ti entrodwir en levennman anyel ki ti pou ed nou rapel sa ranson. Konsernan sa levennman, i ti dir: “Kontinyen fer sa pour montre ki zot pe mazin mwan.” (Lik 22:19) Temwen Zeova pou komemor lanmor Zezi Mardi le 11 Avril 2017, apre soley kouse. Sa levennman ki pou dire pour apepre enn erdtan, pou enkli en diskour ki pou eksplike akoz Zezi ti mor e ki mannyer nou kapab benefisye la konmela e dan lavenir. Lannen pase, apepre 20 milyon dimoun dan lemonn antye ti asiste Memoryal. Nou kordyalman envit ou pour zwenn ansanm avek nou pour demontre lapresyasyon pour sa pli gro kado ki Bondye in donnen.

^ par. 7 Pli bon fason pour aprann konn Bondye e vin pros avek li, i pour etidye son Parol, Labib. Pour ou fer sa, rod led avek Temwen Zeova oubyen al lo sit Enternet, www.jw.org.