ESKI OU KAPAB SWAZIR KI POU ARIVE DAN OU LAVENIR? Serten dimoun i krwar ki zot lavi i ganny kontrole par desten e zot napa vreman en swa. Ler zot pa reisi atenn en lobzektif dan zot lavi, zot zis dir: “Ki ou a fer, petet i pa ti devret arive!”

Lezot dimoun i dezapwente ler zot vwar ki zot pa kapab fer nanryen pour sanz sa lemonn kriyel e enzis. Petet zot in esey amelyor zot lavi me lager, krim, dezas natirel ek maladi in kas zot plan plizyer fwa e zot zis dir, ‘Akfer eseye?’

I vre ki sirkonstans lavi i kapab kas nou bann plan. (Eklezyast 9:11) Par kont, nou kapab swazir pour annan en lavenir kot nou viv pour touzour. Anfet, Labib i dir ki nou lavenir i depan lo swa ki nou fer. Annou vwar sa ki i dir.

Avan ki nasyon Izrael ti antre dan Later Promiz, Moiz, ki ti sef sa nasyon ti dir zot: “Mon met devan ou lavi ek lanmor, benediksyon ek malediksyon. Swazir lavi, pour ki ou viv, ou, avek ou bann desandan. Kontan [Zeova], ou Bondye, obei li e reste atase avek li.”​—Deterononm 30:15, 19, 20.

“Mon met devan ou lavi ek lanmor, benediksyon ek malediksyon. Swazir lavi.”​—Deterononm 30:19

Bondye ti delivre bann Izraelit dan lesklavaz Lezip e i ti donn zot sa loportinite pour annan en lavi lib e zwaye dan Later Promiz. Me sa pa ti pou zis ariv koumsanmenm. Pour zot kapab ganny sa benediksyon, zot ti bezwen “swazir lavi.” Ki mannyer zot ti pou fer sa? Zot ti devret ‘kontan Bondye, obei li e reste atase avek li.’

Ozordi ou osi ou kapab swazir ki pou arive dan ou lavenir. Ler ou swazir pour kontan Bondye, obei e reste atase avek li, an realite ou pe swazir pour viv pour touzour dan paradi lo later. Me ki ou bezwen fer?

Lanmour i kalite prensipal Bondye. Zapot Zan ti ganny enspire pour dir ki “Bondye i lanmour.” (1 Zan 4:8) I pour sa rezon ki ler Zezi ti ganny demande lekel sa komannman pli enportan, i ti reponn: “Ou devret kontan Zeova ou Bondye avek tou ou leker, avek tou ou nanm e avek tou ou lespri.” (Matye 22:37) En bon relasyon avek Zeova pa devret baze lo lafreyer me lo lanmour. Alor, akoz nou devret swazir pour kontan Zeova?

Lanmour ki Zeova i annan pour bann imen i parey lanmour ki bann paran i annan pour zot zanfan. Menm si bann paran i enparfe, zot ansenny, ankouraz, siport e disiplin zot zanfan akoz zot anvi zot zanfan i ere e reisi dan lavi. An retour bann paran i anvi zot zanfan i kontan zot e mazin bann bon keksoz ki zot paran in ansenny zot. Alor, pa i normal pour nou Papa ki dan lesyel ekspekte ki nou montre nou lapresyasyon pour tou bann keksoz ki in fer pour nou?

Serten tradiksyon Labib i servi sa mo “ekoute” dan Deterononm 30:20 me dan Labib, sa mo “obei” e “ekoute” i souvan vedir menm keksoz. Alor, ler nou dir en zanfan “ekout ou paran,” nou pe dir li obei son paran. Ler nou ekout lavwa Bondye, nou osi pe obei sa ki in dir. Vi ki nou pa kapab  tann lavwa Bondye, nou ekout li par lir e aplik sa ki son Parol, Labib i dir.​—1 Zan 5:3.

Pour montre lenportans ekout lavwa Bondye, en fwa Zezi ti dir: “Zonm pa devret viv zis lo dipen tousel me lo tou parol ki sorti dan labous Zeova.” (Matye 4:4) Menm si i enportan pour nou manze, i pli enportan ankor pour nou aprann konn Bondye. Akoz i enportan? Lerwa Salomon ki ti saz ti dir: “Lavantaz ki lasazes i anmennen i parey lavantaz larzan; konnesans i en lavantaz; i prezerv lavi bann saz.” (Eklezyast 7:12) Konnesans lo Bondye e lasazes sorti kot li i kapab protez nou ozordi e ed nou swazir sa pli bon lavenir kot nou pou kapab viv pour touzour.

Mazin sa ki Zezi ti dir e ki’n ganny mansyonnen dan sa lartik avan: “Sa pti baro e sa semen ki difisil i anmenn ver lavi, me pa bokou ki pe trouv li.” (Matye 7:13, 14) Vi ki nou pe mars lo sa semen, i pou bon pour annan en bon gid e reste atase avek li ziska ki nou ariv kot nou destinasyon, setadir lavi eternel. Nou annan bann bon rezon pour reste atase avek Bondye. (Psonm 16:8) Me ki mannyer nou kapab fer sa?

Nou annan bokou keksoz pour fer toulezour e i annan bokou ankor ki nou ti a kontan fer. Sa bann keksoz i kapab fer nou sitan okipe ki nou napa letan pour mazin sa ki Bondye i anvi nou fer. I pour sa rezon ki Labib i dir nou: “Kontinyen vey byen ki mannyer zot viv, pa viv parey dimoun bet me parey dimoun saz. Servi byen zot letan parski sa letan ki nou pe viv ladan i move.” (Efezyen 5:15, 16) Nou reste atase avek Bondye ler nou fer sir ki nou relasyon avek li i sa keksoz pli enportan dan nou lavi.​—Matye 6:33.

Menm si ou pa kapab sanz sa ki’n arive dan lepase, ou kapab swazir pour annan en bon lavenir pour ou ek ou fanmir. Labib i montre ki Zeova, nou Papa dan lesyel, i kontan nou e i dir nou sa ki i anvi nou fer. Remarke ki profet Mika i dir:

“Ou ki en imen, [Zeova] in fer ou konnen sa ki byen. La sa ki [Zeova] i demann ou fer: Respekte lazistis, montre labonte, mars dan limilite avek ou Bondye.”​—Mika 6:8.

Eski ou pou aksepte lenvitasyon Zeova pour mars avek li pour kapab viv pour touzour lo later? Ou annan sa swa!