Skip to content

Al lo konteni

Labib i en liv ki diny konfyans

Labib i en liv ki diny konfyans

Tou dilon listwar, tou sort kalite dimoun in konsider Labib konman en liv ki zot kapab annan konfyans ladan. Ozordi, plizyer milyon dimoun i swiv son lansennyman. Par kont, i annan serten ki konsider Labib zis konman en liv zistwar. Ki ou panse? Eski ou kapab trouv laverite dan Labib?

AKOZ OU KAPAB ANNAN KONFYANS DAN LABIB?

Kwa ki pou ed ou annan konfyans dan Labib? Annou pran en legzanp: Si ou annan en zanmi ki’n toultan dir ou laverite, pa ou pou annan konfyans dan li? Parey sa zanmi, eski Labib in toultan dir laverite? Annou vwar detrwa legzanp.

Bann ki’n ekri Labib i onnet

Bann ki’n ekri Labib ti vreman onnet, souvan zot ti koz lo zot prop fot ek zot defo. Par egzanp, profet Zonas ti ekri konsernan son prop dezobeisans. (Zonas 1:1-3) Anfet, a lafen son liv i ti rakonte ki mannyer Bondye ti koriz li, me i pa ti atir latansyon lo son prop lekor par koz lo ki mannyer i ti sanz son move latitid. (Zonas 4:1, 4, 10, 11) Lonnekte tou sa bann ki’n ekri Labib i montre ki zot ti senserman enterese avek laverite.

Konsey Labib i pratik

Eski Labib i toultan donn bann bon konsey pratik? Definitivman, wi. Par egzanp, annou vwar ki Labib i dir konsernan gard en bon relasyon avek lezot: “Tou sa ki zot anvi dimoun i fer pour zot, zot osi zot devret fer parey pour zot.” (Matye 7:12) “En larepons trankil i repous lakoler; me en parol brit i provok lakoler.” (Proverb 15:1) Bann konsey Labib i ankor pratik pour nou ozordi zis parey letan zot ti ganny ekrir.

 Labib i egzakt ler i koz lo listwar

Bokou bann dekouvert arkeolozik ki’n ganny fer dan lepase i konfirmen ki diferan dimoun, landrwa ek bann levennman ki Labib i mansyonnen ti vreman egziste. Annou vwar en legzanp. Labib i dir ki dan letan Neemya, bann dimoun sorti Tir (bann Fenisyen) ki ti reste Zerizalenm ti pe “anmenn pwason ek tou sort marsandiz.”​—Neemya 13:16.

Eski i annan okenn levidans pour siport sa verse Labib? Wi, i annan. Bann arkeolog in dekouver bann marsandiz sorti Tir an Izrael. Sa i montre ki i ti annan komers ant sa de nasyon lontan. Deplis, bann arkeolog in osi dekouver bann restan pwason sorti dan lanmer Mediterane, Zerizalenm. Zot krwar ki sa bann pwason ti ganny anmennen par bann marsan sorti byen lwen. Apre ki en spesyalis Labib ti’n egzamin sa levidans, i ti dir: “Sa ki Neemya 13:16 i dir konsernan bann dimoun sorti Tir ki ti vann pwason Zerizalenm i kapab vre.”

Labib i egzakt ler i koz lo lasyans

Anfet Labib i en liv relizye e istorik. Me ler i koz lo bann size syantifik, i toultan egzakt. Annou vwar en legzanp.

Anviron 3,500 an pase, Labib ti dir ki later i “sispann dan nean,” setadir i pa tenir lo nanryen. (Zob 26:7) Sa ti vreman diferan avek bann zistwar sa letan ki ti dir ki later i flote lo delo oubyen i ganny anmennen lo ledo en torti zean. Apepre 1,100 an apre ki liv Zob ti’n ganny ekrir, dimoun pa ti oule krwar ki later pa tenir lo nanryen, me zot ti krwar ki i annan en keksoz ki i ti pe tenir lo la. An 1687, trwa san zan pase, Isaac Newton ti pibliy son bann resers lo lafors gravite e i ti eksplike ki i annan en lafors envizib ki fer later reste dan son orbit. Sa dekouvert syantifik vreman enportan ti konfirm sa ki Labib ti’n dir plis ki 3,000 an pli boner!

 Bann profesi Labib i ganny akonplir

Eski tou bann profesi Labib in ganny akonplir? Annou vwar en legzanp: Profet Izai ti dir ki Babilonn pou ganny detrir.

Profesi: Apepre lannen 732 A.N.L., Izai en ekriven Labib ti dir ki Babilonn ki pli tar ti pou vin kapital en Lanpir pwisan ti pou ganny detrir e avek letan i ti pou napa personn ki ti pou reste laba. (Izai 13:17-20) Izai ti menm dir ki en zonm ki apel Siris, ki ti pou detri sa lavil. I ti osi dekri ki mannyer Siris ti pou atak sa lavil. I ti predir ki larivyer ti pou “sek” e bann gran baro lavil ti pou reste ouver.​—Izai 44:27–45:1.

Lakonplisman: Anviron 200-z-an apre ki Izai ti’n predir sa, en lerwa Pers ti atak Babilonn. Ki mannyer i ti apele? Siris. Vi ki i ti vreman difisil pour antre dan lavil Babilonn, Siris ti deside travers Larivyer Efrat ki ti toultour sa lavil. Son bann zonm ti fouy en transe pour sanz direksyon sa larivyer e sa ti fer nivo delo desann. Nivo delo ti telman desann ki bann solda Pers ti kapab travers larivyer apye ziska kot miray lavil. San ekspekte, bann Babilonnyen ti’n kit baro ki ti vir avek larivyer ouver! Vi ki baro ti ouver, larme Siris ti antre Babilonn e atak sa lavil.

Pa zis sa, Labib ti osi dir ki personn pa pour reste Babilonn. Pour plizyer santenn lannen, dimoun ti kontinyen reste laba. Me ozordi, bann debri Babilonn ki o bor Bagdad, Irak i en levidans ki sa profesi in ganny akonplir konpletman. Wi, Labib i en liv ki diny konfyans, menm ler i koz lo sa ki pou arive a lavenir.