Skip to content

Al lo konteni

 LARTIK LETID 28

Kontinyen servi Zeova menm ler nou ganny enterdi

Kontinyen servi Zeova menm ler nou ganny enterdi

“Nou pa kapab aret koz lo keksoz ki nou’n vwar e tande.”​—AKT 4:19, 20.

KANTIK 122 Reste ferm e solid!

SA KI NOU POU ETIDYE *

1-2. (a) Akoz nou pa devret sirprann si gouvernman i enterdi nou travay? (b) Ki nou pou diskite dan sa lartik?

AN 2018, plis ki 223,000 proklanmater ti pe viv dan bann pei kot nou travay in ganny enterdi oubyen anba restriksyon. Nou pa sirprann pour konn sa. Parey nou ti vwar dan sa lartik avan, bann vre Kretyen i konnen ki zot pou ganny persekite. (2 Tim. 3:12) Nenport landrwa kot nou reste, i kapab arive ki en sel kou, san ki nou pe eksepte, gouvernman i enterdi nou travay e esey anpes nou ador nou Bondye Zeova.

2 Si sa i arive, ou kapab demann ou lekor sa bann kestyon swivan: ‘Eski persekisyon i vedir ki nou’n perdi laprouvasyon Bondye? Si nou ganny enterdi, eski nou pou aret servi Zeova? Eski mon devret al reste dan en lot pei kot mon pou lib pour servi Zeova?’ Nou pou diskit lo sa bann kestyon dan sa lartik. Nou pou osi vwar ki mannyer nou kapab kontinyen ador Zeova ler nou travay i ganny enterdi e ki bann keksoz nou merit evite fer.

ESKI PERSEKISYON I VEDIR KI NOU’N PERDI LAPROUVASYON BONDYE?

3. Dapre 2 Korentyen 11:23-27, ki mannyer zapot Pol ti ganny persekite e ki nou aprann avek son leksperyans?

3 Si en gouvernman i enterdi nou travay, petet nou pou krwar ki nou’n perdi laprouvasyon Zeova. Me rapel ki persekisyon pa vedir sa. Annou vwar legzanp zapot Pol. Nou konnen ki i ti annan laprouvasyon Bondye. I ti zapot  pour bann nasyon e i ti annan sa privilez pour ekri 14 let ki dan Lekritir Grek Kretyen. Menm si Pol ti annan laprouvasyon Bondye, i ti fer fas avek bokou persekisyon. (Lir 2 Korentyen 11:23-27.) Leksperyans zapot Pol i ed nou konpran ki Zeova i permet ki son bann serviter fidel i ganny persekite.

4. Akoz dimoun dan lemonn i ay nou?

4 Zezi ti eksplike akoz nou devret ekspekte ganny persekite. I ti dir ki dimoun pou ay nou akoz nou pa form parti sa lemonn. (Zan 15:18, 19) Ler nou ganny persekite, sa pa vedir ki nou napa laprouvasyon Zeova. O kontrer, i montre ki nou pe fer sa ki byen.

SI NOU TRAVAY I GANNY ENTERDI, ESKI NOU POU ARET SERVI ZEOVA?

5. Eski bann imen i annan sa pouvwar pour fer nou aret servi Zeova? Eksplike.

5 Bann imen i fay konpare avek nou Bondye Tou Pwisan, alor zot pa pou zanmen kapab anpes nou servi Zeova. Bokou zot in eseye me zot pa’n reisi. Annou vwar ki ti arive pandan Dezyenm Lager Mondyal. Pandan sa letan, bann gouvernman dan plizyer pei ti persekit pep Bondye. Apard ki bann Nazi Lalmanny, bann gouvernman Lostrali, Kanada ek lezot pei ti osi enterdi travay Temwen Zeova. Kantmenm sa, gete ki ti arive. Ler lager ti konmanse an 1939, i ti annan 72,475 proklanmater an tou dan lemonn. Bann rapor i montre ki ler lager ti fini an 1945, i ti annan 156,299 proklanmater akoz Zeova ti’n beni son pep. Lakantite proklanmater ti’n plis ki double!

6. Ki bon keksoz ki kapab arive ler nou ganny persekite? Donn en legzanp.

6 Olye fer nou per, persekisyon i kapab ed nou pli determinen pour servi Zeova. Par egzanp, en koup ki ti annan en pti garson ti pe viv dan en pei kot gouvernman ti enterdi nou travay. Dan plas per e fer mwens pour Zeova, sa koup ti deside pour fer pionye ordiner. Sa madanm ti menm kit son bon plas travay pour li kapab fer pionye. Sa msye ti dir ki bokou dimoun ti anvi konn plis lo Temwen Zeova akoz gouvernman ti’n enterdi nou travay. Alor, i ti vwar li pli fasil pour konmans bann letid Labib. I ti annan en lot bon rezilta. En ansyen sorti dan sa menm pei ti dir ki bokou proklanmater ki ti’n aret  servi Zeova ti rekonmans asiste renyon e rekonmans prese.

7. (a) Ki nou aprann avek Levitik 26:36, 37? (b) Ki ou ou pou fer ler nou ganny enterdi?

7 Ler nou bann lennmi i enterdi nou travay, zot anvi fer nou per pour servi Zeova. An plis ki enterdi nou travay, zot kapab fann bann rimer lo nou, anvoy gard fouy dan nou lakaz, anmenn nou ankour e menm met serten parmi nou dan prizon. Zot swete ki nou pou per zis akoz zot in reisi met detrwa nou dan prizon. Si nou les zot fer nou per, i kapab ki dan en sans nou menm nou nou enterdi nou travay, setadir nou konmans fer mwens oubyen menm aret servi Zeova. Nou pa pou anvi fer parey sa bann dimoun ki ganny dekrir dan Levitik 26:36, 37. (Lir.) O kontrer, nou annan konfyans total dan Zeova e nou pa per. (Ps. 56:3) Nou priye e rod led Zeova. Nou konnen ki avek son led, menm sa gouvernman pli pwisan pa pou kapab anpes nou servi Zeova fidelman.​—Ebr. 13:6.

ESKI MON DEVRET AL RESTE DAN EN LOT PEI?

8-9. (a) Ki desizyon sak Kretyen i bezwen fer pour li ek son fanmir? (b) Kwa ki pou ed en dimoun fer en desizyon ki saz?

8 Si gouvernman kot ou reste i enterdi nou travay, petet ou kapab demann ou lekor si ou devret al reste dan en pei kot ou lib pour servi Zeova. Sa i en desizyon personnel ki ou devret fer ou menm. Avan ki en dimoun i deside, i kapab fer resers lo sa ki bann Kretyen dan premye syek ti fer ler zot ti ganny persekite. Apre ki Etyenn ti’n ganny touye, bann disip ki ti reste Zerizalenm ti al reste dan bann rezyon Zide ek Samari e zot ti menm ariv Fenisi, Sip ek Antyos. (Mat. 10:23; Akt 8:1; 11:19) En dimoun i osi kapab etidye lo sa ki Pol ti fer en lot fwa ler bann Kretyen dan premye syek ti ganny persekite. Zapot Pol ti deside pour reste dan bann landrwa kot dimoun ti kont sa travay predikasyon, menm si i ti’n kapab danzere pour li. I ti fer sa akoz i ti anvi anons sa bon nouvel e ankouraz bann frer ek ser ki ti pe ganny persekite dan sa bann lavil.​—Akt 14:19-23.

9 Ki nou aprann avek sa de legzanp? Sak sef fanmir i devret fer son prop desizyon lo si li ek son fanmir pou al reste dan en lot pei oubyen non. Avan ki i deside, i devret priye e reflesi lo sirkonstans son fanmir. I devret osi mazin lo ki bon lefe ek move lefe sa desizyon i kapab annan lo zot. Dan en sityasyon koumsa, sak Kretyen i devret “desarz son prop responsabilite.” (Gal. 6:5) Nou pa devret ziz lezot pour bann desizyon ki zot fer.

KI MANNYER NOU POU ADOR ZEOVA LER NOU GANNY ENTERDI?

10. Ki lenstriksyon biro brans ek bann ansyen pou donnen?

10 Ki mannyer nou kapab kontinyen ador Zeova ler nou travay i ganny enterdi? Biro brans pou donn bann ansyen dan ou kongregasyon bann lenstriksyon ek sizesyon pratik lo ki mannyer nou pou ganny manze spirityel, ki mannyer nou pou zwenn ansanm pour renyon e ki mannyer nou pou anons sa bon nouvel. Si biro brans pa kapab kontakte bann ansyen, bann ansyen pou ed ou ek tou manm kongregasyon pour kontinyen servi Zeova. Zot lenstriksyon pou baze lo sa ki Labib i dir e lo nou bann piblikasyon.​—Mat. 28:19, 20; Akt 5:29; Ebr. 10:24, 25.

11. Akoz ou kapab asire ki ou pou toultan annan sa ki ou bezwen pour gard ou lafwa for e ki ou ou kapab fer pour protez ou Labib ek bann piblikasyon ki ou annan?

 11 Zeova in promet ki son bann serviter pou annan tou sa ki zot bezwen pour gard zot lafwa for. (Iza. 65:13, 14; Lik 12:42-44) Alor ou kapab asire ki son lorganizasyon pou fer tou sa ki i kapab pour donn ou sa ki ou bezwen pour reste fidel. Me ki ou ou kapab fer? Ler nou travay i ganny enterdi, rod en bon landrwa pour kasyet ou Labib ek okenn piblikasyon ki ou annan. Fer sir ki ou pa zanmen les okenn sa bann piblikasyon alatrenn, ki swa dan form elektronik oubyen lo papye, kot i kapab fasilman ganny dekouver. Sakenn ant nou i bezwen fer tou sa ki i kapab pour gard son lafwa for.

Avek led Zeova, nou kapab zwenn ansanm pour ador li san lafreyer (Vwar paragraf 12) *

12. Ki mannyer bann ansyen i kapab organiz bann renyon dan en fason ki dimoun pa pou remarke?

12 Ki pou arive avek nou bann renyon? Bann ansyen pou organiz bann renyon dan en fason ki bann ki persekit nou pa pou remarke. Petet zot pou demann ou pour zwenn dan bann pti group e i tre probab ki zot pou sanz ler ek landrwa bann renyon tanzantan. Ler ou pe al oubyen kit renyon, koz dousman e sa pou ede protez ou bann frer ek ser. Kekfwa ou pou osi bezwen sanz dan en fason ki pa atir latansyon lo ou.

Menm si gouvernman i enterdi nou travay, nou pa pou aret prese (Vwar paragraf 13) *

13. Ki nou kapab aprann avek nou bann frer ek ser dan ansyen Linyon Sovyetik?

13 Nou travay predikasyon pou ganny organize dan diferan fason depandan lo landrwa kot nou reste. Me vi ki nou kontan Zeova e nou kontan koz avek lezot konsernan son Rwayonm, nou pou toultan rod en fason pour nou prese. (Lik 8:1; Akt 4:29) Ler en istoryen ki apel Emily B. Baran ti pe koz lo travay predikasyon Temwen Zeova dan ansyen Linyon Sovyetik, i ti dir: “Ler gouvernman ti dir zot ki zot pa kapab prese, bann Temwen ti koz lo zot lafwa avek zot vwazen, koleg travay ek zanmi. Ler zot ti al dan prizon akoz sa, bann Temwen ti pres avek lezot prizonnyen.” Menm si zot travay ti’n ganny enterdi, nou bann frer ek ser dan ansyen Linyon Sovyetik pa ti aret anons sa bon nouvel. Si nou travay i ganny enterdi kot ou reste, swiv legzanp sa bann frer ek ser!

KI NOU MERIT EVITE FER?

Nou bezwen konnen kan pour reste trankil (Vwar paragraf 14) *

14. Dapre Psonm 39:1, ki nou merit fer?

14 Fer atansyon ki ou dir dimoun. Ler nou travay i ganny enterdi, nou bezwen realize i annan “en letan pour reste trankil.” (Ekle. 3:7) Pa donn bann lenformasyon konfidansyel, parey non bann frer ek ser, landrwa kot nou zwenn, ki mannyer nou prese e ki mannyer nou ganny nou bann piblikasyon. Nou pa pou donn  sa bann lenformasyon avek gouvernman, ni menm avek nou bann zanmi ek fanmir ki reste dan nou pei oubyen en lot pei. Si nou ti fer sa, nou ti pou met lavi nou bann frer ek ser an danze.​—Lir Psonm 39:1.

15. Ki Satan pou esey fer e ki nou devret fer?

15 Pa les bann pti problenm diviz nou. Satan i konnen ki si i annan divizyon dan en lakour, sa lakour pa pou reisi. (Mark 3:24, 25) I pou kontinyen esey diviz nou. I fer sa akoz i anvi ki nou lager antre nou dan plas lager kont li.

16. Ki bon legzanp Ser Gertrud Poetzinger in kite?

16 Menm bann Kretyen matir i bezwen fer atansyon pour pa zanmen fer sa. Annou vwar legzanp de ser Kretyen swazir, ki ti apel Gertrud Poetzinger ek Elfriede Löhr. Zot ti ganny anvoye dan en kan konsantrasyon Nazi ansanm avek lezot ser Kretyen. Ler Elfriede ti fer bann diskour pour ankouraz lezot ser ki ti dan kan, Gertrud ti konmans zalou. Pli tar, Gertrud ti santi li mal e i ti sipliy Zeova pour ed li. I ti ekri: “Nou bezwen aprann pour aksepte ler lezot i annan plis abilite oubyen responsabilite ki nou.” Ki i ti fer pour li aret zalou? Gertrud ti konsantre lo bann zoli kalite ki Elfriede ti annan e ki i ti amikal. Koumsa, i ti reganny son bon relasyon avek Elfriede. Zot tou le de zot ti ganny large dan kan konsantrasyon e zot ti kontinyen servi Zeova fidelman ziska zot ti mor e al dan lesyel. Si nou fer zefor pour rezourd bann pti problenm ki nou annan avek nou frer ek ser depi la konmela, nou pa pou les okenn keksoz diviz nou a lavenir.​—Kol. 3:13, 14.

17. Akoz nou bezwen toultan swiv lenstriksyon sorti kot lorganizasyon Zeova?

17 Toultan swiv lenstriksyon. Si nou swiv lenstriksyon ki nou gannyen avek bann frer responsab ki diny konfyans, nou pou evit bokou problenm. (1 Pyer 5:5) Par egzanp, dan en pei kot nou travay i enterdi, bann frer responsab ti’n demann bann proklanmater pour pa kit okenn piblikasyon dan predikasyon. Me en frer pionye ti krwar i pli konnen e i ti distribye bann piblikasyon. Ki ti arive? Pa bokou letan apre ki li ek lezot proklanmater ti’n fini fer temwannyaz enformel, lapolis ti kestyonn zot. I paret ki bann gard ti’n swiv zot e anmas bann piblikasyon ki zot ti’n distribye. Ki nou aprann avek sa leksperyans? Nou bezwen swiv lenstriksyon menm si nou krwar nou pli konnen e nou pa dakor. Zeova i toultan beni nou ler nou ekout bann frer ki i’n apwente pour diriz nou.​—Ebr. 13:7, 17.

18. Akoz nou pa devret met bann lalwa ki pa neseser?

 18 Pa met bann lalwa ki pa neseser. Si bann ansyen i met bann lalwa ki pa neseser, sa pou fer keksoz difisil pour bann frer ek ser. Frer Juraj Kaminský i dir ki ti arive ler nou travay ti ganny enterdi dan ansyen Tyekoslovaki: “Apre ki plizyer ansyen ti ganny met dan kaso, serten frer responsab ki pa ti’n ganny met dan prizon ti konmans met zot prop lalwa e dir bann frer ek ser ki zot ganny drwa fer e pa fer.” Zeova pa’n donn personn sa drwa pour met bann lalwa pour bann frer ek ser swiv. En dimoun ki met bann lalwa ki pa neseser pa pe protez son bann frer ek ser, o kontrer, i pe esey domin lo zot lafwa.​—2 Kor. 1:24.

PA ZANMEN ARET ADOR ZEOVA

19. Dapre 2 Kronik 32:7, 8, akoz nou kapab annan kouraz malgre nenport keksoz ki Satan i fer?

19 Nou pli gran lennmi Dyab, pou kontinyen esey persekit bann serviter Zeova ki fidel. (1 Pyer 5:8; Rev. 2:10) Satan ek tou bann ki siport li pou esey enterdi nou travay e anpes nou ador Zeova. Par kont, menm si nou per, nou pa pou zanmen aret servi Zeova! (Det. 7:21, NWT) Zeova i avek nou e i pou kontinyen siport nou menm si nou travay i ganny enterdi.​—Lir 2 Kronik 32:7, 8.

20. Ki ou determinen pour fer?

20 Parey nou bann frer dan premye syek, nou bezwen determinen pour kontinyen servi Zeova. Ler zot ti devan lakour siprenm Zwif, zot ti dir: “Si zot krwar ki i byen devan Bondye pour ekout zot plito ki Bondye, zize zot menm. Me nou, nou pa kapab aret koz lo keksoz ki nou’n vwar e tande.”​—Akt 4:19, 20.

KANTIK 73 Donn nou lardyes

^ par. 5 Ki nou devret fer si gouvernman i enterdi nou travay? Sa lartik pou donn serten sizesyon pratik lo bann keksoz ki nou devret fer e pa fer pour ki nou pa zanmen aret servi Zeova!

^ par. 59 LEKSPLIKASYON PORTRE: Tou bann portre i montre bann Temwen ki pe servi dan bann pei kot nou travay i ganny restrikte. Dan sa portre, en pti group i zwenn ansanm pour renyon dan stor kot en frer.

^ par. 61 LEKSPLIKASYON PORTRE: En ser Kretyen (lo kote gos) pe koz avek en madanm e i rod loportinite pour koz lo Zeova.

^ par. 63 LEKSPLIKASYON PORTRE: En frer ki pe ganny kestyonnen par lapolis i refize donn okenn lenformasyon konsernan son kongregasyon.