1. Ki nou pou vwar dan sa lartik?

 BANN garson Zakob i otour li e zot pe ekout atantivman sa ki i pe dir avek sakenn parmi zot. Dan sa lartik avan, nou ti aprann ki Zakob ti dir Ribenn, Simeon, Levi ek Zida bann keksoz ki zot pa ti pe ekspekte. Alor, i tre probab ki zot ti anvi tande ki Zakob ti annan pour dir avek son wit lezot garson. Aprezan annou vwar sa ki nou kapab aprann avek sa ki Zakob ti dir Zeboulonn, Isakar, Dann, Gad, Aser, Naftali, Zozef ek Benzamen. a

ZEBOULONN

2. Ki benediksyon Zeboulonn ti gannyen e ki mannyer sa bann parol ti vin vre? (Zenez 49:13) (Vwar  bwat.)

² Lir Zenez 49:13. Zakob ti dir ki bann desandans Zeboulonn ti pou reste o bor lanmer ver dan nor Later Promiz e plis ki 200 an pli tar, tribi Zeboulonn ti ganny zot teritwar. Zot teritwar ti sitye ant Lanmer Galile ek Lanmer Mediterannen. Moiz ti dir konsernan Zeboulonn: “O Zeboulonn, ou pou dan lazwa ler ou pe ale.” (Det. 33:18) Petet Moiz ti pe refer avek lefet ki Zeboulonn ti pou kapab fasilman fer biznes avek bann dimoun dan lezot landrwa vi ki i ti sitye ant sa de lanmer. Nenport rezon akoz Moiz ti’n dir sa, bann desandans Zeboulonn ti annan rezon pour zot zwaye.

3. Kwa ki kapab ed nou pour kontant nou avek sa ki nou annan?

³ Ki nou kapab aprann? Nenport ki landrwa kot nou reste oubyen nenport ki sityasyon ki nou ladan, nou annan en  kantite rezon pour nou zwaye. Pour nou kontinyen reste zwaye, nou bezwen gard antet bann bon keksoz ki nou annan. (Ps. 16:6; 24:5) Parfwa i kapab pli fasil pour konsantre lo bann keksoz ki nou napa olye konsantre lo bann bon keksoz ki nou annan. Alor fer zefor pour gard antet bann bon keksoz ki ou annan e ki fer ou zwaye.—Gal. 6:4.

ISAKAR

4. Ki benediksyon Isakar ti gannyen e ki mannyer sa bann parol ti vin vre? (Zenez 49:14, 15) (Vwar  bwat.)

⁴ Lir Zenez 49:14, 15. Zakob ti felisit Isakar parski i ti travay dir. I ti konpar li avek en bourik vreman for ki ti kapab anmenn keksoz lour. Zakob ti osi dir ki Isakar ti pou ganny en bon landrwa. Sa ki Zakob ti dir ti vin vre. Bann desandans Isakar ti ganny en bout later o bor Larivyer Zourden ki ti byen fertil. (Zoz. 19:22) San dout zot ti travay dir pour kiltiv zot later me zot ti osi fer bokou zefor pour ed lezot. (1 Rwa. 4:7, 17) Par egzanp, tribi Isakar ti pare pour al lager ler nasyon Izrael ti pe lager avek zot bann lennmi. Sanmenm sa ki ti arive pandan letan Ziz Barak ek profet Debora.—Ziz 5: 15.

5. Akoz nou bezwen travay dir?

⁵ Ki nou kapab aprann? Zeova i apresye tou sa ki nou fer dan son servis zis parey i ti apresye bann travay ki tribi Isakar ti fer. (Ekle. 2:24) Par egzanp, mazin legzanp bann frer ki travay dir pour pran swen avek kongregasyon. (1 Tim. 3:1) Sa bann frer pa bezwen al lager me zot travay dir pour protez bann frer ek ser kont bann keksoz ki kapab gat zot lanmitye avek Zeova. (1 Kor. 5:1, 5; Zid 17-23) Zot osi travay dir pour prepar e fer bann diskour pour ankouraz kongregasyon.—1 Tim. 5:17.

DANN

6. Ki responsabilite tribi Dann ti gannyen? (Zenez 49:17, 18) (Vwar  bwat.)

⁶ Lir Zenez 49:17, 18. Zakob ti dir ki Dann ti parey en serpan ki mord bann zannimo ki pli gro ki li parey en seval lager. Tribi Dann ti annan kouraz e i ti pare pour atak bann lennmi nasyon Izrael. Ler nasyon Izrael ti pe al dan Later Promiz, tribi Dann ti “mars par deryer tou lezot kan pour protez zot.” (Nom. 10:25) Menm si lezot tribi pa ti vwar tou sa ki tribi Dann ti pe fer pou desarz sa responsabilite, sa ki tribi Dann ti pe fer ti vreman enportan.

7. Ki mannyer nou devret santi konsernan okenn responsabilite ki nou gannyen dan servis Zeova?

⁷ Ki nou kapab aprann? Eski ou’n deza fer en travay e apre ou’n santi ki lezot pa’n remark sa ki ou’n fer? Petet ou ti ede pour netway e mentenir Lasal Rwayonm, ou ti ede pour fer en keksoz pandan lasanble oubyen ou’n fer en lot travay. Sa i en bon keksoz ki ou’n fer. Toultan gard antet ki Zeova i remark tou sa ki ou fer pour li e i apresye. I vreman kontan ler ou servi li pa akoz ou oule lezot dimoun i felisit ou me akoz ou’n vreman anvi montre li ki ou kontan li en kantite.—Mat. 6:1-4.

GAD

8. Akoz i ti fasil pour bann lennmi Izrael atak tribi Gad? (Zenez 49:19) (Vwar  bwat.)

⁸ Lir Zenez 49:19. Zakob ti predir ki en group bandi ti pou atak Gad. Plis ki 200 an pli tar, tribi Gad ti ganny son later les avek Larivyer Zourden. Sa landrwa ti zis o bor bann nasyon ki ti zot lennmi.  Alor zot bann lennmi dan sa bann nasyon ti kapab fasilman atak zot. Kantmenm sa, bann Gadit ti anvi reste dan sa landrwa akoz i ti annan en kantite laplenn kot zot ti kapab ganny manze pour zot bann zannimo. (Nom. 32:1, 5) I kler ki bann Gadit ti annan kouraz. Me an plis ki sa, zot ti annan konfyans ki Zeova ti pou ed zot defann sa later ki i ti’n donn zot. Zot ti menm anvoy zot bann solda lo lot kote Larivyer Zourden pour al ed lezot tribi ganny zot later. Sa ti dire pour plizyer lannen. (Nom. 32:16-19) Zot ti annan konfyans ki Zeova ti pou protez zot madanm ek zanfan pandan labsans bann zonm. Zeova ti beni zot parski zot ti demontre kouraz e parski zot ti ed lezot menm ler i pa ti fasil pour zot fer li.—Zoz. 22:1-4.

9. Si nou annan konfyans dan Zeova, ki lefe sa pou annan lo nou bann desizyon?

⁹ Ki nou kapab aprann? Pour nou kapab kontinyen servi Zeova menm ler nou pas dan problenm, nou bezwen kontinyen annan konfyans dan li. (Ps. 37:3) En kantite frer ek ser ozordi i montre ki zot annan konfyans dan Zeova par fer bann sakrifis pour ede lo bann proze konstriksyon, pour servi kot i annan bezwen pour plis proklanmater oubyen par ed lorganizasyon Zeova dan lezot fason. Zot fer sa akoz zot asire ki Zeova pou toultan pran swen avek zot.—Ps. 23:1.

 ASER

10. Ki tribi Aser pa ti fer? (Zenez 49:20) (Vwar  bwat.)

¹⁰ Lir Zenez 49:20. Zakob ti predir ki tribi Aser ti pou vin ris e sanmenm sa ki ti arive. Later ki tribi Aser ti gannyen ti enn parmi bann ki ti pli fertil dan Izrael. (Det. 33:24) Zot later ti o bor Lanmer Mediterannen e i ti enkli por Sidon ki ti en por ki ti ris e kot zot ti fer komers. Me Aser pa ti pous bann Kananeen dan zot teritwar. (Ziz 1:31, 32) I paret ki bann Kananeen ti enfliyans tribi Aser e zot ti konmans konsantre lo bann keksoz materyel. Sa ti fer ki zot ti nepli konsantre lo fer lavolonte Zeova. Par egzanp, ler Ziz Barak ti demann bann Izraelit pour ede lager avek bann Kananeen, tribi Aser pa ti al ede. Sa ti fer ki zot pa ti vwar bann keksoz merveye ki Zeova ti fer pour ed bann Izraelit ranport laviktwar “o bor delo Megido.” (Ziz 5:19-21) I kapab ki tribi Aser ti santi zot kanmi ler zot ti tann sa sanson ki Barak ek Debora ti sante ki dir: “Aser ti asize nanryen fer o bor lanmer.”—Ziz 5:17.

11. Akoz nou bezwen annan en bon pwennvi lo bann keksoz materyel?

¹¹ Ki nou kapab aprann? Nou anvi donn Zeova nou meyer. Pour nou kapab fer sa, nou bezwen fer zefor pour pa annan menm pwennvi avek bann dimoun dan lemonn ki krwar ki larzan ek bann  keksoz materyel i sa keksoz ki pli enportan dan lavi. (Prov. 18:11) Nou fer zefor pour annan en bon pwennvi lo larzan. (Ekle. 7:12; Ebr. 13:5) Nou pa gaspiy nou letan ek lenerzi pour esey rod bann keksoz ki nou pa vreman bezwen. O kontrer nou fer tou sa ki nou kapab pour Zeova. Nou konnen ki si nou reste fidel, Zeova pou rekonpans nou e nou pou annan en bon lavi dan nouvo lemonn.—Ps. 4:8.

NAFTALI

12. Ki mannyer sa ki Zakob ti dir Naftali ti vin vre? (Zenez 49:21) (Vwar  bwat.)

¹² Lir Zenez 49:21. Zakob ti dir ki Naftali pou dir “bann zoli parol.” Sa i kapab pe refer avek lafason ki Zezi ti koze ler i ti lo later. Zezi ti en bon ansenyan. I ti pas en kantite letan dan lavil Kapernaoum ki ti dan teritwar Naftali. I pour sa rezon ki lavil Kapernaoum ti ganny apele “sa lavil kot i ti reste.” (Mat. 4:13; 9:1; Zan 7:46) Izai ti profetize ki Zezi ti pou parey “en gran lalimyer” pour bann dimoun dan tribi Zeboulonn ek Naftali. (Iza. 9:1, 2) Atraver son lansennyman, Zezi ti “sa vre lalimyer ki kler tou sort kalite dimoun.”—Zan 1:9.

13. Ki mannyer nou kapab fer sir ki sa ki nou dir i fer Zeova plezir?

¹³ Ki nou kapab aprann? Sa ki nou dir e lafason ki nou dir en keksoz i enportan pour Zeova. Ki mannyer nou kapab dir “bann zoli parol” ki fer Zeova plezir? Nou fer sa ler nou dir laverite. (Ps. 15:1, 2) Nou kapab osi ankouraz lezot par sa ki nou dir. Par egzanp, nou kapab felisit lezot ler zot fer en bon keksoz. Nou fer zefor pour pa kritik lezot oubyen konplent. (Efe. 4:29) Nou kapab amelyore dan lafason ki nou konmans en konversasyon avek dimoun pour nou kapab rann temwannyaz avek zot.

ZOZEF

14. Ki mannyer sa profesi konsernan Zozef ti vin vre? (Zenez 49:22, 26) (Vwar  bwat.)

¹⁴ Lir Zenez 49:22, 26. I bezwen ki Zakob ti vreman fyer akoz Zozef. Zeova ti’n “swazir [li] parmi son bann frer.” Zakob ti dir ki Zozef i parey “en brans lo en pye fri ki raport bokou fri.” Zakob ti sa pye fri e Zozef ti enn son brans. Zozef ti premye garson Rasel ki ti madanm Zakob e ki Zakob ti vreman kontan. Zakob ti dir ki Zozef ti pou ganny leritaz premye ne dan plas Ribenn ki ti premye garson Lea. (Zen. 48:5, 6; 1 Kron. 5:1, 2) Sa bann parol ti vin vre ler desandans de garson Zozef, setadir desandans Efraim ek Manase ti vin de tribi dan Izrael e zot ti ganny zot prop teritwar.—Zen. 49:25; Zoz. 14:4.

15. Ki mannyer Zozef ti reazir ler i ti ganny trete dan en fason enzis?

¹⁵ Zakob ti osi dir ki bann ki tir fles ti “tir fles lo [Zozef] e zot ti kontinyelman annan laenn pour li.” (Zen. 49:23) Zakob ti pe refer avek bann frer Zozef ki ti zalou li, ki ti tret li dan en fason enzis e ki ti rezon akoz i ti pas dan en kantite problenm. Malgre tousala, Zozef pa ti gard rankin avek son bann frer oubyen blanm Zeova pour sa ki ti’n arive avek li. Me parey Zakob ti dir: “[Zozef] ti tyonbo son lark byen for e son lanmen ti reste for e vit.” (Zen. 49:24) Zozef ti depan lo Zeova ler i ti pas dan problenm. I pa ti zis pardonn son bann frer me i ti osi tret zot avek labonte. (Zen. 47:11, 12) Zozef ti les sa ki i ti pas ladan fer li vin en pli bon dimoun. (Ps. 105:17-19) Sa ti fer ki Zeova ti kapab servi li pour fer bann keksoz enportan.

16. Ki mannyer nou kapab swiv legzanp Zozef ler nou pas dan problenm?

 ¹⁶ Ki nou kapab aprann? Annou pa zanmen les bann problenm ki nou pas ladan fer nou elwannyen avek Zeova e avek nou bann frer ek ser. Rapel ki Zeova i kapab les nou pas dan problenm konman en fason pour form nou. (Ebr. 12:7, not.) I ed nou pour devlop bann bon kalite, par egzanp ki mannyer pour demontre konpasyon e pour pardonnen. (Ebr. 12:11) Zeova pou rekonpans nou pour nou landirans zis parey i ti rekonpans Zozef.

BENZAMEN

17. Ki mannyer sa profesi konsernan Benzamen ti vin vre? (Zenez 49:27) (Vwar  bwat.)

¹⁷ Lir Zenez 49:27. Zakob ti dir ki tribi Benzamen ti pou lager byen parey en lelou. (Ziz 20:15, 16; 1 Kron. 12:2) Dan “bomaten,” setadir ler nasyon Izrael ti annan son premye lerwa, sa lerwa ti sorti dan tribi Benzamen e i ti apel Sail. I ti montre ki i ti en gerye pwisan ler i ti al lager avek bann Filisten. (1 Sam. 9:15-17, 21) Plizyer lannen pli tar, setadir dan “aswar” ler i ti nepli annan okenn lerwa dan Izrael, Larenn Ester ek Premye Minis Mordekay ki tou le de ti sorti dan tribi Benzamen, ti anpese ki bann Izraelit ti ganny detrir konpletman. Sa ti arive pandan ki Lanpir Pers ti pe dirize.—Ester 2:5-7; 8:3; 10:3.

18. Ki mannyer nou kapab reste fidel parey tribi Benzamen ti fer?

¹⁸ Ki nou kapab aprann? San dout tou bann dimoun dan tribi Benzamen ti vreman kontan ler zot ti vwar Sail, ki ti sorti dan zot tribi, vin lerwa. Me pli tar Zeova ti fer David ki ti sorti dan tribi Zida vin lerwa. Avek letan tribi Benzamen ti siport David. (2 Sam. 3:17-19) Plizyer lannen pli tar ler bann lezot tribi ti rebele, tribi Benzamen ti reste fidel avek tribi Zida ek sa lerwa ki Zeova ti’n swazir. (1 Rwa. 11:31, 32; 12:19, 21) Parey tribi Benzamen, annou siport sa bann ki Zeova in swazir pour diriz son pep ozordi.—1 Tesa. 5:12.

19. Ki byenfe nou gannyen avek sa ki Zakob ti dir avan i ti mor?

¹⁹ Nou kapab ganny en kantite byenfe avek sa ki Zakob ti dir avan i ti mor. Ler nou vwar lafason ki son bann parol ti vin vre, sa i fer nou pli asire ki bann lezot profesi ki’n ganny rikorde dan parol Zeova pou vin vre zot osi. Ler nou vwar lafason ki bann garson Zakob ti ganny beni, sa i fer nou konpran pli byen ki mannyer nou kapab fer Zeova plezir.