LARTIK LETID 27
KANTIK 79 Ansenny zot pour ki zot reste ferm
Ed bann etidyan Labib pour swazir pour servi Zeova
“Reste ferm dan lafwa . . . Vin for.”—1 KOR. 16:13.
TOPIK
Nou pou vwar ki mannyer nou kapab ed bann etidyan Labib pour devlop lafwa ek sa kouraz ki zot bezwen pour fer bann sanzman e servi Zeova.
1-2. (a) Akoz serten etidyan Labib i ezite pour swazir pour servi Zeova? (b) Ki nou pou vwar dan sa lartik?
ESKI i ti annan serten keksoz ki ti fer ou ezite pour vin en Temwen Zeova? Petet ou ti per ki ou bann koleg travay, zanmi oubyen fanmir ti pou ankoler avek ou si ou ti vin en Temwen Zeova. Oubyen petet ou ti krwar ki ou pa ti pou zanmen kapab viv dapre bann standar Bondye. Si ou ti santi koumsa, alor ou konnen ki mannyer serten etidyan Labib i santi e akoz serten i ezite pour vin en Temwen Zeova.
2 Zezi ti konnen ki bann santiman koumsa i kapab anpes en dimoun servi Zeova. (Mat. 13:20-22) Me i pa ti aret ed bann ki ti ezite pour vin son disip. O kontrer i ti montre son bann disip ki mannyer pour ed bann dimoun koumsa pour (1) idantifye kwa ki pe anpes zot progrese, (2) devlop plis lanmour pour Zeova, (3) met sa ki pli enportan premye e (4) sirmont zot bann difikilte. Ki mannyer nou kapab aplik sa ki Zezi ti dir son bann disip ler nou servi sa liv Viv ere pour touzour! pour ed en etidyan Labib swazir pour servi Zeova?
ED OU ETIDYAN POUR IDANTIFYE KWA KI PE ANPES LI PROGRESE
3. Petet kwa ki ti anpes Nikodenm vin en disip Zezi?
3 Nikodenm ti en sef Zwif ki ti annan en pozisyon enportan. Me i ti annan en keksoz ki ti fer li difisil pour li swazir pour vin disip Zezi. I ti fer apepre sis mwan depi ki Zezi ti’n konmans prese e Nikodenm ti’n realize ki Zezi ti Mesi. (Zan 3:1, 2) Kantmenm sa, i ti swazir pour zwenn avek Zezi an kasyet parski i ti “per bann Zwif.” (Zan 7:13; 12:42) Petet i ti per ki si i ti vin en disip Zezi, i ti pou perdi son lotorite e serten son bann keksoz materyel. a
4. Ki mannyer Zezi ti ed Nikodenm konpran ki Bondye ti anvi i fer?
4 Nikodenm ti konn byen Lalwa Moiz me i ti bezwen led pour konpran sa ki Zeova ti anvi i fer. Ki mannyer Zezi ti ed li? Zezi ti pare pour pas letan avek Nikodenm e pour koz avek li. I ti menm zwenn li pandan lannwit. Zezi ti dir Nikodenm ki i ti bezwen fer pour vin en disip. I ti bezwen repantir, ganny batize dan delo e demontre lafwa dan Garson Bondye.—Zan 3:5, 14-21.
5. Ki mannyer nou kapab ed en etidyan Labib pour idantifye kwa ki pe anpes li fer progre?
5 Menm si en etidyan Labib i konpran byen sa ki Labib i dir, petet i bezwen led pour vwar kwa ki pe anpes li fer progre. Par egzanp, i kapab ki son travay i pran tou son letan oubyen petet son fanmir pe opoz li. Alor parey Zezi ti fer, pran letan pour ed ou etidyan. Ou kapab envit li pour bwar en pti kafe oubyen pour al lo lans. Ler zot fer bann keksoz koumsa ansanm, sa i kapab fer li pli alez pour koz lo bann difikilte ki i pe pas ladan. Apre ankouraz ou etidyan pour fer bann sanzman neseser. Fer li konpran ki i bezwen fer sa bann sanzman pa pour fer ou plezir me pour li montre son lanmour pour Zeova.
6. Ki mannyer ou kapab ed en etidyan Labib pour annan sa kouraz pour aplik sa ki i pe aprann? (1 Korentyen 16:13)
6 Ler en etidyan Labib i asire ki Zeova pou ed li aplik bann prensip dan Labib, sa pou fer li annan kouraz pour aplik sa ki i pe aprann. (Lir 1 Korentyen 16:13.) Dan en serten fason ou parey en ansenyan lekol. Mazin ler ou ti lekol, lekel ki ti ou ansenyan prefere? I tre probab ki i ti sa ansenyan ki ti demontre pasyans anver ou e ki ti ed ou pour annan plis konfidans dan ou bann abilite. Dan menm fason, en bon ansenyan Labib i pa zis ansenny sa etidyan sa ki Bondye i oule i fer me i osi asir li ki i pou kapab fer sa bann sanzman avek led Zeova. Ki mannyer ou kapab fer sa?
ED OU ETIDYAN POUR DEVLOP PLIS LANMOUR POUR ZEOVA
7. Ki mannyer Zezi ti ed bann ki ti ekout li pour devlop plis lanmour pour Zeova?
7 Zezi ti konnen ki sa lanmour ki son bann disip ti annan pour Bondye ti pou motiv zot pour aplik sa ki zot ti’n aprann. I ti souvan ansenny zot bann keksoz ki ti pou ed zot devlop plis lanmour pour zot Papa ki dan lesyel. Par egzanp, i ti konpar Zeova avek en zonm ki donn son bann zanfan bann bon keksoz. (Mat. 7:9-11) I kapab ki serten dimoun ki ti pe ekout Zezi pa ti’n annan en bon papa. Imazin ki mannyer zot ti santi ler Zezi ti koz lo legzanp sa papa ki ti akey son garson apre ki i ti’n fer en kantite move keksoz. Zezi ti ed zot vwar ki Zeova i kontan zot en kantite e I anvi ed zot.—Lik 15:20-24.
8. Ki mannyer ou kapab ed en etidyan Labib pour devlop plis lanmour pour Zeova?
8 Ou osi ou kapab ed en etidyan Labib pour devlop plis lanmour pour Zeova par souvan koz lo bann zoli kalite ki Zeova i annan. Sak fwa ki zot fer letid, ed li pour konpran ki mannyer sa ki i aprann i montre ki Zeova i kontan nou. Ler ou pe koz lo sa ranson, ed li konpran ki Zeova in donn sa ranson pa zis akoz i kontan tou dimoun me akoz i kontan li osi personnelman. (Rom. 5:8; 1 Zan 4:10) Ler en etidyan i konpran ki kantite Zeova i kontan li personnelman, sa i kapab ed li pour kontan Zeova plis ankor.—Gal. 2:20.
9. Kwa ki ti ed en msye ki apel Michael pour fer bann sanzman dan son lavi?
9 Annou vwar leksperyans Michael ki reste Lendonezi. Ler i ti pe grandi, i ti konn laverite me i pa ti batize. Ler i ti annan 18 an, i ti al dan en lot pei pour travay konman en drayver kanmiyon. Pli tar, i ti retourn Lendonezi pour li marye me i ti kit son madanm ek son fiy pour li retourn travay aletranze. Pandan ki i ti aletranze, son madanm ek son fiy ti konmans etidye Labib e zot ti fer progre. Apre ki son manman ti mor, Michael ti deside retourn Lendonezi pour pran swen avek son papa e i ti aksepte pour fer letid Labib. Ler i ti pe etidye leson 27 dan liv Viv ere pour touzour!, sa lenformasyon dan seksyon “Al pli o profon” ti tous li en kantite. Ler i ti reflesir lo lafason ki Zeova ti santi ler i ti vwar Son Garson soufer, Michael ti konmans plere. I ti vreman rekonesan pour sa ranson e sa ti motiv li pour fer bann sanzman dan son lavi e batize.
ED OU ETIDYAN POUR MET SA KI PLI ENPORTAN PREMYE
10. Ki mannyer Zezi ti ed son bann disip pour met sa ki pli enportan premye? (Lik 5:5-11) (Vwar portre.)
10 I pa ti pran bokou letan pour serten disip Zezi realize ki Zezi ti Mesi. Me zot ti bezwen led pour konpran ki zot ti devret fer sa travay predikasyon vin zot priyorite. Pyer ek Andre ti deza bann disip Zezi pour en pe letan ler Zezi ti demann zot pour fer sa travay predikasyon vin en priyorite. (Mat. 4:18, 19) Zot ti annan en biznes lapes ki ti pe fer byen e i paret ki zot ti travay ansanm avek Zak ek Zan. (Mark 1:16-20) I tre probab ki ler Pyer ek Andre ti “kit zot lasenn,” zot ti fer laranzman pour ki zot kapab kontinyen pran swen avek zot fanmir pandan ki zot ti pe swiv Zezi. Akoz zot ti pare pour kit zot biznes? Sa resi dan levanzil Lik i dir ki Zezi ti fer en mirak ki ti fer zot asire ki Zeova pou toultan kapab donn zot sa ki zot bezwen.—Lir Lik 5:5-11.
Ki nou kapab aprann avek lafason ki Zezi ti ed son bann disip pour met sa ki pli enportan premye? (Vwar paragraf 10) b
11. Ki mannyer nou kapab servi nou prop leksperyans pour ed nou etidyan annan plis lafwa?
11 Nou pa kapab fer bann mirak parey Zezi me nou kapab koz avek nou etidyan konsernan lafason ki Zeova i ed bann ki met li premye dan zot lavi. Par egzanp, eski ou rapel lafason ki Zeova ti ed ou ler ou ti konmans asiste bann renyon? Petet ou ti bezwen koz avek ou anplwayer e eksplik li ki ou ti pou nepli travay apre ler si sa ti pou fer ou mank renyon. Anmezir ki ou partaz ou leksperyans avek ou etidyan, eksplik li ki mannyer ler ou ti vwar lafason ki Zeova ti ed ou met li premye dan ou lavi, sa ti fer ou lafwa vin pli for.
12. (a) Akoz nou devret envit diferan frer ek ser pour asiste en letid avek nou? (b) Ki mannyer ou kapab servi bann video pour ansenny ou etidyan? Donn en legzanp.
12 I ti pou byen ki ou etidyan i tann lafason ki bann frer ek ser in fer bann sanzman pour zot kapab met Zeova premye. Alor envit diferan frer ek ser pour asiste sa letid. Sa bann frer ek ser in grandi dan diferan fason, alor demann zot pour eksplike ki mannyer zot in vin dan laverite e ki zot in fer pour fer servis Zeova vin sa keksoz pli enportan dan zot lavi. Osi pandan letid, pran letan pour get bann video dan sa seksyon “Al pli o profon” oubyen “Fer plis resers” dan liv Viv ere pour touzour! Par egzanp, ler zot pe etidye leson 37 dan sa liv, zot kapab get sa video Zeova pou pran ka avek nou bann bezwen e koz lo bann prensip ki dan sa video.
ED OU ETIDYAN POUR SIRMONT BANN DIFIKILTE
13. Ki mannyer Zezi ti prepar son bann disip pour lopozisyon?
13 Plizyer fwa Zezi ti dir son bann disip ki dimoun ti pou opoz zot, menm zot fanmir ti pou kapab fer sa. (Mat. 5:11; 10:22, 36) Pa bokou letan avan Zezi i mor, i ti dir son bann disip ki zot ti pou menm kapab ganny touye parski zot servi Zeova. (Mat. 24:9; Zan 15:20; 16:2) I ti dir zot ki zot bezwen fer atansyon dan predikasyon. I ti dir zot pa argimant avek bann ki opoz zot e pour vey byen sa ki zot dir e fer pour ki zot kapab kontinyen anons sa bon nouvel.
14. Ki mannyer nou kapab prepar nou etidyan pour ler dimoun i opoz li? (2 Timote 3:12)
14 Parey Zezi, nou kapab eksplik nou etidyan Labib ki serten koleg travay, zanmi oubyen fanmir i kapab opoz zot akoz zot pe etidye Labib. (Lir 2 Timote 3:12.) Serten koleg travay i kapab boufonn li parski i pe esey viv dapre bann prensip Labib. Lezot dimoun, menm son fanmir i kapab pa dakor avek sa ki i pe aprann dan Labib. Pa bezwen tarde pour koz avek ou etidyan konsernan lefet ki dimoun i kapab opoz li. Sa pou fer ki i pa pou sirprann ler sa i arive e i pou konnen ki pour dir e ki pour fer.
15. Kwa ki kapab ed en etidyan Labib pour andire ler son fanmir i opoz li?
15 Si fanmir ou etidyan pe opoz li, ankouraz li pour reflesir lo rezon akoz serten son bann fanmir i ankoler ki i pe etidye Labib avek Temwen Zeova. I kapab ki zot krwar ki i’n ganny anbete oubyen i kapab ki zot krwar Temwen Zeova i bann move dimoun. Menm fanmir Zezi ti krwar ki Zezi ti’n perdi latet. (Mark 3:21; Zan 7:5) Ansenny ou etidyan pour demontre pasyans e pour koz dan en bon fason avek son fanmir ek lezot.
16. Ki mannyer nou kapab ed en etidyan Labib pour partaz son krwayans dan en bon fason?
16 Si fanmir sa etidyan i anvi konn plis lo sa ki sa etidyan pe aprann, i ti pou saz si sa etidyan pa eksplik tou keksoz en sel kou. Si i fer sa, son fanmir i kapab santi ki i pe bonbard zot avek en ta lenformasyon e petet apre sa, son fanmir pa pou anvi koz ankor konsernan sa ki i pe aprann. Alor ankouraz ou etidyan pour koz dan en fason senp ki fer ki son fanmir pou anvi ekout li laprosenn fwa. (Kol. 4:6) Petet i kapab ankouraz son fanmir pour al lo jw.org. Sa pou fer ki son fanmir pou kapab aprann plis lo Temwen Zeova nenport ler ki i anvi e i kapab swazir lakantite lenformasyon ki i pou lir.
17. Ki mannyer ou kapab prepar en etidyan pour reponn bann kestyon ki lezot i kapab demann li konsernan Temwen Zeova? (Vwar portre.)
17 Petet ou kapab servi sa seri “Bann kestyon ki dimoun i souvan demande lo Temwen Zeova” ki lo jw.org pour ed ou etidyan prepar bann larepons senp pour bann kestyon ki son bann fanmir oubyen koleg travay i kapab demann li. (2 Tim. 2:24, 25) A lafen sak leson dan liv Viv ere pour touzour!, ansanm vwar sa seksyon “Serten dimoun i dir.” Ankouraz ou etidyan pour praktis dan son prop mo ki mannyer pour eksplik lezot son krwayans. Pa ezite pour donn li sizesyon lo ki mannyer i kapab pli byen eksplik son krwayans. Ler zot praktis ansanm, sa i kapab ed li eksplik lezot akoz i krwar oubyen pa krwar dan en keksoz.
Ankouraz ou etidyan pour eksplik lezot son krwayans par praktis avek li pandan son letid (Vwar paragraf 17) c
18. Ki mannyer ou kapab ankouraz en etidyan pour partisip dan predikasyon? (Matye 10:27)
18 Zezi ti donn lord son bann disip pour anons sa bon nouvel avek bann dimoun. (Lir Matye 10:27.) Ler en etidyan i konmans anons sa bon nouvel, i pou vwar lafason ki Zeova i ed li e i pou aprann pour annan plis konfyans dan Zeova. Pli boner i fer sa, pli boner i pou aprann pour depan lo Zeova. Ki mannyer ou kapab ed en etidyan pour annan sa lobzektif pour anons sa bon nouvel? Ler i annan en kanpanny predikasyon dan ou teritwar, ankouraz ou etidyan pour reflesir lo ki mannyer i kapab kalifye pour vin en proklanmater. Eksplik li akoz en kantite dimoun in vwar li pli fasil pour konmans anons sa bon nouvel pandan sa bann kanpanny koumsa. En lot lobzektif ki i kapab annan i pour kalifye pour fer size pandan renyon lasemenn. Sa pou fer ki i pou ganny formasyon e i pou aprann pour eksplik son krwayans pli byen.
MONTRE OU ETIDYAN KI OU ANNAN KONFYANS KI I ANVI SERVI ZEOVA
19. Ki mannyer Zezi ti montre son bann disip ki i annan konfyans dan zot e ki mannyer nou kapab swiv son legzanp?
19 Avan ki Zezi ti mont dan lesyel, i ti dir son bann disip ki zot ti pou rezwenn kanmarad ankor. Zot pa ti konpran ki Zezi ti pe koz konsernan ler zot ti pou al dan lesyel. Kantmenm sa, Zezi ti asire ki zot ti anvi fer Zeova plezir. (Zan 14:1-5, 8) I ti konnen ki zot ti bezwen letan pour konpran serten keksoz par egzanp, ki zot ti pou al reste dan lesyel. (Zan 16:12) Parey Zezi, nou kapab montre nou bann etidyan ki nou annan konfyans ki zot anvi fer Zeova plezir.
Pli boner ki en etidyan i konmans anons sa bon nouvel, pli boner i pou aprann pour depan lo Zeova
20. Ki mannyer en ser ki reste Malawi ti montre ki i ti annan konfyans dan son etidyan?
20 Annan konfyans ki nou etidyan i anvi fer sa ki byen. Annou vwar legzanp en ser ki apel Chifundo ki reste Malawi. Chifundo ti konmans en letid Labib dan liv Viv ere pour touzour! avek en madanm ki ti apel Alinafe ki ti Katolik. Ler zot ti fini diskit lo leson 14, Chifundo ti demann son etidyan ki i ti panse konsernan servi bann portre ek stati pour ador Bondye. Alinafe ti ofanse e i ti dir: “Mon kapab servi portre ek stati si mon anvi.” Apre sa konversasyon, Chifundo ti krwar ki Alinafe ti pou aret etidye me i ti demontre pasyans e i ti kontinyen fer letid avek Alinafe parski i ti krwar ki avek letan, Alinafe ti pou konpran ki i mal pour servi portre ek stati pour ador Bondye. Detrwa mwan pli tar, Chifundo ti demann Alinafe sa kestyon ki dan leson 34: “Ki mannyer ou letid lo Labib e lo sa vre Bondye Zeova in benefisye ou ziska prezan?” Chifundo i rakont sa ki Alinafe ti dir: “Alinafe ti dir en kantite bon keksoz. Enn parmi i ki Temwen Zeova pa fer okenn keksoz ki Labib i dir i mal.” Pa bokou letan apre, Alinafe ti aret servi portre ek stati pour ador Bondye e i ti kalifye pour batize.
21. Ki mannyer nou kapab ed en etidyan pour swazir pour servi Zeova?
21 Menm si Zeova i sa enn “ki fer pouse,” nou kapab ed en etidyan pour fer progre. (1 Kor. 3:7) Nou pa zis ansenny lo sa ki Bondye i anvi i fer me nou ed li pour devlop plis lanmour pour Zeova. Nou osi ankouraz li pour demontre son lanmour pour Zeova par met Zeova premye. Osi nou kapab ansenny li ki mannyer pour depan lo Zeova ler lezot i opoz li. Ler nou montre ki nou annan konfyans dan li, nou ed li pour annan sa kouraz pour viv dapre bann standar Zeova e pour swazir pour servi Zeova.
KANTIK 55 Pa per zot!
a De-z-an edmi apre ki Nikodenm ti’n koz avek Zezi, Nikodenm ti ankor en manm lakour siprenm bann Zwif. (Zan 7:45-52) En liv resers i dir ki dapre tradisyon, Nikodenm ti vin en disip apre lanmor Zezi.—Zan 19:38-40.
