Skip to content

Al lo konteni

 LARTIK LETID 43

Donn Zeova en devosyon zis pour li tousel

Donn Zeova en devosyon zis pour li tousel

“Se Zeova ou Bondye ki ou devret adore e zis li tousel ki ou devret servi.”​—MAT. 4:10.

KANTIK 51 Dedye nou lavi avek Bondye!

SA KI NOU POU ETIDYE *

1. Akoz nou devret ador zis Zeova?

NOU devret ador zis Zeova akoz i nou Kreater e sa Enn ki’n donn nou lavi. (Rev. 4:11) Me i annan en danze. Menm si nou kontan e annan respe pour Zeova, i kapab ki serten keksoz dan nou lavi i vin sitan enportan ki sa i anpes nou donn Zeova en devosyon zis pour li tousel parey i merite. I enportan pour nou konnen ki mannyer sa i kapab arive. Me avan sa, annou diskit lo ki savedir donn Zeova en devosyon zis pour li tousel.

2. Dapre Egzod 34:14, ki nou pou fer si nou donn Zeova en devosyon zis pour li tousel?

2 Zeova “i en Bondye zalou,” setadir en Bondye ki oule en devosyon zis pour li tousel. Dapre Labib, sa i vedir ki nou ador zis li e ki nou annan en lanmour profon pour li. Alor, nou pa pou les personn oubyen okenn keksoz pran son plas dan nou leker.​—Lir Egzod 34:14.

3. Akoz nou annan rezon donn Zeova en devosyon zis pour li tousel?

3 Nou annan rezon donn Zeova en devosyon zis pour li tousel. Akoz nou dir sa? Parski nou devosyon i baze lo sa ki nou’n aprann lo li. Nou’n aprann pour kontan son bann zoli kalite. Nou konnen kwa ki Zeova i kontan e pa kontan e nou santi parey li. Nou konpran e siport son plan pour bann imen. Nou konnen ki i en privilez pour vin zanmi Zeova. (Ps. 25:14, NWT) Tou sa ki nou aprann lo nou Kreater i ed nou vin pli pros avek li.​—Zak 4:8.

4. (a) Ki Satan i servi pour esey anpes nou donn Zeova en devosyon zis pour li tousel? (b) Ki nou pou diskite dan sa lartik?

4 Dyab ki kontrol sa lemonn. I servi sa lemonn pour fer  bann keksoz ki imen i anvi vin pli enportan dan nou lavi e pour fer li pli difisil pour reziste nou bann move dezir. (Efe. 2:1-3; 1 Zan 5:19) I anvi ki nou kontan lezot keksoz pour ki nou pa donn Zeova en devosyon zis pour li tousel. Annou diskit lo de fason ki Satan i kapab fer sa. Premyerman, i esey fer nou kontan larzan. Dezyenmman, i esey fer nou swazir bann move divertisman.

FER ATANSYON KI OU PA KONTAN LARZAN

5. Akoz nou bezwen fer atansyon ki nou pa konmans kontan larzan?

5 Nou tou nou anvi annan ase manze pour manze, lenz konvenab pour mete ek en bon landrwa reste. Par kont, nou bezwen fer atansyon ki nou pa konmans kontan larzan. Bokou dimoun dan lemonn Satan i “kontan larzan” ek bann keksoz ki zot kapab aste avek larzan. (2 Tim. 3:2) Zezi ti konnen ki son bann disip ti pou ganny tante pour kontan larzan zot osi. I ti dir: “En lesklav pa kapab servi de met, parski swa i pou ay enn e kontan lot oubyen i pou fidel avek enn e mepriz lot. Ou pa kapab lesklav Bondye e lesklav Larises an menm tan.” (Mat. 6:24) En serviter Zeova ki pas bokou letan ek lenerzi pour esey vin ris dan sa lemonn, i parey en dimoun ki pe servi de met. I pa pe donn Zeova en devosyon zis pour li tousel.

Lafason ki serten kretyen Laodise ti vwar zot lekor . . . e lafason ki Zeova ek Zezi ti vwar zot (Vwar paragraf 6)

6. Ki leson nou kapab aprann avek sa konsey ki Zezi ti donn kongregasyon Laodise?

6 Ver lafen premye syek, bann Kretyen dan kongregasyon Laodise ti pe fer vantar e dir: “Mon ris, mon’n anmans bokou larises e mon pa mank nanryen.” Me Zeova ek Zezi ti kapab vwar ki zot ti “malere, fer lapenn, pov, aveg e touni.” Zezi ti donn zot sa konsey pa akoz zot ti ris, me  akoz zot ti sitan kontan larzan ki sa ti pe gat zot lanmitye avek Zeova. (Rev. 3:14-17) Si nou remarke ki nou pe konmans kontan larzan, nou bezwen sanz nou fason panse vitman. (1 Tim. 6:7, 8) Si non, nou pou konmans kontan lezot keksoz e Zeova pa pou aksepte nou ladorasyon. Zeova i ekspekte ki nou donn li en devosyon zis pour li tousel. (Det. 4:24) Alor, ki mannyer larzan i kapab vin tro enportan pour nou?

7-9. Ki ou aprann avek leksperyans en ansyen ki apel David?

7 Annou vwar legzanp David, en ansyen Leta-z-ini. David i dir ki i ti travay dir dan sa lakonpannyen kot i ti travay. I ti ganny en promosyon e i ti menm ganny rekonnet konman enn bann dimoun ki pli byen kapab fer sa travay Leta-z-ini. David i dir: “Sa letan, mon ti krwar ki tou sa bann keksoz ti montre ki Zeova ti pe beni mwan.” Me eski sa ti vre?

8 Avek letan, David ti realize ki son travay ti pe gat son relasyon avek Zeova. I dir: “Ler mon ti dan renyon e menm dan predikasyon, mon ti remarke ki mon ti pe mazin bann problenm ki annan pour fer avek travay. Mon ti pe ganny en kantite larzan, me mon ti anba plis presyon e mon ti pe konmans ganny problenm dan mon maryaz.”

9 David ti realize ki i ti bezwen deside kwa ki pli enportan pour li. I dir: “Mon ti determinen pour sanz mon sityasyon.” David ti anvi sanz son progranm travay, alor i ti koz avek son anplwayer lo sa ki i ti pe mazin fer. Ki ti arive? David ti ganny pouse dan son travay! Me ki David ti fer? I dir: “Son lannmen, mon ti ranpli form pour fer pionye asistan kontinyelman.”  Pour siport zot lekor, David ek son madanm ti konmans netway bann gran batiman. Apre en pe letan, i ti vin en pionye ordiner e pli tar son madanm osi ti pran sa servis. David ek son madanm in swazir pour fer en travay ki bokou dimoun pa anvi fer, me zot travay pa sa keksoz pli enportan pour zot. Menm si sa saler ki zot gannyen i bokou pli mwens ki avan, tou le mwan zot annan ase larzan pour kouver zot bann depans. Zot anvi met Zeova premye e zot in vwar pour zot menm ki Zeova i pran swen avek bann dimoun ki met Rwayonm premye.​—Mat. 6:31-33.

10. Ki mannyer nou kapab protez nou leker?

10 Ki swa nou annan en kantite larzan oubyen non, nou bezwen protez nou leker. Ki mannyer nou kapab fer sa? Pa konmans kontan larises e pa les ou travay vin pli enportan ki ou servis pour Zeova. Ki mannyer ou kapab konnen si sa pe arive avek ou? Ou kapab demann ou lekor sa bann kestyon swivan: ‘Eski mon abitye mazin travay ler mon dan renyon oubyen dan predikasyon? Eski mon toultan trakas lo si mon pou annan ase larzan a lavenir? Eski larzan ek bann keksoz materyel pe kree problenm dan mon maryaz? Eski mon ti pou pare pour fer en travay ki bokou dimoun pa anvi fer si sa ti pou permet mwan pas plis letan dan servis Zeova?’ (1 Tim. 6:9-12) Anmezir ki nou reflesi lo sa bann kestyon, gard antet ki Zeova i kontan nou e ki i fer sa promes avek tou bann ki annan en devosyon zis pour li tousel: “Mon pa pou zanmen kit ou e mon pa pou zanmen abandonn ou.” I pour sa rezon ki zapot Pol ti ekri: “Montre dan zot fason viv ki zot pa kontan larzan.”​—Ebr. 13:5, 6.

SWAZIR BYEN OU DIVERTISMAN

11. Ki lefe divertisman i kapab annan lo en dimoun?

11 Zeova i anvi ki nou lavi i gou e bann divertisman i kapab ed nou fer sa. Anfet, Parol Bondye i dir ki “napa nanryen pli meyer pour en zonm ki i manze e menm bwar e vwar bon rezilta akoz i’n travay dir.” (Ekle. 2:24, NWT) Par kont, laplipar divertisman ozordi i kapab annan en move lefe lo nou. Sa bann divertisman i kapab fer bokou dimoun konmans aksepte e menm kontan bann keksoz ki Labib i dir i mal.

Lekel ki pe prepar ou divertisman? (Vwar paragraf 11-14) *

12. Dapre 1 Korentyen 10:21, 22, akoz nou devret byen swazir nou divertisman?

 12 Nou anvi donn Zeova en devosyon zis pour li tousel, alor nou pa kapab manz lo “latab Zeova” e “lo latab bann demon.” (Lir 1 Korentyen 10:21, 22.) Souvan, ler dimoun i pran en repa ansanm sa i vedir ki zot zanmi. Si nou swazir bann divertisman ki promot vyolans, pratik demonyak, imoralite seksyel oubyen okenn lezot move dezir ek latitid, i pou konmsi nou pe pran en repa avek bann lennmi Bondye e pe manz bann pla ki zot in prepare. Si nou fer sa, nou pa zis fer ditor nou lekor me nou osi gat nou lanmitye avek Zeova.

13-14. Dapre Zak 1:14, 15, akoz nou bezwen vey byen ki kalite divertisman nou swazir? Donn en legzanp.

13 Ki mannyer divertisman i parey manze? Ler nou manze, nou kapab swazir kwa ki nou met dan nou labous. Me apre ki nou’n anval nou manze, nou pa kapab swazir ki lefe sa manze pou annan lo nou lekor. Bann bon manze i kapab fer nou pli an bon sante, tandis ki bann manze ki pa bon pour nou i kapab annan en move lefe lo nou. Petet nou pa pou vwar son lefe deswit, me son lefe pou evidan pli tar.

14 Pareyman, ler nou swazir nou divertisman, nou swazir kwa ki nou les antre dan nou lespri. Me apre sa, sa divertisman ki nou’n swazir pou annan en lefe lo nou fason panse ek santiman. Bann bon divertisman i kapab bon pour nou, tandis ki bann move divertisman i kapab fer nou ditor. (Lir Zak 1:14, 15.) Petet nou pa pou remark lefe ki move divertisman i annan lo nou deswit, me nou pou vwar son lefe apre en pe letan. I pou sa rezon ki Labib i averti nou: “Pa les zot ganny anbete: Personn pa kapab anbet Bondye. Sa ki en dimoun pe senmen, sanmenm ki i pou rekolte osi. Parski sa enn ki pe senm pour fer plezir son lekor enparfe pou rekolte sa ki move avek son lekor enparfe.” (Gal. 6:7, 8) I vreman enportan ki nou rezet tou divertisman ki promot bann keksoz ki Zeova i deteste!​—Ps. 97:10.

15. Ki kado Zeova in donn nou?

15 Bokou serviter Zeova i kontan get Televizyon JW, nou stasyon televizyon lo Enternet. En ser ki apel Marilyn i dir: “Televizyon JW in ed mwan vin en dimoun pli zwaye e mon kapab get tou keksoz ki i annan lo la parski tou keksoz i bon pour mwan. Ler mon santi mwan tousel oubyen dekouraze, mon rod en diskour oubyen Ladorasyon Bomaten ki ankourazan pour mwan gete. Sa i fer mwan santi pli pros avek Zeova ek son lorganizasyon. Televizyon JW in sanz mon lavi konpletman.” Eski ou pe benefisye avek sa kado sorti kot Zeova? Tou le mwan i annan bann nouvo progranm lo Televizyon JW. I osi annan bann lanrezistreman odyo, video ek sanson ankourazan ki nou kapab gete e ekoute nenport ki moman.

16-17. Akoz nou bezwen vey byen lakantite letan ki nou pase dan divertisman e ki mannyer nou kapab fer sa?

16 I vre ki nou bezwen vey byen kwa ki nou swazir konman divertisman, me nou osi bezwen vey byen lakantite letan ki nou pase dan divertisman. Si nou pa fer sa, i kapab ki nou pas plis letan dan divertisman ki dan servis Zeova. Bokou dimoun i vwar li difisil pour kontrol lakantite letan ki zot pase dan divertisman. En ser 18 an ki apel Abigail i dir: “Ler mon get televizyon apre en gran lazournen, sa  i ed mwan rilaks. Me si mon pa fer atansyon, mon kapab pas plizyer erdtan devan televizyon.” En zenn frer ki apel Samuel i dir: “Parfwa, mon get en kantite pti video lo Enternet. Mon konmans get zis enn, me ler mon fer levanter, trwa oubyen kat erdtan in pase.”

17 Ki mannyer ou kapab kontrol lakantite letan ki ou pase dan divertisman? Sa premye keksoz ki ou kapab fer i kalkile ki kantite letan ou pase dan divertisman. Akoz ou pa mark lakantite letan ki ou pase dan en semenn? Ekri lo en kalandriye konbyen letan ou pase pe get televizyon, pe get keksoz lo Enternet e pe zwe game lo ou lekipman elektronik. Si ou santi ki ou pe pas tro bokou letan pe fer sa bann keksoz, esey fer en progranm. Plàn pour fer bann keksoz pli enportan premye e apre sa deside kan ki ou pou fer divertisman. Apre, demann Zeova pour ed ou fer sa ki ou’n plàn. Koumsa, ou pou annan letan ek lenerzi pour fer ou letid Labib personnel, ladorasyon fanmir, prepar e al renyon e pour servi Zeova dan predikasyon. Petet ou pou pli apresye sa letan ki ou pase dan divertisman akoz ou’n met Zeova premye.

KONTINYEN DONN ZEOVA EN DEVOSYON ZIS POUR LI TOUSEL

18-19. Ki mannyer nou kapab montre ki nou donn Zeova en devosyon zis pour li tousel?

18 Apre ki zapot Pyer ti’n ekri konsernan lafen lemonn Satan e nouvo lemonn, i ti dir: “Zot ki mon kontan, vi ki zot pe esper sa bann keksoz, fer tou zot posib pour ki finalman zot a ganny trouve san okenn tas, san defo e dan lape.” (2 Pyer 3:14) Ler nou obei sa konsey e fer nou mye pour viv e ador Zeova dan sa fason ki li i oule, nou montre ki nou pe donn Zeova en devosyon zis pour li tousel.

19 Satan ek son lemonn pou kontinyen esey fer nou met lezot keksoz avan Zeova. (Lik 4:13) Me nou pa pou les personn oubyen nanryen pran plas Zeova dan nou leker. Nou determinen pour donn Zeova sa ki zis li ki merite, en devosyon zis pour li tousel!

KANTIK 30 Mon Papa, mon Bondye ek Zanmi

^ par. 5 Nou kontan servi Zeova. Me eski nou pe servi zis Zeova? Bann desizyon ki nou fer i ed nou konn larepons sa kestyon. Pour ed nou konnen si nou pe donn Zeova en devosyon zis pour li tousel, nou pou diskit lo bann desizyon ki nou fer konsernan de keksoz, larises ek divertisman.

^ par. 53 LEKSPLIKASYON PORTRE: Nou pa pou anvi manz manze ki’n ganny prepare dan en lakwizin sal. Alor, akoz nou pou anvi get bann divertisman ki’n ganny kontaminen avek vyolans, pratik demonyak oubyen imoralite seksyel?