Skip to content

Al lo konteni

 LARTIK LETID 13

Kontan kanmarad en kantite

Kontan kanmarad en kantite

“Kontan kanmarad en kantite avek tou zot leker.”​—1 PYER 1:22.

KANTIK 109 Kontan lezot avek tou ou leker

SA KI NOU POU ETIDYE *

Sa dernyen lannwit ki Zezi ti avek son bann disip, i ti met lanfaz lo lanmour (Vwar paragraf 1-2)

1. Ki lord spesifik zezi ti donn son bann disip? (Vwar portre lo kouvertir.)

SA ZOUR swar avan Zezi ti mor, i ti donn son bann disip en lord spesifik. I ti dir zot: “Parey mwan mon’n kontan zot, zot osi kontan kanmarad. Par sa, tou dimoun pou konnen ki zot mon disip, si zot annan lanmour antre zot.”​—Zan 13:34, 35.

2. Akoz i enportan pour demontre lanmour anver kanmarad?

2 Zezi ti dir ki son bann vre disip ti pou ganny idantifye klerman si zot demontre sa menm kalite lanmour ki li i ti demontre. Sanmenm ki ti arive dan premye syek e ozordi osi parey. Alor, i vreman enportan ki nou kontan kanmarad menm ler i difisil pour fer li.

3. Ki nou pou vwar dan sa lartik?

3 Vi ki nou enparfe, sa i fer li difisil pour nou kontan kanmarad en kantite. Kantmenm sa, nou bezwen esey swiv legzanp Zezi. Dan sa lartik, nou pou aprann ki mannyer lanmour pou ed nou fer lape, pa fer lapreferans e pour demontre lospitalite. Anmezir ou etidye sa lartik, demann ou lekor: ‘Ki mon kapab aprann avek bann frer ek ser ki’n kontinyen demontre lanmour malgre difikilte?’

KONTAN POUR FER LAPE

4. Dapre Matye 5:23, 24, akoz nou devret fer lape avek en frer ki ankoler avek nou?

4 Zezi ti montre akoz i enportan pour fer lape avek en frer ki ankoler avek nou. (Lir Matye 5:23, 24.) I ti fer resorti ki nou bezwen gard en bon relasyon avek lezot si nou anvi fer plezir Bondye. Zeova i kontan ler nou fer nou mye pour fer lape avek nou bann frer ek ser. I pa pou aksepte  nou ladorasyon si nou gard rankin e refize pour esey fer lape.​—1 Zan 4:20.

5. Kwa ki ti fer li difisil pour en frer fer lape?

5 Nou kapab vwar li difisil pour fer lape. Akoz? Annou vwar sa ki ti arive avek Mark. * I ti sagren ler en frer ti kritik li e dir bann move keksoz lo li avek lezot dan kongregasyon. Ki mannyer Mark ti reakte? I dir: “Mon ti perdi kontrol e pran lakoler.” Apre sa, Mark ti regret sa ki i ti’n fer e esey demann leskiz sa frer pour fer lape. Me sa frer ti refize fer lape avek Mark. Mark ti mazinen: ‘Akoz mon pou kontinyen eseye, si i pa anvi fer lape avek mwan?’ Me sirveyan rezyonal ti ankouraz Mark pour pa bes lebra. Ki Mark ti fer?

6. (a) Ki mannyer Mark ti kontinyen esey fer lape? (b) Ki mannyer Mark ti aplik Kolosyen 3:13, 14?

6 Mark ti reflesir byen lo son latitid. I ti realize ki i ti napa ase limilite e ki parfwa i ti mazinen ki i ti pli meyer ki lezot. I ti realize ki i ti bezwen sanz son latitid. (Kol. 3:8, 9, 12) I ti al kot sa frer ankor e avek limilite i ti demann leskiz pour son konportman. Mark ti osi ekri bann let pour sa frer pour dir li ki i vreman regret sa ki’n arive e demann li si zot kapab revin zanmi. Mark ti menm donn sa frer bann pti kado ki i ti krwar sa frer ti pou kontan. Malerezman, sa frer ti kontinyen gard rankin avek li. Kantmenm sa, Mark ti kontinyen obei lord Zezi pour kontan son frer e pardonnen. (Lir Kolosyen 3:13, 14.) Menm si lezot pa enterese pour fer lape, sa vre lanmour Kretyen pou ed nou pour kontinyen pardonn zot e priye ki nou pou reisi fer lape avek zot.​—Mat. 18:21, 22; Gal. 6:9.

Si en dimoun i annan en problenm avek nou, i kapab ki nou bezwen esey fer plizyer keksoz pour fer lape avek sa dimoun ankor (Vwar paragraf 7-8) *

7. (a) Ki Zezi ti demann nou pour fer? (b) Ki sityasyon difisil en ser ti fer fas avek?

7 Zezi ti demann nou pour kontinyen  tret lezot dan menm fason ki nou anvi lezot i tret nou. I ti osi dir ki nou pa devret kontan zis bann ki kontan nou. (Lik 6:31-33) Ki ou pou fer si en dimoun dan kongregasyon pa koz avek ou e i menm refize dir ou bonzour? Sa pa ariv souvan me i kapab arive. Sanmenm ki ti arive avek Lara. I dir: “En ser ti inyor mwan e mon pa ti konnen akoz. Sa ti telman trakas mwan ki mon ti nepli anvi al renyon.” Lara ti mazinen: ‘Mon pa’n fer nanryen mal e lezot osi dan kongregasyon i vwar ki sa ser i azir drol.’

8. Ki Lara ti fer pour fer lape e ki nou kapab aprann avek son leksperyans?

8 Lara ti deside fer keksoz pour fer lape. I ti priy Zeova e deside pour koz avek sa ser. Zot ti koz lo sa problenm, anmay kanmarad e fer lape. Tou keksoz ti paret oke. Lara i dir: “Me pli tar, sa ser ti demontre menm latitid ankor. Mon ti vreman dekouraze.” O konmansman, Lara ti santi ki i ti pou kontan si sa ser ti sanz son latitid. Me pli tar Lara ti konpran ki sa pli bon keksoz ki i ti kapab fer, i kontinyen tret sa ser avek lanmour e “pardonn [li] volonterman.” (Efe. 4:32–5:2) Lara i rapel ki vre lanmour Kretyen “pa gard rankin. I siport tou keksoz, i krwar tou, i toultan annan lespwar e i andir tou keksoz.” (1 Kor. 13:5, 7) Lara ti reganny son lape lespri. Avek letan, sa ser ti vin pli amikal anver li. Ler ou fer lape avek ou bann frer ek ser e kontinyen kontan zot, ou kapab asire ki “Bondye lanmour ek lape” pou avek ou.​—2 Kor. 13:11.

PA FER LAPREFERANS

9. Dapre Akt 10:34, 35, akoz nou bezwen pa fer lapreferans?

9 Zeova pa fer lapreferans. (Lir Akt 10:34, 35.) Ler nou pa fer lapreferans, nou montre ki nou son zanfan. Nou obei sa lord pour kontan nou prosen parey nou prop lekor e nou gard lape dan nou  fanmir spirityel.​—Rom. 12:9, 10; Zak 2:8, 9.

10-11. Ki mannyer en ser ti sirmont son bann santiman negatif?

10 I kapab difisil pour serten pa fer lapreferans. Annou vwar sa ki ti arive avek en ser ki apel Ruth. Ler i ti ankor zenn, i ti pas dan en move leksperyans avek en dimoun ki ti sorti dan en lot pei. Ki lefe sa ti annan lo li? Ruth i dir: “Mon ti ay tou sa ki ti annan pour fer avek sa pei. Mon ti krwar ki tou dimoun dan sa landrwa ti parey, menm bann frer ek ser.” Ki mannyer Ruth ti sirmont son bann santiman negatif?

11 Ruth ti realize ki i ti bezwen lalit avek son bann santiman negatif. I ti lir bann leksperyans ek rapor dan Yearbook konsernan sa pei. I dir: “Mon ti fer zefor pour annan en pwennvi pozitif lo bann dimoun sa pei. Mon ti konmans remarke ki bann frer ek ser ti annan devouman pour Zeova. I ti kler ki zot osi zot form par nou lasosyasyon frer ek ser dan lemonn antye.” Avek letan, Ruth ti realize ki i ti bezwen demontre plis lanmour pour lezot. I dir: “Sak fwa mon ti zwenn bann frer ek ser ki sorti dan sa pei, mon ti fer en zefor spesyal pour vin amikal avek zot. Mon ti koz avek zot e mon ti aprann konn zot pli byen.” Ki rezilta sa ti anmennen? Ruth i dir: “Avek letan, mon ti nepli annan bann santiman negatif.”

Si nou annan “lanmour pour lasosyasyon tou bann frer,” nou pa pou fer lapreferans (Vwar paragraf 12-13) *

12. Ki problenm en ser ki apel Sarah ti annan?

12 Serten dimoun i kapab fer lapreferans san ki zot realize. Par egzanp, Sarah ti krwar ki i pa ti fer lapreferans akoz i pa ti ziz dimoun dapre zot ras, zot sityasyon finansyel oubyen lakantite responsabilite ki zot annan dan lorganizasyon. Me i ti admet: “Mon ti konmans realize ki mon ti pe fer lapreferans.” Dan ki fason? Sarah i sorti dan en fanmir byen edike e i ti kontan pas letan avek bann dimoun byen edike. En fwa i ti menm dir avek enn son zanmi: “Mon pas letan avek bann frer ek ser ki byen edike. Mon evite pas letan avek lezot ki pa edike.” I kler ki Sarah ti bezwen sanz son latitid. Ki mannyer i ti pou fer sa?

13. Ki nou aprann avek lafason ki Sarah ti sanz son latitid?

13 En sirveyan rezyonal ti ed Sarah reflesir lo son latitid. Sarah i dir: “I ti felisit mwan pour mon fidelite dan servis Zeova, pour mon bann bon komanter e sa bon konnesans ki mon annan lo Labib. Apre sa, i ti dir ki anmezir nou ganny plis konnesans, nou osi bezwen devlop bann kalite Kretyen parey limilite, respe ek pitye.” Sarah ti aplik konsey ki sa sirveyan rezyonal ti donn li. I dir: “Mon ti realize ki sa keksoz pli enportan i demontre labonte ek lanmour.” Alor, i ti konmans vwar son bann frer ek ser dan en lot fason. I dir: “Mon ti esey konpran zot bann kalite ki ti fer zot presye pour Zeova.” Me ki nou pou dir lo nou? Nou pa pou anvi santi ki nou pli meyer ki lezot akoz nou ledikasyon! Si nou annan “lanmour pour lasosyasyon tou bann frer,” nou pou evite fer lapreferans.​—1 Pyer 2:17.

DEMONTRE LOSPITALITE

14. Dapre Ebre 13:16, ki mannyer Zeova i santi ler nou demontre lospitalite anver lezot?

14 Zeova i vreman kontan ler nou demontre lospitalite. (Lir Ebre 13:16.) I konsider sa konman en parti nou ladorasyon, espesyalman ler nou ed sa ki dan  bezwen. (Zak 1:27; 2:14-17) Alor, Labib i ankouraz nou pour “annan labitid pour demontre lospitalite.” (Rom. 12:13) Ler nou demontre lospitalite nou montre lezot ki nou vreman enterese avek zot, nou kontan zot e nou anvi vin zot zanmi. Ki swa nou partaz en pti snak, en keksoz pour bwar, en repa e pas letan avek lezot, Zeova i kontan. (1 Pyer 4:8-10) Par kont, i kapab annan serten keksoz ki kapab fer li difisil pour nou demontre lospitalite.

“Dan lepase, mon ti ezite pour demontre lospitalite, me mon’n sanz mon fason panse e sa i fer mwan pli ere” (Vwar paragraf 16) *

15-16. (a) Akoz serten i santi ki zot pa kapab demontre lospitalite? (b) Kwa ki ti ed Edit pour demontre lospitalite?

15 Nou kapab ezite pour demontre lospitalite akoz nou sirkonstans. Annou vwar legzanp en vev ki apel Edit. Avan ki i ti vin en Temwen Zeova, i pa ti tro kontan pas letan avek lezot. Edit ti santi ki lezot dimoun ti pou pli byen kapab demontre lospitalite ki li.

16 Apre ki Edit ti’n vin en Temwen Zeova, i ti sanz son fason panse. I ti deside pour konmans demontre lospitalite. I dir: “Ler nou nouvo lasal Rwayonm ti pe ganny konstrir, en ansyen ti koz avek mwan lo en koup marye ki ti pe vin ede dan konstriksyon e i ti demann mwan si mon ti pou kapab donn zot en plas reste kot mwan pour de semenn. Mon ti rapel lafason ki Zeova ti beni sa vev Zarefat.” (1 Rwa. 17:12-16) Edit ti dakor pour donn zot en plas reste. Eski i ti ganny beni? I dir: “De semenn ti vin de mwan. Pandan sa letan, nou ti devlop en bon lanmitye.” Edit in osi ganny bann bon zanmi dan kongregasyon. Aprezan, i en pionye e i kontan envit bann frer ek ser ki i travay avek dan predikasyon pour vin pran en rafresisman kot li. I dir: “Mon santi mon byen ler mon donnen e mon osi ganny bokou benediksyon an retour.”​—Ebr. 13:1, 2.

17. Ki Luke ek son madanm ti pe fer me ki zot pa ti realize?

 17 Petet nou deza pe demontre lospitalite me eski nou kapab amelyore? Par egzanp, Luke ek son madanm ti kontan demontre lospitalite. Zot ti annan sa labitid pour envit zot paran, zot manm fanmir, zot zanmi pros e osi sirveyan rezyonal ek son madanm. Par kont, Luke i dir: “Nou realize ki nou ti pe envit zis bann ki ti pros avek nou.” Ki mannyer Luke ek son madanm ti amelyor lafason ki zot demontre lospitalite?

18. Ki mannyer Luke ek son madanm ti amelyor lafason ki zot demontre lospitalite?

18 Luke ek son madanm ti aprann ki savedir demontre lospitalite ler zot ti reflesir lo parol Zezi: “Si zot kontan bann ki kontan zot, ki rekonpans i annan pour zot?” (Mat. 5:45-47) Zot ti realize ki zot ti bezwen swiv legzanp Zeova, ki zenere avek tou dimoun. Alor zot ti deside pour envit bann frer ek ser ki zot pa ti’n deza envite avan. Luke i dir: “Nou tou nou kontan sa bann letan ki nou pase ansanm. Sa i fer nou vin pli pros avek kanmarad e pli pros avek Zeova.”

19. Ki mannyer nou montre ki nou bann disip Zezi e ki ou determinen pour fer?

19 Nou’n vwar ki mannyer ler nou kontan kanmarad en kantite, sa i kapab ed nou fer lape, pa fer lapreferans e demontre lospitalite. Nou bezwen rezet okenn santiman negatif e kontan nou bann frer ek ser en kantite avek tou nou leker. Si nou fer sa, nou pou ere e nou pou montre ki nou vreman bann disip Zezi.​—Zan 13:17, 35.

KANTIK 88 Montre mwan ou semen

^ par. 5 Zezi ti dir ki dimoun pou rekonnet bann vre Kretyen atraver sa lanmour ki zot annan antre zot. Lanmour pour nou bann frer ek ser i pous nou pour fer lape, pa fer lapreferans e demontre lospitalite. Pa toultan ki sa pou fasil. Dan sa lartik nou pou ganny bann sizesyon pratik lo ki mannyer pour kontinyen kontan kanmarad avek tou nou leker.

^ par. 5 Serten non dan sa lartik in sanze.

^ par. 57 LEKSPLIKASYON PORTRE: En ser i esey fer lape. Son premye lesey pa marse me i kontinyen eseye. Vi ki i ti kontinyen demontre lanmour , zot ti fer lape.

^ par. 59 LEKSPLIKASYON PORTRE: En frer aze i santi ki lezot pa apresye li dan kongregasyon.

^ par. 61 LEKSPLIKASYON PORTRE: En ser ki avan ti ezite pour demontre lospitalite ti sanz son fason panse e sa i fer li pli ere.