Skip to content

Al lo konteni

 LARTIK LETID 7

Nou kontan nou Papa Zeova en kantite

Nou kontan nou Papa Zeova en kantite

“Nou kontan akoz i’n kontan nou premye.”​—1 ZAN 4:19.

KANTIK 3 Nou lafors, nou lespwar, nou konfyans

SA KI NOU POU ETIDYE *

1-2. Akoz e ki mannyer Zeova in fer li posib pour nou form parti son fanmir?

ZEOVA in envit nou pour form parti son fanmir, parmi bann ki ador li. Pa sa i en zoli lenvitasyon! Bann manm ki form parti sa fanmir i bann dimoun ki’n dedye zot lavi avek Zeova e ki’n demontre lafwa dan sakrifis son Garson. Nou en fanmir vreman ere. Nou annan en lavi satisfezan la konmela e nou kontan akoz nou annan sa lespwar pour viv pour touzour ki swa dan lesyel oubyen dan Paradi lo later.

2 Zeova in fer li posib pour nou form parti son fanmir akoz i kontan nou en kantite. Me pour li fer sa i’n bezwen fer en gran sakrifis. (Zan 3:16) “Bondye in pey en pri pour aste” nou. (1 Kor. 6:20) Atraver sa ranson, Zeova in fer li posib pour nou annan en lanmitye pros avek li. Nou annan sa loner pour apel sa pli gran Personnaz dan liniver, Papa. Parey nou’n vwar dan sa lartik avan, Zeova i sa pli bon Papa.

3. Ki kestyon nou kapab demande? (Vwar bwat “ Eski Zeova i enterese avek mwan?”)

3 Parey en ekriven Labib, nou kapab demande: “Ki mon pou donn [Zeova] an retour pour tou sa kantite dibyen ki i’n fer pour mwan?” (Ps. 116:12) Anfet, nou pa pou zanmen kapab donn nou Papa ki dan lesyel nanryen an retour. Kantmenm sa, son lanmour pour nou i fer nou kontan li an retour. Zapot Zan ti dir: “Nou nou kontan akoz i’n kontan nou premye.” (1 Zan 4:19) Ki mannyer nou kapab montre nou Papa ki dan lesyel ki nou kontan li?

 RESTE PROS AVEK ZEOVA

Nou montre ki nou kontan nou Papa ki dan lesyel en kantite, ler nou priy li, obei li e ed lezot pour kontan li (Vwar paragraf 4-14)

4. Dapre Zak 4:8, akoz nou devret fer zefor pour vin pros avek Zeova?

4 Zeova i anvi ki nou vin pros avek li e ki nou kominik avek li. (Lir Zak 4:8.) I ankouraz nou pour “persevere dan lapriyer” e i toultan ekout nou. (Rom. 12:12) I pa zanmen tro bizi oubyen tro fatige pour ekout nou. An retour, nou ekout li ler nou lir Labib ek nou bann piblikasyon ki ed nou konpran Labib. Nou osi ekout li ler nou ekout byen dan renyon. Zis parey en bon konversasyon i ed bann zanfan reste pros avek zot paran, ler nou kominik avek Zeova regilyerman sa i ed nou pour reste pros avek li.

Vwar paragraf 5

5. Ki mannyer nou kapab amelyor nou lapriyer?

5 Reflesir lo ki mannyer ou bann lapriyer i ete. Zeova i anvi nou dir li tou sa ki dan nou leker. (Ps. 62:8) I ti pou byen si nou demann nou lekor sa kestyon: ‘Eski mon lapriyer i parey en mesaz ki’n zis ganny rekopye oubyen eski i parey en mesaz ki mon’n ekri mwan menm e ki eksprim mon bann santiman?’ San dout, ou kontan Zeova en kantite e ou anvi annan en bon lanmitye avek li. Pour ou kapab fer sa, ou bezwen koz avek li regilyerman. Dir li ou bann santiman pli profon. Dir li sa ki fer ou zwaye e sa ki fer ou sagren. Ou kapab asire ki ou kapab demann li led.

6. Ki nou devret fer pour reste pros avek nou Papa ki dan lesyel?

6 Pour nou reste pros avek nou Papa ki dan lesyel, nou devret toultan rekonesan anver li. Nou dakor avek sa ki sa psalmis ti dir: “[Zeova] mon Bondye! Ou’n fer en kantite keksoz merveye pour nou; napa personn parey ou. Mon anvi fer konnen ou bann mervey. Me i annan tro bokou pou rakonte.” (Ps. 40:5) Nou pa devret zis santi ki nou apresye sa ki Zeova in fer me nou osi demontre nou lapresyasyon pour li par sa ki nou dir e fer. Sa i montre ki nou diferan avek bokou dimoun ozordi. Laplipar dimoun pa apresye tou sa ki Bondye i fer pour zot. Anfet, en keksoz ki montre ki nou pe viv dan “bann dernyen zour,” i ki dimoun pa rekonesan. (2 Tim. 3:1, 2) Nou pa zanmen anvi annan sa menm latitid.

7. Ki Zeova i anvi nou fer e akoz?

7 Bann paran pa anvi ki zot zanfan i lager me zot anvi ki zot vin zanmi. Pareyman, Zeova i anvi ki tou son bann zanfan i vin zanmi avek kanmarad. Anfet, lanmour ki nou annan pour kanmarad i montre ki nou bann vre Kretyen. (Zan 13:35) Nou dakor avek sa ki sa psalmis ti dir: “I bon, i gou war bann frer viv ini ansanm.” (Ps. 133:1) Ler nou kontan nou bann frer ek ser, nou montre Zeova ki nou kontan li. (1 Zan 4:20) Pa i vreman gou pour form parti en fanmir frer ek ser ki “bon avek kanmarad, [ki] annan konpasyon ek tandres”!​—Efe. 4:32.

DEMONTRE LANMOUR PAR VIN OBEISAN

Vwar paragraf 8

8. Dapre 1 Zan 5:3, ki sa rezon pli enportan ki nou obei Zeova?

8 Zeova i ekspekte bann zanfan i obei zot paran e i ekspekte ki nou obei li. (Efe. 6:1) I merite ki nou obei li parski i nou Kreater, sa Enn ki ed nou reste vivan e i pli saz ki okenn paran imen. Par kont, sa rezon pli enportan ki nou obei Zeova i akoz nou kontan li. (Lir 1 Zan 5:3.) Menm si nou annan plizyer rezon  akoz nou devret obei Zeova, i pa fors nou pour obei li. Zeova in donn nou sa liberte pour swazir, alor i kontan ler nou swazir pour obei li akoz nou kontan li.

9-10. Akoz i enportan pour konn e obei bann standar Bondye?

9 Bann paran i anvi ki zot zanfan i an sekirite. Alor, zot met bann lareg pour protez zot zanfan. Ler zanfan i obei sa bann lareg, zot montre ki zot annan konfyans ek respe pour zot paran. I pli enportan pour nou konn e obei bann standar ki nou Papa ki dan lesyel in mete. Ler nou fer sa, nou montre Zeova ki nou kontan li, nou annan respe pour li e nou osi nou ganny bann byenfe. (Iza. 48:17, 18) De lot kote, bann ki pa obei Zeova ek son bann standar i fer zot lekor ditor.​—Gal. 6:7, 8.

10 Ler nou viv dan en fason ki fer plezir Zeova, nou ganny proteze avek bann keksoz ki kapab fer nou ditor fizikman, emosyonnelman oubyen avek bann keksoz ki kapab gat nou lanmitye avek Zeova. Zeova i konn sa ki pli bon pour nou. Aurora ki reste Leta-z-ini i dir: “Mon konnen ki ler nou obei Zeova nou lavi pou toultan pli meyer.” Nou konnen ki sa i vre. Pa ou’n ganny bann byenfe ler ou’n obei bann standar Zeova!

11. Ki lapriyer i ed nou pour fer?

11 Lapriyer i ed nou pour obei Zeova menm si i difisil. Parfwa i difisil pour obei Zeova me nou bezwen fer bokou  zefor pour lager avek nou tandans pour fer pese. En psalmis ti sipliy Bondye: “Donn mwan disernman, pour mwan konpran ou lalwa e met li an pratik avek tou mon leker.” (Ps. 119:34) Denise ki en pionye ordiner i dir: “Ler mon vwar li difisil pour obei en lalwa Zeova, mon fer lapriyer pour mwan kapab ganny lafors pour fer sa ki byen.” Nou kapab asire ki Zeova pou toultan reponn bann lapriyer koumsa.​—Lik 11:9-13.

ED LEZOT POUR KONTAN NOU PAPA

12. Dapre Efezyen 5:1, ki nou devret fer?

12 Lir Efezyen 5:1. Konman “bann zanfan ki Bondye i kontan,” nou fer nou mye pour imit son bann kalite. Nou fer sa ler nou demontre lanmour, labonte e ler nou pardonn lezot. Ler bann dimoun ki pa konn Bondye i vwar nou bon kondwit, sa i kapab motiv zot pour aprann konn li. (1 Pyer 2:12) Bann paran Kretyen i annan bon rezon pour swiv legzanp Zeova dan lafason ki zot azir anver zot zanfan. Ler zot fer sa, zot zanfan i kapab anvi devlop zot prop lanmitye avek nou Papa ki kontan nou.

Vwar paragraf 13

13. Ki nou devret fer pour nou devlop kouraz?

13 Normalman bann pti zanfan i fyer pour zot papa e zot kontan pour koz avek lezot lo li. Pareyman, nou vreman fyer ki Zeova i nou Papa e nou anvi ki lezot i aprann konn li. Nou tou  nou santi parey Lerwa David ki ti dir: “Mon met mon lafyerte dan [Zeova].” (Ps. 34:2) Me si nou tro timid pour koz lo Zeova, ki mannyer nou kapab devlop kouraz? Nou pou devlop kouraz si nou mazin lo ki mannyer Zeova pou kontan ler nou koz lo li e ki mannyer lezot pou ganny bann byenfe ler zot aprann konn li. Zeova pou donn nou sa kouraz ki nou bezwen. I ti ed bann Kretyen dan premye syek pour devlop kouraz e i pou ed nou osi.​—1 Tesa. 2:2.

14. Ki serten rezon akoz i enportan pour anons sa bon nouvel?

14 Zeova pa fer lapreferans e i kontan ler i vwar nou pe demontre lanmour pour lezot, nenport ki landrwa zot sorti. (Akt 10:34, 35) Enn bann pli bon fason ki nou kapab demontre lanmour pour lezot, i ler nou anons sa bon nouvel avek zot. (Mat. 28:19, 20) Ki pou arive ler nou fer sa travay? Bann ki ekout nou i kapab amelyor zot lavi depi la konmela e dan lavenir zot pou kapab viv pour touzour dan Paradi lo later.​—1 Tim. 4:16.

NOU POU ERE LER NOU KONTAN NOU PAPA

15-16. Ki rezon nou annan pour nou zwaye?

15 Zeova i en Papa ki kontan nou e i anvi ki son fanmir i ere. (Iza. 65:14) Menm si nou pe fer fas avek bokou difikilte, nou annan bokou rezon pour nou zwaye. Par egzanp, nou asire ki nou Papa ki dan lesyel i kontan nou en kantite. Nou annan en konnesans egzakt lo Parol Bondye. (Zer. 15:16) Nou form parti en fanmir spesyal ki kontan Zeova, kontan son bann standar e ki kontan kanmarad.​—Ps. 106:4, 5.

16 Nou kapab zwaye akoz nou asire ki a lavenir lavi pou vin pli meyer. Nou konnen ki byento Zeova pou tir tou bann move keksoz e ki ler son Rwayonm pou dirize, later antye pou vin en paradi. Nou osi annan sa zoli lespwar ki bann ki’n mor pou ganny resisite e zot pou avek nou ankor. (Zan 5:28, 29) Pa sa pou gou! Pli enportan ankor, nou asire ki byento tou bann ki pou dan lesyel oubyen lo later, pou donn nou Papa ki kontan nou sa loner, louanz ek devosyon ki i merite.

KANTIK 12 Zeova, Bondye Tre O

^ par. 5 Nou konnen ki nou Papa Zeova i kontan nou en kantite e in fer nou form parti son fanmir, parmi bann ki ador li. An retour, nou kontan li nou osi. Ki mannyer nou kapab montre nou Papa ki nou kontan li? Dan sa lartik, nou pou vwar serten fason ki nou kapab fer sa.