Skip to content

Al lo konteni

 LARTIK LETID 8

Lalit avek zalouzi e promot lape

Lalit avek zalouzi e promot lape

“Annou rod bann keksoz ki promot lape e bann keksoz ki batir kanmarad.”​—ROM. 14:19.

KANTIK 113 Nou annan lape

SA KI NOU POU ETIDYE *

1. Ki lefe zalouzi ti annan lo fanmir Zozef?

ZAKOB ti kontan tou son garson me i ti pli kontan Zozef, son garson 17 an. Ki mannyer bann frer Zozef ti reazir? Zot ti konmans zalou li e sa zalouzi ti fer zot ay li. Zozef pa ti’n fer nanryen pour son bann frer ay li. Kantmenm sa, zot ti vann Zozef konman en lesklav e apre zot ti koz manti avek zot papa. Zot ti dir ki en zannimo sovaz ti’n touy son garson prefere. Zot zalouzi ti fer ki i ti nepli annan lape dan zot fanmir e zot papa ti vreman sagren.​—Zen. 37:3, 4, 27-34.

2. Dapre Galat 5:19-21, akoz groker i danzere?

2 Dan Labib, groker * i ganny mansyonnen parmi “bann move kondwit lekor enparfe” ki vreman danzere e ki kapab anpes en dimoun antre dan Rwayonm Bondye. (Lir Galat 5:19-21.) Zalouzi i rasin bann move tre parey laenn, kankan ek bann lakoler.

3. Ki nou pou vwar dan sa lartik?

3 Legzanp bann frer Zozef i montre ki mannyer zalouzi i kapab detri bann relasyon e fer ki i napa lape dan en fanmir. Menm si nou pa pou zanmen fer sa ki bann frer Zozef ti fer, nou tou nou annan en leker enparfe e tret. (Zer. 17:9, NWT) Alor, i pa drol ki par ler nou kapab lalit avek sa tandans pour zalou lezot. Annou vwar serten legzanp  dan Labib ki pou ed nou idantifye bann rezon akoz zalouzi i kapab pran rasin dan nou leker. Nou pou osi vwar ki nou kapab fer pour lalit avek zalouzi e promot lape.

KWA KI KAPAB FER NOU GROKER OUBYEN ZALOU?

4. Akoz bann Filisten ti zalou Izaak?

4 Ler en dimoun i annan bokou keksoz materyel. Izaak ti en zonm ris e bann Filisten ti konmans zalou larises ki Izaak ti annan. (Zen. 26:12-14) Zot ti menm bous bann pwi ki Izaak ti servi pour donn delo son bann zannimo. (Zen. 26:15, 16, 27) Parey bann Filisten, serten dimoun ozordi i zalou bann dimoun ki annan plis keksoz materyel ki zot. Zot pa zis anvi keksoz lezot me zot osi pa anvi ki sa dimoun i annan sa bann keksoz.

5. Akoz bann sef relizye ti zalou Zezi?

5 Ler en dimoun i ganny apresye. Bann sef relizye Zwif ti zalou Zezi akoz en kantite dimoun ti pli apresye li. (Mat. 7:28, 29) Zezi ti reprezantan Bondye e i ti pe ansenny laverite. Kantmenm sa, bann sef relizye ti fann bann rimer pour sali repitasyon Zezi. (Mark 15:10; Zan 11:47, 48; 12:12, 13, 19) Ki leson nou kapab aprann avek sa resi? Nou bezwen lalit avek sa tandans pour zalou bann ki annan bann kalite ki fer bann frer ek ser dan kongregasyon kontan zot. Nou osi devret esey imit zot bann bon kalite.​—1 Kor. 11:1; 3 Zan 11.

6. Ki mannyer Dyotref ti montre ki i ti zalou?

6 Ler en dimoun i ganny bann responsabilite dan kongregasyon. Dan premye syek, Dyotref ti zalou bann ki ti pe diriz kongregasyon Kretyen. I ti anvi “premye plas” dan kongregasyon alor i ti fann rimer e rod fason pour sali repitasyon zapot Zan ek lezot frer ki ti annan responsabilite. (3 Zan 9, 10) Menm si nou pa pou zanmen fer parey Dyotref, nou osi nou kapab konmans zalou en frer oubyen ser ki’n ganny en responsabilite ki nou ti pou’n kontan gannyen. Nou kapab santi koumsa espesyalman si nou krwar ki nou ti kapab desarz sa responsabilite parey sa lot dimoun ouswa menm pli byen ki li.

Nou leker i parey later e nou bann bon kalite i parey bann zoli fler. Me zalouzi i parey en plant anpwazonnen. Zalouzi oubyen groker i kapab anpes nou devlop bann bon kalite parey lanmour, konpasyon ek labonte (Vwar paragraf 7)

7. Ki lefe zalouzi i kapab annan lo nou?

7 Zalouzi i parey en move zerb ki anpwazonnen. Enn fwa in pran rasin dan nou leker, i kapab difisil pour derasin li konpletman. Ler en dimoun i mazin zis son prop lekor e i orgeye, sa i kapab fer li vin pli zalou. Zis parey en move zerb i kapab anpes en fler pouse, zalouzi i kapab anpes nou devlop bann kalite parey lanmour, konpasyon ek labonte. Dek ki nou santi ki nou konmans zalou, nou bezwen derasin sa move santiman dan nou leker. Ki mannyer nou kapab lalit avek zalouzi?

DEVLOP LIMILITE E KONTANT NOU AVEK SA KI NOU ANNAN

Ki mannyer nou kapab lalit avek zalouzi oubyen groker, ki parey bann move zerb? Avek led lespri sen Bondye, nou kapab derasin sa bann santiman, ranplas zot avek limilite e kontant nou avek sa ki nou annan (Vwar paragraf 8-9)

8. Ki bann kalite ki pou ed nou lalit avek zalouzi?

8 Nou kapab lalit avek zalouzi par devlop limilite e kontant nou avek sa nou annan. Ler nou annan sa bann bon kalite i pou napa plas pour zalouzi. Limilite pou anpes nou annan en gran lopinyon lo nou lekor. En dimoun ki annan limilite pa santi ki i merit plis ki lezot. (Gal. 6:3, 4) En dimoun ki kontant li oubyen ki satisfe avek sa ki i annan pa konpar li avek lezot. (1 Tim. 6:7, 8) Ler en dimoun ki annan limilite e ki kontant li avek sa ki i annan i vwar en lot dimoun ganny en bon keksoz, i kontan pour sa dimoun.

9. Dapre Galat 5:16 ek Filipyen 2:3, 4, ki lespri sen pou ed nou fer?

 9 Pour nou pa zalou nou bezwen led lespri sen Bondye. Nou osi bezwen led lespri sen pour nou kapab devlop limilite e kontant nou avek sa ki nou annan. (Lir Galat 5:16; Filipyen 2:3, 4.) Lespri sen Zeova i kapab ed nou egzamin nou bann panse pli profon e rezon akoz nou fer keksoz. Avek led Bondye, nou kapab ranplas sa bann move panse avek bann panse ankourazan. (Ps. 26:2; 51:10) Annou vwar legzanp Moiz ek Pol, bann zonm ki ti reisi lalit avek zalouzi.

En zenn Izraelit i tay kot Moiz ek Zozye pour dir zot ki de ansyen ki pa ti’n vin kot tabernak ti pe profetize. Zozye i demann Moiz pour anpes sa de ansyen profetize me Moiz i refize. O kontrer, i dir Zozye ki i kontan ki Zeova in donn sa de ansyen lespri sen (Vwar paragraf 10)

10. Ki sityasyon ki ti’n kapab teste Moiz? (Vwar portre lo kouvertir.)

10 Moiz ti annan bokou lotorite lo pep Bondye me i pa ti esey anpes lezot annan sa menm privilez. Par egzanp, en zour Zeova ti pran en pe lespri sen ki ti lo Moiz e i ti donn en group Izraelit ki ti pe debout o bor latant oubyen tabernak. Pa bokou letan apre, Moiz ti tande ki de ansyen ki pa ti’n vin kot tabernak, ti’n osi ganny lespri sen e zot ti’n konmans profetize. Ki Moiz ti fer ler Zozye ti demann li pour anpes sa de ansyen profetize? Moiz pa ti zalou akoz sa latansyon ki Zeova ti pe donn sa de zonm. O kontrer, i ti demontre limilite e i ti kontan pour zot akoz zot ti kapab profetize. (Nom. 11:24-29) Ki leson nou aprann avek Moiz?

Ki mannyer bann ansyen i kapab demontre limilite parey Moiz? (Vwar paragraf 11-12) *

11. Ki mannyer bann ansyen i kapab swiv legzanp Moiz?

11 Si ou en ansyen, eski ou’n deza ganny demande pour form en dimoun pour okip en responsabilite dan kongregasyon ki ou vreman kontan? Par egzanp, i kapab ki ou kontan sa responsabilite pour kondwir letid Latour Veyer sak semenn. Me si ou annan limilite parey Moiz, ou pa pou santi ki ou pou vin mwen enportan si ou’n ganny demande pour form en lot frer pour li okip sa responsabilite byen. O kontrer, ou pou kontan pour ed ou frer.

12. Ki mannyer plizyer frer ek ser pe montre ki zot kontant zot avek sa ki zot annan e ki zot annan limilite?

12 Annou vwar en lot sityasyon ki plizyer frer aze pe fer fas avek. Pour plizyer lannen, zot in servi konman kordinater konsey ansyen. Me ler zot ganny 80 an, zot pare pour pas sa responsabilite avek en lot frer. Bann sirveyan rezyonal ki’n ganny 70 an, i pare pour pas sa responsabilite e aksepte lezot form servis. Tou resaman, plizyer Betelit partou dan lemonn in konmans zot nouvo servis dan teritwar. Sa bann frer ek ser fidel pa gard rankin avek bann ki pe aprezan okip sa responsabilite ki zot ti annan avan.

13. Akoz zapot Pol ti’n kapab ganny tante pour zalou sa 12 zapot?

13 Zapot Pol i en lot bon legzanp en dimoun ki ti demontre limilite e ki ti kontant li avek sa ki i annan. Pol pa ti permet ki zalouzi i devlope dan li. I ti travay dir dan predikasyon me avek limilite i ti dir: “Mon pli pti parmi tou bann zapot e mon pa merite ganny apele zapot.” (1 Kor. 15:9, 10) Sa 12 zapot ti swiv Zezi pandan son minister lo later me Pol ti vin en Kretyen apre lanmor ek rezireksyon Zezi. Menm si apre i ti ganny apwente konman “zapot pour bann nasyon,” Pol pa ti zanmen form parti sa 12 zapot. (Rom. 11:13; Akt 1:21-26) Pol pa ti zalou sa 12 zapot ek sa lanmitye pros ki zot ti annan avek Zezi. O kontrer, i ti kontant li avek sa ki i ti annan.

14. Ki nou pou fer si nou annan limilite e nou kontant nou avek sa ki nou annan?

 14 Si nou annan limilite e nou kontant nou avek sa ki nou annan, nou pou fer parey Pol e nou pou demontre respe pour bann ki Zeova in donn lotorite. (Akt 21:20-26) Zeova in fer sir ki i annan bann ansyen pour diriz kongregasyon Kretyen. Menm si zot enparfe, Zeova i konsider sa “bann zonm konman kado.” (Efe. 4:8, 11) Ler nou demontre respe pour sa bann zonm ki Bondye in apwente e avek limilite nou swiv zot gidans, nou reste pros avek Zeova e i pou annan lape parmi nou bann frer ek ser.

“ROD BANN KEKSOZ KI PROMOT LAPE”

15. Ki nou bezwen fer?

15 Si nou zalou lezot ouswa si lezot i zalou nou, nou pa pou anpe avek kanmarad. Nou bezwen derasin okenn santiman zalouzi oubyen groker ki dan nou leker e evite fer keksoz ki pou fer lezot devlop sa bann santiman. Nou bezwen fer sa bann keksoz enportan pour nou kapab obei lord Zeova pour “rod bann keksoz ki promot lape e bann keksoz ki batir kanmarad.” (Rom. 14:19) Ki nou kapab fer pour ed lezot lalit avek zalouzi e promot lape?

16. Ki mannyer nou kapab ed lezot lalit avek zalouzi?

16 Nou latitid ek nou aksyon i kapab annan en gran lenfliyans lo lezot. Lemonn i anvi nou “demonstre” akoz bann keksoz ki nou annan. (1 Zan 2:16) Me sa kalite latitid i fer dimoun zalou. Nou kapab  evite fer lezot vin groker si nou pa toultan koz lo bann keksoz ki nou annan oubyen koz lo sa ki nou pe mazin pour aste. En lot fason ki nou kapab evite fer lezot vin groker i par lafason ki nou azir ler nou annan bann privilez dan kongregasyon. Si nou kontinyen koz lo sa bann privilez ki nou annan, i kapab ki nou pe fer lezot vin groker. De lot kote, ler nou demontre en lentere senser dan lezot e rekonnet ki zot pe fer bann bon keksoz, nou ed zot pour kontant zot avek sa ki zot annan e nou promot linite ek lape dan kongregasyon.

17. Ki bann frer Zozef ti arive fer e akoz?

17 Nou kapab evite vin groker! Annou vwar ankor enn fwa legzanp bann frer Zozef. Plizyer lannen apre ki zot ti’n mal fer avek Zozef, zot ti zwenn li Lezip. Avan ki Zozef ti revel son vre lidantite avek son bann frer, i ti teste zot pour vwar si zot ti’n sanze. I ti organiz en repa avek zot kot i ti donn son pli zenn frer, Benzamen plis latansyon ki lezot. (Zen. 43:33, 34) Me i napa nanryen ki montre ki son bann frer ti zalou Benzamen. O kontrer, zot ti vreman enkyet pour zot frer e pour zot papa, Zakob. (Zen. 44:30-34) Vi ki bann frer Zozef ti nepli zalou, zot ti kapab fer ki i annan lape dan zot fanmir ankor. (Zen. 45:4, 15) Pareyman, si nou derasin okenn santiman zalouzi dan nou, nou pou ede gard lape dan nou fanmir ek kongregasyon.

18. Dapre Zak 3:17, 18, ki pou arive si nou ede promot lape?

18 Zeova i anvi ki nou lalit avek zalouzi e promot lape. Nou devret fer bokou zefor pour fer sa de keksoz. Parey nou’n vwar dan sa lartik, nou annan sa tandans pour zalou oubyen groker. (Zak 4:5) Nou pe viv dan en lemonn ki ankouraz dimoun pour vin groker. Me si nou devlop limilite, demontre lapresyasyon e kontant nou avek sa ki nou annan, nou pa pou vin groker. O kontrer, nou pou ede promot lape pour nou kapab devlop bann bon kalite.​—Lir Zak 3:17, 18.

KANTIK 130 Aprann pardonnen

^ par. 5 Dan lorganizasyon Zeova i annan lape. Me si nou konmans groker oubyen zalou, sa i kapab fer ki i pou nepli annan lape parmi nou. Dan sa lartik, nou pou vwar kwa ki kapab fer en dimoun groker oubyen zalou. Nou pou osi vwar ki mannyer nou kapab lalit avek sa move tandans e ki mannyer nou kapab promot lape.

^ par. 2 KI SA I VEDIR? Dan sa lartik, groker oubyen zalouzi pe refer avek bann santiman ki kapab fer en dimoun ay son prosen. Parey Labib i montre, sa i kapab fer en dimoun pa zis anvi sa ki lezot i annan me osi anpes lezot servi zot prop keksoz.

^ par. 61 LEKSPLIKASYON PORTRE: Pandan en renyon konsey ansyen, en frer pli aze ki kondwir letid Latour Veyer, i ganny demande pour form en zenn ansyen pour pran sa responsabilite. Menm si sa frer pli aze i kontan son privilez, i kontan pour siport desizyon bann ansyen e donn sa zenn frer bann sizesyon pratik e felisit li senserman.