Skip to content

Al lo konteni

 BIOGRAFI

Mon ti ganny benediksyon Zeova akoz mon ti swiv bann bon legzanp

Mon ti ganny benediksyon Zeova akoz mon ti swiv bann bon legzanp

LER mon ti ankor zenn, mon ti vwar li difisil pour anons sa bon nouvel. Anmezir mon ti pe grandi, mon ti ganny demande pour fer bann keksoz ki mon ti krwar mon pa kapab fer. Alor les mwan rakont ou konsernan bann bon legzanp ki’n ed mwan sirmont mon lafreyer e ki’n ed mwan apresye bann zoli benediksyon ki mon’n gannyen pandan sa 58 an ki mon’n dan servis a plen tan.

Mon ti ne dan Lavil Quebec, dan provens Quebec, Kanada. Dan sa provens, dimoun i koz Franse. Mon paran, Louis ek Zélia ti vreman bann bon paran e zot ti kontan mwan. Mon papa ti en dimoun timid e i ti kontan lir. Mon ti kontan ekri e mon ti anvi vin en zournalis en zour.

Ler mon ti annan apepre 12 an, Rodolphe Soucy, en msye ki ti travay avek mon papa, ti vin vizit nou lakour avek en zanmi. Zot ti Temwen Zeova. Mon pa ti konn gran keksoz lo Temwen Zeova e mon pa ti vreman enterese dan zot larelizyon. Kantmenm sa, mon ti enpresyonnen avek lafason ki zot ti reponn nou bann kestyon an servan Labib. Mon paran osi ti enpresyonnen, alor nou ti aksepte pour etidye Labib.

Sa letan, mon ti dan en lekol Katolik. Par ler, mon ti koz avek mon bann kanmarad lekol lo sa ki mon ti pe aprann dan mon letid Labib. Me avek letan, bann ansenyan ki ti bann pret ti tann konsernan nou bann konversasyon. Dan plas servi Labib pour montre ki sa ki mon ti pe dir pa vre, enn ant zot ti dir devan laklas ki mon en rebel. Menm si sa sityasyon ti difisil pour mwan, i ti anmenn bann bon rezilta parski i ti ed mwan vwar ki sa ki zot ti pe ansennyen konsernan Bondye pa ti annakor avek sa ki Labib i dir. Mon ti realize ki mon pa ti devret dan sa lekol. Avek permisyon mon paran, mon ti sanz lekol.

MON TI APRANN POUR KONTAN PREDIKASYON

Mon ti kontinyen etidye Labib me mon pa ti pe fer bokou progre parski mon ti per pour  anons sa bon nouvel kazankaz. Legliz Katolik ti vreman annan en gran lenfliyans e zot ti opoz sa travay predikasyon. Maurice Duplessis, ki ti premye minis Quebec ti travay vreman pros avek legliz. I ti ankouraz bann dimoun pour menas e menm atak Temwen Zeova. Sa letan, Temwen Zeova ti bezwen annan bokou kouraz pour kapab anons sa bon nouvel.

En frer ki apel John Rae, ki ti’n asiste nevyenm laklas Lekol Gilead ti ed mwan sirmont mon lafreyer. John ti annan bokou leksperyans, i ti dous, annan limilite e abordab. I rar ki i ti donn mwan konsey me mon ti aprann en kantite avek son bon legzanp. I ti vreman difisil pour John koz Franse, alor souvandfwa mon ti akonpanny li dan predikasyon e ed li avek sa langaz. Sa letan ki mon ti pase avek John ti ed mwan pour finalman deside vin en Temwen Zeova. Mon ti batize le 26 Me 1951, di-z-an apre ki mon ti’n zwenn Temwen Zeova.

Bon legzanp John Rae (A) in ed mwan (B) pour sirmont mon lafreyer pour anons sa bon nouvel kazankaz

Laplipar frer ek ser dan nou pti kongregasyon dan Lavil Quebec, ti pionye. Zot bon legzanp ti motiv mwan pour fer pionye. Vi ki nou pa ti servi bann piblikasyon dan predikasyon, nou ti bezwen aprann servi pli byen Labib. Alor, mon ti esey aprann bann verse Labib ki ti pou ed mwan defann laverite. Par kont, en kantite dimoun ti refize lir okenn versyon Labib ki pa ti’n ganny aprouve par Legliz Katolik.

An 1952, mon ti marye avek en ser fidel ki ti apel Simone Patry. Nou ti al reste Montreal e enn an apre nou ti ganny nou fiy Lise. Menm si mon ti’n aret fer pionye pa bokou letan avan ki nou ti marye, nou de Simone, nou ti esey viv en lavi senp pour nou kapab fer otan ki nou kapab dan bann aktivite kongregasyon konman en fanmir.

Di-z-an ti pase avan ki mon ti konmans reflesir seryezman lo fer pionye. An 1962, ler mon ti pe asiste Lekol Minister Rwayonm pour bann ansyen kot Betel Kanada ki ti ganny fer pour en mwan, mon ti reste dan en lasanm avek en frer ki apel Camille Ouellette. Camille ti devoue pour predikasyon e sa ti enpresyonn mwan vi ki i ti’n marye e annan zanfan. Sa letan, pa bokou frer ek ser Quebec ki ti pe fer pionye e an menm tan pe elve en zanfan. Sanmenm ki Camille ti esey fer. Pandan sa letan ki nou ti pase ansanm, i ti ankouraz mwan pour reflesir lo mon sityasyon. Zis detrwa  mwan apre, mon ti realize ki mon ti kapab repran servis pionye. Serten ti panse ki sa pa ti en bon desizyon me mon ti repran servis pionye, akoz mon ti asire ki Zeova ti pou ed mwan fer plis dan predikasyon.

NOU TI RETOURN LAVIL QUEBEC KONMAN PIONYE SPESYAL

An 1964, nou de Simone nou ti ganny apwente konman pionye spesyal dan Lavil Quebec kot nou ti grandi e laba nou ti servi pour plizyer lannen. Sa letan, i ti annan mwens lopozisyon ki avan me i ti ankor annan dimoun ki ti opoz nou.

En Sanmdi apremidi, lapolis ti aret mwan dan en pti lavil ki apel Sainte-Marie, ki pa lwen avek Lavil Quebec. En gard ti anmenn mwan kot stasyon lapolis e i ti met mwan dan kaso akoz mon ti pe anons sa bon nouvel kazankaz san en permi. Pli tar mon ti ganny anmennen devan ziz Baillargeon, en zonm ki vreman fer per. I ti demann mwan lekel ki pou vin mon avoka. Ler mon ti dir sa ziz ki Glen How, * en frer ki ti en avoka byen koni ki ti pou reprezant mwan, i ti dir: “Ar wi! Pa sa enn!” Sa letan bokou dimoun ti konn Glen How konman en bon avoka ki’n ede defann Temwen Zeova. Pa lontan apre, lakour ti enform mwan ki tou sarz kont mwan ti’n ganny tire.

Vi ki dimoun ti opoz nou travay Quebec, i ti vreman difisil pour trouv en bon landrwa lwe pour fer nou bann renyon. Nou pti kongregasyon ti ganny zis en vye garaz ki napa sofaz. Vi ki i ti fer fre pandan liver, bann frer ti servi en oil heater pour sof sa landrwa. Souvandfwa nou ti rasanble otour sa oil heater avan renyon pour koz lo bann leksperyans ankourazan.

I gou pour vwar bann bon rezilta ki sa travay predikasyon in anmennen pandan sa bann dernyen lannen. Pandan bann lannen 1960, i ti annan zis detrwa pti kongregasyon dan zanmirant Lavil Quebec, dan rezyon Côte-Nord e dan Gaspé Peninsula. Ozordi, i annan bokou plis frer ek ser dan sa bann rezyon e zot zwenn dan bann zoli Lasal Rwayonm.

NOU TI GANNY DEMANDE POUR VIZIT BANN KONGREGASYON

An 1977, mon ti asiste en lekol pour bann sirveyan rezyonal ek distrik ki ti ganny fer Toronto, Kanada

An 1970, mon ti ganny demande pour servi konman sirveyan rezyonal. Apre, an 1973, mon ti ganny apwente konman sirveyan distrik. Pandan sa bann lannen, mon ti aprann en kantite avek bann frer matir parey Laurier Saumur * ek David Splane, * de frer ki ti pe servi konman sirveyan. Apre sak lasanble, nou de David, nou ti donn kanmarad bann sizesyon lo ki mannyer pour amelyor nou fason ansennyen. Mon rapel enn fwa David ti dir mwan: “Léonce, mon ti kontan ou dernyen diskour. I ti byen, me mon ti pou’n kapab fer trwa diskour avek tou sa lenformasyon!” Mon ti tant pour met tro bokou lenformasyon dan  mon bann diskour alor mon ti bezwen aprann pour evite fer sa.

Mon’n servi dan plizyer lavil dan les Kanada

Bann sirveyan distrik ti ganny apwente pour ankouraz bann sirveyan rezyonal. Par kont, en kantite proklanmater Quebec ti konn mwan byen. Souvandfwa, zot ti anvi travay avek mwan dan predikasyon ler mon ti pe vizit bann sirveyan rezyonal. Mon ti kontan pour travay avek zot dan predikasyon, me mon pa ti pe pas ase letan avek sirveyan rezyonal. En fwa, en sirveyan rezyonal ti dir mwan zantiman: “I byen ki ou pas letan avek bann frer ek ser me pa oubliye ki ou’n vin isi pour vizit mwan. Mwan osi mon bezwen lankourazman!” Mon ti aprann en kantite avek sa bon konsey.

Malerezman, an 1976 en move keksoz ki mon pa ti pe ekspekte ti arive. Mon madanm, Simone, ti tonm malad e i ti mor. I ti en bon madanm parski i pa ti egois e i ti kontan Zeova en kantite. Vi ki mon ti pas bokou letan dan predikasyon, sa ti ed mwan pour sirmont mon sagrinasyon e mon remersye Zeova pour son sipor pandan sa letan difisil. Pli tar, mon ti marye avek Carolyn Elliott, en pionye byen devoue ki koz Angle. Carolyn ti’n vin servi Quebec kot i ti annan en gran bezwen. Carolyn i abordab e i vreman enterese avek lezot, espesyalman bann ki timid ouswa tousel. I ti ed mwan en kantite dan mon servis konman sirveyan distrik.

EN LANNEN VREMAN ENPORTAN

An Zanvye 1978, mon ti ganny demande pour vin en formater pour premye Lekol Pionye ki ti ganny fer Quebec. Mon ti vreman per akoz mon pa’n zanmen asiste sa lekol, ni menm vwar sa liv ki zot servi. Tou keksoz ti nouvo pour mwan parey i ti ete pour sa bann zelev. Granmersi dan sa premye laklas i ti annan bokou pionye eksperyanse. Menm si mon ti formater, mon ti aprann en kantite avek bann zelev.

Pli tar an 1978, lasanble enternasyonal ki annan pour tit “Victorious Faith” ti ganny fer dan Stad Olenpik Montreal. I ti sa pli gran  lasanble ki’n deza ganny fer Quebec e i ti annan plis ki 80,000 dimoun ki ti asiste. Mon ti ganny demande pour koz avek bann zournalis konsernan sa lasanble e mon ti vreman kontan pour vwar ki zot ti ekri bann bon keksoz lo nou. Zot ti fer bann entervyou avek nou lo radyo ek televizyon e sa bann progranm ti dire pour plis ki 20 erdtan. Zot ti osi pibliy plizyer santenn lartik. Sa ti en gran temwannyaz!

EN NOUVO RESPONSABILITE DAN EN LOT TERITWAR

An 1996, i ti annan en gran sanzman dan mon lavi. Depi mon batenm, mon ti’n servi Quebec dan teritwar kot dimoun i koz Franse e aprezan mon ti ganny demande pour al servi Toronto, en landrwa kot dimoun i koz Angle. Mon pa ti santi ki mon kalifye e mon ti vreman per pour donn diskour parski mon pa ti konn koz byen Angle. Mon ti bezwen priy pli souvan e depan plis lo Zeova.

Mon ti vreman per avan ki mon ti konmans servi dan sa rezyon me la mon kontan sa de lannen ki mon’n servi dan rezyon Toronto. Carolyn ti demontre bokou pasyans e ed mwan vin pli konfidan pour koz Angle e bann frer ek ser ti siport e ankouraz mwan en kantite. Nou pa ti tarde pour fer en kantite nouvo zanmi.

Mon ti annan bokou keksoz pour prepare avan lasanble me kantmenm sa, souvan mon ti pas apepre enn erdtan dan Vandredi swar pour anons sa bon nouvel kazankaz. Serten ti’n kapab mazinen, ‘Akoz ou al predikasyon zis avan lasanble?’ Me mon ti vwar sa bann konversasyon dan predikasyon vreman ankourazan. Menm ozordi, mon toultan santi mwan pli zwaye apre predikasyon.

An 1998, nou de Carolyn, nou ti ganny anvoye Montreal konman pionye spesyal. Pour plizyer lannen, mon ti annan sa responsabilite pour organiz temwannyaz piblik e travay avek medya pour sanz fason ki dimoun i vwar Temwen Zeova. Konmela, nou de Carolyn, nou kontan anons sa bon nouvel avek bann etranze ki’n fek vin reste Kanada e ki souvandfwa zot kontan pour aprann plis lo Labib.

Mwan avek mon madanm, Carolyn

Ler mon mazin sa 68 an ki mon’n batize konman en Temwen Zeova, mon santi ki Zeova in vreman beni mwan. Mon santi mwan vreman ere parski mon’n aprann pour kontan predikasyon e mon’n ed en kantite dimoun pour aprann konn laverite. Mon fiy Lise ek son msye, ti pran servis pionye ordiner apre ki zot zanfan ti’n grandi. Ler mon vwar zot pe kontinyen demontre devouman dan predikasyon, sa i fer mwan vreman kontan. Mon vreman rekonesan pour bann frer ek ser ki’n ed mwan atraver zot bon legzanp ek konsey pour annan en bon lanmitye avek Zeova e pour servi Li dan diferan fason. Mon’n aprann ki sel fason pour nou kapab kontinyen fer sa ki lorganizasyon Zeova i demann nou, i ler nou depan lo lespri sen Zeova. (Ps. 51:11, NWT) Mon kontinyen remersye Zeova parski in donn mwan sa zoli privilez pour loue son non!​—Ps. 54:6.

^ par. 16 Vwar biografi W. Glen How dan Veye! le 22 Avril 2000 an Angle ki annan pour tit The Battle Is Not Yours, but God’s.”

^ par. 20 Vwar biografi Laurier Saumur dan Latour Veyer le 15 Novanm 1976 an Angle ki annan pour tit I Found Something Worth Fighting For.”

^ par. 20 David Splane i en manm lo Konsey Direkter Temwen Zeova.