Skip to content

Al lo konteni

 LARTIK LETID 50

Zeova ki fer ou lib

Zeova ki fer ou lib

“Zot ava . . . proklanm liberasyon pour tou zabitan partou dan pei.”​—LEV. 25:10.

KANTIK 22 Rwayonm pe dirize!

SA KI NOU POU ETIDYE *

1-2. (a) Kisisa en Zibile? (Vwar sa bwat “ Kisisa Zibile?”) (b) Ki Zezi ti koz lo la dan Lik 4:16-18?

DAN serten pei, i annan bann levennman ki ganny fer pour selebre senkantyenm lannen ki en lerwa oubyen larenn in diriz en pei. Bann lafet ki mark sa lannen zibile i kapab al pour en lazournen, en semenn ouswa pli lontan ki sa, me ler lafet i fini, tou sa moman zwaye i ganny oubliye.

2 Tou le 50 an, bann Izraelit dan letan lontan ti osi selebre pour en lannen antye. Sa ti apel en Zibile. Pandan sa lannen Zibile, bann Izraelit ti ganny laliberte. Akoz nou devret aprann konsernan sa Zibile ki bann Izraelit ti selebre? Parski i fer nou rapel en provizyon merveye ki Zeova in fer pour nou. Sa provizyon pou fer ki nou lib pour touzour e nou kapab benefisye avek sa laranzman depi la konmela. Zezi ti koz lo sa laliberte.​—Lir Lik 4:16-18.

Pandan Zibile, bann Izraelit ti vreman zwaye parski bann Izraelit ki ti lesklav ti kapab retourn kot zot fanmir ek zot propriyete (Vwar paragraf 3) *

3. Dapre Levitik 25:8-12, ki byenfe bann Izraelit ti gannyen pandan lannen Zibile?

3 Pour nou kapab konpran pli byen sa ki Zezi ti pe dir ler i ti koz lo liberasyon, annou diskit premyerman lo sa lannen Zibile ki Bondye ti fer pour pep Izrael. Zeova ti dir bann Izraelit: “Zot ava konsakre senkantyenm lannen e zot ava proklanm liberasyon pour tou zabitan partou dan pei. Sa i ava en zibile pour zot: Tou dimoun ava retourn lo zot propriyete e dan zot fanmir.” (Lir Levitik 25:8-12.) Dan sa lartik avan, nou ti vwar byenfe ki bann Izraelit ti gannyen avek Saba ki ti ganny fer tou le semenn. Alor, ki byenfe bann Izraelit ti gannyen pandan  lannen Zibile? Meton en Izraelit ti annan en ta det e i’n bezwen vann son propriyete pour pey son det. Pandan lannen Zibile i ti ganny rann son propriyete. Alor, sa zonm ti kapab “retourn lo [son] propriyete” e pli tar son bann zanfan ti pou erit sa propriyete. De lot kote, i kapab ki en zonm ki annan en gro det ti bezwen vann enn son zanfan oubyen son prop lekor konman lesklav pour pey sa det. Pandan lannen Zibile, en lesklav ti bezwen ‘retourn kot son fanmir.’ Alor, napa en dimoun ki ti pou reste en lesklav tou son lavi san okenn lespwar! Sa laranzman i montre ki Zeova i vreman enterese avek son pep.

4-5. Akoz i enportan pour nou aprann konsernan sa lannen Zibile ki bann Izraelit ti selebre?

4 Ki lot byenfe bann Izraelit ti gannyen pandan lannen Zibile? Zeova ti eksplike: “I pa devre annan okenn pov parmi zot. Annefe, [Zeova] pou sirman beni ou dan sa pei ki [Zeova], ou Bondye pou donn ou koman patrimwann, pour ou pran posesyon.” (Det. 15:4) Sa i vreman diferan avek sa ki pe arive konmela, kot bann ris i vin pli ris e bann pov i vin pli pov!

5 Konman bann Kretyen, nou pa anba Lalwa Moiz. Sa i vedir ki nou pa swiv sa lalwa ki ti liber bann lesklav, kennsel bann det e rann dimoun zot propriyete pandan lannen Zibile. (Rom. 7:4; 10:4; Efe. 2:15) Kantmenm sa, i enportan pour nou aprann konsernan sa lannen Zibile. Akoz? Parski sa laliberte ki nou annan i fer nou rapel sa laranzman ki Zeova ti fer pour bann Izraelit.

ZEZI TI ANNONS MESAZ LALIBERTE

6. Dan ki kalite lesklavaz ki imen i bezwen ganny libere?

6 Nou tou nou bezwen ganny libere parski nou lesklav pese. Vi ki nou fer pese, nou vin vye, malad e nou mor. En kantite dimoun i kapab vwar ki sa i vre, ler zot get dan laglas ouswa ler zot al kot dokter akoz zot malad. Nou osi dekouraze akoz nou fer pese. Zapot Pol ti dir ki i “prizonnyen sa lalwa pese ki dan [son]  lekor.” I ti osi dir: “Pov mwan! Lekel ki pou delivre mwan avek sa lekor ki pe touy mwan?”​—Rom. 7:23, 24.

7. Ki Izai ti predir konsernan laliberte?

7 Nou vreman kontan ki Bondye in fer provizyon pour nou ganny libere avek pese. Zezi i sa enn ki fer li posib pour nou ganny libere avek pese. Plis ki 700 an avan Zezi ti vin lo later, profet Izai ti predir ki pli tar dimoun ti pou annan en pli bon laliberte ki bann Izraelit ti annan pandan lannen Zibile. I ti ekri: “Lespri Senyer [Zeova] i repoz lo mwan, [Zeova] in konsakre mwan; in anvoy mwan anmenn bonn nouvel kot bann ki’n ganny imilye; geri bann leker brize, proklanm delivrans pour bann prizonnyen rann laliberte bann ki dan prizon.” (Iza. 61:1) Sa profesi pe refer avek lekel?

8. Sa profesi konsernan liberasyon i refer avek lekel?

8 Sa profesi enportan konsernan liberasyon ti konmans ganny akonplir apre ki Zezi ti konmans son minister. Ler Zezi ti al dan sinagog Nazaret, lavil kot i ti’n grandi, i ti lir sa profesi dan Izai avek bann Zwif ki ti’n reini dan sa landrwa. Zezi ti dir ki sa bann parol pe refer avek li. Zezi ti dir: “Lespri sen Zeova i lo mwan, akoz i’n swazir mwan pour anons bon nouvel avek bann pov. I’n anvoy mwan pour anons bann lesklav zot liberasyon, pour fer bann aveg vwar kler e pour liber bann ki’n ganny martirize, pour pres lo sa letan kot i posib ganny laprouvasyon Zeova.” (Lik 4:16-19) Ki mannyer Zezi ti akonplir sa profesi?

BANN PREMYE DIMOUN KI TI GANNY LIBERE

Zezi ti anons mesaz laliberte ler i ti dan sinagog Nazaret (Vwar paragraf 8-9)

9. Dan letan Zezi, ki kalite laliberte bokou dimoun ti anvi?

9 Dan letan Zezi, dimoun ti konmans ganny sa laliberte ki Izai ti’n profetize e ki Zezi ti koz lo la dan sinagog. Nou kapab asire ki sa ti arive parski Zezi ti dir: “Ozordi, sa parol dan lekritir ki zot fek tande in ganny akonplir.” (Lik 4:21) I kapab ki bokou dimoun ki ti tann Zezi sa zour ti krwar ki zot ti pou ganny libere avek bann Romen. I tre probab ki zot ti mazin parey sa de zonm ki ti dir: “Nou ti swete ki i ti sa enn ki ti pou delivre Izrael.” (Lik 24:13, 21) Me nou konnen ki Zezi pa ti demann son bann disip pour rebel kont dominasyon bann Romen.  O kontrer, i ti dir zot “rann sa ki pour Sezar avek Sezar.” (Mat. 22:21) Alor, ki mannyer Zezi ti liber bann dimoun sa letan?

10. Ki kalite laliberte Zezi ti donn bann dimoun?

10 Garson Bondye ti vin lo later pour ed dimoun ganny libere dan de fason. Premyerman, Zezi ti ed dimoun pour ganny libere avek fo lansennyman bann sef relizye. En kantite Zwif sa letan ti ganny forse pour swiv bann tradisyon zonm ek bann krwayans. (Mat. 5:31-37; 15:1-11) Bann dimoun ki ti dir ki zot ti pe ed lezot servi Bondye, pa ti pe fer li dan sa bon fason, alor i ti konmsi zot ti aveg. Vi ki zot ti rezet Mesi ek laverite ki i ti ansennyen, zot pa ti konn Bondye. Dan en sans, zot ti reste aveg e zot pese pa ti ganny pardonnen. (Zan 9:1, 14-16, 35-41) Zezi ti montre bann dimoun ki annan limilite ki mannyer zot kapab ganny libere avek bann fo lansennyman. I ti fer sa atraver son bann bon lansennyman ek legzanp.​—Mark 1:22; 2:23–3:5.

11. Dan ki lot fason Zezi ti donn laliberte?

11 Dezyenmman, Zezi ti fer li posib pour limanite ganny libere dan lesklavaz pese. Vi ki Zezi ti donn son lavi konman en ranson, Bondye i kapab pardonn tou bann ki demontre lafwa e ki aksepte sa ranson. (Ebr. 10:12-18) Zezi ti dir: “Si Garson i liber zot, zot pou vreman lib.” (Zan 8:36) San dout sa laliberte ti pli meyer ki sa ki en Izraelit ti’n kapab gannyen pandan lannen Zibile! Par egzanp, en zonm ki ti ganny libere pandan lannen Zibile ti kapab revin en lesklav e apre i ti pou mor. Me laliberte ki Zezi i donnen pou dire pour touzour.

12. Lekel ki ti premye pour ganny sa laliberte ki Zezi ti koz lo la?

12 Zour Lapannkot lannen 33, Zeova ti servi son lespri sen pour swazir bann zapot ek lezot zonm ek fanm fidel. I ti adopte zot konman son bann garson pour zot a lavenir ganny resisite dan lesyel pour dirize ansanm avek Zezi. (Rom. 8:2, 15-17) Zot ti premye pour ganny sa laliberte ki Zezi ti koz lo la dan sinagog Nazaret. Sa bann zonm ek fanm ti nepli lesklav fo lansennyman bann sef relizye Zwif ek zot bann pratik ki pa ti sorti dan Parol Bondye. Pour Bondye i ti konmsi zot ti’n fini ganny libere avek pese ki anmenn lanmor. Sa provizyon ki  Zeova in met an plas pour fer bann imen lib, ti konmans Lapannkot lannen 33 ler I ti swazir bann disip Zezi e i pou fini a lafen Renny Mil an Zezi. Ki bon keksoz ki pou arive pandan sa letan?

ANKOR PLIZYER MILYON DIMOUN POU GANNY LIBERE

13-14. Apard ki bann Kretyen swazir, lekel ankor ki kapab ganny sa laliberte ki Zezi ti koz lo la?

13 Ozordi, plizyer milyon dimoun senser sorti dan tou nasyon i bann “lezot mouton.” (Zan 10:16) Bondye pa’n swazir zot pour dirize ansanm avek Zezi dan lesyel. O kontrer, Labib i dir ki zot annan sa posibilite pour viv pour touzour lo later. Eski ou annan sa lespwar?

14 Depi la konmela ou kapab ganny serten byenfe parey bann Kretyen swazir. Vi ki ou annan lafwa dan sakrifis Zezi, ou kapab demann Zeova pour pardonn ou pese. Sa i fer ou ganny laprouvasyon Bondye e ou pou annan en konsyans kler. (Efe. 1:7; Rev. 7:14, 15) Mazin osi lo bann benediksyon ki ou annan akoz ou’n ganny libere avek bann fo lansennyman. Zezi ti dir: “Zot pou konn laverite e laverite pou fer zot lib.” (Zan 8:32) Nou vreman kontan pour annan sa laliberte!

15. Ki laliberte ek benediksyon nou kapab ekspekte a lavenir?

15 Ou kapab ekspekte ki nou pou annan plis laliberte dan lavenir. Tre byento,  Zezi pou detri tou fo larelizyon ek bann gouvernman imen koronpi. Bondye pou protez “en gran lafoul” dimoun ki pe servi li e apre i pou permet zot ganny bann benediksyon dan paradi lo later. (Rev. 7:9, 14) Sa letan, en kantite dimoun pou ganny resisite. Bann ki swazir pour servi Zeova pa pou malad, vin vye oubyen mor.​—Akt 24:15.

16. Ki laliberte merveye bann imen pou gannyen a lavenir?

16 Pandan Renny Mil an Kris, Zezi ansanm avek bann ki pou dirize avek li, pou ed bann imen annan en lasante parfe ek en lanmitye parfe avek Bondye. Zis parey bann Izraelit ti ganny laliberte pandan lannen Zibile, bann imen pou ganny en pli gran laliberte pandan Renny Mil an Kris. Sa pou vedir ki tou dimoun ki servi Zeova fidelman pou vin parfe e zot pa pou fer pese ankor.

Dan nouvo lemonn, nou pou kontan pour fer bann travay itil e satisfezan (Vwar paragraf 17)

17. Dapre Izai 65:21-23, ki pou arive avek pep Bondye? (Vwar portre lo kouvertir.)

17 Lir Izai 65:21-23. Sa bann verse i montre ki mannyer lavi pou ete lo later a lavenir. Nou pa pou pares e nanryen fer. O kontrer, Labib i montre ki sa letan pep Bondye pou fer bann travay itil e satisfezan. A lafen Renny Mil an Kris, nou kapab asire ki “kreasyon [pou] osi ganny libere dan lesklavaz pese ek lanmor e ganny laglwar ek laliberte bann zanfan Bondye.”​—Rom. 8:21.

18. Akoz nou kapab asire ki nou pou annan en lavenir merveye?

18 Dan letan bann Izraelit, Zeova ti fer sa laranzman Saba pour son pep kapab repoze e fer bann keksoz spirityel. Pandan Renny Mil an Kris, nou osi nou pou fer parey. Nou pou annan letan pour ador Bondye parski sa i vreman enportan e i fer nou ere. Tou imen ki fidel pou ere pandan Renny Mil an Kris akoz nou tou nou pou annan en bon travay e nou tou nou pou servi Bondye.

KANTIK 142 Tenir for nou lespwar

^ par. 5 Zeova ti fer provizyon pour bann Izraelit ganny libere. Sa ti ariv pandan lannen Zibile. Ozordi, bann Kretyen pa bezwen obei Lalwa Moiz, me i enportan pour nou aprann konsernan lannen Zibile. Dan sa lartik, nou pou vwar ki mannyer lannen Zibile ki bann Izraelit ti selebre i fer nou mazin en keksoz ki Zeova in fer pour nou e ki mannyer sa i kapab benefisye nou.

^ par. 61 LESPLIKASYON PORTRE: Pandan Zibile, bann zonm ki ti lesklav ti ganny large e zot ti kapab retourn kot zot fanmir ek zot propriyete.