Skip to content

Al lo konteni

Servi Zeova, sa Bondye laliberte

Servi Zeova, sa Bondye laliberte

“Kot lespri sen Zeova i ete, i annan laliberte.”​—2 KORENTYEN 3:17.

KANTIK: 49, 73

1, 2. (a) Akoz lesklavaz ek laliberte ti bann size enportan dan lepok zapot Pol? (b) Lekel ki Pol ti dir i Sours vre laliberte?

BANN Kretyen dan premye syek ti reste dan Lanpir Romen, kot dimoun ti vreman fyer pour zot bann lalwa, sistenm zidisyer e sa laliberte ki zot ti annan. Kantmenm sa, sa lanpir pwisan ti depan lo bann lesklav pour fer laplipar zot bann travay pli dir. A en serten moman, apepre 1 dan 3 dimoun dan Lanpir Romen ti en lesklav. Byensir, lesklavaz ek laliberte ti bann size enportan pour bann dimoun ordiner, enkli bann Kretyen.

2 Souvandfwa zapot Pol ti ekri lo laliberte. Me i pa ti pe esey rezourd bann problenm sa lemonn, ki en kantite dimoun sa letan ti anvi fer. O kontrer, Pol ek son bann frer ek ser Kretyen ti travay dir pour ansenny dimoun sa bon nouvel lo Rwayonm Bondye e pour ed zot konpran valer sakrifis Zezi. Pol ti dir son bann frer ek ser Kretyen kote pour trouv Sours vre laliberte. I ti  ekri: “Zeova i en Lespri e kot lespri sen Zeova i ete, i annan laliberte.”​—2 Korentyen 3:17.

3, 4. (a) Ki Pol ti koz lo la dan bann verse avan 2 Korentyen 3:17? (b) Ki nou bezwen fer pour annan laliberte ki sorti kot Zeova?

3 Dan son dezyenm let pour bann Korentyen, Pol ti mansyonn sa ki ti arive avek Moiz ler i ti desann sorti lo Montanny Sinai apre ki i ti’n dan prezans lanz Zeova. Son figir ti pe briye! Ler bann Izraelit ti vwar Moiz, zot ti per, alor i ti kouver son figir avek en vwal. (Egzod 34:29, 30, 33; 2 Korentyen 3:7, 13) Pol ti eksplike: “Me ler en dimoun i retourn ver Zeova, sa vwal i ganny tire.” (2 Korentyen 3:16) Ki Pol ti pe esey dir?

4 Dan sa lartik avan, nou’n aprann ki Zeova, Kreater tou keksoz, i sa sel Personnaz ki annan laliberte total. Alor i fer sans ki i annan laliberte dan prezans Zeova e “kot lespri sen Zeova i ete.” Me Pol ti dir ki si nou anvi annan sa laliberte nou bezwen retourn ver Zeova. Sa i vedir ki nou bezwen annan en bon relasyon avek li. Bann Izraelit dan dezer ti vwar keksoz dapre pwennvi imen, non pa dapre pwennvi Zeova. I ti konmsi zot ti annan en vwal lo zot lespri ek leker. Zot ti anvi servi zot nouvo laliberte pour satisfer zot prop dezir.​—Ebre 3:8-10.

Menm en dimoun ki dan prizon i kapab annan laliberte

5. (a) Ki kalite laliberte lespri sen Zeova i donnen? (b) Ki mannyer nou konnen ki menm en lesklav ouswa en prizonnyen i kapab annan sa laliberte ki Zeova i donnen? (c) Ki bann kestyon nou bezwen reponn?

5 Sa laliberte ki lespri sen Zeova i donnen i plis ki sa laliberte ki en lesklav i gannyen ler i ganny libere. Lespri sen i anmenn bokou plis laliberte ki bann imen i kapab donnen. Lespri sen i kapab liber nou dan lesklavaz pese ek lanmor e lesklavaz fo larelizyon ek son bann koutim. (Romen 6:23; 8:2) Pa sa i en laliberte merveye! Menm en dimoun ki en lesklav ouswa ki dan prizon i kapab annan sa kalite laliberte. (Zenez 39:20-23) Ser Nancy Yuen ek Frer Harold King ti ganny met dan prizon pour plizyer lannen akoz zot lafwa, me sa pa ti fer zot perdi sa kalite laliberte. Ou kapab get zot pe koz lo zot leksperyans lo JW Broadcasting. (Get anba INTERVIEWS AND EXPERIENCES > ENDURING TRIALS.) Aprezan annou reponn de kestyon. Ki mannyer nou kapab prouve ki nou laliberte i vreman presye pour nou? Ki mannyer nou kapab servi nou laliberte dan en fason ki saz?

SA LALIBERTE KI BONDYE I DONN NOU I VREMAN PRESYE

6. Ki mannyer bann Izraelit ti montre ki zot pa ti rekonesan pour sa laliberte ki Zeova ti’n donn zot?

6 Ler nou ganny en kado presye, nou rekonesan anver sa dimoun ki’n donn nou sa kado. Me bann Izraelit pa ti  rekonesan pour sa laliberte ki Zeova ti donn zot. Zis detrwa mwan apre ki Zeova ti liber zot Lezip, zot ti konmans annan lanvi pour bann manze ek bwar ki zot ti gannyen Lezip. Zot ti konplent konsernan sa lamann ki Zeova ti pe donn zot pour manze. Zot ti menm anvi retourn Lezip! Pour zot, ‘pwason, kokonm, melon, pwaro, zonnyon ek lay’ ti pli enportan ki sa laliberte ki Zeova ti’n donn zot pour ador li. I pa drol alor ki Zeova ti pran en gran lakoler avek zot. (Nonm 11:5, 6, 10; 14:3, 4) Sa i ansenny nou en leson enportan.

7. Ki mannyer Pol ti aplik son prop konsey ki dan 2 Korentyen 6:1 e ki mannyer nou kapab fer parey?

7 Pol ti averti tou bann Kretyen pour pa perdi zot rekonesans pour sa laliberte ki Zeova in donnen atraver son garson, Zezi Kri. (Lir 2 Korentyen 6:1.) Pol ti enparfe, i ti en lesklav pese ek lanmor e sa ti fer li santi li mal. Kantmenm sa i ti dir: “Gran mersi Bondye gras a Zezi Kri nou Senyer!” Akoz i ti dir sa? Pol ti eksplik son bann frer ek ser Kretyen: “Parski lalwa lespri sen ki donn lavi bann ki ini avek Kris in liber ou avek lalwa pese ek lanmor.” (Romen 7:24, 25; 8:2) Parey Pol, nou pa devret zanmen oubliye ki Zeova in liber nou dan lesklavaz pese ek lanmor. Ranson i fer li posib pour nou servi nou Bondye avek en konsyans kler e sa i donn nou vre lazwa.​—Psonm 40:8.

Eski ou pe servi ou laliberte pour swazir pour fer sa ki Zeova i oule ouswa pour fer sa ki ou oule? (Vwar paragraf 8-10)

8, 9. (a) Ki lavertisman zapot Pyer ti donnen konsernan lafason ki nou devret servi nou laliberte? (b) Ki mannyer en dimoun i kapab mal servi son laliberte?

8 Nou pa devret zis dir ki nou rekonesan anver Zeova, me nou devret osi fer atansyon ki nou pa mal servi nou laliberte. Par egzanp, zapot Pyer ti averti nou ki nou pa devret servi nou laliberte konman en leskiz pour fer sa ki mal. (Lir 1 Pyer 2:16.) Sa lavertisman i fer  nou rapel sa ki ti arive avek bann Izraelit dan dezer. Ozordi osi nou bezwen sa lavertisman, petet menm plis ki avan. Satan ek son lemonn i ofer bokou keksoz dezirab pour mete, manze, bwar e detann nou avek. Bann piblisiter i servi bann zoli dimoun pour fer nou krwar ki nou bezwen aste bann keksoz ki nou pa vreman bezwen. I kapab vreman fasil pour sa lemonn anbet nou e fer nou mal servi nou laliberte.

9 Konsey Pyer i osi aplik pour bann keksoz ki pli enportan dan lavi, tel parey ki kalite ledikasyon, metye ouswa karyer nou pou swazir. Par egzanp, bann zenn ozordi i santi zot anba presyon pour travay vreman dir pour ki zot kapab ganny aksepte dan bann pli bon liniversite. En kantite dimoun i dir zot ki si zot fer letid avanse, zot pou ganny bann bon travay, fer bokou larzan e ganny respekte. Sa bann dimoun i kapab montre zot lenformasyon ki paret pe prouve ki bann ki al liniversite pou ganny plis larzan ki bann ki pa al pli lwen ki lekol segonder. Alor, ler bann zenn pe fer bann swa ki kapab afekte larestan zot lavi, petet zot pou vwar li en bon nide pour fer letid avanse. Me kwa ki zot ek zot paran i devret gard antet?

10. Ki nou devret gard antet ler nou fer bann swa dan bann keksoz personnel?

10 Serten i kapab mazinen ki sa bann keksoz i personnel, alor zot devret annan sa laliberte pour swazir sa ki zot anvi, tan ki sa pa fatig zot konsyans. Zot kapab pe mazin parol Pol: “Mon pa oule ki mon laliberte i ganny zize par konsyans en lot dimoun.” (1 Korentyen 10:29) Menm si nou annan sa laliberte pour fer nou prop swa konsernan nou ledikasyon ek karyer, nou devret rapel ki nou laliberte i annan limit e ki tou nou desizyon i annan konsekans. Sanmenm sa Pol ti dir: “Nou ganny drwa fer tou keksoz, me pa tou keksoz ki pou benefisye nou. Nou ganny drwa fer tou keksoz, me pa tou keksoz ki batir.” (1 Korentyen 10:23; not) Alor menm si nou annan sa laliberte pour fer bann swa dan bann keksoz personnel, sa ki nou anvi i pa sa keksoz pli enportan.

NOU SERVI NOU LALIBERTE DAN EN FASON KI SAZ LER NOU SERVI ZEOVA

11. Pour ki rezon Zeova in liber nou?

11 Ler Pyer ti averti nou pour pa mal servi nou laliberte, i ti dir ki sa bon fason pour servi li i konman “bann lesklav Bondye.” Rezon ki Zeova in servi Zezi pour liber nou dan lesklavaz pese ek lanmor i pour nou kapab servi nou lavi antye pour servi Li.

Sa pli bon fason pour servi nou laliberte i ler nou servi nou letan ek lenerzi pour servi Zeova plennman

12. Ki legzanp Noe ek son fanmir in kite pour nou?

12 Sa pli bon fason pour servi nou laliberte i ler nou servi nou letan ek lenerzi pour servi Zeova plennman. Sa pou protez nou par anpes bann lobzektif sa lemonn ek bann dezir personnel vin sa keksoz pli enportan dan nou lavi. (Galat 5:16) Mazin lo sa ki Noe ek son fanmir ti fer. Zot ti viv dan en lemonn vyolan e imoral. Me zot pa ti annan menm lobzektif avek bann  dimoun otour zot e zot pa ti partisip dan bann aktivite ki sa bann dimoun ti fer. Zot ti swazir pour reste okipe dan sa travay ki Zeova ti’n donn zot pour fer. Zot ti konstri lars, anmas manze pour zot ek bann zannimo e averti lezot lo sa Deliz. “Noe ti fer tou sa ki Bondye ti’n dir li.” (Zenez 6:22) Sa ti fer ki Noe ek son fanmir ti sirviv lafen sa move lemonn ki zot ti pe viv ladan sa letan.​—Ebre 11:7.

13. Ki Zeova in donn nou lord pour fer?

13 Ki Zeova in donn nou lord pour fer ozordi? Konman bann disip Zezi, nou konnen ki Bondye in donn nou lord pour prese. (Lir Lik 4:18, 19.) Ozordi, Satan in avegle lespri laplipar dimoun e zot pa realize ki zot lesklav fo larelizyon, bann keksoz materyel ek sistenm politik. (2 Korentyen 4:4) Parey Zezi, nou annan sa privilez pour ed lezot aprann konn e ador Zeova, sa Bondye laliberte. (Matye 28:19, 20) I pa fasil pres avek lezot. Dan serten landrwa, dimoun pa enterese pour aprann konn Bondye e serten i menm ankoler ler nou pres avek zot. Me vi ki Zeova in donn nou lord pour prese, nou devret demann nou lekor, ‘Eski mon kapab servi mon laliberte pour fer plis dan servis Zeova?’

14, 15. Ki en kantite serviter Zeova in deside pour fer? (Vwar portre o konmansman sa lartik.)

14 I ankourazan ki en kantite parmi pep Bondye in realize ki lafen sa lemonn i vreman pros e zot in deside pour senplifye zot lavi e konmans servis pionye. (1 Korentyen 9:19, 23) Serten i fer pionye kot zot reste, tandis ki lezot i al servi dan bann kongregasyon ki bezwen led. Dan sa dernyen senk an, plis ki 250,000 frer ek ser in konmans fer pionye e la i annan plis ki 1,100,000 pionye ordiner. Pa i merveye ki en kantite pe servi zot laliberte pour servi Zeova dan sa fason!​—Psonm 110:3.

15 Kwa ki’n ed zot pour servi zot laliberte dan en fason ki saz? Annou vwar legzanp John ek Judith, ki’n servi dan plizyer pei pandan sa dernyen 30 an. Zot eksplike ki ler Lekol Pionye ti konmanse an 1977, bann zelev ti ganny ankouraze pour al servi kot i annan en pli gran bezwen. Pour atenn sa lobzektif, John ek Judith ti bezwen gard zot lavi senp. Alor John ti souvan sanz son travay. Avek letan, zot ti al dan en pei etranze pour anons mesaz Labib. Kwa ki ti ed zot pour sirmont bann difikilte, tel parey aprann en nouvo langaz e adapte avek en nouvo kiltir ek klima? Zot ti priy Zeova e depan lo li pour ed zot. Ki mannyer zot santi lefet ki zot in servi Zeova dan sa fason pour tou sa bann lannen? John i dir: “Mon ti santi ki mon ti pe donn tou pour tou dan sa  pli bon aktivite ki mon’n deza konnen ouswa eksperyanse. Zeova ti vin pli reel pour mwan, parey en vre papa. La mon konpran sa ki Zak 4:8 i vedir: ‘Vin pros avek Bondye e i pou vin pros avek zot.’ Mon ti konnen ki mon ti’n trouv sa ki mon ti pe rode, en bi satisfezan dan lavi.”

16. Ki mannyer plizyer milye in servi zot laliberte dan en fason ki saz?

16 Serten, parey John ek Judith i kapab fer pionye pour en bon pe letan. I annan lezot ki zot sirkonstans pa permet zot fer pionye pour bokou letan. Kantmenm sa, en kantite i volonter pour travay lo bann proze konstriksyon partou dan lemonn. Par egzanp, apepre 27,000 frer ek ser ti vin ede dan konstriksyon biro prensipal, Warwick, New York. Serten ti vin pour de semenn, serten pour detrwa mwan e lezot pour enn an ouswa plis. En kantite sa bann frer ek ser ti fer bann sakrifis pour zot kapab al servi Warwick. Zot in servi zot laliberte pour loue e onor Zeova, sa Bondye laliberte. Pa zot bann bon legzanp pour nou!

17. Ki nou kapab esper avek enpasyans si la konmela nou servi nou laliberte dan en fason ki saz?

17 Nou rekonesan ki nou’n aprann konn Zeova e ki nou annan sa laliberte ki nou gannyen ler nou ador li. Annou prouve par bann swa ki nou fer ki sa kalite laliberte i vreman presye pour nou. Dan plas mal servi sa laliberte, annou servi li pour donn Zeova nou meyer. Apre sa, nou kapab profit bann benediksyon ki Zeova ti promet pour sa letan kot sa profesi pou ganny akonplir: “Ki kreasyon i osi ganny libere dan lesklavaz pese ek lanmor e ganny laglwar ek laliberte bann zanfan Bondye.”​—Romen 8:21.