Skip to content

Al lo konteni

 LARTIK LETID 4

Sa ki en repa senp i ansenny nou lo en Lerwa dan lesyel

Sa ki en repa senp i ansenny nou lo en Lerwa dan lesyel

“Sa i reprezant mon lekor. . . . Sa i reprezant mon ‘disan lalyans.’”​—MAT. 26:26-28.

KANTIK 16 Loue Ya pour son Garson

SA KI NOU POU ETIDYE *

1-2. (a) Akoz nou pa sirprann ki Zezi i anvi nou selebre son lanmor dan en fason senp? (b) Ki bann kalite Zezi ki nou pou egzaminen?

ESKI ou kapab eksplik sa ki pase pandan Memoryal lanmor Kris? Tre probab laplipar nou i konn sa ki arive pandan Repa Senyer. Akoz? Parski sa repa i vreman senp. Par kont, sa i en levennman vreman enportan. Petet nou kapab demande: ‘Akoz sa repa i sitan senp?’

2 Pandan son minister lo later, Zezi ti renonmen pour ansenny bann laverite enportan dan en fason senp, kler e fasil pour konpran. (Mat. 7:28, 29) Dan sa menm fason, i ti montre nou konman pour selebre son lanmor, en levennman vreman enportan dan en fason senp. Annou egzamin sa repa Memoryal * ek serten keksoz ki Zezi ti dir e fer. Nou pou apresye plis ankor lafason ki Zezi ti demontre limilite, kouraz ek lanmour. Nou pou osi aprann ki mannyer nou kapab swiv son legzanp pli byen ankor.

ZEZI I ANNAN LIMILITE

Dipen ek diven Memoryal i rapel nou ki Zezi ti donn son lavi pour nou e ki aprezan i pe dirize konman Lerwa dan lesyel (Vwar paragraf 3-5)

3. Dapre Matye 26:26-28, ki mannyer sa repa Memoryal ti ete e ki sa de keksoz senp ti reprezante?

3 Zezi ti entrodwi Memoryal son lanmor avek son 11 zapot fidel. I ti servi sa ki ti’n reste apre repa Lapak pour fer sa repa Memoryal. (Lir Matye 26:26-28.) I ti servi sa dipen san lelven ek diven ki ti deza la. Zezi ti  dir son bann zapot ki sa de keksoz senp i reprezant son lekor parfe ek disan ki byento i ti pou ofer. Petet, bann zapot pa ti sirprann ki sa nouvo repa ti sitan senp. Akoz?

4. Ki mannyer sa konsey ki Zezi ti donn Mart i ed nou konpran akoz repa Memoryal ti senp?

4 Reflesi lo sa ki ti arive plizyer mwan pli boner, pandan trwazyenm lannen minister Zezi, ler i ti vizit son bann bon zanmi, Lazar, Mart ek Mari. Sa zour, Zezi ti pe pas en bon moman avek son bann zanmi e la i ti konmans ansennyen. Mart ti la me i ti okipe pe fer en gran repa pour son envite spesyal. Ler Zezi ti remark sa, i ti zantiman koriz Mart e ed li realize ki i pa toultan neseser pour fer en gran repa. (Lik 10:40-42) Aprezan, Zezi i aplik son prop konsey. I pa ti reste bokou letan avan son lanmor, alor i ti fer en repa Memoryal senp. Ki sa i montre nou lo Zezi?

5. Ki sa repa senp i montre nou lo Zezi e ki mannyer sa i annakor avek Filipyen 2:5-8?

5 Dan tou sa ki Zezi ti fer e dir, i ti demontre limilite. Alor, i pa sirprann nou ki i ti demontre bokou limilite sa zour swar avan son lanmor. (Mat. 11:29) I ti konnen ki i ti pe al fer sa pli gran sakrifis dan listwar imen e ki Zeova ti pou resisit li dan en pozisyon pli o dan lesyel. Kantmenm sa, Zezi pa ti esey rod latansyon par fer en gran festen pour selebre son lanmor. I ti plito demann son bann disip pour mazin li en fwa par an par fer sa repa senp. (Zan 13:15; 1 Kor. 11:23-25) Sa repa senp me apropriye i montre ki Zezi pa ti en dimoun orgeye. Nou devret kontan ki limilite i enn bann kalite ekstraordiner ki nou Lerwa dan lesyel i demontre.​—Lir Filipyen 2:5-8.

6. Ki mannyer nou kapab imit limilite Zezi ler nou dan problenm?

6 Ki mannyer nou kapab imit limilite Zezi? Par met lentere lezot avan sa ki pour nou. (Fili. 2:3, 4) Reflesi lo sa dernyen swar ki Zezi ti lo later. Zezi ti konnen ki i ti pe al soufer en kantite avan i mor. Pourtan, i ti enkyet pour son bann zapot fidel akoz zot ti pou dan en gran latristes apre son lanmor. Alor, i ti pas sa dernyen swar pe enstri, ankouraz e rasir zot. (Zan 14:25-31) Zezi ti  demontre limilite par toultan met lentere lezot avan sa ki pour li. Pa Zezi in kit en bon legzanp pour nou!

ZEZI I ANNAN KOURAZ

7. Ki mannyer Zezi ti demontre kouraz zis apre ki i ti’n entrodwi Repa Senyer?

7 Zis apre ki Zezi ti’n entrodwi Repa Senyer, i ti demontre en kantite kouraz. Akoz nou dir sa? Zezi ti pare pour fer lavolonte son Papa, menm si i ti konnen ki i ti pou ganny kondannen amor pour swadizan koz kont Bondye, en keksoz ki ti vreman fer onte. (Mat. 26:65, 66; Lik 22:41, 42) Zezi ti reste fidel pour onor non Zeova, siport drwa Zeova pour dirize e donn bann imen ki repantir sa loportinite pour viv pour touzour. An menm tan, Zezi ti prepar son bann disip pour sa ki zot ti pe al pas atraver.

8. (a) Ki Zezi ti dir son bann zapot fidel? (b) Apre lanmor Zezi, ki mannyer son bann disip ti demontre kouraz parey li?

8 Zezi ti osi demontre kouraz par met dekote tou son traka e konsantre lo bezwen son bann zapot fidel. Apre ki Zida ti’n ganny demande pour ale, Zezi ti entrodwi sa repa senp avek bann ki ti pou vin bann Kretyen swazir. Sa repa ti pou fer son bann disip swazir rapel bann byenfe ki disan Zezi ek sa nouvo lalyans i anmennen. (1 Kor. 10:16, 17) Pour ed zot reste fidel, Zezi ti dir son bann disip sa ki li ek son Papa ti ekspekte avek zot. (Zan 15:12-15) Zezi ti osi koz avek bann zapot lo bann difikilte ki zot ti pou rankontre. Apre, i ti ankouraz zot pour swiv son legzanp e “pran kouraz!” (Zan 16:1-4a, 33) Plizyer lannen pli tar, bann disip Zezi ti ankor pe swiv son legzanp par demontre kouraz ek en leta lespri  sakrifis. Menm si zot ti bezwen soufer en kantite, zot ti ankouraz kanmarad dan bann diferan leprev.​—Ebr. 10:33, 34.

9. Ki mannyer nou kapab demontre kouraz parey Zezi?

9 Ozordi, nou osi nou demontre kouraz parey Zezi. Par egzanp, i demann kouraz pour ed nou bann frer ki pe ganny persekite akoz zot lafwa. Parfwa, nou bann frer ki dan prizon i ganny kondannen dan en fason enzis. Ler sa i arive, nou bezwen fer tou sa ki nou kapab pour ed zot, menm pare pour koze pour defann zot. (Fili. 1:14; Ebr. 13:19) Nou osi demontre kouraz ler nou kontinyen pres “avek lardyes.” (Akt 14:3) Parey Zezi, nou determinen pour anons mesaz Rwayonm, menm si dimoun i opoz nou oubyen persekit nou. Me parfwa, i kapab arive ki nou dekouraze. Ki nou kapab fer?

10. Pandan bann semenn avan Memoryal, ki nou devret fer e akoz?

10 Nou kapab devlop plis kouraz ler nou reflesi lo lespwar ki nou annan gras a sakrifis Kris. (Zan 3:16; Efe. 1:7) Pandan bann semenn avan Memoryal, nou ganny en loportinite spesyal pour devlop plis lapresyasyon pour ranson. Pandan sa letan, fer ou lektir Labib pour Memoryal, priye e medit lo bann levennman ki ti arive zis avan Zezi ti mor. Apre ler nou zwenn pour Repa Senyer, nou pou apresye pli byen sa ki lanblenm Memoryal i reprezante e lenportans sa sakrifis ki san konparezon. Ler nou rekonesan pour sa ki Zezi ek Zeova in fer pour nou e nou konpran byenfe ki sa i anmennen pour nou ek bann ki nou kontan, nou lespwar i vin pli for e nou ganny motive pour demontre kouraz e andire ziska lafen.​—Ebr. 12:3.

11-12. Ki nou’n aprann ziska prezan?

 11 Ziska prezan nou’n aprann ki Repa Senyer i fer nou rapel pa zis ranson me osi bann zoli kalite ki Zezi in demontre parey limilite ek kouraz. Nou devret vreman kontan ki Zezi i ankor pe demontre sa bann kalite konman nou Granpret ki pled pour nou. (Ebr. 7:24, 25) Nou devret fidelman selebre lanmor Zezi parey i’n donn nou lord akoz nou oule vreman montre nou lapresyasyon. (Lik 22:19, 20) Nou selebre Memoryal le 14 Nizan, sa dat pli enportan lo nou kalandriye.

12 Repa Senyer i en seremoni byen senp me i met lanfaz lo en lot kalite ki ti pous Zezi pour sakrifye son lavi pour nou. Ler i ti lo later, Zezi ti byen renonmen pour sa kalite. Ki kalite sa?

ZEZI I ANNAN LANMOUR

13. Ki Zan 15:9 ek 1 Zan 4:8-10 i dir lo lanmour ki Zeova ek Zezi in demontre e lekel ki benefisye avek zot lanmour?

13 Zezi ti demontre sa menm lanmour ki Zeova i annan pour nou dan tou sa ki i ti fer e i ti fer li dan en fason parfe. (Lir Zan 15:9; 1 Zan 4:8-10.) Me pli enportan ki tou, son lanmour senser ti pous li pour sakrifye son lavi pour nou. Ki swa nou form parti bann Kretyen swazir oubyen “lezot mouton,” nou benefisye avek lanmour ki Zeova ek son Garson in demontre anver nou atraver sa sakrifis. (Zan 10:16; 1 Zan 2:2) Mazin osi sa bann keksoz ki ti ganny servi pandan sa repa Memoryal. Sa osi i montre lanmour ek konsiderasyon ki Zezi ti annan pour son bann disip. Dan ki fason?

Avek lanmour, Zezi ti entrodwi en repa Memoryal ki ti vreman senp e ki’n kapab ganny selebre pour plizyer syek menm dan bann sityasyon difisil (Vwar paragraf 14-16) *

14. Dan ki fason Zezi ti demontre lanmour pour son disip?

14 Zezi ti demontre lanmour anver bann Kretyen swazir par entrodwi en repa senp ki zot ti pou kapab kontinyen selebre me pa en seremoni konplike. Avek letan, sa bann Kretyen swazir ti bezwen selebre Memoryal sak lannen, dan diferan sirkonstans e menm dan prizon. (Rev. 2:10) Eski zot ti kapab kontinyen obei Zezi? Wi!

15-16. Ki mannyer serten in reisi selebre Repa Senyer dan bann sityasyon difisil?

15 Depi premye syek ziska dan nou letan, bann vre Kretyen in fer zefor pour selebre lanmor Zezi. Zot in esey selebre Repa Senyer parey Zezi ti fer, parfwa dan bann kondisyon vreman difisil. Annou vwar detrwa legzanp. Ler Frer Harold King ti tousel dan prizon Lasin, i ti bezwen rod en fason pour li selebre Memoryal. I ti prepar lanblenm Memoryal an sekre par servi sa ki i ti annan. I ti osi bezwen rod en fason pour kalkil dat Memoryal. Ler sa zour ti arive pour selebre Memoryal, tousel dan son kaso, i ti sante, priye e fer en diskour baze lo Labib.

16 La en lot legzanp. En group ser ki ti dan kan konsantrasyon pandan Dezyenm Lager Mondyal ti riske zot lavi pour selebre Repa Senyer. Me vi ki sa repa i senp, zot ti reisi selebre Memoryal dan en fason diskre. Zot rakonte: “Nou ti debout pros avek kanmarad dan en serk e dan milye i ti annan en stoul ki ti kouver avek en tapi blan. Nou ti met dipen ek diven lo la. Nou pa ti alim lalimyer me nou ti servi en labouzi pour ki lezot pa vwar sa ki nou ti pe fer. . . . Ankor en fwa, nou ti dir Zeova, nou  Papa ki nou ti pou servi tou nou lafors pour defann Son non sen.” Pa sa bann ser ti demontre en lafwa remarkab! Vi ki i posib pour selebre Memoryal menm dan bann sityasyon difisil, pa sa i laprev ki Zezi i vreman kontan nou!

17. Ki kestyon nou devret demann nou lekor?

17 Anmezir ki Memoryal i vin pli pros, i byen pour demann nou lekor sa bann kestyon: ‘Ki mannyer mon kapab demontre plis lanmour ankor parey Zezi? Eski mon met lentere mon bann frer ek ser Kretyen avan sa ki pour mwan? Eski mon ekspekte tro bokou avek mon bann frer ek ser oubyen mon konn zot limit?’ Annou toultan swiv legzanp Zezi e annan menm “santiman” avek lezot.​—1 Pyer 3:8.

GARD SA BANN LESON ANTET

18-19. (a) Ki nou kapab asire? (b) Ki ou determinen pour fer?

18 Byento, nou pou nepli selebre Memoryal lanmor Kris. Ler Zezi i “vini” pandan gran ladetres, i pou rasanble “sa bann ki’n ganny swazir” e anmenn zot dan lesyel. La nou pou aret selebre Memoryal.​—1 Kor. 11:26; Mat. 24:31.

19 Menm ler Memoryal pou nepli ganny selebre, nou kapab asire ki pep Zeova pou toultan mazin sa repa senp ki reprezant sa gran limilite, kouraz ek lanmour ki’n ganny demontre par en imen. Sa letan, bann ki’n selebre repa spesyal pour koz lo sa repa vreman spesyal pour ki tou bann ki pou vivan dan Paradi i kapab benefisye. Me pour nou ganny bann byenfe la konmela gras a sa repa, nou bezwen determinen pour imit limilite, kouraz ek lanmour Zezi. Si nou fer sa, nou kapab asire ki Zeova pou rekonpans nou.​—2 Pyer 1:10, 11.

KANTIK 13 Kris i nou model

^ par. 5 Byento nou pou asiste Repa Senyer pour mazin lanmor Zezi Kri. Sa repa senp i ansenny nou bokou lo limilite, kouraz ek lanmour Zezi. Dan sa lartik, nou pou diskite ki mannyer nou kapab imit sa bann zoli kalite ki Zezi ti demontre.

^ par. 2 KI SA I VEDIR?: En memoryal i en laranzman kot en keksoz spesyal i ganny fer pour mazin e onor en dimoun oubyen levennman enportan.

^ par. 56 LEKSPLIKASYON PORTRE: Bann serviter fidel pe selebre Memoryal dan en kongregasyon premye syek, dan bann lannen 1880, dan en kan konsantrasyon Nazi, Lalmanny e dan nou letan, dan en senp Lasal Rwayonm Sid Lanmerik kot klima i so.