Skip to content

Al lo konteni

 SEKSYON 6

Zob i gard son lentegrite

Zob i gard son lentegrite

Satan i kestyonn lentegrite Zob devan Bondye, me Zob i reste fidel avek Zeova

ESKI okenn dimoun pou reste fidel avek Bondye si i ganny teste ziska son limit ouswa ler lobeisans pa paret anmenn okenn benefis materyel? Sa kestyon ti ganny souleve e ganny reponn an rapor avek en zonm ki ti apel Zob.

Pandan ki bann Izraelit ti ankor Lezip, Zob, en fanmir Abraam, ti pe viv dan en pei ki konmela i apel Arabi. Antretan, bann lanz dan lesyel ti rasanble devan Bondye e Satan sa rebel osi ti parmi zot. Devan sa gran rasanbleman dan lesyel, Zeova ti eksprim son konfyans dan Zob, son serviter fidel. Anfet, Zeova ti dir ki napa lezot zonm ankor ki ti annan lentegrite parey pour Zob. Me Satan ti pretann ki Zob ti pe servi Bondye zis akoz Bondye ti pe beni li e protez li. Satan ti dir ki si Zob ti perdi tou sa ki i ti annan, i ti pou modi Bondye.

Bondye ti permet Satan fer Zob perdi son larises, son zanfan e osi son lasante. San konn rol ki Satan ti annan pour zwe dan tou sa la, Zob pa ti pe konpran akoz Bondye ti pe les li pas atraver sa bann leprev. Kantmenm sa, Zob pa ti zanmen modi Bondye.

Trwa swadizan zanmi ti vin kot Zob. Dapre bann gran konversasyon ki’n ganny ekrir dan liv Zob, sa bann zonm ti pe esey konvenk li dan en move fason, ki Bondye ti pe pini li pour son bann pese ki i ti’n fer dan kasyet. Zot ti menm dir ki Bondye pa ni pran plezir dan son bann serviter, ni met konfyans dan zot. Zob ti rezet zot move rezonnman. Avek konfyans, Zob ti dir ki i ti pou gard son lentegrite ziska lanmor!

Me Zob ti fer en fot, i ti tro konsernen pour zistifye son lekor. En zennonm ki ti apel Eliou ti pran laparol apre ki i ti’n ekout tou zot largiman. Eliou ti reprimann Zob pour lapenn i pa ti’n reisi konpran ki zistifye drwa Zeova pour dirize ti pli enportan ki zistifye drwa nenport imen. Eliou ti osi severman reprimann bann konpanyon Zob.

Apre sa, Zeova ti koz avek Zob pour koriz son fason panse. Pour donn Zob en leson lo siperyorite Bondye konpare avek imen, Zeova ti atir latansyon Zob lo bann travay merveye dan kreasyon. Avek limilite Zob ti aksepte disiplin ki i ti gannyen avek Bondye. Lefet ki Zeova i “ranpli avek labonte ek konpasyon,” i ti redonn Zob son lasante, double son larises ki i ti annan oparavan e beni li avek dis zanfan. (Zak 5:11) Par gard son lentegrite ler i ti rankontre bann leprev difisil, Zob ti reponn fo lakizasyon Satan avek sikse konmkwa bann imen pa pou reste fidel avek Bondye si zot ganny teste.

Baze lo liv Zob.