Skip to content

Al lo konteni

 SEKSYON 21

Zezi i vivan!

Zezi i vivan!

Zezi i aparet avek son bann disip, i enstrir zot e ankouraz zot

LO TRWAZYENM zour apre lanmor Zezi, serten madanm ki ti son disip ti dekouver ki sa ros ki ti’n bous larantre tonbo ti’n ganny pous akote. Deplis, tonbo ti vid!

De lanz ti aparet e enn parmi ti dir: “Zot pe rod Zezi de Nazaret. . . . I’n resisite.” (Mark 16:6) Deswit, sa bann madanm ti taye pour al dir bann zapot. Dan semen zot ti bat avek Zezi, I ti dir zot: “Pa bezwen per. Ale, dir mon bann frer al Galile e la zot a war mwan.”—Matye 28:10.

Pli tar sa zour, de disip ti pe marse sorti Zerizalenm pour al Emais. En etranze ti zwenn ansanm avek zot e demann zot ki zot ti pe koz lo la. Anfet i ti Zezi sa, ki ti’n resisite e ki ti’n aparet dan lekor ki premye kou zot pa ti rekonnet. Avek figir byen tris zot ti dir ki zot ti pe koz lo Zezi. Sa etranze ti konmans eksplik zot bann keksoz ki ti aplik avek Mesi dan Lekritir antye. Sirman, Zezi ti’n akonplir tou bann profesi konsernan Mesi ziska sa pli ptipti detay. * Kan sa bann disip ti realize ki sa etranze ti Zezi ki ti’n resisite konman en lespri, i ti’n fini disparet.

Deswit sa de disip ti retourn Zerizalenm. Laba zot ti trouv bann disip ki ti’n tak zot anndan. Anmezir ki sa de disip ti rakont zot leksperyans, Zezi ti aparet. Son bann disip ki ti byen sirprann pa ti oule krwar! I ti demande: “Akoz zot ganny sa bann dout dan zot leker?” I ti kontinyen: “La sa ki’n ganny ekrir: ki Mesi i devre soufer, e resisite trwazyenm zour.”—Lik 24:38, 46.

Zezi ti aparet pandan 40 zour apre son rezireksyon dan diferan moman. Dan en lokazyon i ti aparet avek plis ki 500 dimoun! I tre probab ki dan sa lokazyon ki i ti donn zot sa privilez vreman enportan: “Ale e fer tou pep vin mon bann disip. . . . Ansenny zot pour obei tou sa ki mon’n konmande. E konnen ki mwan mon avek zot toulezour, ziska lafen.”—Matye 28:19, 20.

Dan son dernyen rankont avek son 11 zapot fidel, Zezi ti promet: “Zot pou ranpli avek en pouvwar ler Sent-Espri pou desann lo zot. Alor zot a vin mon bann temwen dan . . . tou bann landrwa pli elwannyen lo later.” (Akt 1:8) Apre sa, anmezir ki Zezi ti mont dan lesyel en nyaz ti kouver li.

—Baze lo Matye sapit 28; Mark sapit 16; Lik sapit 24; Zan sapit 20 ek 21; 1 Korentyen 15:5, 6.

^ par. 6 Pour plis legzanp lo bann profesi lo Mesi ki ti ganny akonplir par Zezi, vwar paz 17-19 dan sa pti liv e osi paz 199-201 dan liv Ki Labib i vreman dir?