ESKI Zeova i en Dirizan saz? En fason pour konn larepons sa kestyon i kan ou egzamin bann konsey ki i donnen. Eski i marse? Si i ganny aplike, eski lavi pou vin pli meyer e fer plis sans? Lerwa Salomon ki ti byen saz ti ekrir plizyer santenn proverb. Zot tous preski tou laspe dan lavi. Egzamin serten legzanp.

Annan konfyans dan Bondye. Konfyans i vreman enportan pour annan en bon relasyon avek Zeova. Salomon ti ekrir: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye.” (Proverb 3:5, 6) Demontre konfyans dan Bondye par rod son gidans e obeir li, i azout bokou valer avek lavi. Bann dimoun ki met konfyans dan Zeova i rezwir son leker e i donn Zeova en larepons pour bann kestyon ki Satan son adverser in souleve.—Proverb 27:11.

Annan lasazes dan lafason ou tret lezot. Plis ki zanmen oparavan, konsey Bondye pour bann msye, madanm ek zanfan i vreman apropriye ozordi. Bondye i konsey bann msye pour “trouv lazwa avek madanm [zot] zenntan” ki vedir ki zot devret reste fidel avek zot madanm. (Proverb 5:18-20) Dan liv Proverb, bann madanm ki’n marye i kapab trouv deskripsyon en madanm debouryer ki son msye ek son zanfan i admir li en kantite. (Proverb sapit 31) Bann zanfan i ganny gidans pour obeir zot paran. (Proverb 6:20) Sa liv i osi montre ki lanmitye i vreman enportan akoz en dimoun ki kontan reste tousel i kapab vin egois. (Proverb 18:1) Zanmi i kapab annan bon ouswa move lenfliyans lo nou, alor nou bezwen byen swazir nou zanmi.—Proverb 13:20; 17:17.

Pran swen avek ou lekor dan en fason saz. Dan liv Proverb i annan en kantite konsey pour evite abiz lalkol, devlop bann bon santiman, rezet bann ki move e osi pour vin en travayer ki travay dir. (Proverb 6:6; 14:30; 20:1) I montre ki konfyans dan desizyon bann imen i anmenn maler e sa i vreman diferan avek konsey Bondye. (Proverb 14:12) I ankouraz nou pour protez nou leker, setadir sa dimoun ki nou ete anndan kont okenn move lenfliyans e i rapel nou ki “sours lavi i sorti dan leker.”—Proverb 4:23.

Plizyer milyon dimoun dan lemonn antye in vwar ki viv an armoni avek bann konsey parey i fer annan en lavi pli meyer. Akoz sa, zot annan tou rezon pour aksepte Zeova konman zot Dirizan.

—Baze lo liv Proverb.