Skip to content

Al lo konteni

 SAPIT NEF

Eski lafen sa lemonn i pros?

Eski lafen sa lemonn i pros?

1. Kote nou kapab konnen ki pou arive a lavenir?

ESKI ou’n deza get nouvel e mazinen, ‘Ki pe arive avek sa lemonn?’ I telman annan en kantite maler ek kriyote lo later ki serten i krwar ki lafen sa lemonn i pros. Eski sa i vre? Eski i annan okenn fason pour konnen ki pou arive a lavenir? Wi. Menm si bann imen pa kapab predir ki pou arive, Zeova i kapab. Dan Labib, Zeova in dir nou ki pou arive avek bann imen ek later a lavenir.​—Izai 46:10; Zak 4:14.

2, 3. Ki bann disip Zezi ti anvi konnen e ki Zezi ti dir zot?

2 Ler Labib i koz lo lafen sa lemonn, i pa vedir ki later pou ganny detrir, me se bann move dimoun ki pou ganny detrir. Zezi ti ansenny dimoun ki Rwayonm Bondye ti pou diriz later. (Lik 4:43) Son bann disip ti anvi konnen kan ki Rwayonm Bondye ti pou vini e zot ti demann Zezi: “Kan tou sa bann keksoz pou arive e ki siny ki pou montre ki ou la e ki lafen sa lemonn i pros pour arive?” (Matye 24:3) Zezi pa ti donn zot en dat egzakt, me i ti dir zot sa ki ti pou arive zis avan lafen sa lemonn. Sa ki Zezi ti dir pou arive pe arive la konmela.

3 Dan sa sapit, nou pou diskit bann levidans ki montre ki nou pe viv dan sa letan zis avan lafen sa lemonn. Me avan sa, nou bezwen konn plis lo en lager ki ti arive dan lesyel pour nou kapab konpran akoz i annan sitan en kantite move keksoz lo later.

 EN LAGER DAN LESYEL

4, 5. (a) Ki ti arive dan lesyel pa bokou letan apre ki Zezi ti vin Lerwa? (b) Dapre Revelasyon 12:12, ki i ti pou arive lo later ler Satan i ganny pouse dan lesyel?

4 Dan Sapit 8, nou ti aprann ki Zezi ti vin Lerwa dan lesyel an 1914. (Danyel 7:13, 14) Liv Revelasyon i dir nou ki ti arive: “Lager ti deklare dan lesyel: Mikael [setadir Zezi] ek son bann lanz ti lager avek dragon [setadir Satan] e dragon ek son bann lanz ti lager.” * Satan ek son bann demon ti perdi sa lager e zot ti ganny zete lo later. Zis mazinen ki kantite bann lanz ti kontan! Me ki ti pou arive avek bann dimoun ki lo later? Labib i dir ki i ti pou annan en kantite maler pour bann imen. Akoz? Parski Dyab i vreman ankoler akoz “i konnen i reste li zis en ptigin letan.”​—Revelasyon 12:7, 9, 12.

5 Dyab pe fer tou sa ki i kapab pour fer nou lavi difisil lo later. I ankoler parski i pa reste li bokou letan avan ki Bondye i tir li. Annou vwar sa ki Zezi ti dir ti pou arive pandan bann dernyen zour.​—Vwar Lezot lenformasyon nimero 24.

BANN DERNYEN ZOUR

6, 7. Ki nou kapab dir konsernan lager ek lafanmin ozordi?

6 Lager. Zezi ti dir: “Nasyon pou lager kont nasyon e rwayonm kont rwayonm.” (Matye 24:7) I annan plis dimoun ki’n ganny touye dan lager pandan nou letan ki dan okenn lezot lepok dan listwar. En rapor ki en lorganizasyon ti fer (Worldwatch Institute) i montre ki depi 1914, bann lager in touy  plis ki 100 milyon dimoun. Dan lespas 100 an, depi lannen 1900 ziska 2000, i ti annan trwa fwa plis dimoun ki ti ganny touye dan lager ki pandan sa 1,900 an avan sa. Zis mazinen ki kantite dimoun in soufer e pas martir akoz lager!

7 Lafanmin. Zezi ti dir: “I pou annan mankman manze.” (Matye 24:7) Ozordi i annan plis manze ki zanmen oparavan, me kantmenm sa en kantite dimoun pa ganny ase manze. Akoz? Parski swa zot napa ase larzan pour aste manze ouswa zot napa later pour plante. Plis ki en bilyon dimoun i bezwen viv lo mwens ki en dolar Ameriken par zour. Lorganizasyon Mondyal pour Lasante i dir ki rezon prensipal ki plizyer milyon zanfan i mor sak lannen, i akoz zot napa ase manze pour reste an bonn sante.

8, 9. Kwa ki montre ki bann profesi Zezi konsernan tranblemandter ek maladi in vin vre?

8 Tranblemandter. Zezi ti predir: “I pou annan bann gran tranblemandter.” (Lik 21:11)  Nou ekspekte ganny bann gran tranblemandter tou le-z-an. Depi lannen 1900, plis ki de milyon dimoun in mor akoz tranblemandter. Osi, menm si teknolozi in ede detekte bann tranblemandter pli boner ki avan, bokou dimoun i ankor pe mor akoz tranblemandter.

9 Maladi. Zezi ti predir ki i ti pou annan “lepidemi.” Bann maladi grav ti pou propaz vitman e touy bokou dimoun. (Lik 21:11) Menm si bann dokter in aprann ki mannyer pour tret bokou maladi, i ankor annan serten maladi ki napa gerizon. Anfet, en rapor i eksplike ki tou le-z-an, plizyer milyon dimoun i mor avek bann maladi tel parey tiberkiloz, malarya ek kolera. An plis ki sa, bann dokter in dekouver 30 nouvo maladi e serten napa gerizon.

LATITID DIMOUN DAN BANN DERNYEN ZOUR

10. Ki mannyer 2 Timote 3:1-5 pe ganny akonplir ozordi?

10 Dan 2 Timote 3:1-5, Labib i dir: “Bann dernyen zour pou  en letan vreman difisil.” Zapot Pol ti dekrir ki mannyer bokou dimoun ti pou konport zot pandan bann dernyen zour. I ti dir ki dimoun ti pou

  • egois

  • kontan larzan

  • dezobeisan anver paran

  • enfidel

  • napa lanmour pour zot fanmir

  • napa kontrol lo zot lekor

  • vyolan e agresif

  • kontan plezir plis ki Bondye

  • fer krwar ki zot kontan Bondye me dezobei li

11. Dapre Psonm 92:7, ki pou arive avek bann move dimoun?

11 Eski i annan bokou dimoun ki koumsa kot ou reste? Partou dan lemonn i annan bokou dimoun ki koumsa. Me byento Bondye pou aranz tou keksoz. I’n promet: “Menm si bann malfeter i pous parey move zerb e bann ki fer sa ki mal i prospere, zot pou ganny detri pour touzour.”​—Psonm 92:7.

 BON NOUVEL DAN BANN DERNYEN ZOUR

12, 13. Ki Zeova in ansenny nou pandan bann dernyen zour?

12 Labib ti predir ki dan bann dernyen zour, i ti pou annan en kantite soufrans dan lemonn. Me i ti osi dir ki pandan bann dernyen zour i ti pou annan bann bon keksoz.

“Sa bon nouvel Rwayonm pou ganny anonse partou lo later.”​—Matye 24:14

13 Dimoun ti pou konpran Labib. Profet Danyel ti ekri konsernan bann dernyen zour. I ti dir: “[Vre] konnesans pou ogmante.” (Danyel 12:4) Bondye ti pou ed son pep konpran Labib pli byen ki zanmen oparavan. Zeova in fer sa sirtou depi 1914. Par egzanp, i’n ed nou pli byen konpran lenportans son non, son plan pour later, ranson, sa ki arive ler nou mor e osi rezireksyon. Nou’n aprann ki zis Rwayonm Bondye ki kapab rezourd tou nou problenm. Nou’n osi aprann ki mannyer pour viv en lavi ere e fer sa ki Bondye i kontan. Me ki bann serviter Bondye i fer avek sa ki zot in aprann? Nou trouv larepons dan en lot profesi.​—Vwar Lezot lenformasyon nimero 21 ek 25.

14. Kote ki sa bon nouvel Rwayonm pe ganny anonse e lekel ki pe anons sa mesaz?

14 Predikasyon lo later antye. Ler Zezi ti pe koz lo bann dernyen zour, i ti dir: “Sa bon nouvel Rwayonm pou ganny anonse partou lo later.” (Matye 24:3, 14) Sa bon nouvel Rwayonm pe ganny anonse dan plis ki 230 pei e dan plis ki 700 langaz. Wi, partou lo later, Temwen Zeova sorti “dan tou nasyon, tribi” pe ed dimoun pour konpran kisisa Rwayonm e ki sa Rwayonm pou fer pour limanite. (Revelasyon 7:9) Zot pa ganny peye pour fer sa. Menm si bokou dimoun i ay e persekit Temwen Zeova, parey Zezi ti’n  predir, napa nanryen ki kapab anpes sa travay ganny fer.​—Lik 21:17.

KI OU POU FER?

15. (a) Eski ou krwar ki nou pe viv dan bann dernyen zour? Akoz? (b) Ki pou arive avek bann dimoun ki obei Zeova e bann ki pa obei li?

15 Eski ou krwar ki nou pe viv dan bann dernyen zour? I annan bokou profesi Labib konsernan bann dernyen zour ki pe ganny akonplir. Byento Zeova pou deside aret sa travay pour anons sa bon nouvel e “lafen” pou arive. (Matye 24:14) Kisisa lafen? Lafen i ler Bondye pou tir tou sa ki mal lo later. I pou fer sa dan sa lager ki apel Armagedon. Zeova pou servi Zezi ek son bann lanz pwisan pour detri tou dimoun ki refize obei Li ek son Garson. (2 Tesalonisyen 1:6-9) Apre sa, Satan ek son bann demon pou nepli anbet dimoun. Tou bann ki oule obei Bondye e aksepte son Rwayonm pou vwar tou bann promes Bondye vin en realite.​—Revelasyon 20:1-3; 21:3-5.

16. Vi ki lafen i sitan pros, ki nou bezwen fer?

16 Tre byento, sa lemonn dirize par Satan pou ganny detrir. Alor i vreman enportan pour demann nou lekor, ‘Ki mon bezwen fer?’ Zeova i oule ki ou aprann tou sa ki ou kapab dan Labib. Ou bezwen pran ou letid Labib o serye. (Zan 17:3) Tou le semenn, Temwen Zeova i fer bann renyon ki ed dimoun konpran Labib. Esey asiste sa bann renyon regilyerman. (Lir Ebre 10:24, 25.) Si ou aprann ki ou bezwen fer bann sanzman, pa bezwen per pour fer li. Anmezir ki ou fer sa bann sanzman, ou pou vin en pli bon zanmi avek Zeova.​—Zak 4:8.

17. Akoz laplipar dimoun pou sirprann ler lafen i arive?

 17 Zapot Pol ti eksplike ki laplipar dimoun pa pou ekspekte sa zour ler bann move dimoun pou ganny detrir. I ti dir ki sa zour pou “parey en voler dan lannwit.” (1 Tesalonisyen 5:2) Zezi ti profetize ki bokou dimoun ti pou swazir pour inyor sa levidans ki nou pe viv dan bann dernyen zour. I ti dir: “Parski ler Garson zonm pou la [oubyen pandan bann dernyen zour], i pou parey dan letan Noe. Parski parey dan letan avan Deliz, dimoun ti pe manze e bwar, bann zonm ti pe marye e bann madanm ti pe ganny donnen an maryaz, ziska zour ki Noe ti antre dan lars e zot pa ti pran kont nanryen ziska ki Deliz ti vini e balye zot tou. I pou parey ler Garson zonm pou la.”​—Matye 24:37-39.

18. Ki lavertisman Zezi ti donnen?

18 Zezi ti demann nou pour fer atansyon ki nou pa les nou ganny distrer “akoz manze e bwar tro bokou [e] akoz traka lavi.” I ti dir ki lafen ti pou vin en sel kou, “parey en pyez” e ki sa ti “pou ariv lo tou zabitan later.” I ti kontinyen par dir: “Alor, reste eveye, toultan sipliy Bondye [dan lapriyer] pour ki zot a kapab sap tou sa bann keksoz ki devret arive e debout devan Garson zonm.” (Lik 21:34-36) Akoz i sitan enportan pour ekout lavertisman Zezi? Parski tre byento, sa move lemonn Satan pou ganny detrir. Zis bann ki annan laprouvasyon Zeova ek Zezi ki pa pou ganny detrir ler lafen i arive e ki pou viv pour touzour dan nouvo lemonn.​—Zan 3:16; 2 Pyer 3:13.

^ par. 4 Mikael i en lot non pour Zezi Kri. Vwar Lezot lenformasyon nimero 23.