Skip to content

Al lo konteni

 ZISTWAR 87

Zezi ti al dan tanp

Zezi ti al dan tanp

GET sa zenn garson pe koz avek sa bann msye. Zot bann ansennyan dan tanp Bondye an Zerizalenm. E sa garson se Zezi. I’n grandi en pe. Aprezan i annan 12 an.

Sa bann ansennyan ti vreman etonnen akoz Zezi ti konn en kantite lo Bondye ek bann keksoz ki’n ganny ekri dan Labib. Me akoz ki Zozef ek Mari pa la zot osi? Oli zot? Annou vwar.

Tou-le-zan Zozef ti anmenn son fanmiy Zerizalenm pour en lafet spesyal ki ti apel Lapak. Zot ti bezwen fer en gran vwayaz depi Nazaret ziska Zerizalenm. Ti napa personn ki ti annan loto, e ti napa ni tren. Dan sa letan zot ti napa sa bann keksoz. Laplipar dimoun ti marse, e ti pran zot apepre 3 zour pour ariv Zerizalenm.

Sa letan Zozef ti annan en gran fanmiy. E zot ti bezwen pran swen avek bann pti frer ek pti ser Zezi. Byen, sa lannen Zozef ek Mari ti’n kit Zerizalenm pour retourn kot zot an Nazaret avek zot bann zanfan. Zot ti krwar ki Zezi ti ansanm avek lezot. Me alafen lazournen kan zot ti arete, zot pa ti trouv Zezi. Zot ti rod li parmi bann fanmiy ek zanmi, me i pa ti avek zot! Alor zot ti retourn Zerizalenm pour rod li.

Finalman, zot ti trouv li la avek bann ansennyan. I ti pe ekout zot e i ti pe demann zot kestyon. E tou dimoun ti etonnen pour vwar ki Zezi ti vreman malen. Me Mari ti dir: ‘Zezi akoz ou’n fer sa avek nou? Mwan ek ou Papa nou’n enkyet, e nou pe rod ou.’

‘Akoz zot bezwen rod mwan?’ Zezi ti reponn. ‘Eski pa zot konnen ki mon bezwen dan lakaz mon Papa?’

Wi, Zezi ti kontan pour dan en landrwa kot i ti kapab aprann lo Bondye. Eski pa nou osi nou devret santi parey? Kot i ti pe reste an Nazaret, Zezi ti kapab al bann renyon tou le semenn. Lefe ki i ti toultan ekout byen, i ti kapab aprann en kantite keksoz dan Labib. Annou vin parey Zezi e swiv son legzanp.