Skip to content

Al lo konteni

 ZISTWAR 64

Salomon ti konstri tanp

Salomon ti konstri tanp

AVAN ki David ti mor, i ti donn Salomon bann plan pour konstri tanp Zeova. Salomon ti konstri tanp dan katriyenm lannen ki i ti pe dirize, e konstriksyon ti dire pour set an edmi. En dizenn milye zonm ti travay lo tanp, e sa konstriksyon ti kout en kantite larzan. Sa se akoz ti annan en kantite lor ek larzan ki ti ganny servi.

Sa tanp ti annan de lasanm prensipal, zis parey tabernak ti annan. Me sa de lasanm ti de fwa pli gran ki sa bann ki ti dan tabernak. Salomon ti met lars lalyans dan sa enn lasanm ki ti dan fon, e lezot keksoz ki ti ganny garde dan tabernak ti ganny met dan sa lot lasanm.

Kan tanp ti fini ganny konstri, ti annan en gran lafet. Salomon ti azenou devan tanp e i ti priye, parey ou kapab vwar dan sa portre. ‘Ni menm lesyel pa ase gran pour tenir ou,’ Salomon ti dir avek Zeova, ‘aprezan, konbyen mwens, sa tanp i kapab tenir ou. Me, silvouple O mon Bondye ekout ou pep kan zot priy dan sa landrwa.’

Kan Salomon ti fini priye, dife ti desann sorti dan lesyel. I ti bril sa sakrifis zannimo ki ti’n ganny ofer. E en lalimyer briye sorti kot Zeova ti ranpli tanp. Sa ti montre ki Zeova ti pe ekoute, e ki i ti kontan sa tanp ek lapriyer Salomon. Aprezan plito ki zot ti ador Zeova dan tabernak bann dimoun ti ador li dan tanp.

Pour en bon pe letan Salomon ti diriz byen, e bann dimoun ti ere. Me Salomon ti marye avek en kantite madanm ki ti sorti dan lezot pei. Sa bann madanm pa ti ador Zeova. Eski ou kapab vwar enn sa bann madanm pe ador en zidol? Finalman, bann madanm Salomon ti nobou antrenn li pour ador lezot bondye. Eski ou konnen ki ti arive kan Salomon ti fer sa? I ti nepli tret bann dimoun byen. I ti vin kriyel, e bann dimoun ti nepli ere.

Zeova ti vreman ankoler avek Salomon, e i ti dir li: ‘Mon pou aras ou rwayonm e mon pou donn en lot zonm. Mon pa pou fer sa dan ou letan, me dan letan ki ou garson pou dirize. Me mon pa pou aras li tou dimoun dan sa rwayonm.’ Annou vwar konman ki sa ti arive.

1 Kronik 28:9-21; 29:1-9; 1 Lerwa 5:1-18; 2 Kronik 6:12-42; 7:1-5; 1 Lerwa 11:9-13.