Skip to content

Al lo konteni

 ZISTWAR 17

De zimo byen diferan

De zimo byen diferan

SA DE garson ki ou vwar dan sa portre zot tre diferan, pa i vre? Eski ou konn zot non? Sa enn ki en saser i apel Ezai, e sa enn ki pe pran swen avek bann mouton i apel Zakob.

Ezai ek Zakob ti de garson zimo Izaak ek Rebeka. Izaak ti kontan Ezai en kantite, akoz i ti en bon saser e i ti anmenn manze kot lakour pour son fanmiy. Me Rebeka ti kontan Zakob plis, akoz i ti en garson trankil e pezib.

Zot granpapa Abraam ti ankor vivan, e zis mazinen konman ki Zakob ti kontan ekout li koz lo Zeova. Finalman, Abraam ti mor alaz 175 an kan sa de zimo ti annan 15 an.

Kan Ezai ti annan 40 an i ti marye avek de madanm an Kanaan. Sa ti fer Izaak ek Rebeka vreman tris, akoz sa de madanm pa ti ador Zeova.

En zour, en keksoz ti arive ki ti fer Ezai tre ankoler avek son frer Zakob. Ti’n ariv ler pour Izaak beni son premye garson. Lefe ki Ezai ti pli vye ki Zakob, se li ki devret resevwar sa benediksyon. Me pli boner i ti’n vann son drwa pour resevwar sa benediksyon avek Zakob. Deplis, kan sa de garson ti ne Bondye ti dir ki Zakob pou resevwar sa benediksyon. E se sa ki ti arive, Izaak ti beni son garson Zakob.

Plitar, kan Ezai ti aprann sa i ti ankoler avek Zakob. I ti sitan ankoler ki i ti dir ki i pou touy Zakob. Kan Rebeka ti antann sa, i ti tre enkyet. Alor i ti dir avek son msye Izaak: ‘I pou vreman terib si Zakob osi i marye avek enn sa bann fiy an Kanaan.’

Alor Izaak ti apel son garson e dir li: ‘Pa marye avek en fiy an Kanaan. Plito al kot ou granpapa Betouel an Arann. Marye avek enn bann fiy son garson Labann.’

Zakob ti ekout son papa, e toudswit i ti konmans fer sa gran vwayaz pour al kot son bann fanmiy ki reste an Arann.

Zenez 25:5-11, 20-34; 26:34, 35; 27:1-46; 28:1-5; Ebre 12:16, 17.