Skip to content

Al lo konteni

 ZISTWAR 15

Madanm Lot ti get deryer

Madanm Lot ti get deryer

LOT ek son fanmiy ti viv ansanm avek Abraam an Kanaan. En zour Abraam ti dir avek Lot: ‘Napa ase later isi pour tou nou bann zannimo. Silvouple, annou separe. Si ou al en direksyon, alor mon pou al lot direksyon.’

Lot ti get sa pei. I ti vwar en zoli landrwa ki ti annan delo ek en kantite zerb ki ti bon pour son bann zannimo. Sa ti Distrik Zourden. Alor Lot ti al reste laba avek son fanmiy ek son bann zannimo. Zot ti finalman reste dan lavil Sodonm.

Bann dimoun an Sodonm ti tre move. Sa ti trakas Lot, akoz i ti en bon dimoun. Bondye osi ti dezapwente. Finalman, Bondye ti anvoy de lanz pour enform Lot ki i ti pe al detri Sodonm ek sa lavil ki ti obor li, Gomor, akoz zot ti move.

Bann lanz ti dir Lot: ‘Degaze! Pran ou madanm ek ou de fiy e sorti dan sa landrwa!’ Lot ek son fanmiy ti en pe tarde pour sorti, alor bann lanz ti atrap zot lanmen e diriz zot an deor sa lavil. Apre, enn ant sa de lanz ti dir: ‘Taye e sov zot lavi! Pa get deryer. Taye ziska kot montanny, afen ki zot pa ganny touye.’

Lot ek son de fiy ti obeir e zot ti tay lwen avek Sodonm. Zot pa ti arete pour en moman, ni menm get deryer. Me madanm Lot ti dezobei. Apre ki zot ti’n ariv en serten distans avek Sodonm, i ti arete e get deryer. Alor madanm Lot ti vin en pilye disel. Eski ou vwar li dan sa portre?

Nou kapab aprann en bon leson dan sa zistwar. I montre nou ki Bondye i sov bann ki obeir li, me bann ki pa obeir li pou perdi zot lavi.

Zenez 13:5-13; 18:20-33; 19:1-29; Lik 17:28-32; 2 Pyer 2:6-8.