Skip to content

Al lo konteni

 ZISTWAR 13

Abraam, zanmi Bondye

Abraam, zanmi Bondye

ENN bann landrwa kot bann dimoun ti al viv apre deliz ti apel Our. Our ti vin en lavil enportan kot ti annan bann zoli lakaz. Me bann dimoun laba ti ador bann fo bondye. Zot ti fer menm keksoz ki zot ti fer an Babel. Bann dimoun ki ti reste Our ek Babel pa ti parey Noe ek son Garson Sem, ki ti kontinyen servi Zeova.

Finalman, 350 an apre deliz, Noe sa zonm fidel ti mor. Zis de an plitar, sa zonm ki ou vwar dan sa portre ti ne. I ti en dimoun vreman spesyal pour Bondye. I ti apel Abraam. I ti viv avek son fanmiy dan sa lavil Our.

En zour Zeova ti dir Abraam: ‘Kit Our ek ou fanmiy, e al dan en pei ki mon pou montre ou.’ Eski Abraam ti obeir Bondye e kit deryer tou sa bann bon keksoz Our? Wi, i ti fer li. Se akoz Abraam ti toultan obeir Bondye ki i ti ganny rekonnet konman zanmi Bondye.

Serten son bann fanmiy ti al avek li kan i ti kit Our. Parmi bann ki ti ale ti son papa Tera, son neve Lot, ek son madanm Sara. Apre en gran vwayaz zot ti ariv dan en lavil ki ti apel Arann. Tera ti mor an Arann. Zot ti lwen avek Our.

Apre en serten letan Abraam ek son fanmiy ti kit Arann e al dan en pei ki ti apel Kanaan. La Zeova ti dir: ‘Sa i sa pei ki mon pou donn ou bann zanfan.’ Abraam ti reste an Kanaan e viv dan latant.

Avek led Bondye Abraam ti annan bann gran troupo mouton ek lezot zannimo ek en kantite serviter. Me li ek Sara ti napa okenn zanfan pour zot menm.

Kan Abraam ti ganny 99 an, Zeova ti dir: ‘Mon promet ki ou pou vin papa bokou nasyon.’ Me konman ki sa ti pou kapab arive, lefe ki Abraam ek Sara ti’n tro vye pour annan zanfan?

Zenez 11:27-32; 12:1-7; 17:1-8, 15-17; 18:9-19.